ମହାମହିମ ପ୍ରଧାନମନ୍ତ୍ରୀ କ୍ରିଷ୍ଟରସନ୍,

ମାନ୍ୟବର ଉର୍ସୁଲା,

ଉଭୟ ଦେଶର ପ୍ରତିନିଧିଗଣ,

ଗଣମାଧ୍ୟମର ବନ୍ଧୁଗଣ,

ନମସ୍କାର!

ସର୍ବପ୍ରଥମେ, ମୁଁ ପ୍ରଧାନମନ୍ତ୍ରୀ କ୍ରିଷ୍ଟରସନଙ୍କୁ ତାଙ୍କର ସ୍ନେହପୂର୍ଣ୍ଣ ସ୍ୱାଗତ ପାଇଁ ଆନ୍ତରିକ ଭାବରେ ଧନ୍ୟବାଦ ଜଣାଉଛି।

କିଛି ସମୟ ପୂର୍ବରୁ, ମୋତେ ସ୍ୱିଡେନର ସର୍ବୋଚ୍ଚ ସମ୍ମାନ, “ରୋୟାଲ୍ ଅର୍ଡର୍ ଅଫ୍ ଦ ପୋଲାର୍ ଷ୍ଟାର୍” ପ୍ରଦାନ କରାଯାଇଥିଲା। ଏହି ସମ୍ମାନ କେବଳ ମୋର ନୁହେଁ; ଏହା ୧.୪ ବିଲିୟନ ଭାରତୀୟଙ୍କ ପାଇଁ ଏକ ସମ୍ମାନ। ଏହା ସ୍ୱିଡେନରେ ଥିବା ଆମର ସମସ୍ତ ବନ୍ଧୁଙ୍କ ପାଇଁ ମଧ୍ୟ ଏକ ଶ୍ରଦ୍ଧାଞ୍ଜଳି ଯେଉଁମାନେ ଭାରତ - ସ୍ୱିଡେନ୍ ସମ୍ପର୍କକୁ ସମୃଦ୍ଧ କରିଛନ୍ତି ଏବଂ ସେମାନଙ୍କୁ ଏକ ଦୃଢ଼ ମୂଳଦୁଆ ପ୍ରଦାନ କରିଛନ୍ତି।

ଆଜିର କାର୍ଯ୍ୟକ୍ରମରେ ଯୋଗଦେଇଥିବାରୁ ମୁଁ ଉର୍ସୁଲା ଜୀଙ୍କୁ ବିଶେଷ କୃତଜ୍ଞତା ଜଣାଉଛି। ତାଙ୍କ ଉପସ୍ଥିତି ସ୍ୱିଡେନ୍ ଓ ୟୁରୋପର ଶିଳ୍ପ କେନ୍ଦ୍ରସ୍ଥଳୀ ଗୋଥେନବର୍ଗ ଗସ୍ତକୁ  ଅଧିକ ମହତ୍ତ୍ୱପୂର୍ଣ୍ଣ କରିଛି।

ବନ୍ଧୁଗଣ,

ଭାରତ ଓ ସ୍ୱିଡେନ୍ ମଧ୍ୟରେ ସମ୍ପର୍କ ଗଣତାନ୍ତ୍ରିକ ମୂଲ୍ୟବୋଧ, ଆଇନର ଶାସନ ଓ ମାନବ-କୈନ୍ଦ୍ରିକ ବିକାଶର ଦୃଢ଼ ଭିତ୍ତିଭୂମି ଉପରେ ନିର୍ମିତ। ଆମର ଉଭୟ ଦେଶ ନବସୃଜନକୁ ଅଭିବୃଦ୍ଧିର ଏକ ବାହକ ଭାବରେ, ସ୍ଥାୟୀତ୍ୱକୁ ଏକ ସହଭାଗୀ ଦାୟିତ୍ୱ ଭାବରେ ଏବଂ ଗଣତନ୍ତ୍ରକୁ ଆମର ଶକ୍ତି ଭାବରେ ଦେଖନ୍ତି।

