مرکزی وزیر تعلیم جناب دھرمیندر پردھان نے آج پبلک سیکٹر کے چار بڑے بینکوں- اسٹیٹ بینک آف انڈیا (ایس بی آئی) بینک آف بڑودہ ، کینرا بینک اور انڈین بینک کے سینئر عہدیداروں کے ساتھ سنٹرل بورڈ آف سیکنڈری ایجوکیشن (سی بی ایس ای) پیمنٹ گیٹ وے سسٹم کی از سر نو  بحالی کے حوالے سے تفصیلی بات چیت کی ۔

میٹنگ کے دوران ، وزیر موصوف نے ایک مضبوط ، قابل اعتماد اور طلباء کے موافق ادائیگی کے نظام کی ضرورت پر زور دیا ، اور  خاص طور پر امتحان کے بعد کی خدمات جیسے دوبارہ تشخیص ، جوابی کاپیوں کی فوٹو کاپی حاصل کرنے اور فیس پر مبنی دیگر عمل کے لیے  اسے ضروری قرار دیا۔

انہوں نے بینکوں کو ہدایت کی کہ وہ بروقت لین دین ، ادائیگی سے متعلق مسائل کے فوری حل اور اضافی یا ادائیگی نہ ہونے کی صورت  میں ازخود  رقم واپسی کو یقینی بنانے کے لیے مضبوط ادائیگی پروٹوکول قائم کرنے میں سی بی ایس ای کی مدد کریں ۔   بینکوں سے یہ بھی کہا گیا ہے کہ وہ جدید تکنیکی حفاظتی اقدامات،  حقیقی وقت کی نگرانی اور شکایات کے ازالے کے تیز میکانزم کے ذریعے پیمنٹ گیٹ وے کے بنیادی ڈھانچے کو مضبوط بنانے کے لیے سی بی ایس ای کے ساتھ مل کر کام کریں ۔

جناب پردھان نے سینئر حکام پر زور دیا کہ وہ اس پہل کو سب سے زیادہ ترجیح دیں،  تاکہ اس بات کو یقینی بنایا جا سکے کہ طلباء کو مستقبل میں تکنیکی خرابیوں یا ادائیگی کی ناکامیوں کا سامنا نہ کرنا پڑے ۔  انہوں نے بینکوں پر زور دیا کہ وہ ہموار ، محفوظ اور مؤثر ڈیجیٹل لین دین کو یقینی بنائیں ۔

میٹنگ میں چاروں بینکوں نے مکمل تعاون کا یقین دلایا اور سی بی ایس ای کے ساتھ تال میل کے ساتھ بہتر پروٹوکول اور تکنیکی اپ گریڈ کو جلد از جلد نافذ کرنے کا عہد کیا ۔

اس سے قبل 24 مئی 2026 کو جناب پردھان نے مرکزی وزیر خزانہ محترمہ نرملا سیتا رمن کے ساتھ بات چیت کی تھی ۔  جس میں انہوں نے سی بی ایس ای کے نتائج کے بعد اور دوبارہ تشخیص کے عمل کے دوران طلبا کو درپیش حالیہ ادائیگی اور تکنیکی مسائل کے بارے میں بتایا  تھا۔

........................................

) ش ح –م  م ع-ق ر)

U.No. 7582