ঐহাক্কী নুংশিরবা ইরৈবাকচাশিং, খুরুমজরি। ঐহাক্না অমুক্কা হন্না 'মন কী বাত'কী থৌরম অসিদা ময়ামগা কন্নেক্ত তৌবা ফংজবা অসিদা নুংঙাইবা ফাওই। লৈবাক অসিগী তোঙান তোঙানবা মফমশিংদগী লাকপা মীওইশিংনা লৈবাক অসিগী, খুন্নাই অসিগী কান্ননবগীদমক থোইদোক হেন্দোকপা থবকশিং পাংথোক্লি... অমসুং ঐখোয়না মখোয়গী মরমদা তাবগা, ঐখোয়না অনৌবা ইথিল অমা ফংই। ঙসি, ঐহাক্না এথলেতিক্সতা লৈবাক্কী অসিগুম্বা মায় পাকপা অমগা লোয়ননা প্রোগ্রাম অসি হৌরগনি। নুমিৎ খরনিগী মমাংদা, নেস্নেল সেনিয়র এথলেতিক্স ফেদরেসন কম্পিতিসন ঝারখন্দগী রাঞ্চীদা পাংথোকখি। লৈবাক অসিগী মফম কয়াদগী শান্নরোই ৮০০ রোম্না শরুক য়াখি। মসিগী মনুংদা তোঙান তোঙানবা ইভেন্ত মরিদা নেস্নেল রেকোর্দ মরি থুগাইখি। গুরিন্দর বীর সিংহ, বিশাল তি.কে., তেজস্বিন শঙ্কর, দেব মীনা, অমসুং কুলদীপ কুমার... মরুপশিং অসিনা তোঙান তোঙানবা কাংলুপশিংদা অনৌবা রেকোর্দশিং শেমখি। অহানবদা, ঐনা মখোয় পুম্নমকপু থাগৎচরি।

মরুপশিং, লৈবাক শীনবা থুংনা পাক শন্না নৈনরিবা থৌরম অমদি মিতর ১০০গী রেসনি। নুমিৎ অনিগী মনুংদা, নুপাগী মিতর ১০০গী রেসতা নেস্নেল রেকোর্দ অসি অহুম্লক থুগাইখি। মসিগী মাইপাকপা ঙমখিবা শান্নরোয় অনিদি গুরিন্দর বীর সিংহ অমসুং অনিমেশ কুজুরনি। ঐহাক্না খনখি মদুদি ঐহাক্না হায়রিবা শান্নরোই অনি অসিগা 'মন কী বাত্তা' ৱারী শানগনি।

(ফোনদা ৱারী শাবা)

প্রধান মন্ত্রী: খুরুমজরি অনিমেশজী, গুরিন্দর বীর, অদোমবুসু খুরুমজরি…সতশ্রি অকল।

অনিমেশ, গুরিন্দর বীর: খুরুমজরি সর, খুরুমজরি সর।

প্রধান মন্ত্রী: ফরে ইচিল ইনাও, অদোম্না অচৌবা মাইপাকপা অমা ফংলে। অদোমগী জুরা অসিনা অঙকপা অমা তৌখি। ঐখোয়না জগলবন্দী অসি ঈশৈদা উবা ফংই, অদুবু হৌজিক্তি চেলেঞ্জশিংদা, জগলবন্দী অমা লৈ, মদুদা মীওই অমনা চেলেঞ্জ অমা তৌই অমসুং অতোপ্পা মীওই অমনা মদু লৌখৎলি। অদুগা মখোয়না মসি অহুমরক তৌখি। অদোমগী হীরম অসি য়াম্না নুংঙাইবা অমনি। ঐহাক্না 'মন কী বাত' তারিবা মীওইশিংনা অদোমগী মরমদা খঙহননীংই… অদোমগী মরমদা মখোয়না খঙগদবনি। মখোয়না অদোম্না পাংথোকখিবা থৌনা অদুগী মরমদা খঙগদবনি।

অনিমেশ জী: খুরুমজরি সর, ঐহাক্কী মিং অনিমেশ কুজুর কৌই। ঐহাক ২০০ অমসুং ৪০০ মিতরদা নেস্নেল রেকোর্দ হোল্দরনি অমসুং ঐহাক ছত্তিসগরদগীনি সর। অমসুং হৌজিক্তি ঐনা ওরিশাগীদমক শান্নরি। হৌখিবা চহিদা ঐহাক এসিয়ন মেদল অমসুং ৱার্ল্দ য়ুনিভর্সিতী গেমস মেদল ফংখি। ঐহাক্না স্কুলদগী পাস আউৎ তৌরকপদগী ২০২১দগী এথলেতিক্স হৌখি। ঐহাক সাইনিক স্কুল অম্বিকাপুরদগী পাস আউৎ অমা ওইরি। ঐহাক্না মমাংদা ফুতবোল শান্নরম্মি। কোবিদকী মতম অসিদা, ঐহাক্কী ইমা-ইপানা ঐহাকপু মপান্দা থোক্নবা অমসুং চত্থোক-চৎশিন তৌনবা নত্ত্রগা শান্নবদা অয়াবা পীখি। অসুম্না, কোবিদ লাইনা-লাইচৎ অসি হন্থরকপা হৌরকপা মতমদা, ঐগী ফুতবোল মরুপশিংনা ঐঙোন্দা হায়খি মদুদি স্তেত মিত অমা পাংথোক্কনি... চৎলু অমসুং শরুক য়াবীয়ু। ঐহাক্না শরুক য়াখি অমসুং মফম অদুদগী নেস্নেলগী থাক্তা সেলেক্সন অমা পাংথোকখি হায়বসি ঐহাক্না খঙখিদে। মদুদগী ঐহাক নেস্নেলদা খনখি অমসুং ঙসি ঐহাক্না ইন্তর্নেস্নেলদা ভারতকী মহুৎ শিন্দুনা চৎলি।

প্রধান মন্ত্রী: ফরে, করি তৌরে গুরিন্দর বীরজী?

