ಗ್ರಾಹಕ ಸಂರಕ್ಷಣಾ ಕಾಯ್ದೆ, 2019ರ ನಿಬಂಧನೆಗಳ ಅಡಿಯಲ್ಲಿ, ಕೇಂದ್ರೀಯ ಗ್ರಾಹಕ ಸಂರಕ್ಷಣಾ ಪ್ರಾಧಿಕಾರವು (CCPA) ಡಿಜಿಟಲ್ ವೇದಿಕೆಗಳಲ್ಲಿ ಅಪಾಯಕಾರಿ ರಾಸಾಯನಿಕಗಳು, ಸ್ಫೋಟಕ ವಸ್ತುಗಳು ಮತ್ತು ಸಂಬಂಧಿತ ಪೂರ್ವಗಾಮಿಗಳ (ಪ್ರಿಕ್ಯೂಸರ್ಸ್) ಅನಧಿಕೃತ ಆನ್ ಲೈನ್ ಮಾರಾಟ ಮತ್ತು ಜಾಹೀರಾತುಗಳ ವಿರುದ್ಧ ನಿಯಂತ್ರಕ ಕ್ರಮವನ್ನು ಪ್ರಾರಂಭಿಸಿದೆ. ಈ ಕ್ರಮವು ಗ್ರಾಹಕರ ಸುರಕ್ಷತೆ, ಸಾರ್ವಜನಿಕ ಭದ್ರತೆ ಮತ್ತು ಜವಾಬ್ದಾರಿಯುತ ಇ-ಕಾಮರ್ಸ್ ಪದ್ಧತಿಗಳನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ. ಕೆಳಗಿನವುಗಳು ಸೇರಿದಂತೆ ವಿವಿಧ ವೇದಿಕೆಗಳಲ್ಲಿ ಅಪಾಯಕಾರಿ ಮತ್ತು ನಿಯಂತ್ರಿತ ವಸ್ತುಗಳ ಆನ್ ಲೈನ್ ಪಟ್ಟಿ ಮತ್ತು ಮಾರಾಟದ ಕುರಿತಾದ ಮಾಹಿತಿಯ ಹಿನ್ನೆಲೆಯಲ್ಲಿ CCPA ಈ ಕ್ರಮವನ್ನು ಕೈಗೊಂಡಿದೆ: 

• ಇಂಡಿಯಾಮಾರ್ಟ್, 
• ಜಸ್ಟ್ ಡಯಲ್, 
• ಸಿಗ್ಮಾ-ಆಲ್ಡ್ರಿಚ್ ಇಂಡಿಯಾ, 
• ಡಯಲ್4ಟ್ರೇಡ್
• ಎಕ್ಸ್ ಪೋರ್ಟರ್ಸ್ಇಂಡಿಯಾ

ಗುರುತಿಸಲಾದ ವಸ್ತುಗಳಲ್ಲಿ ಸ್ಫೋಟಕ ಪೂರ್ವಗಾಮಿಗಳು ಮತ್ತು ಅಪಾಯಕಾರಿ ರಾಸಾಯನಿಕಗಳು ಸೇರಿವೆ, ಇವುಗಳನ್ನು ಸರಿಯಾದ ಸುರಕ್ಷತಾ ಕ್ರಮಗಳು ಮತ್ತು ಪರಿಶೀಲನಾ ಕಾರ್ಯವಿಧಾನಗಳಿಲ್ಲದೆ ಮಾರಾಟ ಮಾಡಿದರೆ ಸಾರ್ವಜನಿಕ ಸುರಕ್ಷತೆ ಮತ್ತು ರಾಷ್ಟ್ರೀಯ ಭದ್ರತೆಗೆ ಗಂಭೀರ ಅಪಾಯಗಳನ್ನು ಉಂಟುಮಾಡಬಹುದು. ಅಂತಹ ಅಪಾಯಕಾರಿ ವಸ್ತುಗಳಿಗೆ ಅನಧಿಕೃತ ಆನ್ ಲೈನ್ ಪ್ರವೇಶವು ಗ್ರಾಹಕರನ್ನು ಗಂಭೀರ ಸುರಕ್ಷತಾ ಅಪಾಯಗಳಿಗೆ ಮತ್ತು ಕಾನೂನುಬಾಹಿರ ಪೂರೈಕೆ ಮಾರ್ಗಗಳಿಗೆ ಒಡ್ಡಬಹುದು.

