• ଯୋଗ ମାନବତାକୁ ଭାରତର କାଳଜୟୀ ଉପହାର! ମନ, ଶରୀର ଓ ଆତ୍ମାକୁ ଏକତ୍ରିତ କରି ଏହା ଏକ ସୁସ୍ଥ ଓ ସଦ୍ଭାବପୂର୍ଣ୍ଣ ବିଶ୍ବ ଗଠନକୁ ଅନୁପ୍ରାଣିତ କରେ : ପ୍ରଧାନମନ୍ତ୍ରୀ
• ଅହମ୍ମଦାବାଦ ଏକ ୟୁନେସ୍କୋ ବିଶ୍ୱ ଐତିହ୍ୟ ସହର ଏବଂ ଏହି ଐତିହାସିକ ଭାରତୀୟ ସହରରେ ଏପରି କାର୍ଯ୍ୟକ୍ରମ ଆୟୋଜନ କରିବା ସମଗ୍ର ଦେଶ ପାଇଁ ଗର୍ବର ବିଷୟ: ପ୍ରଧାନମନ୍ତ୍ରୀ
• ବିଶ୍ୱ ଯୋଗ ଦିବସ ପୂର୍ବରୁ ଆୟୋଜିତ ବିଶ୍ୱ ଯୋଗାସନ ଚାମ୍ପିଅନସିପ୍, ସ୍ୱାସ୍ଥ୍ୟ ଏବଂ ସୁସ୍ଥତାର ଦ୍ୱିଗୁଣ ଉପହାର ଆଣିଛି: ପ୍ରଧାନମନ୍ତ୍ରୀ
• ଏହି ଚାମ୍ପିଅନସିପ୍ ମାଧ୍ୟମରେ, ଯୋଗାସନ ଏକ ପ୍ରତିଯୋଗିତାମୂଳକ କ୍ରୀଡ଼ା ଭାବରେ ଏକ ନୂତନ ପରିଚୟ ହାସଲ କରିବ, ଏବଂ ମୁଁ ନିଶ୍ଚିତ ଯେ ଭବିଷ୍ୟତରେ, ଏହାକୁ ଅଲିମ୍ପିକ୍ସ ଏବଂ ଅନ୍ୟାନ୍ୟ ବହୁକ୍ରୀଡା ବିଶିଷ୍ଟ ପ୍ରତିଯୋଗିତାରେ ମଧ୍ୟ ଅନ୍ତର୍ଭୁକ୍ତ କରାଯିବ: ପ୍ରଧାନମନ୍ତ୍ରୀ

ବିଶ୍ବ କ୍ରୀଡ଼ାରେ ଏକ ଐତିହାସିକ ମାଇଲଖୁଣ୍ଟ ସ୍ବରୂପ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଏକ ଭିଡିଓ ବାର୍ତ୍ତାମାଧ୍ୟମରେ ପ୍ରଥମ ବିଶ୍ବ ଯୋଗାସନ ଚାମ୍ପିଅନସିପ୍‌ର ଉଦ୍‌ଘାଟନ କରିଛନ୍ତି। ଏହି ଅବସରରେ ସେ କହିଥିଲେ, “ ଆଜି ଅହମଦାବାଦ ଭୂମିରୁ ବିଶ୍ବ କ୍ରୀଡ଼ା ପରମ୍ପରାରେ ଏକ ନୂଆ ଅଧ୍ୟାୟ ଯୋଡ଼ାଯାଇଛି’’।

