تلنگانہ کے گورنر جناب شیو پرتاپ شکلا نے 28 مئی 2026 کو حیدرآباد میں واقع لوک بھون میں میگھالیہ کے طلباء کے وفد سے ملاقات کی اور ان سے تبادلۂ خیال کیا۔

طلباء کا یہ وفد، جس کی قیادت انڈین انسٹی ٹیوٹ آف مینجمنٹ شیلانگ کر رہا ہے، ایک تعلیمی و ثقافتی تبادلہ پروگرام کے تحت تلنگانہ کا دورہ کر رہا ہے۔ اس پروگرام کا مقصد نوجوانوں کے درمیان قومی یکجہتی کو فروغ دینا اور باہمی ثقافت کے عمل سیکھنے کو مضبوط بنانا ہے۔

اس سے قبل، 25 مئی 2026 کو طلباء کے وفد کا ورنگل میں واقع نیشنل انسٹی ٹیوٹ آف ٹیکنالوجی میں پرتپاک استقبال کیا گیا، جو تلنگانہ کے دورے کے دوران ان کا میزبان ادارہ ہے۔ اس موقع نے ریاست بھر میں ان کے تعلیمی و ثقافتی تبادلے اور عملی سیکھنے کے سفر کا باقاعدہ آغاز کیا۔

ملاقات کے دوران گورنر نے نوجوانوں کے کردار کو قومی یکجہتی کے فروغ، ثقافتی ہم آہنگی کے استحکام اور قومی تعمیر میں شمولیت کے حوالے سے نہایت اہم قرار دیا۔وفد کے ارکان نے یووا سنگم کے اپنے سفر کے تجربات مشترک کیے اور احترام و یادگار کے طور پر گورنر کو ایک مومنٹو پیش کیا۔ یہ ملاقات شرکاء کے لیے بھارت کے تنوع، جمہوری اقدار اور اتحاد کے جذبے کی بہتر افہام و تفہیم کا ذریعہ بنی اور ان کے تعلیمی و ثقافتی تجربے کو مزید بامعنی بنایا۔

طلباء کے وفد نے تلنگانہ میں مختلف اہم ثقافتی، تعلیمی اور اختراعی مراکز کا دورہ کیا، جن میں حسین ساگر جھیل، اسٹیچو آف ایکوالٹی، رامپا مندر، ورنگل قلعہ، بھدرکالی مندر اور ہزار ستونوں کا مندر جیسے تاریخی و ثقافتی مقامات شامل تھے۔ ان دوروں کے ذریعے شرکاء نے ریاست کے بھرپور ثقافتی ورثے، تاریخی عظمت، تعلیمی برتری اور ترقیاتی اقدامات کے بارے میں قیمتی معلومات حاصل کیں۔وفد نے کانہا شانتی وانم اور ٹی-ہب کا بھی دورہ کیا، جہاں انہیں ہمہ جہت فلاح و بہبود کے طریقوں اور بھارت کے تیزی سے ترقی کرتے ہوئے اختراع اور اسٹارٹ اپ نظام سے متعارف کرایا گیا۔

ورنگل میں واقع نیشنل انسٹی ٹیوٹ آف ٹیکنالوجی میں  طلباء نے تحقیقی و اختراعی سہولیات کا مشاہدہ کیا، ماحولیاتی پائیداری کے فروغ کے لیے شجرکاری مہم میں حصہ لیا اور 30 مئی 2026 کو منعقدہ اختتامی تقریب میں شرکت کی۔ اس تقریب کے ساتھ ان کا یووا سنگم کے تحت تعلیمی اور ثقافتی تبادلے کا سفر مکمل ہوا۔طلباء کا وفد 31 مئی 2026 کو میگھالیہ کے لیے روانہ ہو گیا۔

نئی دہلی میں وزارتِ تعلیم کے تحت محکمۂ اعلیٰ تعلیم کی جانب سے شروع کیے گئے یووا سنگم مرحلہ چھ کا مقصد تعلیمی اور ثقافتی تبادلوں کے ذریعے قومی یکجہتی، ثقافتی یگانگت و جذباتی ہم آہنگی کو مضبوط بنانا ہے۔ یہ اقدام 22 جوڑے شدہ ریاستوں اور مرکز کے زیرِ انتظام علاقوں کے شرکاء کو ایک دوسرے کے قریب لاتا ہے، تاکہ وہ بھارت کے متنوع ثقافتی ورثے، اختراعی نظام اور قومی تعمیر سے وابستہ مشترکہ امنگوں کو بہتر طور پر سمجھ سکیں۔

 

***********

ش ح۔ت ف۔ش ت

 (U: 7854)      

(ریلیز آئی ڈی: 2267870) وزیٹر کاؤنٹر : 7