ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ತನ್ನ ‘ಪೈಮಾನಾ’ ಪ್ಲಾಟ್‌ಫಾರ್ಮ್ ಮೂಲಕ ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಮೇಲ್ವಿಚಾರಣೆಯನ್ನು ಬಲಪಡಿಸುವುದನ್ನು ಮುಂದುವರೆಸಿದೆ. ಇದು ವಿವಿಧ ಸಚಿವಾಲಯಗಳಲ್ಲಿ ಸುಧಾರಿತ ಟ್ರ್ಯಾಕಿಂಗ್, ಸಕಾಲಿಕ ಪರಾಮರ್ಶೆಗಳು ಮತ್ತು ದತ್ತಾಂಶ ಆಧಾರಿತ ನಿರ್ಧಾರ ಕೈಗೊಳ್ಳುವಿಕೆಯನ್ನು ಸಶಕ್ತಗೊಳಿಸಿದೆ. ಈ ಪೋರ್ಟಲ್ ಏಪ್ರಿಲ್ 2026 ರ ಹೊತ್ತಿಗೆ ₹42.78 ಲಕ್ಷ ಕೋಟಿ ಮೌಲ್ಯದ 1,981 ಮೂಲಸೌಕರ್ಯ ಯೋಜನೆಗಳನ್ನು ಮೇಲ್ವಿಚಾರಣೆ ಮಾಡುತ್ತಿದೆ.