ಆನ್ ಲೈನ್ ವೇದಿಕೆಗಳಿಗೆ ನೋಟಿಸ್ ಜಾರಿ

ಸಂಬಂಧಿತ ಇ-ಕಾಮರ್ಸ್ ಸಂಸ್ಥೆಗಳು ಮತ್ತು ಆನ್ ಲೈನ್ ವೇದಿಕೆಗಳಿಗೆ ಸಿಸಿಪಿಎ (CCPA) ನೋಟಿಸ್ ಗಳನ್ನು ಜಾರಿಗೊಳಿಸಿದ್ದು, ಈ ಕೆಳಗಿನ ವಿವರಗಳನ್ನು ಕೋರಿದೆ:

• ಮಾರಾಟಗಾರರ ಮಾಹಿತಿ ಮತ್ತು ಪರವಾನಗಿ ಅನುಸರಣೆ
• ಖರೀದಿದಾರರ ಪರಿಶೀಲನಾ ಕಾರ್ಯವಿಧಾನಗಳು
• ಮಾರಾಟವಾದ ಪ್ರಮಾಣಗಳು
• ಆಮದು ವಿವರಗಳು
• ಅನ್ವಯವಾಗುವ ನಿಯಂತ್ರಕ ಅನುಮೋದನೆಗಳು

ಪ್ರಾಥಮಿಕ ಪರಿಶೀಲನೆಯ ಸಮಯದಲ್ಲಿ, ಆನ್ಲೈನ್ನಲ್ಲಿ ಪಟ್ಟಿ ಮಾಡಲಾದ ಅಥವಾ ಜಾಹೀರಾತು ಮಾಡಲಾದ ಹಲವಾರು ಅಪಾಯಕಾರಿ ರಾಸಾಯನಿಕಗಳು ಮತ್ತು ಸ್ಫೋಟಕ ವಸ್ತುಗಳನ್ನು ಸಾರ್ವಜನಿಕ ಸುರಕ್ಷತೆ ಮತ್ತು ಅಪಾಯಕಾರಿ ವಸ್ತುಗಳ ನಿರ್ವಹಣೆಯನ್ನು ನಿಯಂತ್ರಿಸುವ ವಿವಿಧ ಕಾನೂನುಗಳು ಮತ್ತು ನಿಯಂತ್ರಕ ಚೌಕಟ್ಟುಗಳ ಅಡಿಯಲ್ಲಿ ನಿಯಂತ್ರಿಸಲಾಗಿದೆ, ನಿರ್ಬಂಧಿಸಲಾಗಿದೆ, ನಿಯಂತ್ರಣದಲ್ಲಿಡಲಾಗಿದೆ ಅಥವಾ ನಿಷೇಧಿಸಲಾಗಿದೆ ಎಂದು ಸಿಸಿಪಿಎ (CCPA) ಗಮನಿಸಿದೆ.

ಅಂತಹ ವಸ್ತುಗಳ ಪಟ್ಟಿ, ಜಾಹೀರಾತು ಅಥವಾ ಮಾರಾಟವನ್ನು ಅನುಮತಿಸುವ ಮೊದಲು ಆನ್ಲೈನ್ ವೇದಿಕೆಗಳು ಮತ್ತು ಮಧ್ಯವರ್ತಿಗಳು ಸರಿಯಾದ ಎಚ್ಚರಿಕೆ ವಹಿಸಬೇಕು ಮತ್ತು ಅನ್ವಯವಾಗುವ ಎಲ್ಲಾ ಕಾನೂನು ಮತ್ತು ನಿಯಂತ್ರಕ ಅವಶ್ಯಕತೆಗಳ ಕಟ್ಟುನಿಟ್ಟಾದ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ಪ್ರಾಧಿಕಾರವು ಒತ್ತಿಹೇಳಿದೆ.

ಪರಿಶೀಲನೆಯಲ್ಲಿರುವ ಅಪಾಯಕಾರಿ ವಸ್ತುಗಳು

ನೋಟಿಸ್ ಗಳು ಈ ಕೆಳಗಿನಂತಹ ನಿಯಂತ್ರಿತ ಮತ್ತು ಅಪಾಯಕಾರಿ ಉತ್ಪನ್ನಗಳ ಆನ್‌ಲೈನ್ ಮಾರಾಟ, ಪಟ್ಟಿ, ಜಾಹೀರಾತು ಅಥವಾ ಸೌಲಭ್ಯಕ್ಕೆ ಸಂಬಂಧಿಸಿವೆ: 

• ಅಮೋನಿಯಂ ನೈಟ್ರೇಟ್ 
• ಗನ್ ಪೌಡರ್ 
• ಪಿಕ್ರಿಕ್ ಆಮ್ಲ 
• ಪೆಂಟಾಎರಿಥ್ರಿಟಾಲ್ ಟೆಟ್ರಾನೈಟ್ರೇಟ್

ತನ್ನ ಜಾರಿ ಪ್ರಯತ್ನಗಳ ಮುಂದುವರಿಕೆಯಾಗಿ, ನಿಯಂತ್ರಿತ ಮತ್ತು ಸಂಭಾವ್ಯ ಅಪಾಯಕಾರಿ ವಸ್ತುಗಳನ್ನು ಒಳಗೊಂಡಿರುವ ಸಮಾನ ಉಲ್ಲಂಘನೆಗಳಿಗೆ ಸಂಬಂಧಿಸಿದಂತೆ ಸಿಸಿಪಿಎ (CCPA) ವಿವಿಧ ಸಂಸ್ಥೆಗಳಿಗೆ ಒಟ್ಟು ಎಂಟು ನೋಟಿಸ್ ಗಳನ್ನು ಜಾರಿಗೊಳಿಸಿದೆ.