ଏହି ସମ୍ମାନଜନକ ପ୍ରତିଯୋଗିତା ଲାଗି ବିଶ୍ୱର ବିଭିନ୍ନ ସ୍ଥାନରୁ ଆସିଥିବା ଅଂଶଗ୍ରହଣକାରୀଙ୍କୁ ସ୍ୱାଗତ କରି ପ୍ରଧାନମନ୍ତ୍ରୀ ଅହମ୍ମଦାବାଦ ଏହାକୁ ଆୟୋଜନ କରୁଥିବାରୁ ଆନନ୍ଦ ପ୍ରକାଶ କରିଥିଲେ। ଶ୍ରୀ ମୋଦୀ କହିଥିଲେ, "ଅହମ୍ମଦାବାଦ ଏକ ୟୁନେସ୍କୋ ବିଶ୍ୱ ଐତିହ୍ୟ ସହର ଏବଂ ଏହି ଐତିହାସିକ ଭାରତୀୟ ସହରରେ ଏହି କାର୍ଯ୍ୟକ୍ରମ ଆୟୋଜନ କରିବା ସମଗ୍ର ଦେଶ ପାଇଁ ଗର୍ବର ବିଷୟ।"

ବିଶ୍ୱ ସ୍ତରରେ ଆୟୋଜିତ ହେଉଥିବା ଯୋଗ ଉତ୍ସବଗୁଡ଼ିକର ମହାମିଳନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଜୁନ୍ ୨୧ ରେ ଅନ୍ତର୍ଜାତୀୟ ଯୋଗ ଦିବସ ବିଭିନ୍ନ ଦେଶରେ ଅନେକ କାର୍ଯ୍ୟକ୍ରମ ସହିତ ପାଳନ କରାଯିବ ଏବଂ ଏହାର ମୁଖ୍ୟ କାର୍ଯ୍ୟକ୍ରମ ଭାରତର ଅନ୍ୟ ଏକ ଐତିହାସିକ ସହର କୋଲକାତାରେ ଆୟୋଜିତ ହେବ। ଶ୍ରୀ ମୋଦୀ କହିଥିଲେ, “ବିଶ୍ୱ ଯୋଗ ଦିବସ ପୂର୍ବରୁ ଆୟୋଜିତ ଏହି ବିଶ୍ୱ ଯୋଗାସନ ଚାମ୍ପିଅନସିପ୍ ନିଜ ସହିତ ସ୍ୱାସ୍ଥ୍ୟ ଏବଂ କଲ୍ୟାଣର ଦୁଇଗୁଣ ଉପହାର ନେଇ ଆସିଛି।”

ଯୋଗ ପାଇଁ ବିଶ୍ୱସ୍ତରୀୟ ସ୍ୱୀକୃତି ହାସଲ କରିବା ପାଇଁ ଭାରତର ଯାତ୍ରାକୁ ମନେ ପକାଇ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ପ୍ରାୟ ଏକ ଦଶନ୍ଧି ପୂର୍ବରୁ ଭାରତ ମିଳିତ ଜାତିସଂଘକୁ ଏକ ଅନ୍ତର୍ଜାତୀୟ ଯୋଗ ଦିବସ ଘୋଷଣା ପ୍ରସ୍ତାବ ଦେଇଥିଲା। ଏହାର ଲକ୍ଷ୍ୟ ଥିଲା ଭାରତର ପ୍ରାଚୀନ ପରମ୍ପରାକୁ ସମଗ୍ର ମାନବଜାତିର ସ୍ୱାସ୍ଥ୍ୟ ଏବଂ ସାମୂହିକ କଲ୍ୟାଣ ସହିତ ଯୋଡ଼ିବା। ଶ୍ରୀ ମୋଦୀ କହିଥିଲେ, "ସଂଯୁକ୍ତ ରାଷ୍ଟ୍ରରେ ୧୯୦ଟି ଦେଶ ଭାରତର ଏହି ପ୍ରସ୍ତାବକୁ ସମର୍ଥନ କରିଥିଲେ।"