গুরিন্দর বীরজী: খুরুমজরি সর, ঐহাক্কী ইমিং গুরিন্দর বীরনি অমসুং ঐহাক ইন্দিয়ন নেভীগী পেত্তী ওফিসর অমনি অমসুং ঐহাক ইন্দিয়াগী খ্বাইদগী য়াঙবা স্প্রিন্তরনি। ঐহাক্না হৌজিক্তি মিতর ১০০দা ১০.০৯গী নেস্নেল রেকোর্দ অমা শেমখ্রে। অমসুং ঐহাক ১০.১গী মখাদা চেনব অহানবা ভারত মচানি। অমসুং ঐহাক্না ত্রেকতা অমসুং য়ুনিফোর্মদা ঐহাক্কী লৈবাক্কী সেবা তৌনবা হোৎনরি। ঐহাক্কী ইপা অমসুং ইপু অনিমক্না শান্ন-খোৎনবগী থবক তৌরম্মি, মরম অদুনা দিৱালী, অনৌবা চহিগুম্বা কুমহৈ অমা লাকপা মতমদা ঐখোয়না ঐখোয়গী য়ুম শেংদোকপা অসি ঐখোয়গী ভারতকী চৎনবীনি। অদুনা ঐহাক্না ঐহাক্কী ইপাগী ত্রোফিশিং অমসুং মেদলশিং শেংদোক্লম্মি... ঐহাক্না মসি য়াম্না পাম্মি... ঐহাক য়াম্না নুংঙাইখি। তুংদা ঐহাক্না ত্রোফি অমা হেক্তা শেংদোকপা মতমদা, মহাক্না কদাইদগী ত্রোফি অসি লৌখিবগে, কদাইদগী মেদল অসি লৌখিবগে, হায়রিবা ফোতো অসি কদাইদগী লৌখিবগে হায়না ঐহাক্না হংজৈ... অদুগা মহাক্না ঐঙোন্দা মহাক্কী ৱারী লিখি, মদুদি... ঐহাক মফম অসিদা শান্নবা চৎখি, ঐহাক্না নেস্নেল মেদল অসি ফংখি, ঐহাক্কী তীমনা মসিদা মাই পাকখি। অদুগা ঐহাক্না মঙোনদা মসিসু হায়খি মদুদি ঐহাকসু স্পোর্তস খরা পাম্মি। মহাক্না অয়ুক্কী মতমদা শান্নবা চৎলম্মি, মরম অদুনা ঐহাক্না মঙোন্দা ঐহাকপুসু পুনবা হায়রকখি। অসুম্না মহাক্না ঐহাকপু পুবা হৌখি, অমসুং মহাক্না শান্ন-খোৎনবদা তম্লিবশিংদু ঐঙোন্দা তাকপা হৌখি। অসুম্না ঐহাক্কী পুক্নিং চিংশিনবা হৌরকখি। য়ুসেন বোল্তকী ৱার্ল্দ রেকোর্দ থুগাইবা ঐনা উখি। মরম অদুনা অসিগুম্বা নুংঙাইবা ৱারী অমা লৈ। ঐহাক্না তেলিভিজন য়েংলিঙৈদা ঐহাক্কী ইমানা মদু মুথৎলু হায়রকখি, "ইচানুপা, হৌজিক লাইরিক পাবগী মতম ওইরে। নঙ লাইরিক পারো" ঐনা হায়খি, "কৈশু কাইদে, ঐবু তি.ভি. য়েংহন্দবনিনা নোংমদি অদোম্না ঐবু তি.ভি.দা উবা ফংলগনি অমসুং গুরুন্দরনা চেনবা উবা ফংলগনি।" ঐহাকসু ঐগী ইমানা ঐবু তি.ভি.দা য়েংবদা নুংঙাইবা ফাওই।

প্রধান মন্ত্রী: ৱাও, য়াম্না ফৈ! মদু অদোমগী অফবা ৱানি।

গুরিন্দর বীরজী: হোয়, সর। মসি মিদল ক্লাসকী ইমুং অমনি। ঐগী ইপাসু ভোলিবোল শান্নরম্মি। ইমুংগী প্রোব্লেমশিংনা মরম ওইদুনা মহাক্না শান্ন-খোৎনবশিং থাদোকখি। মহাক্কী অপাম্বা অদু মপুং ফাবা ঙমখিদ্রে। অদুনা মহাক্না ঐগী মঙলান অদু উখি... ফরে, ঐগী ইচানা মঙলান অদু মঙফাওনহনগনি। ঐহাক্না মহাক্কা ৱারী শানরম্মি অমসুং মিল্খা সিংহনা য়াম্না কন্না থবক তৌরি হায়বা ঐহাক্না তাখি। ঐহাক্না মঙোন্দা নোংমদা নহাক্কী অপাম্বা অদু ঐহাক্না মপুং ফাহনগনি হায়না হায়খি। মতুংদা মহাক্না হায়রম্মি মদুদি মঙলানশিং অসি অসিগুম্বা মওংদা মপুং ফাহনবা ঙম্লোই, মদুগীদমক্তা কন্না হোৎনগদবনি। কনাগুম্বা অমনা লেপ্পা লৈতনা হোৎনগদবনি। মিলখা সিংহ জীনা ঈ ওখি, নুংশা চেনখি। মহাক্না নুমিৎ চুপ্পা ত্রেনিং তৌরম্মি, মরম অদুনা হায়রিবা থৌওংশিং অসিনা ঐঙোন্দা ইথিল পীরম্মি। ঐহাক্কী ইপাবুংনা ঐহাকপু পুক্নিং থৌগৎপীখি মদুদি করিগুম্বা ঐহাক চেনবা তারবদি, ঐহাক্না ঐহাক্কী লৈবাক অসিগীদমক মেদল অমা পুরকপা অমসুং মাই পাকপা তাই। অমসুং ঐহাক্না মিতর ১০০গী ইভেন্ত খনখিবা মতমদা, মীপুম খুদিংমক্না ঐঙোন্দা হায়নরম্মি মদুদি ব্রাদার, মিতর ১০০দি তৌরুনু, মিতর ১০০ অসি ভারতমচাশিংগী ইভেন্ত নত্তে। ভারত মচাশিংগী হকচাং অসি মিতর ১০০গীদমক শারক্তে। মরম অদুনা ঐহাক্কী ইপা অমসুং ঐহাক্না মতম পুম্নমক্তা হায়নৈ মদুদি গুরিন্দর, ঐখোয়না মসি খনখ্রে, ঐখোয়না মসিদগী হল্লরোই। কনাগুম্বনা ঐঙোন্দা ঐখোয়না পাংথোকপা ঙম্লোই হায়না হায়রকপা তারবদি, ঐখোয়না পাংথোকপা ঙম্মি হায়বা ঐখোয়না তাক্কনি। অমসুং অদোম্না মসি পাংথোক্কনি, ঐহাক্না অদোমদা থাজবা থম্লি। অসুম্না ঐগী ইপানা ঐঙোন্দা থাজবা থম্লকপা মতমদা, ঐহাক্না থাজবা অদু ঐহাক্কী থৌনাদা ওন্থোকখি অমসুং মাংলোমদা চংশিনখি, অমসুং ঙসি ঐহাক্না ভারত মচা খুদিংমক্তা স্প্রিন্ত তৌনবা হায়জরি।

প্রধান মন্ত্রী: য়েংউ, নখোয় অনিমক্না য়াম্না ফজনা থবক তৌরি, অমসুং নুমিৎ নিনিগী মনুংদা, নখোয় অনিমক্না নেস্নেল রেকোর্দ অহুম হন্না থুগাইখ্রে। গুরিন্দর বীরনা হায়খিবগুম্না, মিতর ১০০গী লমজেল চেনবা চৎপদা, মীশিংনা হায়নৈ মদুদি ভারতকী মীওইশিংনা মসিগী থবক অসিগীদমক্তা পাঙ্গল লৈতে। অসিগুম্বা খুদোংচাদবা কয়া লৈরবসু, অদোম্না কন্না হোৎনখি, মরম অদুনা ঐহাক্না নখোয় অনিগী মফমদগী মসি খঙবা পাম্মি, অমসুং 'মন কী বাত'কী তারিবশিংনসু অদোমগী পুক্নিং থৌগৎপা অদু করিনো, অদোমগী পুক্নিং চিংশিনবা অদু করিনো, অদোমগী ৱাখল্লোন করিনো, অমসুং অদোম্না মসি করম্না তৌরিবনো হায়বদু খঙবা পাম্মি। মসি কয়া য়াম্না লুবগে?