ಪೆಸೊ (PESO) ನೊಂದಿಗೆ ಸಮನ್ವಯತೆ

ಸಮನ್ವಯಿತ ನಿಯಂತ್ರಣ ಕ್ರಮದ ಭಾಗವಾಗಿ, ಅಪಾಯಕಾರಿ ಮತ್ತು ಸ್ಫೋಟಕ ವಸ್ತುಗಳನ್ನು ನಿಯಂತ್ರಿಸುವ ಪ್ರಸ್ತುತ ಚೌಕಟ್ಟನ್ನು ಪರಿಶೀಲಿಸಲು ಸಿಸಿಪಿಎ (CCPA) ಪೆಟ್ರೋಲಿಯಂ ಮತ್ತು ಸ್ಫೋಟಕಗಳ ಸುರಕ್ಷತಾ ಸಂಸ್ಥೆ (PESO) ಯ ಅಧಿಕಾರಿಗಳೊಂದಿಗೆ ಸಭೆಯನ್ನು ಸಹ ನಡೆಸಿತು.

ಇ-ಕಾಮರ್ಸ್ ಸಂಸ್ಥೆಗಳು ಒದಗಿಸಿದ ಈ ವೇದಿಕೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮಾರಾಟಗಾರರ ಪಟ್ಟಿಯನ್ನು ಅನ್ವಯವಾಗುವ ಕಾನೂನುಗಳು ಮತ್ತು ನಿಯಂತ್ರಕ ನಿಬಂಧನೆಗಳ ಅಡಿಯಲ್ಲಿ ಅಗತ್ಯ ಕ್ರಮ ಕೈಗೊಳ್ಳಲು ಪೆಸೊ (PESO) ನೊಂದಿಗೆ ಹಂಚಿಕೊಳ್ಳಲಾಗಿದೆ.

ಅಪಾಯಕಾರಿ ಉತ್ಪನ್ನಗಳ ಪಟ್ಟಿಯನ್ನು ತೆಗೆದುಹಾಕಲು ಆರಂಭಿಸಿದ ವೇದಿಕೆಗಳು

ಸಿಸಿಪಿಎ (CCPA) ಕೈಗೊಂಡ ಮಧ್ಯಸ್ಥಿಕೆ ಮತ್ತು ಜಾರಿ ಕ್ರಮಗಳ ನಂತರ, ಹಲವಾರು ಆನ್ ಲೈನ್ ವೇದಿಕೆಗಳು ಮತ್ತು ಸಂಸ್ಥೆಗಳು ಅಪಾಯಕಾರಿ ರಾಸಾಯನಿಕಗಳು ಮತ್ತು ಸ್ಫೋಟಕ ವಸ್ತುಗಳಿಗೆ ಸಂಬಂಧಿಸಿದ ಪಟ್ಟಿಗಳನ್ನು ತೆಗೆದುಹಾಕಲು, ನಿರ್ಬಂಧಿಸಲು, ನಿಯಂತ್ರಿಸಲು ಅಥವಾ ಪಟ್ಟಿಯಿಂದ ಕೈಬಿಡಲು  ಪ್ರಾರಂಭಿಸಿವೆ. ಅನ್ವಯವಾಗುವ ಕಾನೂನುಗಳು ಮತ್ತು ಗ್ರಾಹಕ ಸುರಕ್ಷತಾ ಮಾನದಂಡಗಳನ್ನು ಉಲ್ಲಂಘಿಸಿ, ನಿಯಂತ್ರಿತ ಅಥವಾ ಅಪಾಯಕಾರಿ ವಸ್ತುಗಳನ್ನು ಅನಧಿಕೃತವಾಗಿ ಪಡೆಯಲು ಡಿಜಿಟಲ್ ಮಾರುಕಟ್ಟೆಗಳು ಸಹಕಾರಿಯಾಗದಂತೆ ನೋಡಿಕೊಳ್ಳುವ ಸರ್ಕಾರದ ಬದ್ಧತೆಯನ್ನು ಈ ಕ್ರಮವು ಬಲಪಡಿಸುತ್ತದೆ.

ಗ್ರಾಹಕರ ಹಕ್ಕುಗಳನ್ನು ರಕ್ಷಿಸಲು, ಸುರಕ್ಷಿತ ಡಿಜಿಟಲ್ ಮಾರುಕಟ್ಟೆಗಳನ್ನು ಖಚಿತಪಡಿಸಿಕೊಳ್ಳಲು, ಅನ್ಯಾಯದ ವ್ಯಾಪಾರ ಪದ್ಧತಿಗಳನ್ನು ತಡೆಗಟ್ಟಲು ಮತ್ತು ವೇಗವಾಗಿ ವಿಕಸನಗೊಳ್ಳುತ್ತಿರುವ ಇ-ಕಾಮರ್ಸ್ ವ್ಯವಸ್ಥೆಯಲ್ಲಿ ಗ್ರಾಹಕರ ವಿಶ್ವಾಸವನ್ನು ಬಲಪಡಿಸಲು ಸಿಸಿಪಿಎ (CCPA) ಬದ್ಧವಾಗಿದೆ.

*****