حکومت ہند کی نئی و قابل تجدید توانائی کی وزارت (ایم این آر ای) نے آج یہاں چھوٹے پن بجلی منصوبوں (ایس ایچ پی) کی ترقیاتی اسکیم پر ایک نیشنل ورکشاپ کا انعقاد کیا۔ اس ورکشاپ میں ریاستی حکومتوں، ریاستی نوڈل ایجنسیوں، سرکاری شعبے کے اداروں، منصوبہ سازوں، تکنیکی اداروں، صنعتی انجمنوں اور چھوٹے پن بجلی شعبے سے وابستہ دیگر شراکت داروں کے نمائندوں نے شرکت کی۔

اپنے استقبالیہ خطاب میں جوائنٹ سیکریٹری جناب راجیش کلہاری نے نئے منظور شدہ چھوٹے پن بجلی ترقیاتی منصوبے کی اہمیت کو اجاگر کرتے ہوئے کہا کہ یہ اسکیم ملک میں پن بجلی کی وسیع غیر استعمال شدہ صلاحیت کو بروئے کار لانے میں اہم کردار ادا کرے گی۔ انہوں نے زور دیا کہ چھوٹے پن بجلی منصوبے بھارت کے قابل تجدید توانائی پورٹ فولیو کا ایک اہم حصہ ہیں اور یہ توانائی تک رسائی، مقامی اقتصادی ترقی، گرڈ کے استحکام اور پائیدار ترقی میں نمایاں کردار ادا کر سکتے ہیں، خصوصاً پہاڑی، دور دراز اور سرحدی علاقوں میں۔ انہوں نے منصوبے کے بروقت نفاذ کو یقینی بنانے کے لیے ریاستوں اور تمام شراکت داروں کی فعال شرکت کی ضرورت پر بھی زور دیا۔

اجلاس سے خطاب کرتے ہوئے سولر انرجی کارپوریشن آف انڈیا لمیٹڈ (ایس ای سی آئی) کے منیجنگ ڈائریکٹر جناب آکاش ترپاٹھی نے بھارت کی صاف توانائی کی منتقلی اور قابل تجدید توانائی کے تنوع کو مضبوط بنانے میں چھوٹے پن بجلی منصوبوں کے کردار کو اجاگر کیا۔ انہوں نے اسکیم کے مؤثر نفاذ کے لیے عملدرآمد کرنے والی ایجنسیوں، منصوبہ سازوں اور ریاستی حکومتوں کے درمیان مؤثر رابطہ کاری کی اہمیت پر زور دیا اور بطور قومی پروگرام عملدرآمد ایجنسی (این پی آئی اے) ایس ای سی آئی کی جانب سے اہل منصوبوں کے مؤثر نفاذ اور سہولت کاری کے عزم کا اظہار کیا۔

ورکشاپ کی ایک اہم جھلک چھوٹے پن بجلی ترقیاتی اسکیم کے رہنما خطوط (مالی سال 2026-27 تا 2030-31) کا باضابطہ اجرا تھا، جسے نئی و قابل تجدید توانائی کی وزارت کے سیکریٹری جناب سنتوش کمار سارنگی نے اسٹیج پر موجود معزز شخصیات کے ساتھ مل کر جاری کیا۔ اس اجرا کو ملک میں چھوٹے پن بجلی شعبے کی بحالی اور توسیع کی جانب ایک اہم سنگ میل قرار دیا جا رہا ہے۔

نئی جاری کردہ اسکیم کا مقصد تقریباً 1,500 میگاواٹ نئی چھوٹی پن بجلی صلاحیت کی تنصیب کی حمایت کرنا ہے۔ 2,584.60 کروڑ روپے کے مجموعی مالیاتی بجٹ کے ساتھ، اس اسکیم کے تحت چھوٹے پن بجلی منصوبوں کے لیے مرکزی مالی امداد (سی ایف اے)، تفصیلی منصوبہ جاتی رپورٹ (ڈی پی آر) کی تیاری، تکنیکی اداروں کی معاونت، استعداد سازی، آگاہی پیدا کرنے، بین الاقوامی تعاون اور منصوبوں کی نگرانی سے متعلق سرگرمیوں کے لیے بھی تعاون فراہم کیا جائے گا۔

کلیدی خطاب کرتے ہوئے نئی و قابل تجدید توانائی کی وزارت کے سیکریٹری جناب سنتوش کمار سارنگی نے کہا کہ بھارت کی صاف توانائی کی منتقلی کے لیے قابل تجدید توانائی کے ذرائع میں تنوع اور علاقائی ضروریات کے مطابق حل پر زیادہ توجہ دینا ضروری ہے۔ انہوں نے زور دے کر کہا کہ چھوٹے پن بجلی منصوبے ایک پختہ، قابل اعتماد اور ماحول دوست قابلِ تجدید توانائی ٹیکنالوجی ہیں، جو توانائی کے تحفظ کو مضبوط بنانے، دیہی ترقی کی حمایت اور متوازن علاقائی ترقی کو فروغ دینے میں اہم کردار ادا کر سکتے ہیں۔ انہوں نے کہا کہ ملک میں تقریباً 21 گیگاواٹ چھوٹے پن بجلی امکانات کا تخمینہ ہونے کے باوجود اب تک اس کا صرف ایک محدود حصہ ہی استعمال کیا گیا ہے، جو مستقبل کی ترقی کے لیے ایک بڑی فرصت فراہم کرتا ہے۔