গুরিন্দর বীরজী: হোয়, সর, মসি গুরিন্দরনি... ঐহাক্না হৌরকপা মতমদা, য়াম্না লান্থেংখি, ঐহাক্না অচুম্বা থবক তৌরিৱ্রা হায়না হন্না হন্না খল্লম্মি, অচুম্বা খনবগী তাঞ্জা ঐহাক্না লৌখি মরমদি মতম পুম্নমক্তা অদোম্না মাই পাকপা ঙম্লোই, করিগুম্বা মতমদা অদোম্না তম্বা ঙমগনি। ঐনা মাংখিবা মতমদা, ঐনা ফজনা পাংথোকপা ঙমদ্রবা মতমদা, নৎত্রগা ঐনা অশোক-অপন নংখিবা মতমদা, ঐগী ইমুং-মনুংনা ঐবু শৌগৎপীখি, "মসি ফৈ। করিগুম্বা নুমিৎ অমা, চহি অমা ফত্ত্রবদি, মসিনা নহাক্কী পুন্সি মাঙহল্লোই। অদোমগী মঙলান শাগৎপা লেপকনু।" ঐহাক্কী কোচনা ঐঙোন্দা মসিসু তাকপীখি মদুদি করিগুম্বা নহাক্না মসি তৌদ্রবদি, অতোপ্পনা তৌরোই। মরম অদুনা, ঐখোয়গী অকোইবদা লৈরিবা মীওইশিং, ঐখোয়গী কম্ম্যুনিতীনা ঐখোয়বু পুক্নিং থৌগৎলকপা মতমদা, পুক্নিং থৌগৎপগী থৌনা অদু কৈদৌঙৈদা হন্থরোই।

প্রধান মন্ত্রী: অনিমেশ জী।

অনিমেশ: সর, ঐহাক্না ২০২১দা এথলেতিক্সতা শরুক য়াবা হৌরকপা মতমদা, মীপুম খুদিংমক্না ঐঙোন্দা হায়নৈ মদুদি, "মসি অনৌবা লম অমনি, অদোম্না মসি তৌবা ঙমগদ্রা ঙম্লোইদ্রা?" অদুনা, ঐনা হায়খি, "হৌজিক ঐনা মসিগী ফিল্দ অসিদা চঙলক্লে, ঐহাক্না তশেংনা মসি তৌগনি।" ঐহাক্কী ইপানা ঐঙোন্দা হায়খি মদুদি করিগুম্বা অদোম্না লম অসিদা চঙলবদি হন্দুনা য়েংগনু মরমদি মীপুম খুদিংমক্না মখোয়না মসি তৌগদবনি, মদু তৌগদবনি হায়না খল্লি অদুবু মীওই খর খক্তনা মসি তৌদুনা উৎলি। নঙনা হন্দক্তা ফিল্দ অসিদা চঙশিল্লকপনি। নঙনা মসিদা লেপচবা তাই, মদুদা মাংলোমদা চংশিনবা তাই। নঙনা খুদোংচাবশিং পুম্নমক ফংলগনি, ঐখোয়না নঙবু পুম্নমক্তা মতেং পাংগনি, ইমুংগী মতেং, শেলগী মতেং, ঐখোয়না পুম্নমক পাংগনি... নঙনা কন্না হোৎনদুনা ভারতনা ভারতকী মীওইশিংসু শান্নবা ঙম্বগী মওং উৎলসি... মরমদি মীওইশিংনা ঐঙোন্দা হায়নরম্মি মদুদি ভারতকী জিনশিং অসি মখোয়না সব ১০ নত্ত্রগা সব ১০.১দা শান্নবা ঙম্বা নৎত্রগা স্প্রিন্ত অসি তৌবা ঙম্বা নত্তে, অদুবু হৌজিক্তি ঐখোয় অনিমক্না ভারতকী মীওইশিংসু মসি তৌবা ঙম্বগী মওং উৎলে। ঐখোয়গীদমক্তা করিগুম্বা অমত্তা অরুবা নত্তে, ঐখোয়না পুম্নমক তৌবা ঙম্মি। অসুম্না সর, হায়রিবা ৱাফম পুম্নমক অসিনা ঐহাকপু য়াম্না পুক্নিং থৌগৎলি অমসুং ঐখোয়না ত্রেনিং তৌরিঙৈদা, ঐখোয়না ঐখোয়গী তাইমিংশিং থুগাইরি অমসুং অতোপ্পা ভারত মচাশিংনসু মসি উরি মদুদি ভারত মচাশিংনসু মসি তৌবা ঙম্মী... অমসুং ঐখোয়না হেন্না তৌগনি সর, অমসুং হৌজিক ঐখোয় অনিমক কম্মনৱেল্থ গেম্সকীদমক্তা খনখ্রে, মরম অদুনা ঐখোয়না লাক্কদৌরিবা কম্পিতিসন অসিদা হেন্না ফজনা পাংথোক্কনি।

প্রধান মন্ত্রী: য়েংবীয়ু, ঐহাকসু খংনীংবা লৈ। অমসুং মীওইশিংদসু মসি লৈরম্বা য়াই। ঐনা নখোয় অনিমক্না য়াম্না লুনা তিন্নবা মরুপশিংনি হায়না ঐনা খঙই। নখোয় অনিমক্না ঐগী রেকোর্দ থুগাইরবদি ঐনা অদোমগী রেকোর্দ থুগাইগদবনি হায়না ৱারেপ লৌখি। এনিমেশ, নঙনা ঐঙোন্দা অহানবদা হায়বিয়ু।