ಮುಖ್ಯಾಂಶಗಳು

• ಏಪ್ರಿಲ್ 2026ರ ಹೊತ್ತಿಗೆ, 17 ಕೇಂದ್ರ ಸಚಿವಾಲಯಗಳು/ಇಲಾಖೆಗಳ ಅಡಿಯಲ್ಲಿ ಒಟ್ಟು ₹42.78 ಲಕ್ಷ ಕೋಟಿ ಪರಿಷ್ಕೃತ ವೆಚ್ಚದ 1,981 ಚಾಲ್ತಿಯಲ್ಲಿರುವ ಮೂಲಸೌಕರ್ಯ ಯೋಜನೆಗಳನ್ನು ಮೇಲ್ವಿಚಾರಣೆ ಮಾಡಲಾಗುತ್ತಿದೆ. ಈ ಯೋಜನೆಗಳ ಮೇಲೆ ಭರಿಸಲಾದ ಸಂಚಿತ ವೆಚ್ಚವು ₹20.36 ಲಕ್ಷ ಕೋಟಿಯಾಗಿದ್ದು, ಇದು ಪರಿಷ್ಕೃತ ಯೋಜನಾ ವೆಚ್ಚದ ಸರಿಸುಮಾರು ಶೇಕಡಾ 47.59 ರಷ್ಟಾಗಿದೆ, ಇದು ಯೋಜನೆ ಅನುಷ್ಠಾನದಲ್ಲಿನ ಸ್ಥಿರ ಪ್ರಗತಿಯನ್ನು ಸೂಚಿಸುತ್ತದೆ.
• ಯೋಜನೆಗಳ ಗಮನಾರ್ಹ ಪ್ರಮಾಣವು ಮುಂದುವರಿದ ಹಂತಗಳಲ್ಲಿದೆ; 801 ಯೋಜನೆಗಳು (~40%) ಶೇಕಡಾ 80 ಕ್ಕಿಂತ ಹೆಚ್ಚು ಭೌತಿಕ ಪ್ರಗತಿಯನ್ನು ಸಾಧಿಸಿದ್ದರೆ, 277 ಯೋಜನೆಗಳು (~14%) ಶೇಕಡಾ 80 ಕ್ಕಿಂತ ಹೆಚ್ಚು ಹಣಕಾಸಿನ ಪೂರ್ಣತೆಯನ್ನು ದಾಟಿವೆ. ಈ ದತ್ತಾಂಶವು ಸಮತೋಲಿತ ಪೈಪ್‌ಲೈನ್ ಅನ್ನು ಸಹ ಪ್ರತಿಫಲಿಸುತ್ತದೆ, ಯೋಜನೆಗಳು ಅನುಷ್ಠಾನದ ಆರಂಭಿಕ ಮತ್ತು ಮುಂದುವರಿದ ಹಂತಗಳಲ್ಲಿ ಹಂಚಿಕೆಯಾಗಿವೆ.
• ಸಾರಿಗೆ ಮತ್ತು ಲಾಜಿಸ್ಟಿಕ್ಸ್ ವಲಯವು (ಡಿಇಎ ಸಮನ್ವಯಗೊಂಡ ಮಾಸ್ಟರ್ ಲಿಸ್ಟ್ ಪ್ರಕಾರ) ಅತಿ ಹೆಚ್ಚು ಚಾಲ್ತಿಯಲ್ಲಿರುವ ಯೋಜನೆಗಳನ್ನು (1,459 ಯೋಜನೆಗಳು) ಹೊಂದಿದ್ದು, ಇದರ ಪರಿಷ್ಕೃತ ಅಂದಾಜು ವೆಚ್ಚ ₹23.34 ಲಕ್ಷ ಕೋಟಿಯಾಗಿದೆ. ಇದು ಸಂಪರ್ಕ ಆಧಾರಿತ ಮೂಲಸೌಕರ್ಯ ಬೆಳವಣಿಗೆಗೆ ನೀಡಲಾದ ಆದ್ಯತೆಯನ್ನು ಉಲ್ಲೇಖಿಸುತ್ತದೆ.
• ಚಾಲ್ತಿಯಲ್ಲಿರುವ 1,981 ಮೂಲಸೌಕರ್ಯ ಯೋಜನೆಗಳಲ್ಲಿ, ₹31.63 ಲಕ್ಷ ಕೋಟಿ ಮೂಲ ವೆಚ್ಚದ 814 ಮೆಗಾ ಯೋಜನೆಗಳು (₹1,000 ಕೋಟಿ ಮತ್ತು ಅದಕ್ಕಿಂತ ಹೆಚ್ಚಿನ ಯೋಜನಾ ವೆಚ್ಚ) ಮತ್ತು ₹5.49 ಲಕ್ಷ ಕೋಟಿ ಮೊತ್ತದ 1,167 ಪ್ರಮುಖ ಯೋಜನೆಗಳು (₹150 ಕೋಟಿಯಿಂದ ₹1,000 ಕೋಟಿಗಿಂತ ಕಡಿಮೆ ಯೋಜನಾ ವೆಚ್ಚ) ಸೇರಿವೆ.
• ಭೌತಿಕ ಮತ್ತು ಹಣಕಾಸಿನ ಪ್ರಗತಿಯು ವಿಶಾಲವಾಗಿ ಒಟ್ಟೊಟ್ಟಿಗೆ ಸಾಗುತ್ತಿದ್ದು, ಹೆಚ್ಚಿನ ಸಂಖ್ಯೆಯ ಯೋಜನೆಗಳು ಆರಂಭಿಕ (0–20%) ಮತ್ತು ಮುಂದುವರಿದ (81–100%) ಹಂತಗಳಲ್ಲಿ ಒಟ್ಟಾಗಿವೆ. ಇದು ಹೊಸದಾಗಿ ಪ್ರಾರಂಭಿಸಲಾದ ಯೋಜನೆಗಳು ಹಾಗೂ ಪೂರ್ಣಗೊಳ್ಳುವ ಹಂತದಲ್ಲಿರುವ ಅನೇಕ ಯೋಜನೆಗಳನ್ನು ಸೂಚಿಸುತ್ತದೆ. 81–100% ವ್ಯಾಪ್ತಿಯಲ್ಲಿ ಭೌತಿಕ ಪ್ರಗತಿಯು ಹಣಕಾಸಿನ ಪ್ರಗತಿಗಿಂತ ಹೆಚ್ಚಿದ್ದರೆ, ಆರಂಭಿಕ ಹಂತಗಳಲ್ಲಿ ಹಣಕಾಸಿನ ಪ್ರಗತಿಯು ತುಲನಾತ್ಮಕವಾಗಿ ಹೆಚ್ಚಾಗಿದೆ, ಇದು ಯೋಜನೆ ಅನುಷ್ಠಾನದಲ್ಲಿನ ಮುಂಗಡ ವೆಚ್ಚದ ಮಾದರಿಗಳನ್ನು ಪ್ರತಿಫಲಿಸುತ್ತದೆ.