سیکریٹری نے مزید زور دیا کہ مرکزی اور ریاستی حکومتوں، منصوبہ سازوں، مالیاتی اداروں، تکنیکی تنظیموں اور مقامی برادریوں کے درمیان قریبی تعاون نہایت اہم ہے۔ انہوں نے ریاستوں کو ترغیب دی کہ وہ فعال انداز میں موزوں منصوبہ جاتی مقامات کی نشاندہی کریں، قانونی منظوریوں کے حصول میں سہولت فراہم کریں اور منصوبوں کے تیز رفتار نفاذ کے لیے سازگار ماحول پیدا کریں۔ انہوں نے یہ بھی بتایا کہ قومی آن لائن ایس ایچ پی پورٹل جلد ہی شروع کیا جائے گا۔

تکنیکی اجلاس کے دوران ایس ای سی آئی کے حکام نے چھوٹے پن بجلی ترقیاتی اسکیم کے رہنما خطوط کی اہم خصوصیات پر تفصیلی پریزنٹیشن پیش کی، جس میں اہلیت کے معیار، مرکزی مالی امداد کے ڈھانچے، منصوبوں کی مدت، نفاذ کے طریقۂ کار اور ادارہ جاتی انتظامات کا احاطہ کیا گیا۔ شرکاء کو ان مختلف اقدامات سے بھی آگاہ کیا گیا جن کا مقصد منصوبوں کی ترقی کو فروغ دینا، ٹیرف میں کمی لانا اور خصوصاً پہاڑی اور شمال مشرقی علاقوں میں منصوبوں کی مالیاتی پائیداری کو بہتر بنانا ہے۔

اس کے بعد نیشنل انفارمیٹکس سینٹر (این آئی سی) اور وزارتِ نئی و قابلِ تجدید توانائی کے حکام نے آن لائن ایس ایچ پی پورٹل کا عملی مظاہرہ پیش کیا، جو اسکیم کے نفاذ کے لیے ایک ڈیجیٹل پلیٹ فارم کے طور پر کام کرے گا۔ اس پریزنٹیشن میں پورٹل کے ڈھانچے، رجسٹریشن کے طریقہ کار، درخواست کے مراحل، دستاویزات جمع کرانے کے عمل، منصوبوں کی نگرانی کے نظام، فنڈ جاری کرنے کے ماڈیول اور شکایات کے ازالے کی سہولیات کا احاطہ کیا گیا۔ شراکت داروں کو بتایا گیا کہ اسکیم کے تحت تمام سرگرمیاں اسی آن لائن پورٹل کے ذریعے انجام دی جائیں گی تاکہ شفافیت، کارکردگی اور حقیقی وقت میں نگرانی کو یقینی بنایا جا سکے۔

ورکشاپ میں ایک تفصیلی تبادلۂ خیال کا سیشن بھی منعقد کیا گیا، جس کے دوران ریاستوں کے نمائندوں، منصوبہ سازوں، صنعتی انجمنوں اور دیگر شراکت داروں نے منصوبوں کی الاٹمنٹ، منظوریوں، ڈی پی آر کی تیاری، مالی امداد، نفاذ کی مدت اور پورٹل کی سہولیات سے متعلق سوالات اٹھائے اور تجاویز پیش کیں۔ ان مباحثوں سے اسکیم کے مؤثر نفاذ کے لیے قیمتی آراء حاصل ہوئیں۔

اپنے اختتامی کلمات میں جناب راجیش کلہاری نے تمام شرکاء کا فعال شرکت اور تعمیری تجاویز پر شکریہ ادا کیا۔ انہوں نے ملک میں چھوٹے پن بجلی منصوبوں کی ترقی کو تیز کرنے اور اسکیم کے کامیاب نفاذ کو یقینی بنانے کے لیے وزارت نئی و قابل تجدید توانائی کے ریاستوں اور دیگر شراکت داروں کے ساتھ قریبی تعاون کے عزم کا اعادہ کیا۔

ورکشاپ کا اختتام اس مشترکہ عزم کے ساتھ ہوا کہ تمام شراکت دار نئی اسکیم کے تحت فراہم کردہ مواقع سے بھرپور فائدہ اٹھائیں گے اور بھارت کی وسیع تر قابل تجدید توانائی منتقلی کے حصے کے طور پر چھوٹے پن بجلی شعبے کی پائیدار ترقی میں اپنا کردار ادا کریں گے۔

******

ش ح۔ ف ش ع

U: 8175