ସାରା ବିଶ୍ବରେ ଯୋଗର ବଢ଼ୁଥିବା ଗ୍ରହଣୀୟତା ଉପରେ ସନ୍ତୋଷ ବ୍ୟକ୍ତ କରି ପ୍ରଧାନମନ୍ତ୍ରୀ କହିଥିଲେ ଯେ କୋଟି କୋଟି ଲୋକ ନିଜର ଦୈନନ୍ଦିନ ଜୀବନଚର୍ଯ୍ୟା ଏବଂ ଜୀବନଶୈଳୀରେ ଯୋଗ, ଧ୍ୟାନ ଓ ପ୍ରାଣାୟାମକୁ ସାମିଲ କରିଛନ୍ତି। ଜୀବନ୍ତ ପରମ୍ପରାଗୁଡ଼ିକର କ୍ରମବିକାଶଶୀଳ ପ୍ରକୃତି ବିଷୟରେ ଉଲ୍ଲେଖ କରି ସେ ବିଶ୍ୱ ଯୋଗାସନ ଚାମ୍ପିଅନସିପ୍‌କୁ ସମସାମୟିକ ପ୍ରାସଙ୍ଗିକତା ସହିତ ଯୋଗର ଏକ ପରିବର୍ତ୍ତନଶୀଳ ନୂତନ ପର୍ଯ୍ୟାୟରେ ପ୍ରବେଶର ପ୍ରତୀକ ଭାବେ ଅଭିହିତ କରିଥିଲେ। ଯୋଗାସନକୁ ଏକ ସ୍ୱୀକୃତିପ୍ରାପ୍ତ ପ୍ରତିଯୋଗିତାମୂଳକ ବିଭାଗ ଭାବରେ ପ୍ରତିଷ୍ଠିତ କରିବାରେ ଏହି ଚାମ୍ପିଅନସିପ୍‌ ବେଶ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିବା ଓ ଆଗାମୀ ଦିନରେ ବିଶ୍ୱର ପ୍ରମୁଖ କ୍ରୀଡ଼ା ମହୋତ୍ସବଗୁଡ଼ିକରେ ଏହା ସାମିଲ ହେବ ବୋଲି ସେ ଆଶା ପ୍ରକାଶ କରିଥିଲେ । ଶ୍ରୀ ମୋଦୀ କହିଥିଲେ, “ଏହି ଚାମ୍ପିଅନସିପ୍ ମାଧ୍ୟମରେ ଯୋଗାସନ ଏକ ପ୍ରତିଯୋଗିତାମୂଳକ କ୍ରୀଡ଼ା ଭାବେ ନୂତନ ପରିଚୟ ପାଇବ, ଏବଂ ମୁଁ ନିଶ୍ଚିତ ଯେ ଭବିଷ୍ୟତରେ ଯୋଗାସନକୁ ଅଲିମ୍ପିକ୍ସ ଏବଂ ଅନ୍ୟାନ୍ୟ ବହୁକ୍ରୀଡ଼ା ବିଶିଷ୍ଟ ପ୍ରତିଯୋଗିତାଗୁଡ଼ିକରେ ସାମିଲ କରାଯିବ।”

ଅହମ୍ମଦାବାଦର ଅଗ୍ରଣୀ ଭୂମିକାକୁ ସ୍ବୀକାର କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ପ୍ରଥମ ବିଶ୍ୱ ଯୋଗାସନ ଚାମ୍ପିଅନସିପ୍ ବିଶ୍ୱ କ୍ରୀଡ଼ା ମୁଖ୍ୟଧାରାରେ ଯୋଗାସନକୁ ସ୍ୱୀକୃତି ପ୍ରଦାନ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଏକ କ୍ରୀଡ଼ା ଭାବରେ ଯୋଗର ଉତ୍ଥାନ ହେବାର ବ୍ୟାପକ ଅର୍ଥନୈତିକ ଏବଂ ବୃତ୍ତିଗତ ପ୍ରଭାବ ଉପରେ ଆଲୋକପାତ କରି ସେ ଉଲ୍ଲେଖ କରିଥିଲେ ଯେ ଏହା ବିଭିନ୍ନ କ୍ଷେତ୍ର ଏବଂ ପେସାରେ ନୂତନ ସୁଯୋଗ ସୃଷ୍ଟି କରିବ। ଶ୍ରୀ ମୋଦୀ କହିଛନ୍ତି, "ଯୋଗାସନର କ୍ରୀଡ଼ା ବିସ୍ତାର ହେବା ସହିତ, ନୂତନ ସମ୍ଭାବନା ଉଭା ହେବ, ଯାହା ଖେଳାଳି, ପ୍ରଶିକ୍ଷକ, କ୍ରୀଡ଼ା ବୈଜ୍ଞାନିକ, ଗବେଷକ ଏବଂ ଇଭେଣ୍ଟ ପରିଚାଳକଙ୍କ ପାଇଁ କ୍ୟାରିଅର ସୁଯୋଗ ସୃଷ୍ଟି କରିବ।"