ଆଜିର ବୈଠକରେ, ଆମେ ଏହି ସମାନ ମୂଲ୍ୟବୋଧ ଓ ସାଧାରଣ ସ୍ୱାର୍ଥ ଉପରେ ଆଧାର କରି ଆମର ସହଯୋଗକୁ ଆଗକୁ ନେବା ଉପରେ ଆଲୋଚନା କରିଛୁ। ଆମର ସହଭାଗୀତା ସମସ୍ତ କ୍ଷେତ୍ରରେ ବୃଦ୍ଧି ପାଉଥିବାରୁ, ଆମେ ଆମର ସମ୍ପର୍କକୁ ଏକ ରଣନୈତିକ ସହଭାଗୀତା ସ୍ତରକୁ ବୃଦ୍ଧି କରିବାକୁ ନିଷ୍ପତ୍ତି ନେଇଛୁ। ଏହି ସହଭାଗୀତା ଅଧୀନରେ, ଆମେ ସବୁଜ ପରିବର୍ତ୍ତନ, ପ୍ରତିରକ୍ଷା, ଉଦୀୟମାନ ପ୍ରଯୁକ୍ତିବିଦ୍ୟା ଏବଂ ପାରସ୍ପରିକ ଜନ-ସମ୍ପର୍କ ସଂଯୋଗ ଭଳି ପ୍ରମୁଖ କ୍ଷେତ୍ରରେ ଆଗକୁ ବଢ଼ିବୁ।

ବନ୍ଧୁଗଣ,

ଆମ ମଧ୍ୟରେ ଏଆଇ, ସ୍ୱାସ୍ଥ୍ୟ-ପ୍ରଯୁକ୍ତିବିଦ୍ୟା ଏବଂ ସବୁଜ ଗତିଶୀଳତା ଭଳି ଉଚ୍ଚ-ପ୍ରଯୁକ୍ତିବିଦ୍ୟା କ୍ଷେତ୍ରରେ ସହଯୋଗର ବ୍ୟାପକ ସମ୍ଭାବନା ରହିଛି। ସ୍ୱିଡେନର ଏକ ବଡ଼ ବ୍ୟବସାୟିକ ପ୍ରତିନିଧିମଣ୍ଡଳ ଚଳିତ ବର୍ଷ ଭାରତରେ ଅନୁଷ୍ଠିତ ଏଆଇ  ପ୍ରଭାବ ସମ୍ମିଳନୀରେ ଅଂଶଗ୍ରହଣ କରିଥିଲା। ଆମେ "ସ୍ୱିଡେନ-ଭାରତ ପ୍ରଯୁକ୍ତିବିଦ୍ୟା ଏବଂ ଏଆଇ କରିଡର"କୁ ସୁଦୃଢ଼ ​​କରିବା ପାଇଁ କଠିନ ପଦକ୍ଷେପ ଉପରେ କାମ କରିବୁ।

ଉଭୟ ଦେଶର ଷ୍ଟାର୍ଟଅପ୍ ଓ ଗବେଷଣା ଇକୋସିଷ୍ଟମ ବ୍ୟବସ୍ଥା ମଧ୍ୟରେ ସଂଯୋଗକୁ ସୁଦୃଢ଼ ​​କରିବା ପାଇଁ, ଆମେ ଭାରତ - ସ୍ୱିଡେନ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା କେନ୍ଦ୍ର ପ୍ରତିଷ୍ଠା କରିବାକୁ ଯାଉଛୁ।

ଜଳବାୟୁ ପରିବର୍ତ୍ତନ ଏବଂ ସ୍ଥାୟୀତ୍ୱ ଉପରେ ଆମର ଚିନ୍ତାଧାରାରେ ଭାରତ ଏବଂ ସ୍ୱିଡେନ ମଧ୍ୟରେ ମଧ୍ୟ ଏକ ଦୃଢ଼ ସମନ୍ୱୟ ରହିଛି। ଶିଳ୍ପ ପରିବର୍ତ୍ତନ ପାଇଁ ନେତୃତ୍ୱ ଗୋଷ୍ଠୀ, କିମ୍ବା “ଲିଡ୍ଆଇଟି” (LeadIT), ଆମର ମିଳିତ ବିଶ୍ୱସ୍ତରୀୟ ପଦକ୍ଷେପ ଯାହା ଅଧୀନରେ ଆମେ କମ୍-କାର୍ବନ ଶିଳ୍ପ ପରିବର୍ତ୍ତନ ଉପରେ ଧ୍ୟାନ ଦେଉଛୁ। ଆଜି, ଆମେ ଏହାର ତୃତୀୟ ପର୍ଯ୍ୟାୟ ଉପରେ କାମ କରିବାକୁ ନିଷ୍ପତ୍ତି ନେଇଛୁ।