অনিমেশ: সর, অহানবা রেকোর্দ অসি ঐহাক্কী ১০.১৮ ওইরম্মি, অদুগা গুরিন্দর বীর ভৈয়ানা সেমিফাইনেলদা ১০.১৭ তৌদুনা রেকোর্দ অদু থুগাইখি অমসুং ঐহাক্না সেমিফাইনেলগী অনিশুবা সেমিফাইনেলদা ১০.১৫ তৌদুনা অমুক হন্না রেকোর্দ অদু থুগাইখি। মতম অদুদা, ঐগী সেমি-ফাইনেল থোকখিবা অদুদা, ঐখোয় অনিমক্না নুংঙাইবা ফাওখি মদুদি হোয়, মসি ফরে, ঙসি রেকোর্দ অদু থুগাইখি, অমসুং ঐখোয় অনিমক্না মসি পাংথোকখি, মরমদি মতম অদুদা কম্পিতিসন অদুদা রাইভেলরী লৈ, অদুবু ঐখোয় অনিমক্না হান্ননা লেপখি, মদুগী মমাংদা ঐখোয়না সৌদি অরাবিয়াদা কম্পিতিসন তৌনবা চৎলমখি, ঐখোয় অনিমক মফম অদুদসু রুমমেৎ ওইরম্মি, মরম অদুনা ঐখোয় অনিমক্না মফম অদুদা হায়নরম্মি মদুদি ঐখোয়না ভারতকী স্প্রিন্তিংবু মাংলোমদা পুখৎকদবনি অমসুং মসি ঐখোয়গী খুৎতা লৈ, ঐখোয়না করি তৌরিবা অদুনা অতোপ্পশিংবু পুক্নিং থৌগৎকনি।

প্রধান মন্ত্রী: গুরিন্দর বীর, অদোম্না করি হায়নীংই?

গুরিন্দর বীরজী: ঐখোয় অনিমক্না ফজনা চেনগনি হায়না ৱারেপ লৌখি। অসুম্না সর, ঐখোয় অমগা অমগা মথৌ তাবা মতমদা, ঐখোয়না অমগা অমগা লোয়ননা লেপমিন্নৈ, রেকোর্দ থমদ্রিঙৈগী মমাংদা, ঐহাক্না রেকোর্দ থম্বা মতমদা অমসুং এনিমেশনা রেকোর্দ থম্বা মতমদা তৌখিবগুম্না। অসুম্না ঐখোয়না ৱার্ম-অপ তৌরিঙৈদা, ঐনা এনিমেশ, এনিমেশ, হায়রিবা ব্লোক অসি অচুম্বনি, মদুদা চংবীয়ু অমসুং মফম অদুদা চংশিনবীয়ু, ঐখোয়না মফম অসিদা ৱার্ম-অপ তৌগনি, করিগুম্বা ৱার্ম-অপ অদু মফম অদুদা লৈরবদি, ঐখোয়না অমনা অমবু মতেং পাংগনি, করিগুম্বা ঐখোয়না অমনা অমবু মতেং পাংগনি, মদুদি অতোপ্পসু ফগৎলগনি, ঐখোয়সু ফগৎলগনি। মরম অদুনা মরুপ-মপাং ওইবা অসিসু মথৌ তাই, অদুবু সর, ঐখোয়না গ্রাউন্দগী মপান্দা, কম্পিতিসনগী মপান্দা লৈরি, অদুনা ঐখোয় মরুপ ওইরি, ঐখোয়না গ্রাউন্দদা চংবা মতমদা, ঐখোয় অমগা অমগা কম্পিতিতর ওইরকই। অসুম্না, ঐহাক অসিদগী হেন্না থুনা চেনগনি, ঐহাক অসিদগী হেন্না থুনা চেনগনি।

প্রধান মন্ত্রী: অদোম্না শরুক য়াখিবা কম্পিতিসন অসি লৈবাক অসিগী মিংচৎ হেনগৎহন্নবা, লৈবাক অসিবু তুংলমচৎতা মাগী থাক অসিদা পুরক্নবা অমসুং পোজিতিব ওইবা ৱাখল্লোন অমগা লোয়ননা পাংথোক্নবা হোৎনবনি। অমসুং ঐহাক্না থাজৈ মদুদি অদোমগী স্পোর্তসমেন্ত স্পিরিৎ অসি... শান্নবা, অমগা অমগা চেলেঞ্জ তৌনবা, মাংজিল থানা চংশিনবা, অমসুং মাংজিল থানা চংশিনবদা মতেং পাংনবা - মসি অদোম্না তৌবা য়াম্না ফবা থবক অমনি। ঐহাক্না অদোমবু থম্মোয় শেংনা নুংঙাইবা ফোংদোকচরি, ঐহাক্কী য়াইফ-পাউজেল পীজরি, অমসুং অদোম্না লৈবাক অসিদা শিংথানীংঙাই ওইরবা থৌনা অমা পুরক্কনি... ঐহাক্না থাজবা থম্লি। অদোম্না অদোমগী থবক অসি নীংথিনা মখা চত্থদুনা চাউখৎপা পুরকপা ওইরসনু। ঐহাক্না অদোমদা য়াইফ-পাউজেল পীজরি।

গুরিন্দর বীরজী/অনিমেশ: থাগৎচরি সর। থাগৎচরি সর।

প্রধান মন্ত্রী: হন্না-হন্না থাগৎচরি।

####

ঐগী নুংশিরবা ইরৈবাকচাশিং,

হৌজিক লৈবাক অসিগী মফম অয়াম্বদা য়াম্না শাই। অয়াকপা নুংশা, অশাবা নুংশিৎ, অসিগুম্বা নুংশিৎ অসিদা অদোম ইশাবু চেকশিন্না থম্বা অসি য়াম্না মরু ওই। ঈশিং তোইনা থকউ। করিগুম্বা নুশাদা চৎপা তারবদি, চেকশিন্না চৎকদবনি। মসিগী মতাংদা তোঙান তোঙানবা সরকারগী দিপার্তমেন্তশিংনা পীরিবা গাইদলাইনশিং অসিসু কুপ্না য়েংবিয়ু।

মরুপশিং,

ঐখোয়গী লৈবাক অসিদা, মৈশা অসি লান্থেংনবগী পাম্বৈ অসি চাকশঙদসু থেংনৈ। নুংশা শাবা হেনগৎলকপগা লোয়ননা য়ুমগী চিঞ্জাক্কী মহাও হোংলকপা, চিঞ্জাক শেম্বগী মওং হোংলকপা অদোম্না উবা ফংলমগনি। মফম খরদদি, লৈবাক্কী চফুশিংদগী ঈশিং থকনৈ; অতোপ্পা মফম খরদদি, শঙ্গোম অফম্বা শেম্বা হৌরকই, অমসুং অতোপ্পা মফম খরদদি, হৈনৌ ফুৎপা হৌরকই -  অমসুং মদুদগী হৌরকই ইন্দিজিনস দ্রিঙ্কশিং। অদোম্না দেসিগী দ্রিঙ্কশিং অসিসু খঙলমগনি। করিগুম্বা নহাক্না অৱাং ভারত্তা চৎলবদি, মফম কয়াদা নহাক্না অম পান্না, হৈনৌ অশংবগী মহাও, অমসুং অশাবা কোকহনবা থেংনগনি। করিগুম্বা নহাক্না পঞ্জাব নৎত্রগা হরিয়ানাদা চৎলবদি, অচৌবা গ্লাসশিংদা লসি থেংনগনি। রাজস্থান অমসুং গুজরাত্তা বতরমিল্ক অসি চানবা চিঞ্জাক খুদিংমক্কী মরুপ অমনি।

