U Myntri Sorkar Pdeng ba dei peit ia ka Tnad Development of North Eastern Region (DoNER) uba dei ruh u Vice-Chairman jong ka North Eastern Council (NEC), u Jyotiraditya M. Scindia, mynta ka sngi u la kren shaphang ki sienjam wanrah jingkylla jong ka Tnad bad peit bniah ia ki jingai jingmut jong phra tylli ki High-Level Task Force ha ka Plenary kaba 73 jong ka North Eastern Council kaba la long ha nongbah Shillong hapoh ka jingpyniaid jong u Myntri Sorkar Pdeng ba dei khmih ia ka Tnad kam pohiing bad Myntri ka Tnad iatreilang u Amit Shah.

Haba ai jingkren ha ka Plenary ba la wan iashim bynta da ki Lat, ki Myntri Rangbah bad ki heh ophisar na phra tylli ki Jylla ka thain shatei lammihngi, u Scindia u la ong ba ka Tnad DoNER ka la nang kylla sha ka nongplie lad, bad ka jingpyniasoh na ka bynta ka roi ka par jong ka thain, ba la ialam da ka nongrim jong ka lai tylli ki-C kata kalong Connect, Converge bad Catalyse.

U la pyntip ba ki phra tylli ki High-Level Task Force kiba la sdang hadien ka Plenary ba 72 jong ka NEC ki la aiti ïa ki plan treikam bad ki jingai jingmut kiba kynthup ïa ka jingkyntiew ïa ka jingbei tyngka, ka rep ka riang bad ka kam horticulture, ki kam trei kti, ki jingdon jingem bad jingpynïasoh, ki lad ba iadei bad ka ioh ka kot, ka jinglah kyrshan dalade ha ka kam ri jingri bad kam ri dohkha, kam ialehkai bad kam jngoh kai pyrthei. Ia ki task force, ba la pyniaid da ki Myntri Rangbah bad ba la kyrshan da ki nongmihkhmat na ka Sorkar Pdeng bad ki Jylla, la sdang ban pynkhreh ia ka jingpynkhreh kam kaba bniah na ka bynta ka lawei jong ka roi ka par jong ka thain shatei lammihngi bad ban plie lad ia ka thain ban noh synniang sha ka jingthmu jong ka Viksit Bharat 2047.

U Scindia u la pyntip ba ïa ki jingai jingmut jong ki task force yn sa rah sha u Chairman ka NEC na ka bynta ban bishar bniah bad ban pyntreikam. U la ong ruh ba la buh ia ka jingtyrwa ban thaw ia ka High-Level Steering Committee kaba kynthup ia ki Myntri Rangbah ba dei khmih bad ki Myntri Sorkar Pdeng ban buddien ia ka jingpyntreikam ia ki jingai jingmut.

Haba kren shaphang ki jingjop ba dang shen jong ka Tnad, u Scindia u la ong ba ka jingpynlut hapoh ka Tnad DoNER ka la kiew na ka T.1,000 klur ha u snem 2022–23 sha ka T.4,000 klur ha kine ki ar snem ba la dep, katba ka Tnad ka la ïoh ïa ka jingmang pisa kaba T.6,500 klur na ka bynta une u snem mang tyngka ba mynta. La wanrah katto katne ki jingpynkylla ban pynsuk ia ki jingai jingmynjur ia ki projek, ban kyntiew ia ka jinglong shai bad ban pynthikna ia ka jingioh pisa ha ka por kaba biang.

U Myntri u la ban jur ïa ka jingjop jong ka Rising North East Investment Summit, kaba la khring ïa ka jingïashim bynta na palat 100 ngut ki nongmihkhmat bad kaba la wanrah ïa ki jingkular ban bei tyngka kiba shongdor kumba T. 4.5 lak klur. U la ong ba ki jingbei tyngka kiba shongdor haduh T.40,000 klur ki dei kiba la pynbiang naduh ka jingïalang bah kaba la long ha u bnai Jymmang 2025, kaba pyni ïa ka jingshaniah jong ki nongbei tyngka kaba nang kiew ha kane ka thaiñ.