2. ಮೂಲಸೌಕರ್ಯ ಯೋಜನೆಗಳ ಸಚಿವಾಲಯ/ಇಲಾಖಾವಾರು ಪ್ರಗತಿ

• ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಅತಿ ಹೆಚ್ಚು ಯೋಜನೆಗಳನ್ನು ಹೊಂದಿದ್ದು, 1,137 ಯೋಜನೆಗಳೊಂದಿಗೆ (57%) ಮತ್ತು ₹10.81 ಲಕ್ಷ ಕೋಟಿ (25%) ಒಟ್ಟು ಪರಿಷ್ಕೃತ ಯೋಜನಾ ವೆಚ್ಚದ ಅತಿ ದೊಡ್ಡ ಪಾಲನ್ನು ಹೊಂದಿದೆ, ಇದು ರಾಷ್ಟ್ರೀಯ ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ಅದರ ಪ್ರಮುಖ ಪಾತ್ರವನ್ನು ಎತ್ತಿ ತೋರಿಸುತ್ತದೆ.
• ರೈಲ್ವೆ ಸಚಿವಾಲಯವು 260 ಯೋಜನೆಗಳನ್ನು (13%) ಅನುಷ್ಠಾನಗೊಳಿಸುತ್ತಿದೆ ಮತ್ತು ₹8.69 ಲಕ್ಷ ಕೋಟಿ (20%) ಯೊಂದಿಗೆ ಒಟ್ಟು ಪರಿಷ್ಕೃತ ಯೋಜನಾ ವೆಚ್ಚದಲ್ಲಿ ಎರಡನೇ ಅತಿ ದೊಡ್ಡ ಪಾಲನ್ನು ಹೊಂದಿದೆ.
• ಕಲ್ಲಿದ್ದಲು ಸಚಿವಾಲಯವು ₹2.49 ಲಕ್ಷ ಕೋಟಿ (6%) ಒಟ್ಟು ಪರಿಷ್ಕೃತ ಯೋಜನಾ ವೆಚ್ಚದೊಂದಿಗೆ 128 ಯೋಜನೆಗಳನ್ನು (7%) ಅನುಷ್ಠಾನಗೊಳಿಸುತ್ತಿದೆ.
• ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ, ವಿದ್ಯುತ್ ಸಚಿವಾಲಯ, ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ ಹಾಗೂ ಜಲಸಂಪನ್ಮೂಲ, ನದಿ ಅಭಿವೃದ್ಧಿ ಮತ್ತು ಗಂಗಾ ಪುನಶ್ಚೇತನ ಇಲಾಖೆಗಳು ಕ್ರಮವಾಗಿ 112, 102, 51 ಮತ್ತು 48 ಯೋಜನೆಗಳನ್ನು ಅನುಷ್ಠಾನಗೊಳಿಸುತ್ತಿದ್ದು, ಇವುಗಳ ಸಂಯೋಜಿತ ಪರಿಷ್ಕೃತ ವೆಚ್ಚ ಕ್ರಮವಾಗಿ ₹₹5.19 ಲಕ್ಷ ಕೋಟಿ, ₹₹5.53 ಲಕ್ಷ ಕೋಟಿ, ₹3.75 ಲಕ್ಷ ಕೋಟಿ ಮತ್ತು ₹2.25 ಲಕ್ಷ ಕೋಟಿಯಾಗಿದೆ.
• ಉಳಿದ 143 ಯೋಜನೆಗಳು (7%), ಒಟ್ಟು ₹4.08 ಲಕ್ಷ ಕೋಟಿ (10%) ಪರಿಷ್ಕೃತ ವೆಚ್ಚದೊಂದಿಗೆ ಉನ್ನತ ಶಿಕ್ಷಣ, ನಾಗರಿಕ ವಿಮಾನಯಾನ, ಉಕ್ಕು, ದೂರಸಂಪರ್ಕ, ಕಾರ್ಮಿಕ ಮತ್ತು ಉದ್ಯೋಗ, ಬಂದರುಗಳು, ಹಡಗು ಮತ್ತು ಜಲಮಾರ್ಗಗಳು, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ, ಗಣಿ, ಡಿಪಿಐಐಟಿ ಮತ್ತು ಕ್ರೀಡೆ ಸೇರಿದಂತೆ ವಿವಿಧ ಸಚಿವಾಲಯಗಳು/ಇಲಾಖೆಗಳಲ್ಲಿ ಹಂಚಿಕೆಯಾಗಿವೆ. (ಅನುಬಂಧ ನೋಡಿ)

