NHRCએ મધ્ય પ્રદેશના સીધી જિલ્લામાં સુવિધાઓના અભાવે એક વર્ષમાં 53 સગર્ભા મહિલાઓના મોતના મામલે સુઓમોટો સંજ્ઞાન લીધું

રાષ્ટ્રીય માનવ અધિકાર આયોગ (NHRC), ભારત એ મધ્ય પ્રદેશના સીધી જિલ્લામાં એપ્રિલ 2025 અને માર્ચ 2026 વચ્ચેના એક વર્ષમાં મુખ્યત્વે જાગૃતિ અને તબીબી સુવિધાઓના અભાવને કારણે ડિલિવરી પહેલા અને પછી 53 સગર્ભા માતાઓના મોતના મીડિયા અહેવાલ પર સુઓમોટો સંજ્ઞાન લીધું છે. અહેવાલ મુજબ, રાજ્યના આરોગ્ય વિભાગ દ્વારા હાથ ધરવામાં આવેલા કોમ્યુનિટી મેટર્નલ હેલ્થ લીગ ગ્રેડિંગમાં સીધી જિલ્લો સતત તળિયાના ત્રણ જિલ્લાઓમાં સ્થાન મેળવી રહ્યો છે.

આયોગે અવલોકન કર્યું છે કે જો મીડિયા અહેવાલની સામગ્રી સાચી હોય, તો તે માનવ અધિકારોના ઉલ્લંઘનનો ગંભીર મુદ્દો ઉભો કરે છે. તેથી, તેણે મધ્ય પ્રદેશ સરકારના મુખ્ય સચિવને નોટિસ પાઠવીને બે અઠવાડિયામાં વિગતવાર અહેવાલ માંગ્યો છે.

29 મે 2026ના રોજ પ્રકાશિત થયેલા મીડિયા અહેવાલ અનુસાર, 53 સગર્ભા મહિલાઓના મોતમાંથી, મૃતકોની સરેરાશ ઉંમર 26 વર્ષ હોવાનું નોંધાયું છે, જેમાં મોટાભાગની મહિલાઓ પ્રથમ કે બીજી વખત માતા બનનારી હતી. સમાચાર અહેવાલમાં સામુદાયિક આરોગ્ય કેન્દ્રો, પ્રાથમિક આરોગ્ય કેન્દ્રો અને જિલ્લા હોસ્પિટલમાં ડોક્ટરો અને તકનીકી નિષ્ણાતો સહિતની પાયાની માળખાકીય સુવિધાઓના અભાવનો પણ ખુલાસો થયો છે, જેના કારણે દર્દીઓને દૂર આવેલા રેવા જિલ્લામાં ઉચ્ચ તબીબી સુવિધાઓ માટે રિફર કરવામાં આવે છે, જે પરિવહન દરમિયાન જીવનને જોખમમાં મૂકે છે. અહેવાલ મુજબ, એક એમ્બ્યુલન્સ ચાલકે ખુલાસો કર્યો હતો કે સીધી જિલ્લાના કેટલાય ગામોમાં યોગ્ય રોડ કનેક્ટિવિટી નથી, જે ચોમાસાની ઋતુમાં બાબતોને વધુ જટિલ બનાવે છે. સગર્ભા સ્ત્રીઓને એમ્બ્યુલન્સ સુધી પહોંચતા પહેલા બે થી ત્રણ કિલોમીટર સુધી ખાટલા (કોટ્સ) પર બેસાડીને લઈ જવી પડે છે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com