ଭାରତ ସବୁଜ ହାଇଡ୍ରୋଜେନ, ବୃତ୍ତାକାର ଅର୍ଥନୀତି ଏବଂ ସ୍ଥାୟୀ ଭିତ୍ତିଭୂମି ଭଳି କ୍ଷେତ୍ରରେ ବ୍ୟାପକ କାର୍ଯ୍ୟ କରୁଛି। ସ୍ୱିଡେନର ପ୍ରଯୁକ୍ତିବିଦ୍ୟା ଏବଂ ଭାରତର ବିସ୍ତୃତ କ୍ଷମତାକୁ ଏକତ୍ର କରି, ଆମେ ସମଗ୍ର ବିଶ୍ୱକୁ ଲାଭ ପହଞ୍ଚାଉଥିବା ଜଳବାୟୁ ସମାଧାନ ସୃଷ୍ଟି କରିପାରିବା। ଆର୍କଟିକ୍ କ୍ଷେତ୍ରରେ ଭାରତ ଏବଂ ସ୍ୱିଡେନର ସହଯୋଗ ମଧ୍ୟ ଜଳବାୟୁ ପରିବର୍ତ୍ତନର ବିଶ୍ୱ ବୁଝାମଣାକୁ ଉନ୍ନତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।

ବନ୍ଧୁଗଣ,

ପ୍ରତିରକ୍ଷା କ୍ଷେତ୍ରରେ ଆମର ସହଯୋଗ ନିରନ୍ତର ଭାବେ ବୃଦ୍ଧି ପାଉଛି। ସ୍ୱିଡିସ୍ କମ୍ପାନୀଗୁଡ଼ିକ ଦ୍ୱାରା ଭାରତରେ ଉତ୍ପାଦନ କେନ୍ଦ୍ର ସ୍ଥାପନ ଦର୍ଶାଉଛି ଯେ ଆମର ସହଭାଗୀତା କ୍ରେତା-ବିକ୍ରେତା ସମ୍ପର୍କରୁ ଆଗକୁ ବଢ଼ି ଏକ ଦୀର୍ଘକାଳୀନ ଶିଳ୍ପ ସହଯୋଗରେ ପରିଣତ ହେଉଛି।

ବନ୍ଧୁଗଣ,

ଆଜି ଉର୍ସୁଲାଜୀଙ୍କ ଉପସ୍ଥିତି ଏହି ଅବସରକୁ ଆହୁରି ସ୍ୱତନ୍ତ୍ର କରିଛି। ଚଳିତ ବର୍ଷ ଜାନୁଆରୀରେ ତାଙ୍କ ଭାରତ ଗସ୍ତ ସମୟରେ, ଆମେ ଭାରତ-ୟୁରୋପୀୟ ସଂଘ ସମ୍ପର୍କକୁ ଆହୁରି ମଜଭୁତ କରିବା ପାଇଁ ଅନେକ ଐତିହାସିକ ନିଷ୍ପତ୍ତି ନେଇଥିଲୁ। ସେହି ସମସ୍ତ ନିଷ୍ପତ୍ତି ଉପରେ ଭଲ ଅଗ୍ରଗତି ହେଉଥିବା ଦେଖି ମୁଁ ଖୁସି ଅନୁଭବ କରୁଛି।

ଭାରତ-ୟୁରୋପୀୟ ସଂଘ ମୁକ୍ତ ବାଣିଜ୍ୟ ଚୁକ୍ତି ଶିଳ୍ପ, ନିବେଶକ ଓ ନବସୃଜନକାରୀଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ। ଯେପରି ଉର୍ସୁଲାଜୀ କହିଥିଲେ, ଏହା "ସମସ୍ତ ଚୁକ୍ତିର ଜନନୀ"।

ସୁରକ୍ଷା ଏବଂ ପ୍ରତିରକ୍ଷା ସହଭାଗୀତା ଏବଂ ମୋବିଲିଟି ଚୁକ୍ତିନାମା ଆମର ରଣନୈତିକ ଏବଂ ଲୋକ-କୈନ୍ଦ୍ରିକ ସହଭାଗୀତାକୁ ନୂତନ ଶକ୍ତି ପ୍ରଦାନ କରିଛି। ଭାରତ-ୟୁରୋପୀୟ ସଂଘ ବାଣିଜ୍ୟ ଏବଂ ପ୍ରଯୁକ୍ତି ପରିଷଦ ଆମର ସହଯୋଗକୁ ଆହୁରି ଗଭୀର କରିଛି। ଆମେ ଡିଜିଟାଲ୍ ପ୍ରଯୁକ୍ତିବିଦ୍ୟା, ସ୍ୱଚ୍ଛ ଶକ୍ତି, ସେମିକଣ୍ଡକ୍ଟର୍, ସ୍ଥିର ଯୋଗାଣ ଶୃଙ୍ଖଳ ଏବଂ ନବସୃଜନ ଭଳି କ୍ଷେତ୍ରରେ ଏକାଠି କାମ କରୁଛୁ।

