અમદાવાદ, ગુજરાત 4 થી 8 જૂન દરમિયાન પ્રથમ વર્લ્ડ યોગાસન ચેમ્પિયનશિપનું આયોજન કરશે, જે દર્શાવે છે કે આ વૈશ્વિક ઈવેન્ટનું આયોજન પ્રથમ વખત થઈ રહ્યું છે. ચેમ્પિયનશિપ દરમિયાન 12 ઈવેન્ટ્સમાં 75 દેશોના 500 થી વધુ સહભાગીઓ ભાગ લે તેવી અપેક્ષા છે.

ચેમ્પિયનશિપ પૂર્વે સભાને સંબોધતા કેન્દ્રીય યુવા બાબતો અને રમતગમત મંત્રી મનસુખ માંડવિયાએ જણાવ્યું હતું કે, “ભારતે દ્વારા વિશ્વને યોગની ભેટ આપવામાં આવી છે. તે 5,000 વર્ષ પહેલાં આપણા દેશમાં શોધાયેલો એક અમૂલ્ય ખજાનો છે.”

યોગના મહત્વ પર પ્રકાશ પાડતા મંત્રીશ્રીએ જણાવ્યું હતું કે, “યોગ આપણને શરીર અને મન બંનેની શક્તિ આપે છે,” સાથે જ તેમણે ભારપૂર્વક જણાવ્યું હતું કે યોગ હવે સારા સ્વાસ્થ્યથી આગળ વધીને વૈશ્વિક સ્તરે સ્વીકૃત રમત તરીકે વિકસિત થયો છે.

યોગની વધતી જતી આંતરરાષ્ટ્રીય સ્વીકૃતિ વિશે વાત કરતા ડૉ. માંડવિયાએ કહ્યું કે, “વિશ્વના તમામ દેશોએ યોગનો સ્વીકાર કરવાનું અને તેને તેમના જીવનનો એક ભાગ બનાવવાનું શરૂ કરી દીધું છે.” તેમણે નોંધ્યું કે ભારતનું જ્ઞાન અને યોગની પરંપરા દેશના દરેક ઘર અને શેરીમાં અસ્તિત્વ ધરાવે છે.

યોગના વિસ્તરતા પ્રભાવને રેખાંકિત કરતા મંત્રીશ્રીએ જણાવ્યું હતું કે, “યોગાસન આજે માત્ર શારીરિક અને માનસિક સુખાકારીનો માર્ગ નથી, પરંતુ તે આજીવિકાનો એક વધતો જતો સ્ત્રોત અને વિશ્વભરમાં ભારતની સોફ્ટ પાવરનું એક શક્તિશાળી પ્રતીક પણ છે.”

મંત્રીશ્રીએ જણાવ્યું હતું કે આ ચેમ્પિયનશિપ ભારત માટે વૈશ્વિક સ્તરે પોતાની સોફ્ટ પાવર પ્રદર્શિત કરવાની એક મોટી તક રજૂ કરે છે.

મંત્રીશ્રીએ વધુમાં ઉમેર્યું હતું કે ફેડરેશને હવે યોગાસનને આંતરરાષ્ટ્રીય રમત તરીકે માન્યતા અપાવવા માટે ઇન્ટરનેશનલ ઓલિમ્પિક કાઉન્સિલના માળખા સાથે રજીસ્ટ્રેશન (નોંધણી) મેળવવા તરફ કામ કરવું જોઈએ.

2036ની ઓલિમ્પિકની યજમાની માટે ભારતની દાવેદારીનો ઉલ્લેખ કરતા ડૉ. માંડવિયાએ જણાવ્યું હતું કે, “જે દેશમાં યોગનો ઉદ્ભવ થયો છે તે દેશ જ્યારે 2036માં ઓલિમ્પિક ગેમ્સની યજમાની કરવાની તૈયારી કરી રહ્યો છે, ત્યારે અમે વિશ્વ મંચ પર પ્રથમ વખત યોગાસનને ઓલિમ્પિક રમત તરીકે સ્થાપિત કરવા માટે પણ તમામ પ્રયાસો કરીશું.”

SM/DK/JD