মেঘালয়ৰ কেবিনেট মন্ত্ৰী আৰু ৰাজ্যিক প্ৰকল্পৰ ভাৰপ্ৰাপ্ত অধ্যক্ষ আলেকজেণ্ডাৰ লালু হেকে আজি কেন্দ্ৰীয় বিজ্ঞান আৰু প্ৰযুক্তি, ভূবিজ্ঞানৰ ৰাজ্য মন্ত্ৰী (স্বতন্ত্ৰ দায়িত্ব) তথা প্ৰধানমন্ত্ৰী কাৰ্যালয়, কৰ্মচাৰী, ৰাজহুৱা অভিযোগ, পেন্সন, পাৰমাণৱিক শক্তি আৰু মহাকাশৰ ৰাজ্য মন্ত্ৰী জিতেন্দ্ৰ সিঙক সাক্ষাৎ কৰি  উত্তৰ-পূৰ্বাঞ্চলৰ জনজাতীয় সম্প্ৰদায়ৰ বাবে বিজ্ঞান, প্ৰযুক্তি আৰু উদ্ভাৱন (এছ টি আই) শক্তিশালী কৰাৰ ওপৰত বিশদ আলোচনা কৰে।

এই আলোচনাত ভাৰত চৰকাৰৰ বিজ্ঞান আৰু প্ৰযুক্তি বিভাগ (ডিএছটি) ৰ দ্বাৰা ৰূপায়ণ কৰা বিজ্ঞান, প্ৰযুক্তি তথা উদ্ভাৱন (এছটিআই) হাবসমূহৰ পৰিসৰ সম্প্ৰসাৰণৰ ওপৰত গুৰুত্ব আৰোপ কৰা হয়, যাতে বিজ্ঞান ভিত্তিক হস্তক্ষেপ আৰু প্ৰযুক্তি-সক্ষম জীৱিকা সমৰ্থনৰ জৰিয়তে অনুসূচীত জনজাতি সম্প্ৰদায়ৰ সামগ্ৰিক বিকাশ ঘটে।

ড০ জিতেন্দ্ৰ সিঙে কয় যে প্ৰধানমন্ত্ৰী নৰেন্দ্ৰ মোদীৰ নেতৃত্বত চৰকাৰে দেশৰ দূৰৱৰ্তী, জনজাতীয় আৰু পিছ পৰা অঞ্চলসমূহত বিজ্ঞান আৰু প্ৰযুক্তিৰ লাভালাভ নিশ্চিত কৰাৰ দিশত নিৰন্তৰভাৱে কাম কৰি আহিছে। তেওঁ গুৰুত্ব আৰোপ কৰি কয় যে উদ্ভাৱন-চালিত উদ্যোগসমূহে জনজাতীয় অঞ্চলসমূহত জীৱিকাৰ সুযোগ, দক্ষতা বিকাশ, তৃণমূল উদ্যোগশীলতা আৰু জীৱনৰ মান উন্নত কৰাত এক পৰিৱৰ্তনমূলক ভূমিকা পালন কৰিব পাৰে।

মত বিনিময়ৰ সময়ত ড০ জিতেন্দ্ৰ সিঙে ব্যাখ্যা কৰে যে বৈজ্ঞানিক প্ৰতিষ্ঠান, স্থানীয় অংশীদাৰ আৰু সামূহিক নেটৱৰ্কসমূহক জড়িত কৰি সহযোগিতামূলক অংশীদাৰিত্বৰ জৰিয়তে জনজাতীয় অঞ্চলসমূহত প্ৰযুক্তিৰ সমাধান প্ৰদান আৰু গ্ৰহণৰ ক্ষেত্ৰত শেষ সীমাৰ প্ৰত্যাহ্বানসমূহৰ মোকাবিলা কৰাৰ বাবে এছ টি আই হাব উদ্যোগটো প্ৰস্তুত কৰা হৈছে। এই উদ্যোগটোৱে তৃণমূল পৰ্যায়ৰ উদ্ভাৱন, সামৰ্থ্য নিৰ্মাণ আৰু আঞ্চলিক প্ৰয়োজনীয়তাৰ সৈতে খাপ খোৱা স্থানীয়ভাৱে প্ৰাসংগিক প্ৰযুক্তিৰ প্ৰয়োগকো উৎসাহিত কৰে।

মন্ত্ৰীগৰাকীয়ে লগতে কয় যে বিজ্ঞান আৰু প্ৰযুক্তি বিভাগে কেইবাটাও জনজাতীয় আৰু উত্তৰ-পূৰ্বাঞ্চলকে ধৰি বিভিন্ন ৰাজ্য তথা কেন্দ্ৰীয় শাসিত অঞ্চলত ৫৩ টা এছ টি আই হাব স্থাপন কৰিছে, যাৰ উদ্দেশ্য হৈছে বৈজ্ঞানিক উদ্ভাৱনক পোনপটীয়াকৈ সামূহিক বিকাশ আৰু বহনক্ষম জীৱিকা সৃষ্টিৰ সৈতে সংযোগ কৰা।

আলেকজেণ্ডাৰ লালু হেকে ড০ জিতেন্দ্ৰ সিঙক মেঘালয় আৰু উত্তৰ-পূৰ্বাঞ্চলৰ উদ্ভাৱন-নেতৃত্বাধীন সামূহিক উন্নয়নমূলক পদক্ষেপসমূহৰ ব্যাপক ৰূপায়ণৰ অপৰিসীম সম্ভাৱনাৰ বিষয়ে অৱগত কৰে। এই আলোচনাত অঞ্চলটোত এছ টি আই-আধাৰিত কাৰ্যসূচীসমূহৰ অধিক প্ৰসাৰৰ বাবে কেন্দ্ৰীয় বৈজ্ঞানিক সংস্থা আৰু স্থানীয় অংশীদাৰসকলৰ মাজত প্ৰতিষ্ঠানিক সংযোগ শক্তিশালী কৰাৰ সম্ভাৱনাও অন্বেষণ কৰা হয়।

ড০ জিতেন্দ্ৰ সিঙে এছ টি আই হাব প্ৰচেষ্টাত উত্তৰ-পূৰ্বাঞ্চলৰ ৰাজ্যসমূহৰ অধিক অংশগ্ৰহণক উৎসাহিত কৰে আৰু ভৱিষ্যতৰ সহযোগিতা তথা সম্প্ৰসাৰণৰ বাবে বিজ্ঞান আৰু প্ৰযুক্তি বিভাগৰ সংশ্লিষ্ট বিষয়াসকলৰ সৈতে সমন্বয় ৰক্ষা কৰি আঁচনিখনৰ অধীনত বিতং প্ৰস্তাৱৰ লগতে কাৰ্যসূচীৰ উপাদানসমূহ অধিক পৰীক্ষা কৰাৰ পৰামৰ্শ দিয়ে।

মেঘালয়ৰ মন্ত্ৰীগৰাকীয়ে ড০ জিতেন্দ্ৰ সিঙক সমাগত জনকল্যাণ আৰু উন্নয়নমূলক পদক্ষেপ সন্দৰ্ভত ৰাজ্যখন ভ্ৰমণ কৰিবলৈ আমন্ত্ৰণ জনায়।

 

*****

NKR/AK/NM/MK

(ৰিলিজ আই ডি : 2265230) অতিথি কক্ষ : 7