অমসুং মসিগী মথক্তা, বিহার, ঝারখন্দ অমসুং নোংপোক থংবা উত্তর প্রদেশতা লৈবা সাত্তু সর্বেৎ অসি য়াম্না পাম্নবা অমনি - মসিনা চখাও থলহল্লি অমসুং পাঙ্গল পী। কোঙ্কন অমসুং গোৱাদা কোকুম সর্বেৎ অমসুং সোল কাধি। খা ভারত্তা পানাকম, নীর মোর, সমবরম, অমসুং ওরিশাদা বেল পানা অসি শুপ্নগী থক্নবা নত্তে, মখোয় অসি ভারতকী তোঙান-তোঙানবা মফমশিংগী চৎনবীগী শরুক অমনি। অমসুং মখোয়না "এক ভারত শ্রেস্থ ভারত"কী ৱাখল্লোনসু উৎলি। অমসুং অদোম্না নীংশিংগদবা ৱাফম অমা লৈ: মসিগী পোৎলম অয়াম্বসি ঐখোয়গী ইশাগী চাকশঙদগী, ঐখোয়গী ফার্মশিং অমসুং লমশিংদগী লাকপনি। অচৌবা ব্রান্দিং অমত্তা লৈতে, অদুবু মখোয়না চহী কয়াগী এক্সপরিয়েন্সবু মশক তাক্লি। নহাকসু কালেনগী মতমদা অসিগুম্বা দেশীগী দ্রিঙ্কশিং অসি থকপীয়ু।

মরুপশিং,

কালেনগী মতমদা য়ুমথোং খুদিংদা খন্ন-নৈনবগী অতোপ্পা হীরম অমা হৌই: মদুদি হৈনৌনি। হৈনৌ অসি খন্ন-নৈনবগী তোইনা থেংনরিবা হীরম অমনি। ভারতকী য়ুমথোং খুদিংমক্তা কালেনগী মতমদা হৈনৌ মতাংদা ৱা শাদবা য়ুমথোং লৈতে।

লম খুদিংমক্তা... মশাগী ওইবা হৈনৌ, মশাগী ওইবা মহাও, মশাগী ওইবা মনম লৈ। মহারাস্ত্রা অমসুং কোঙ্কনগী হাপুস, অল্ফোন্সো, গুজরাতকী কেসার, মসি আমরসকী থম্মোয়নি, উত্তর প্রদেশকী দুস্সেহরি, অমসুং ঐগী কাশীগী লঙ্গরা। লঙ্গরা হৈনৌগী অখন্নবা মগুন অমা লৈ, মসি মপুং ফারক্লবা মতুংদসু অয়াম্বা মতমদা শংলগা লৈ। বিহারগী জর্দালু, মদুগী মনম অদু অরাপ্পদগী খঙবা ঙম্মী। চাওসা, মালদা - মমিং খুদিংমক্না মসিগা মরী লৈনবা মেমোরিশিং লৈ। খা ভারত্তা চৎলু, বঙ্গনাপল্লী, তোতাপুরি, নীলম, মালগোভা, বেঙ্গলগী হিমসাগর, ওরিশা, অমসুং অন্ধ্র প্রদেশকী সুবর্নরেখা লৈ। অতোপ্পা ৱাহৈ অমদা হায়রগদি, মফম হোংলকপা মতমদা, হৈনৌগী মওং-মতৌ, মচু, অমসুং মহাওসু হোংই।

অমসুং মরুপশিং, হৌজিক্তি হৈনৌগী খোঙচৎ অসি খুঙ্গংদগী মালেমগী কৈথেল ফাওবা য়ৌরে। ঙসি, 'মন কী বাত'কী থোংদা, ঐহাক্না হৈনৌ পাম্বী থাবদা শরুক য়ারিবা ঐহাক্কী লৌমী ইচিল-ইনাওশিংবু থাগৎপা ফোংদোকচরি। নখোয়শিং অসি মহৌশানা লৌমীশিং নত্তে... নখোয়শিং অসি লৈবাক অসিগী লৌউ-শিংউগী শেন্মিৎলোনগীদমক্তা য়াম্না মরু ওই। অদোম্না অসুম্না মঙাল পীদুনা লৈবিয়ু। মরুপশিং, মহৌশানা মহৈলোয়শঙশিং অসি ছুতি লৈরিঙৈ মনুংদা, ঐহাক্না অদোম্না য়াওবা পাম্বা ক্লাস অমগী মতাংদা ৱারী শাজগে। মরুপশিং, অঙাংশিং, নহা অমসুং অহল অনিমক্না তম্বা য়াবা, ফী থীদবা, অচৌবা বিল্দিংশিং লৈতবা, ক্লাসরুমশিং লৈতবা, অমসুং খ্বাইদগী নুংঙাইবা ৱাফমদি, ক্লাসশিং অসি তুরেল অমদা পাংথোক্লিবা স্কুল অমা ৱাখলনা শাগৎপীয়ু।

মরুপশিং,

মসি ৱারী নত্তে। মসি অচুম্বা হোৎনবা অমনি। কেরলমগী অলুভাদা, সাজি ভলাশেরিলনা অসিগুম্বা স্বিমিং ক্লব অমা চলাইরি। মীওই ১৫,০০০ হেনবনা মফম অসিদা ঈরোইবা তমখ্রে। সাজি জীনা দিব্যাং অঙাংশিংদা ঈরোইবা তম্বীখি। মসিগী হোৎনবা অসিগী মরুমদা অৱাবসু লৈরি।

চহি খরগী মমাংদা, মহৈরোই কয়া অমা বোত এক্সিদেন্ত অমদা শিখি। হায়রিবা থৌদোক অসিনা সাজি জীবু য়াম্না থম্মোয় শোকহনখি। মহাক্না খল্লি, করিগুম্বা অঙাংশিংনা ঈরোইবা হৈরম্লবদি, মীওই কয়াগী পুন্সি কনবা ঙম্লমগনি, অমসুং মফম অদুদগী মহাক্কী কেম্পেন হৌরকখি।

মরুপশিং,

সাজি ভলাশেরিলজীগী পুন্সিনা ঐখোয়দা অচৌবা পাউখুম অমা পীরি। সর্ভিস তৌবদা অচৌবা রিসোর্সশিং মথৌ তাদে। মথৌ তাবা অসি অফবা ৱাখল্লোন অমসুং লেপ্পা লৈতনা হোৎনবনি। মসিগী মপাঙ্গল অসি খক্তনা, মীওই লিশিং কয়াগী পুন্সিদা অহোংবা পুরকপা ঙমগনি।