ଚଳିତ ବର୍ଷର ଅନ୍ତର୍ଜାତୀୟ ଯୋଗ ଦିବସର ବିଷୟବସ୍ତୁ, "ସୁସ୍ଥ ଦୀର୍ଘଜୀବନ ପାଇଁ ଯୋଗ" ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ସମସାମୟିକ ବିଶ୍ୱ ସ୍ୱାସ୍ଥ୍ୟ ଚିନ୍ତା ଏବଂ ଦୀର୍ଘାୟୁ ପାଇଁ ଏକ ଆଧୁନିକ ଜନସଂଖ୍ୟାର ଆକାଂକ୍ଷା ପରିପ୍ରେକ୍ଷୀରେ ଯୋଗର ପ୍ରାସଙ୍ଗିକତା ଉପରେ ଆଲୋକପାତ କରିଥିଲେ। ଶ୍ରୀ ମୋଦୀ ମନ୍ତବ୍ୟ ଦେଇଥିଲେ, "ଯେଉଁମାନେ ଦୀର୍ଘକାଳୀନ ସୁସ୍ଥ ଏବଂ ସକ୍ରିୟ ରହିବାର ଉପାୟ ଖୋଜୁଛନ୍ତି ସେମାନଙ୍କ ପାଇଁ ଯୋଗ ଏକ ଆଦର୍ଶ ପସନ୍ଦ।"

ଯୋଗକୁ ଗୋଟିଏ ପଟେ ଏକ ମୁକ୍ତିଦାୟକ ଆଧ୍ୟାତ୍ମିକ ଅଭ୍ୟାସ ଏବଂ ଅନ୍ୟପଟେ ଏକ ସୁଲଭ ସ୍ୱାସ୍ଥ୍ୟସେବା ସମାଧାନ ଭାବରେ ବର୍ଣ୍ଣନା କରି, ଶ୍ରୀ ମୋଦୀ ଏହାର ସାର୍ବଜନୀନ ସୁଗମତା ସମ୍ପର୍କରେ ଏକ ସାମଗ୍ରିକ ବାର୍ତ୍ତା ପ୍ରଦାନ କରିଥିଲେ। ସାର୍ବଜନୀନ ସ୍ୱାସ୍ଥ୍ୟ ପାଇଁ ଏକ ସ୍ମରଣୀୟ ମନ୍ତ୍ର ପ୍ରଦାନ କରି, ସେ ଯୋଗର ରୋଗ-ନିବାରକ ସମ୍ଭାବନାକୁ ଏକ ସରଳ ବାକ୍ୟରେ ବ୍ୟକ୍ତ କରିଥିଲେ। ଶ୍ରୀ ମୋଦୀ କହିଥିଲେ, "ପ୍ରତିଦିନ ଯୋଗ ଅଭ୍ୟାସ କରନ୍ତୁ, ଯୋଗ ହିଁ ସମସ୍ତ ରୋଗ ଦୂର କରିବ।"