3. ಮೂಲಸೌಕರ್ಯ ಯೋಜನೆಗಳ ವಲಯವಾರು ಪ್ರಗತಿ (ಡಿಇಎ ಸಮನ್ವಯಗೊಂಡ ಮೂಲಸೌಕರ್ಯ ಮಾಸ್ಟರ್ ಲಿಸ್ಟ್ ಪ್ರಕಾರ)

• ಸಾರಿಗೆ ಮತ್ತು ಲಾಜಿಸ್ಟಿಕ್ಸ್ ವಲಯವು ಮುಂಚೂಣಿಯಲ್ಲೇ ಮುಂದುವರಿದಿದ್ದು, 1,459 ಯೋಜನೆಗಳಾದ್ಯಂತ (ಒಟ್ಟು ಯೋಜನೆಗಳ 74%) ಒಟ್ಟು ಪರಿಷ್ಕೃತ ವೆಚ್ಚದ 55% ರಷ್ಟನ್ನು (₹23.34 ಲಕ್ಷ ಕೋಟಿ) ಹೊಂದಿದೆ. ಇದು ಆರ್ಥಿಕ ಏಕೀಕರಣ ಮತ್ತು ಲಾಜಿಸ್ಟಿಕ್ಸ್ ದಕ್ಷತೆಯಲ್ಲಿ ರಸ್ತೆಗಳು ಮತ್ತು ಹೆದ್ದಾರಿಗಳು, ರೈಲ್ವೆ, ವಿಮಾನಯಾನ, ನಗರ ಸಾರ್ವಜನಿಕ ಸಾರಿಗೆ, ಹಡಗು ಮತ್ತು ಒಳನಾಡು ಜಲಮಾರ್ಗಗಳ ಪ್ರಮುಖ ಪಾತ್ರವನ್ನು ಒತ್ತಿಹೇಳುತ್ತದೆ.
• ಇಂಧನ ವಲಯವು 221 ಯೋಜನೆಗಳಾದ್ಯಂತ ಒಟ್ಟು ಪರಿಷ್ಕೃತ ವೆಚ್ಚದ 27% ರಷ್ಟನ್ನು (₹11.30 ಲಕ್ಷ ಕೋಟಿ) ಹೊಂದಿದ್ದು, ತೈಲ ಮತ್ತು ಅನಿಲ ಮೂಲಸೌಕರ್ಯ, ವಿದ್ಯುತ್ ಉತ್ಪಾದನೆ, ಪ್ರಸರಣ ಮತ್ತು ವಿತರಣಾ ಜಾಲಗಳು ಹಾಗೂ ಇಂಧನ ಶೇಖರಣಾ ವ್ಯವಸ್ಥೆಗಳ ಮೇಲಿನ ನಿರಂತರ ಒತ್ತು ನೀಡುವುದನ್ನು ಪ್ರತಿಫಲಿಸುತ್ತದೆ.
• ಸಂವಹನ ಮೂಲಸೌಕರ್ಯವು 12 ಯೋಜನೆಗಳಾದ್ಯಂತ ₹2.73 ಲಕ್ಷ ಕೋಟಿ (6%) ಪರಿಷ್ಕೃತ ವೆಚ್ಚದೊಂದಿಗೆ, ಡಿಜಿಟಲ್ ಸಂಪರ್ಕವನ್ನು ಬಲಪಡಿಸುವ ಗುರಿಯನ್ನು ಹೊಂದಿರುವ ಉದ್ದೇಶಿತ ಕ್ರಮಗಳನ್ನು ಪ್ರತಿನಿಧಿಸುತ್ತದೆ.
• ನೀರು ಮತ್ತು ನೈರ್ಮಲ್ಯ ಯೋಜನೆಗಳು 67 ಯೋಜನೆಗಳಾದ್ಯಂತ ₹2.30 ಲಕ್ಷ ಕೋಟಿ (5%) ಯಷ್ಟಾಗಿದ್ದು, ಅಗತ್ಯ ನಗರ ಸೇವೆಗಳ ಮೇಲಿನ ನಿರಂತರ ಗಮನವನ್ನು ಎತ್ತಿ ತೋರಿಸುತ್ತದೆ.
• ಸಾಮಾಜಿಕ ಮತ್ತು ವಾಣಿಜ್ಯ ಮೂಲಸೌಕರ್ಯವು ₹₹0.91 ಲಕ್ಷ ಕೋಟಿ (2%) ಪರಿಷ್ಕೃತ ವೆಚ್ಚದೊಂದಿಗೆ 77 ಯೋಜನೆಗಳನ್ನು ಒಳಗೊಂಡಿದ್ದು, ಶಿಕ್ಷಣ, ಆರೋಗ್ಯ, ರಿಯಲ್ ಎಸ್ಟೇಟ್ ಮತ್ತು ಪ್ರವಾಸೋದ್ಯಮ, ಆತಿಥ್ಯ ಮತ್ತು ಕ್ಷೇಮ ವಲಯದಲ್ಲಿನ ಆಯ್ದ ಹೂಡಿಕೆಗಳನ್ನು ಪ್ರತಿಫಲಿಸುತ್ತದೆ.
•  ‘ಇತರೆ’ ಅಡಿಯಲ್ಲಿ ವರ್ಗೀಕರಿಸಲಾದ ಯೋಜನೆಗಳು 145 ಯೋಜನೆಗಳಾದ್ಯಂತ ₹₹2.21 ಲಕ್ಷ ಕೋಟಿ (5%) ಮೊತ್ತವಾಗಿದ್ದು, ಕಲ್ಲಿದ್ದಲು, ಉಕ್ಕು, ಲೋಹಗಳು ಮತ್ತು ಗಣಿಗಾರಿಕೆಯಂತಹ ವಲಯಗಳಾದ್ಯಂತ ವೈವಿಧ್ಯೀಕರಣವನ್ನು ಸೂಚಿಸುತ್ತವೆ.

(ಅನುಬಂಧ II ನೋಡಿ)