ଭାରତ ଓ ୟୁରୋପ ମଧ୍ୟରେ ରାଜନୈତିକ, ଅର୍ଥନୈତିକ ଏବଂ ରଣନୈତିକ ସମନ୍ୱୟ ସାରା ବିଶ୍ୱରେ ଶାନ୍ତି ଏବଂ ସ୍ଥିରତା ପାଇଁ ଗୁରୁତ୍ୱପୂର୍ଣ୍ଣ।

ବନ୍ଧୁଗଣ,

ଆଜିର ଉତ୍ତେଜନାପୂର୍ଣ୍ଣ ବିଶ୍ୱ ପରିବେଶରେ, ଭାରତ ଓ ସ୍ୱିଡେନ ଭଳି ଗଣତାନ୍ତ୍ରିକ ଦେଶମାନଙ୍କ ମଧ୍ୟରେ ଘନିଷ୍ଠ ସହଯୋଗର ବିଶେଷ ଗୁରୁତ୍ୱ ରହିଛି। ଆମେ ସର୍ବଦା ବିଭିନ୍ନ ଉତ୍ତେଜନା ଏବଂ ଚ୍ୟାଲେଞ୍ଜର ସମାଧାନ ପାଇଁ ଆଲୋଚନା ଏବଂ କୂଟନୀତି ଉପରେ ଗୁରୁତ୍ୱ ଦେଇଆସିଛୁ।

ଭାରତ ଓ ସ୍ୱିଡେନ ଏଥିରେ ସହମତ ଯେ, ଆତଙ୍କବାଦ ସମଗ୍ର ମାନବତା ପାଇଁ ଏକ ଗୁରୁତର ଚ୍ୟାଲେଞ୍ଜ। ଗତ ବର୍ଷ ପହଲଗାମରେ ଆତଙ୍କବାଦୀ ଆକ୍ରମଣ ପରେ ସ୍ୱିଡେନରୁ ଆମକୁ ମିଳିଥିବା ସମର୍ଥନ ପାଇଁ ମୁଁ ପ୍ରଧାନମନ୍ତ୍ରୀ କ୍ରିଷ୍ଟରସନଙ୍କ ପ୍ରତି ମୋର କୃତଜ୍ଞତା ପ୍ରକାଶ କରୁଛି। ଆମେ ଆତଙ୍କବାଦ ଏବଂ ଏହାକୁ ସମର୍ଥନ କରୁଥିବା ଲୋକଙ୍କ ବିରୁଦ୍ଧରେ ଆମର ଲଢ଼େଇ ଜାରି ରଖିବୁ।

ମହାମହିମ,

ଆଜିର ଅର୍ଥପୂର୍ଣ୍ଣ ଆଲୋଚନା ପାଇଁ ମୁଁ ପୁଣି ଥରେ ଆପଣଙ୍କୁ ଧନ୍ୟବାଦ ଜଣାଉଛି। ମୁଁ ସମ୍ପୂର୍ଣ୍ଣ ବିଶ୍ୱାସ ଯେ, ଆମର ମିଳିତ ପ୍ରୟାସ ମାଧ୍ୟମରେ, ଭାରତ-ସ୍ୱିଡେନ ଏବଂ ଭାରତ-ୟୁରୋପ ସହଭାଗୀତା ଆଗକୁ ବଢ଼ିବ ଏବଂ ଆମେ ମିଳିତ ଭାବରେ ବିଶ୍ୱ ଶାନ୍ତି, ସୁରକ୍ଷା ଏବଂ ସମୃଦ୍ଧିରେ ଯୋଗଦାନ ଦେଇ ଚାଲିବୁ।

ଆପଣମାନଙ୍କୁ ଅନେକ ଧନ୍ୟବାଦ।

ସ୍ୱୀକାରୋକ୍ତି: ଏହା ପ୍ରଧାନମନ୍ତ୍ରୀଙ୍କ ଅଭିଭାଷଣର ଆନୁମାନିକ ଅନୁବାଦ। ମୂଳ ଅଭିଭାଷଣ ହିନ୍ଦୀରେ ପ୍ରଦାନ କରାଯାଇଥିଲା।

*****

MT