ଯୋଗକୁ ଦୈନନ୍ଦିନ ଜୀବନରେ ସାମିଲ କରିବା ପାଇଁ ଆୟୁଷ ମନ୍ତ୍ରଣାଳୟ ଦ୍ୱାରା ଆରମ୍ଭ କରାଯାଇଥିବା 'ଯୋଗ ୩୬୫' ଅଭିଯାନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ବ୍ୟାପକ ବିଶ୍ୱ ଅଂଶଗ୍ରହଣ ପାଇଁ ଆହ୍ୱାନ କରିଥିଲେ। ସେ ଚାମ୍ପିଅନସିପରେ ଅଂଶଗ୍ରହଣ କରୁଥିବା ସମସ୍ତ ଖେଳାଳିଙ୍କୁ ନିଜ ନିଜ ଦେଶକୁ ଫେରିଯିବା ଏବଂ ଯୋଗର ବିଶ୍ୱ ଦୂତ ହେବା ପାଇଁ ଆହ୍ୱାନ କରିଥିଲେ। ଲୋକମାନଙ୍କୁ ପ୍ରଭାବିତ କରିବାରେ ସେମାନଙ୍କ ପ୍ରଭାବୀ ଭୂମିକା ଉପରେ ପ୍ରଧାନମନ୍ତ୍ରୀ ଗୁରୁତ୍ବଆରୋପ କରିଥିଲେ । ଶ୍ରୀ ମୋଦୀ କହିଥିଲେ, "ଯେତେବେଳେ ଆପଣ ନିଜ ନିଜ ଦେଶକୁ ଫେରିବେ, 'ଯୋଗ ୩୬୫'ର ଦୂତ ଭାବରେ ଯୋଗର ଏହି ବାର୍ତ୍ତାକୁ ଆପଣଙ୍କ ସହିତ ନେଇ ଯାଆନ୍ତୁ ଏବଂ ନିଜ ନିଜର ଅଭିଜ୍ଞତା ଏବଂ ବିଶ୍ୱାସ ମାଧ୍ୟମରେ ସମଗ୍ର ବିଶ୍ୱକୁ ଏହି ବାର୍ତ୍ତା ସହିତ ଯୋଡନ୍ତୁ।"

ପ୍ରତିଯୋଗିତାର ଫଳାଫଳ ନିର୍ବିଶେଷରେ ସମସ୍ତ ଅଂଶଗ୍ରହଣକାରୀଙ୍କୁ ଇତିହାସ ସୃଷ୍ଟିକାରୀ ବୋଲି ବର୍ଣ୍ଣନା କରି, ଶ୍ରୀ ମୋଦୀ ଏହି ଉଦଘାଟନୀ କାର୍ଯ୍ୟକ୍ରମରେ ସେମାନଙ୍କ ଉପସ୍ଥିତିର ବିଶେଷ ଗୁରୁତ୍ୱ ଉପରେ ଉଲ୍ଲେଖ କରିଥିଲେ।

ବିଶ୍ୱସ୍ତରୀୟ ଖେଳାଳିମାନଙ୍କ ପ୍ରେରଣାଦାୟକ ଭୂମିକାକୁ ସ୍ୱୀକାର କରି ସେ କହିଥିଲେ ଯେ ସେମାନଙ୍କର ପ୍ରତିଭା, ସମର୍ପଣ ଏବଂ ଶୃଙ୍ଖଳା ବିଶ୍ୱବ୍ୟାପୀ ଯୁବପିଢ଼ିଙ୍କ ପାଇଁ ପ୍ରେରଣାର ଉତ୍ସ ଭାବରେ କାର୍ଯ୍ୟ କରିବ। ଶ୍ରୀ ମୋଦୀ ମନ୍ତବ୍ୟ ଦେଇଥିଲେ, "ଆପଣଙ୍କ ପ୍ରତିବଦ୍ଧତା ବିଶ୍ୱବ୍ୟାପୀ ଯୁବପିଢ଼ିଙ୍କୁ ଅନୁପ୍ରାଣିତ କରିବ।"

ଆନୁଷ୍ଠାନିକ ଭାବରେ ଏହି ଚାମ୍ପିଅନସିପର ଉଦଘାଟନ କରି ଶ୍ରୀ ମୋଦୀ ଘୋଷଣା କରିଥିଲେ, "ମୁଁ ଏତଦ୍ଦ୍ୱାରା ପ୍ରଥମ ବିଶ୍ୱ ଯୋଗାସନ ଚାମ୍ପିଅନସିପ୍ ୨୦୨୬, ଅହମ୍ମଦାବାଦର ଉଦଘାଟନ ଘୋଷଣା କରୁଛି!"

TKM