4. ಪೂರ್ಣಗೊಂಡ ಯೋಜನೆಗಳು ಮತ್ತು ಹೊಸ ಸೇರ್ಪಡೆಗಳು

• ಏಪ್ರಿಲ್ 2026 ರ ಅವಧಿಯಲ್ಲಿ, ವಸತಿ ಮತ್ತು ನಗರ ವ್ಯವಹಾರಗಳು, ರೈಲ್ವೆ, ವಿದ್ಯುತ್, ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳು ಹಾಗೂ ಕಾರ್ಮಿಕ ಮತ್ತು ಉದ್ಯೋಗ ವಲಯಗಳಲ್ಲಿನ ಪ್ರಮುಖ ಆಸ್ತಿಗಳು ಸೇರಿದಂತೆ 9 ಯೋಜನೆಗಳನ್ನು ಕಾರ್ಯಾರಂಭ ಮಾಡಲಾಗಿದೆ. ಗಮನಾರ್ಹವಾಗಿ ಕಾರ್ಯಾರಂಭ ಮಾಡಲಾದ ಯೋಜನೆಗಳಲ್ಲಿ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ “ನಾಗ್ಪುರ-ರಾಯಪುರ ರಸ್ತೆ ಪಾರ್ದಿ ಆಕ್ಟ್ರಾಯ್ ನಾಕಾದಿಂದ ಇತ್ವಾರಿಗೆ ನಗರ ಲಿಂಕ್‌ ನಲ್ಲಿ ಆರ್‌ ಒ ಬಿ, ಸರ್ವಿಸ್ ರಸ್ತೆಗಳು, ಆರ್‌ ಸಿ ಸಿ ಚರಂಡಿಗಳಿಗಾಗಿ ಫುಟ್‌ಪಾತ್ ಸೇರಿದಂತೆ ಕಿಮೀ 544.650 ರಲ್ಲಿ ಫ್ಲೈಓವರ್ (₹758.4 ಕೋಟಿ)”, ವಿದ್ಯುತ್ ಸಚಿವಾಲಯದ “ರಾಜಸ್ಥಾನದ ಆರ್‌ ಇ ಝಡ್ ನಿಂದ 20 ಗಿಗಾವಾಟ್‌ ವಿದ್ಯುತ್ ಸ್ಥಳಾಂತರಿಸುವ ಪ್ರಸರಣ ವ್ಯವಸ್ಥೆ - ಹಂತ-III ಭಾಗ E1 (₹688.74 ಕೋಟಿ)” ಮತ್ತು ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ “ಜಬಲ್ಪುರ ಒಳಚರಂಡಿ ನಿರ್ವಹಣೆ ಮತ್ತು ಸಂಸ್ಕರಣಾ ಮೂಲಸೌಕರ್ಯ ಯೋಜನೆ (₹362.31 ಕೋಟಿ)” ಸೇರಿವೆ.
• ಏಪ್ರಿಲ್ 2026 ರ ಅವಧಿಯಲ್ಲಿ, ಹೆಚ್ಚುವರಿ 55 ಯೋಜನೆಗಳನ್ನು ಪೈಮಾನಾ ಮೇಲ್ವಿಚಾರಣೆಯ ಅಡಿಗೆ ತರಲಾಗಿದೆ. ಈ ಯೋಜನೆಗಳು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ, ರೈಲ್ವೆ ಸಚಿವಾಲಯ, ವಿದ್ಯುತ್ ಸಚಿವಾಲಯ, ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ, ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ, ಕಲ್ಲಿದ್ದಲು ಸಚಿವಾಲಯ, ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ, ಉನ್ನತ ಶಿಕ್ಷಣ ಇಲಾಖೆಗಳಿಗೆ ಸೇರಿವೆ. ಇವುಗಳಲ್ಲಿ ಪ್ರಮುಖವಾದವು:
  • ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ “ಬೆಂಗಳೂರು ಮೆಟ್ರೋ ರೈಲು ಯೋಜನೆ - ಹಂತ-3” (₹15,611 ಕೋಟಿ).
  • ವಿದ್ಯುತ್ ಸಚಿವಾಲಯದ “ಕಲೈ-II ಜಲವಿದ್ಯುತ್ ಯೋಜನೆ [1200 ಮೆಗಾವಾಟ್]” (₹14,105.83 ಕೋಟಿ).
  • ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆಯ “ಹೈದರಾಬಾದ್ ನಾಗ್ಪುರ ಕೈಗಾರಿಕಾ ಕಾರಿಡಾರ್ ಅಡಿಯಲ್ಲಿ ಜಹೀರಾಬಾದ್ ನೋಡ್ ಅಭಿವೃದ್ಧಿ” (₹2,360 ಕೋಟಿ).