ঐগী নুংশিরবা ইরৈবাকচাশিং,

ইকুই কুইদ্রিঙৈদা ঐহাক্না য়ুরোপকী নেদরলেন্দস্তা চৎপগী খুদোংচাবা ফংখি। ঐহাক মফম অদুদা মীফম কয়া অমদা শরুক য়াখি। মতম অসিগী মনুংদা, ভারত মচা খুদিংমকপু চাউথোকচবা পোকহনখিবা মতম অমা লাকখি। নেদরলেন্দস্তা পাংথোকখিবা অখন্নবা থৌরম অমদা, চৌলা মতমগী অরিবা কোপর প্লেৎশিং ভারত্তা হল্লকখি। নেদরলেন্দসকী প্রধান মন্ত্রীসু থৌরম অদুদা শরুক য়াখি। কোপর প্লেৎশিং অসিগা মরী লৈননা ভারত অমসুং মপান লৈবাক্তগী ঐহাক্না লেপ্পা লৈতনা মেসেসশিং ফংলি। মীয়াম্না নুংঙাইবা অমসুং চাউথোকচবা ফোঙদোক্নরি। মালেম শিনবা থুংনা লৈরিবা তামিল কম্ম্যুনিতীনা মসিগী মতাংদা অখন্ননা নুংঙাইবা পোকখি।

মরুপশিং,

কোপর প্লেৎশিং অসিগী মরমদা মীওইশিংগী মরক্তা য়াম্না খঙনীংবশিং লৈ। মরম অদুনা, ঙসি ঐহাক্না মখোয়গা মরী লৈনবা ইনফোর্মেসন খরা শিন্নবা পাম্মি। মসিগী মনুংদা অচৌবা কোপর প্লেৎ ২১ অমসুং অপীকপা কোপর প্লেৎ ৩ য়াওরি। মখোয়শিং অসি মরুওইনা রাজা রাজেন্দ্র চৌলা অহানবগা মরী লৈনৈ, মহাক্না মহাক্কী মপা, রাজা রাজরাজা চৌলাগী ৱাশক অমা মপুং ফাহনখি। মখোয়না এনাইমঙ্গালমগী খুঙ্গংবু বদ্ধ মোনস্ত্রীদা দান তৌখিবা অদু পনখি। কোপর প্লেৎশিং অসিনা চৌলা দাইনাস্তীগী মাইপাকপশিং অদুসু শন্দোক্না তাক্লি। মখোয়না চৌলা নীংথৌরেলগী সমুদ্রগী শক্তি অসি কয়া য়াম্না শিংথানীংঙাই ওইবগে হায়বদু উৎলি। মখোয়না খা-নোংপোক এসিয়াগী লৈবাকশিংগা লৈনরিবা মরীশিংগী মরমদসু ঈ-পাউ পীরি। ঐখোয় পুম্নমক্না চৌলা নীংথৌরেলগী শিংথানীংঙাই ওইরবা পুৱারী অমসুং চৎনবী অসিদা চাউথোকচরি।

মরুপশিং,

ঐখোয়গী সরকারনা ভারতকী অসিগুম্বা মমল য়াম্লবা হেরিতেজ সাইতশিং অসি ঙাক শেন্নবা লেপ্পা লৈতনা হোৎনরি। মসিগা মরী লৈননা, জ্ঞান ভারতম অভিয়ানগী মখাদা ছত্তিসগরগী মালহারদা মরুওইবা অমা ফংলে। মফম অসিদা য়াম্না তাঙবা কোপর প্লেৎ অহুম থেংনখি। মখোয়শিং অসি পান্দুভনশী দাইনাস্তীগী মহাঋশি বালার্জুনগী নীংথৌরেল মতমগা মরী লৈনৈ হায়না থাজনৈ। এক্সপর্তশিংনা হায়রি মদুদি ইরিবশিং অসি তরুকশুবা অমসুং তরেৎশুবা চহি চাগী মতমদগী লৈরকপনি, মসিনা তাক্লিবদি চহি ১৪০০দগী ১৫০০গী মমাংদগী লৈরকপনি। কোপর প্লেৎশিং অসি অরিবা মতমগী ব্রাহ্মী স্ক্রিপ্ত অমসুং পালী লোলদা ইরি। মখোয়না মতম অদুগী লৈঙাক, ধর্ম অমসুং চৎনবীগী মতাংদা মরু ওইবা ৱারোলশিং পীরি।

মরুপশিং,

ঐখোয় ভারত মচাশিংনা এস্ত্রোনোমীদা মতম পুম্নমক্তা অখন্নবা পুক্নিং চিংশিনবা অমা লৈ। চহি চা কয়াগী মমাংগী ওবজর্বেতরীশিং ঐখোয়গী লৈবাক অসিদা হৌজিক ফাওবা লৈরি। মফম অসিদা অৱাংবা থাক্কী মেথমেতিকেল দিস্কোভরীশিং ফংখি। নেভিগেসন ওইগেরা, অলমানেক ওইগেরা, নত্রগা ঐখোয়গী কুহ্মৈশিং ওইগেরা, মখোয় পুম্নমক অসি অতিয়া অমসুং থৱানমিচাকশিংগা মরী লৈনৈ।

এস্ত্রোনোমীনা ঐখোয়গী লৈবাক অসিদা মীরোল খুদিংমক্তা পুক্নিং চিংশিন্দুনা লাক্লি। মসিনা থিজিন হুমজিনবদা পুক্নিং থৌগৎলি; ঙসিগী নহাশিংদা থৱায় য়াওবা য়াম্না উবা ফংলি। অদোমসু লৈবাক শিনবা থুংনা এস্ত্রোনোমী ক্লবশিং মীয়াম্না পাম্নবা হেনগৎলক্লিবা অদু উবা ফংলগনি। মখোয়গী থবকশিং অসি অচৌবা শহরশিংদগী অপীকপা শহরশিংদা, স্কুলশিংদগী পার্কশিংদা উবা ফংই। বেঙ্গলোর এস্ত্রোনোমিকল সোসাইতীগী মরমদা ঐহাক খঙখি। ওবজর্বেসন সেসনশিং মফম অসিদা পাংথোকই। মসিগী ওর্গনাইজেসন অসিনা খুঙ্গংগী লমশিংদা এস্ত্রোনোমীবু মীয়াম্না খঙহন্নবা মিসন অমসু হৌদোকখ্রে। 'খাগোল মন্দল' কৌবা তীম অমনা য়াম্না ইন্নোভেতিব ওইবা পুং ৩০গী কোর্স অমা হৌদোকখ্রে।