Ha kaba iadei bad ka jingkynthup lang ia baroh ha ka kam pisa tyngka, u Scindia u la pyntip ba la sdang 131 tylli ki tnad bank kiba thymmai ha kylleng ka thaiñ shatei lammihngi ha kine ki 15 bnai ba ladep, katba 6,500 tylli ki shnong ki bym don ki kam bank mynshwa mynta la pynrung hapoh ka rynsan jong ki bank. U la bynrap ba ka jingpdiang ia ka jingsiew digital ha kane ka thain ka la poi haduh 90 per cent lyngba ka UPI.

U Myntri u la kren ruh shaphang ki jingjop jong ka Ashtalakshmi Darshan Student Exchange Programme bad ka ISRO exposure visits, kiba la ailad ïa ki samla pule na kylleng ka ri bad ka thaiñ Shatei Lammihngi ban ïasam ïa ka kolshor bad ka jingpule katkum ka jingstad saian.

U Scindia u la kren ruh shaphang ki sienjam jong ka Tnad ban kyntiew ïa ki jaka jngohkai pyrthei kiba pawnam ha baroh ki phra tylli ki Jylla jong ka thaiñ Shatei Lammihngi ban pyni ïa ka jingriewspah ka mariang, ka kolshor, ki jingdon jingem jong ka thain bad ka lad ba iadei bad ka kam jngoh kai. U la ban jur ia ki projek ba kongsan kum ka Matabari Tourism Circuit ha Tripura bad ka Sohra Tourism Circuit ha Meghalaya, kiba dang shna ban pynkhlain ia ki jingdon jingem ha ka kam jngohkai pyrthei, ban pynbha ia ki jingdonkam jong ki nongwan jngohkai, ban kyntiew ia ka jingpyniasoh bad ban wanrah ia ki lad kamai jakpoh kiba lah ban iaineh na ka bynta ki nongshong shnong jong ka thain. U la ong ba la khmih lynti ba kine ki sienjam kin khring ïa ka jingwan ki nongjngohkai pyrthei napoh ri bad nabar ri, kin pynmih ia ki lad ioh kam ïoh jam bad kin noh synñiang shibun sha ka ïoh ka kot jong ka thaiñ.

U Myntri u la batai bniah ruh halor ka sienjam One State One Product, ha kaba kawei pa kawei ka Jylla ka thaiñ Shatei Lammihngi ka la ithuh ïa u mar ba kyrpang ne ka kam katkum ka jingkhlain bad ka jinglong tynrai jong ka. Ki mar kiba la ithuh hapoh kane ka sienjam ki kynthup ïa u shynrai Lakadong na Meghalaya, Muga Silk na Assam, Kiwi na Arunachal Pradesh, Queen Pineapple na Tripura bad ka rukom rep organic na Sikkim, bad kiwei kiwei. Kane ka sienjam ka ialeh ban pynkhlain ia ka jingkyntiew ia ki mar, ban kyntiew ia ka jingpyniaid iew bad ka jingsong, ban pynsuk ia ka jingioh ia ki iew, kyntiew ia ka jingshalan mar shabar ri bad kyntiew ia ka ioh ka kot jong ki nongrep, ki nongtrei kti bad ki nongseng kam seng jam. U Scindia u la ong ba da kaba pyndonkam ïa ki bor ba kyrpang jong kawei pa kawei ka jylla, kane ka sienjam kan ïarap ban pynbiang ia ki mar na ka thain shatei lammihngi kiba pawnam ha kylleng ka pyrthei katba ka dang kyntiew ïa ka ioh ka kot kaba kynthup lang ia baroh bad kaba iaineh ha kylleng ka thaiñ.

U Myntri u la ong ba ki sienjam kiba iaibteng ha ka jingkyntiew ia ka jingbei tyngka, ka jingkyntiew ia ki jingdon jingem, ka jingpyniar ia ki kam bank, ka kam jngohkai pyrthei, ka jingpynpoi mar bad ka jingkyntiew ia ki briew kiba la tbit ha ka kam ki buh ia ka nongrim na ka bynta ka thain shatei lammihngi kaba riewspah bad kaba lah ban kyrshan dalade. U la pynpaw ka jingsngew skhem ba kane ka thain kan paw kum ka kor kaba kongsan jong ka India ha ka jingkiew shaphrang bad kan don ka bynta kaba kongsan ban pynurlong ia ka jingthmu jong ka Viksit Bharat 2047.

*****