મહિલા અને બાળ વિકાસ મંત્રાલયે (MWCD) તેના ઈન્ટર્નશીપ પ્રોગ્રામ હેઠળ ઓગસ્ટ-સપ્ટેમ્બર સત્ર માટે અરજીઓ આમંત્રિત કરી છે. આ પ્રોગ્રામ મહિલા વિદ્યાર્થીઓ, વિદ્વાનો, સામાજિક કાર્યકરો અને શિક્ષકો માટે ખુલ્લો છે જેઓ કોઈપણ યુનિવર્સિટી, શૈક્ષણિક અથવા બિન-શૈક્ષણિક સંસ્થા સાથે નોંધાયેલા અથવા સંકળાયેલા હોય.

ભારતના નોન-ટાયર-I શહેરો અને ગ્રામીણ વિસ્તારોની 21-40 વર્ષની વયજૂથની મહિલા ઉમેદવારો અરજી કરવા માટે પાત્ર છે. અરજીઓ ઈન્ટર્નશીપ પ્રોગ્રામ પોર્ટલ: http://wcd.intern.nic.in/ દ્વારા ઓનલાઈન સબમિટ કરવાની રહેશે.

ઈન્ટર્નશીપ પ્રોગ્રામ વિશે

ઈન્ટર્નશીપ પ્રોગ્રામ નાણાકીય વર્ષ દરમિયાન ચાર સત્રોમાં ચલાવવામાં આવે છે: મે-જૂન, ઓગસ્ટ-સપ્ટેમ્બર, નવેમ્બર-ડિસેમ્બર અને ફેબ્રુઆરી-માર્ચ, દરેક બે મહિનાના સમયગાળાના હોય છે. દરેક સત્ર માટે, પ્રત્યેક સત્ર શરૂ થવાના બે મહિના પહેલા, મહિનાની 1લી થી 10મી તારીખ વચ્ચે અરજીઓ સ્વીકારવામાં આવે છે. એકવાર પસંદ થયેલા ઉમેદવારો પછીના સત્રો માટે અરજી કરવા પાત્ર નથી.

આ પ્રોગ્રામ ટૂંકા ગાળાના જોડાણ દ્વારા સહભાગીઓને મંત્રાલયની નીતિઓ અને કાર્યક્રમોથી માહિતગાર કરવાનો હેતુ ધરાવે છે. ઈન્ટર્ન્સ મંત્રાલયની ચાલુ પ્રવૃત્તિઓ પર ધ્યાન કેન્દ્રિત કરતા પાયલોટ પ્રોજેક્ટ્સ અથવા માઇક્રો-સ્ટડીઝ (સૂક્ષ્મ-અભ્યાસ) હાથ ધરી શકે છે.

આ પહેલ દ્વારા, મંત્રાલય યોજનાઓના બહેતર અમલીકરણમાં યોગદાન આપવા અને નીતિગત પ્રક્રિયાઓ સાથે જોડાવાની તકો પૂરી પાડીને યુવા પ્રતિભાઓનો ઉપયોગ કરવાનો લક્ષ્યાંક ધરાવે છે. આ પ્રોગ્રામ સરકારી પહેલો પર સંશોધન અને અર્થપૂર્ણ ક્રિયાપ્રતિક્રિયાની સુવિધા પણ પૂરી પાડે છે, જે ઈન્ટર્ન્સને પ્રયોગમૂલક વિશ્લેષણ, અહેવાલો, નીતિ પત્રો અને સંક્ષિપ્ત વિગતો (બ્રીફ્સ) દ્વારા યોગદાન આપવા સક્ષમ બનાવે છે.

તે દેશમાં સંબંધિત મુદ્દાઓ પર માહિતીના અંતરને દૂર કરવામાં મદદ કરવાની સાથે મહિલાઓ અને બાળકોના કલ્યાણ અને સશક્તિકરણ માટે કામ કરતા મંત્રાલયના અધિકારીઓ, અન્ય સંબંધિત મંત્રાલયો અને મુખ્ય હિતધારકો (સ્ટેકહોલ્ડર્સ) સાથે વાતચીત માટે સાનુકૂળ વાતાવરણ પણ પૂરું પાડે છે.

SM/IJ/JD