মরুপশিং,

নুমিদাংগী মতমদা থৱানমিচাকশিং য়েংবদা নুংঙাইবা ফাওই। এস্ত্রো কেরলা কৌবা ওর্গনাইজেসন অমনা নাইৎ ওবজর্বেসন কেম্পশিং অমসুং ৱার্কশোপশিং পাংথোকই। মফম অসিদা, নহাশিংনা তেলিস্কোপ শেম্বা অমসুং স্তার মেপশিং শীজিন্নবা তম্লি। রাজকোৎকী বিগ বেং এস্ত্রোনোমী ক্লবনা গিরগী উমংদগী হৌরগা কচ্ছকী রন ফাওবদা এস্ত্রোনোমীগী থৌরম কয়া অমা পাংথোক্লি। 'জ্যোতির্বিদ্যা পেরিসনস্থা' অসিসু খ্বাইদগী লিরবা এস্ত্রোনোমী ইন্সতিত্যুসনশিংগী মনুংদা অমনি। মসিদা ওবজর্বেস্নেল ফেসিলিতীশিং, লাইরিক্কী লাইব্রেরী, অমসুং তেলিস্কোপ লাইব্রেরীগী খুদোংচাবা ফংহল্লি।

ঐহাক্না আই.এস.এ.এ.সি.গী মতাংদসু পনজনীংই। মসি মহৈরোইশিংনা লুচিংবা লৈবাক শীনবা থুংনা লৈরিবা নেৎৱার্ক অমনি অমসুং মসিনা এস্ত্রোনোমী অমসুং এস্ত্রোফিজিক্স ক্লবশিংবু শম্নহল্লি।

মরুপশিং,

নহাক্কী শান্ন-খোৎনবগীদমক মতম কাইথোকপা অমসুং লেপ্পা লৈতনা অনৌবা খরা তমজবা হায়বসি য়াম্না মরু ওই। ঐনা নহাশিংদা এস্ত্রোনোমী ক্লব অমদা য়াওনবা অমসুং ছুতীগী মতম অসিদা প্লানেতরিয়ম অমদা চৎনবা হায়জরি।

মরুপশিং,

ঐহাক্না 'মন কী বাত' তি.ভি.দা য়েংলিবা মীওইশিংদা হায়জনীংবদি, অদোম্না ভিদিও অসি য়েংবা তাই। মসিগী ভিদিও অসি হন্দক পাউশিংদা শন্দোকখ্রে। মসিদা, মীওই খরনা হোৎনবা কন্না অমসুং চেকশিন্না গঙ্গাগী দোলফিন অমা কন্নবা হোৎনরি। অদোম্না মসি খঙবদা থোইদোক হেন্দোক্না নুংঙাইগনি মদুদি মসিগী থবক অসি পুন্না পুং ১৩ চংখি, অমসুং অরোইবদা দোলফিন অসি কনবা ঙমখি।

মরুপশিং,

ভারতকী অহানবা গঙ্গা দোলফিন রেস্ক্যু এম্বুলেন্সনা মসিদা অচৌবা থৌদাং অমা লৌখি। থৌদোক অসি উত্তর প্রদেশতা থোকখি। গঙ্গাগী দোলফিন অমা মফম অদুদা লৈবা খোং অমদা তাশিনখি। মতম অদুদা, 'নমামী গঙ্গে অভিয়ান'গী মখাদা শাখিবা এম্বুলেন্স অসি মফম অদুদা আশাগী মঙাল অমা ওইনা য়ৌরকখি। মদুদগী চেকশিন্না লৌথোকখি। মসিবু য়েংশিনখি, লায়েংখি অমসুং মতুংদা মসিবু রাপ্তী তুরেলদা শাফনা থাদোকখি। মওং অমদা, পুন্সি অমা য়ুমদা হল্লকখি...

মরুপশিং,

হায়রিবা দোলফিন রেস্ক্যু এম্বুলেন্স অসি য়াম্না অখন্নবা অমনি। মসিবু মোবাইল হোস্পিতাল অমা ওইনা দিজাইন তৌখ্রে। মসিদা দোল‌ফিন অসি সেফ ওইনা থম্নবগী থৌরাং লৈ। মসিদা ওক্সিজেন ফেসিলিতীশিং, অখন্নবা স্ত্রেৎচরশিং, অমসুং রেস্ক্যু ইক্বিপমেন্ত লৈ। মসিনা তাক্লিবদি করিগুম্বা দোলফিন অমনা শোকপা তারবদি, খোং অমদা চঙশিল্লবদি, নত্ত্রগা তুরেলদগী তোখায়না লৈরবদি, মদুবু খুদক্তা মতেং পাংবা ঙম্মী। মরুপশিং, ঐখোয়না গঙ্গাগী দোলফিন অসি কনবা মতমদা, ঐখোয়না স্পিসিস অমা খক্তমক কনবা নত্তে, ঐখোয়না গঙ্গাগী বাইওদাইবর্সিতীসু কল্লি। ঐখোয়না তুরেল অসিগী পুন্সিগী পথাপ পুম্নমক কল্লি অমসুং ঐখোয়গী তুংগী চারোন-শুরোনগীদমক মমল য়াম্লবা মহৌশাগী হেরিতেজ অমা কল্লি।

ঐগী নুংশিরবা ইরৈবাকচাশিং,

নখোয় কয়ানা তুরেল, পুখ্রি নত্ত্রগা গুহাগী ঈশিংগা লোয়ননা মরী লৈনবা নীংশিং মমি কয়া লরমগনি। খরনা পুখ্রিদা ঈরোইবা নীংশিংলমগনি, খরদা পুখ্রি মপালদা মরুপশিংগা শান্নমিন্নবা নীংশিংলমগনি, খরনা লৈখোমগী মনম নীংশিংলমগনি। পুন্সি চুপ্পা অসিগুম্বা অঙাং ওইরিঙৈগী মতম অদু থম্মোয়দা নীংশিংদুনা লৈহৌই।

মরুপশিং,

অসিগুম্বা নীংশিংবশিংবু ঙাকশেন্দুনা থম্বগী ইথিল পীবা ৱারী অমা উত্তর প্রদেশকী বাস্তি জিলাদগী থোক্লকখি। বস্তিগী আকাশ গুপ্তনা মহাক্কী খুঙ্গংগী মনোরমা তুরেল উবদা য়াম্না নুংঙাইখিদে। মহাক্না অঙাং ওইরিঙৈদা উখিবা তুরেল অসি তরু তনানবা অমসুং ফজবা ওইরম্মি... মতমগী মতুং ইন্না, প্লাস্তিক অসি তুরেল অসিদা মরাং কাইনা তুংশিল্লকখি, অমসুং অমোৎ-অকাই হেনগৎলকখি। শ্রীমান আকাশনা ৱাকৎপগী মহুৎ অনৌবা অমা হৌদোক্নবা ৱারেপ লৌখি। "ৱাকৎপা তৌদনা, অনৌবা অহৌবা অমা" অসি মহাক্কী মন্ত্র ওইরকখি। মহাক্না মহাক্কী মরুপশিংবু পুদুনা চৎখি।