5. ಮುಂದಿನ ಪತ್ರಿಕಾ ಪ್ರಕಟಣೆಯ ದಿನಾಂಕ:

ಮೇ 2026 ರ ತಿಂಗಳ ಫ್ಲ್ಯಾಶ್ ವರದಿಯನ್ನು 25 ಜೂನ್ 2026 ರಂದು ಬಿಡುಗಡೆ ಮಾಡಲಾಗುತ್ತದೆ.

ಗಮನಿಸಿ

1. ಈ ಪತ್ರಿಕಾ ಪ್ರಕಟಣೆಯು ₹₹150 ಕೋಟಿ ಮತ್ತು ಅದಕ್ಕಿಂತ ಹೆಚ್ಚಿನ ವೆಚ್ಚದ ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಕುರಿತು ಫ್ಲ್ಯಾಶ್ ವರದಿ (ಏಪ್ರಿಲ್ 2026) ಯ ಮುಖ್ಯಾಂಶಗಳಾಗಿದೆ, ಇದು https://paimana-proj.mospi.gov.in/ ನಲ್ಲಿ ಅಥವಾ ಕ್ಯೂಆರ್ ಕೋಡ್ ಮೂಲಕ ಲಭ್ಯವಿದೆ.

2. ಪೈಮಾನಾ ಎಂಬುದು ₹150 ಕೋಟಿ ಮತ್ತು ಅದಕ್ಕಿಂತ ಹೆಚ್ಚಿನ ವೆಚ್ಚದ ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಮೇಲ್ವಿಚಾರಣೆಗಾಗಿ ಕೇಂದ್ರೀಕೃತ ವೆಬ್ ಆಧಾರಿತ ಪೋರ್ಟಲ್ ಆಗಿದೆ. "ಒಂದು ದತ್ತಾಂಶ, ಒಂದು ನಮೂದು" ತತ್ವದ ಮೇಲೆ ಕಾರ್ಯನಿರ್ವಹಿಸುವ ಇದು, ವಿವಿಧ ಸಚಿವಾಲಯಗಳು/ಇಲಾಖೆಗಳಿಂದ ಶೇ. 70 ಕ್ಕಿಂತ ಹೆಚ್ಚು ಯೋಜನಾ ದತ್ತಾಂಶವನ್ನು ಸ್ವಯಂಚಾಲಿತವಾಗಿ ನವೀಕರಿಸಲು ಎಪಿಐಗಳ ಮೂಲಕ ಡಿಪಿಐಐಟಿಯ ಐಪಿಎಂಪಿ ಪೋರ್ಟಲ್‌ ನೊಂದಿಗೆ ಸಂಯೋಜನೆಗೊಳ್ಳುತ್ತದೆ. ಪೈಮಾನಾ ಮೂಲಸೌಕರ್ಯ ಮೇಲ್ವಿಚಾರಣೆಯನ್ನು ಪ್ರಮಾಣೀಕರಿಸಲು ಮತ್ತು ರಾಷ್ಟ್ರ ನಿರ್ಮಾಣಕ್ಕಾಗಿ ತಿಳುವಳಿಕೆಯುಳ್ಳ ನಿರ್ಧಾರ ಕೈಗೊಳ್ಳುವಿಕೆಯನ್ನು ಬೆಂಬಲಿಸಲು ವಿನ್ಯಾಸಗೊಳಿಸಲಾದ ರಾಷ್ಟ್ರೀಯ ಭಂಡಾರವಾಗಿಯೂ ಕಾರ್ಯನಿರ್ವಹಿಸುತ್ತದೆ.

ಅನುಬಂಧ I

ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಸಚಿವಾಲಯ/ಇಲಾಖಾವಾರು ಪ್ರಗತಿ

ಅನುಬಂಧ II

ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ವಲಯವಾರು ಪ್ರಗತಿ (ಡಿಇಎ ಸಮನ್ವಯಗೊಂಡ ಮೂಲಸೌಕರ್ಯ ಮಾಸ್ಟರ್ ಲಿಸ್ಟ್ ಪ್ರಕಾರ)

Click here to see PDF