মখোয়দা লৈরিবা হায়ববু নেৎ, য়োৎপাক, পোলাং অমসুং মখোয়গী খ্বাইদগী চাউবা পাঙ্গলনি: খেন্নবা অমা পুরক্নবগী ৱারেপ লৌবা। হায়রিবা নহাশিং অসিনা তুরেল অদুদা চঙশিল্লগা, কবোকংশিং লৌথোক্লগা, অমসুং প্লাস্তিক অমসুং অমোৎ-অকাই লৌথোকখি। করিগুম্বা মতমদা, নুমিৎ অমা খক্তদা মখোয়না তুরেল অদুদগী কিলোগ্রাম ৫০দগী ৬০ ফাওবগী চাংদা অমোৎপশিং লৌথোকখি। তপ্না তপ্না, মনোরামা তুরেলগী শরুক অদু অমুক হন্না নানবা হৌরকখি। থবক অসিনা অকোইবদা লৈরিবা মীওইশিংগী পুক্নিং চিংশিনখি... লুনানবগী মরমদা এৱেরনেস হেনগৎলকখি।

মরুপশিং,

অসিগুম্লবা মান্নবা ইথিল পীবা ৱারী অসি গোৱাদসু থোকখি। বালকৃষ্ণ আইয়া অসি গোৱাদগী রিতায়র তৌরবা ওজা অমনি। অদুবু সোসিএল ৱার্ক্কী থৌনা অসি ঙসি ফাওবদা মপাঙ্গল কনখৎলি। মাদ্দি-তোলাপ লমদমদা ঈশিংগী খুদোংচাদবা লৈবনা মহাকপু য়াম্না নুংঙাইতবা ফাওখি। মহাক্না সোলুসন অমগী মায়কৈদা থবক তৌবা হৌখি। বালকৃষ্ণনা পাইপলাইনশিং তিংবদা মরুওইবা থৌদাং অমা লৌখি। মসিনা য়ুম কয়াদা ঈশিং পুরকখি। মসিনা ঈশিং ফংনবা নুমিৎ খুদিংগী লান্থেংনরিবা ইমুং মনুংগী মীওইশিংদা অচৌবা মতেং ওইখি।

মরুপশিং,

মমাং থাদা ঐহাক্না য়াম্না নুংঙাইবা থৌদোক অমা থেংনখি। মসি 'মন কী বাত'গা মরী লৈনৈ। মরম অদুনা ঐহাক্না ঙসি অদোমগা লোয়ননা খন্ন-নৈনবা পাম্মি। তামিল নাদুগী নাগরকোইলদা ঐহাক্না ওজা অমা থেংনখি। ঐহাক্না মহাক্কা চহী তরাগী খুজিং কয়াগী মমাংদা উনখি। ঐনা গিরিজা অম্মা জীগী মরমদা ঙাংলি। মীফম অদুদা নহা ওইরিবা মহৈরোয় খরসু মহাক্কা লোয়ননা লৈখি।

মরুপশিং,

গিরিজা অম্মা জীনা স্কুল ১৫ রোম চলাইরি। মসিগী মরক্তা চেন্নাইদা লৈবা জয়গোপাল গারোদিয়া হিন্দু বিদ্যালয় অসি য়াম্না মরুওই। মহাক্কী লৈবাক নুংশিবগী ইথিলনা অসিনা ভারত মচা খুদিংমকপু পুক্নিং থৌগৎলি। 'মন কী বাত'তগী ইথিল লৌরদুনা মহাক্না লৈবাক অসিদা লৈরিবা লান্মী কয়াদা মতেং পাংনবা ৱাশক লৌখি। মসি পাংথোক্নবগীদমক, মহাক্না মহাক্কী স্কুল পুম্নমক্কী মহৈরোইশিংদা ইথিল পীখি। মহাক্না অঙাংশিংদা থৌনা ফরবা লান্মীশিংগীদমক নোংমদা লুপা অমা তুশিন্নবা হায়খি। মসিনা তাক্লিবদি মহৈরোয় খুদিংমক্না চহি অমদা লুপা ৩৬৫ তুংশিনখি। অসিগুম্বা অপীকপা কন্ত্রিব্যুসনশিংগী খুত্থাংদা চাউরাক্না লুপা লাখ ৪০ খোমগৎপা ঙমখি। গিরিজা অম্মানা ঐঙোন্দা শেনফম অসিগী চেক অমা পীখি। ঐহাক্না মহাক্কা ৱারী শানবা মতম, ভারতকী ইমাগীদমক মহাক্না কয়া য়াম্না কত্থোকপগে হায়বদু ঐহাক্না খংখি।

হৌখিবা চহি খক্তদা, চেন্নাইগী অহানবা হিন্দু স্কুলনা মাগী চহি ৫০শুবা মপোক কুমওন পাংথোকখি। লৈবাক অসিগী এজুকেসন অমসুং নাৎকী চাউথোকচবা অদু হেনগৎহনবদা হায়রিবা স্কুল নেৎৱার্ক অসিনা লৌরিবা থৌদাং অসি থাগৎনিংঙাইনি। থৌদাং লৌখিবা পুম্নমকপু ঐনা থাগৎপা ফোংদোকচরি অমসুং মরুওইনা ঐখোয়গী থৌনা ফরবা লান্মীশিংগীদমক থৌদাং লৌখিবা মহৈরোইশিংবু থাগৎপা ফোংদোকচরি। মরুপশিং, ভারতকী খুঙ্গং অমসুং শহর খুদিংমক্তা, করিগুম্বা অমা নৎত্রগা অমবু ঐখোয়দা পুক্নিং থৌগৎলি। অয়াম্বা মতমদা, মসিগী হোৎনরিবশিং অসি পাক শন্না নৈনদে, অদুবু ঐখোয়না মখোয়শিং অসি খঙলকপা মতমদা, লৈবাক অসিনা মাগী মীয়ামগী পাঙ্গলনা মাংলোমদা চংশিল্লি হায়বা ঐখোয়গী থাজবা অসি হেন্না মপাঙ্গল কনখৎলকই। অসিগুম্বা হোৎনবা অসি য়েংনবা ঐহাক্না অদোমদা হায়জরি। খুন্নাইগীদমক্তা অফবা থবক তৌরিবা মীওইশিংবু মশক খঙদোকউ, মখোয়বু থাগৎপীয়ু, মখোয়দগী তমশিনবীয়ু, অমসুং ওইথোকপা তারবদি, অফবা মরম অমগীদমক শরুক অমা ওইবিয়ু। ঐহাক্না মথং থাদা অমুক হন্না "মন কী বাত"তা অদোমগা লোয়ননা ইনোৎ হাপ্পা ৱারীশিংগা লোয়ননা শরুক য়াগনি। ময়ামবু হন্না-হন্না থাগৎচরি। খুরুজরি।

*****