કેન્દ્રીય યુવા બાબતો અને રમતગમતના રાજ્ય મંત્રી શ્રીમતી રક્ષા ખડસેએ આજે ​​નેશનલ સ્પોર્ટ્સ યુનિવર્સિટી (NSU), ઇમ્ફાલની મુલાકાત લીધી હતી, જ્યાં તેમણે યુનિવર્સિટીના કાયમી કેમ્પસની પ્રગતિની સમીક્ષા કરી હતી અને ભારતીય રમતગમત શિક્ષણની આ અગ્રણી સંસ્થા સાથે સંકળાયેલા એથ્લેટ્સ, વિદ્યાર્થીઓ, કોચ અને અધિકારીઓ સાથે સંવાદ કર્યો હતો. તેમણે આ ક્ષેત્રમાં રમતગમતની ઇકોસિસ્ટમની તેમની સમીક્ષાના ભાગરૂપે સ્પોર્ટ્સ ઓથોરિટી ઓફ ઇન્ડિયા (SAI) નેશનલ સેન્ટર ઓફ એક્સેલન્સ (NCOE), ઇમ્ફાલની પણ મુલાકાત લીધી હતી.

આ મુલાકાત દરમિયાન મંત્રીની સાથે નેશનલ સ્પોર્ટ્સ યુનિવર્સિટીના વાઇસ ચાન્સેલર શ્રી દલજીત સિંહ ચૌધરી; મણિપુર સરકારના રમતગમત સચિવ શ્રી એન. પ્રવીણ સિંહ; સાઈ (SAI) ના પ્રાદેશિક નિયામક શ્રી સી. દંડપાણી; તેમજ નેશનલ સ્પોર્ટ્સ યુનિવર્સિટી અને સ્પોર્ટ્સ ઓથોરિટી ઓફ ઇન્ડિયાના વરિષ્ઠ અધિકારીઓ ઉપસ્થિત રહ્યા હતા.

વહેલી સવારે, શ્રીમતી ખડસે એથ્લેટ્સ સાથે તેમના દૈનિક તાલીમ સત્રો દરમિયાન જોડાયા હતા અને તેમની સાથે ફિટનેસ અને કન્ડિશનિંગ પ્રવૃત્તિઓમાં ભાગ લીધો હતો. તેમણે વોર્મ-અપ ડ્રીલ્સ, એન્ડ્યુરન્સ (ક્ષમતા) તાલીમ, સ્ટ્રેચિંગ એક્સરસાઇઝ, મોબિલિટી રૂટિન અને રમત-વિશિષ્ટ પ્રેક્ટિસ સત્રોનું નિરીક્ષણ કરતી વખતે ખેલાડીઓ અને કોચ સાથે નજીકથી વાતચીત કરી હતી. ખેલાડીઓ દ્વારા દર્શાવવામાં આવેલ સમર્પણ અને શિસ્તની પ્રશંસા કરતા, મંત્રીએ તેમને શ્રેષ્ઠતા માટે પ્રયત્નશીલ રહેવા અને આંતરરાષ્ટ્રીય મંચો પર દેશનું નામ રોશન કરવા પ્રોત્સાહિત કર્યા હતા.

ઇમ્ફાલ વેસ્ટમાં કૌત્રુક ખાતે નેશનલ સ્પોર્ટ્સ યુનિવર્સિટીના કાયમી કેમ્પસમાં, શ્રીમતી ખડસેએ ચાલી રહેલા બાંધકામ અને ઇન્ફ્રાસ્ટ્રક્ચર વિકાસ કાર્યોની વિગતવાર સમીક્ષા કરી હતી. આશરે 325 એકરમાં ફેલાયેલું આ કેમ્પસ પૂર્ણ થવાના આરે છે, જેનું લગભગ 95 ટકા કામ પહેલેથી જ પૂર્ણ થઈ ગયું છે. મંત્રીએ કેમ્પસમાં વિકસાવવામાં આવી રહેલી મુખ્ય સુવિધાઓની સમીક્ષા કરી હતી, જેમાં વહીવટી બ્લોક, સ્માર્ટ ક્લાસરૂમ અને પ્રયોગશાળાઓથી સજ્જ શૈક્ષણિક સંકુલ, પુસ્તકાલય, ઓડિટોરિયમ, સ્પોર્ટ્સ સાયન્સ (રમત વિજ્ઞાન) સુવિધાઓ અને આશરે 1,300 વિદ્યાર્થીઓ અને આશરે 60 ફેકલ્ટી સભ્યોના રહેવાની સુવિધા માટે ડિઝાઇન કરાયેલ રહેણાંક હોસ્ટેલનો સમાવેશ થાય છે.

મંત્રીએ રમતગમત શિક્ષણ, રમતગમત વિજ્ઞાન, કોચિંગ, રમતગમત ટેકનોલોજી, એથ્લેટ વિકાસ અને સંશોધનને ટેકો આપવા માટે NSU ખાતે વિકસાવવામાં આવી રહેલી સંકલિત શૈક્ષણિક અને રમતગમત ઇકોસિસ્ટમની પણ સમીક્ષા કરી હતી. તેમણે નોંધ્યું હતું કે આ યુનિવર્સિટી ભારતના સંસ્થાકીય રમતગમતના માળખાને મજબૂત કરવા અને વૈશ્વિક સ્તરે સ્પર્ધાત્મક રમતગમતના વ્યાવસાયિકો અને એથ્લેટ્સ તૈયાર કરવા તરફનું એક પરિવર્તનકારી પગલું છે.

મુલાકાત દરમિયાન વાત કરતા શ્રીમતી ખડસેએ જણાવ્યું હતું કે પ્રધાનમંત્રી શ્રી નરેન્દ્ર મોદીજીના દૂરંદેશી નેતૃત્વ હેઠળ, ભારત રમતગમતના ઇન્ફ્રાસ્ટ્રક્ચર, એથ્લેટ વિકાસ અને રમતગમત શિક્ષણમાં અભૂતપૂર્વ રોકાણનું સાક્ષી બની રહ્યું છે. તેમણે ભારપૂર્વક જણાવ્યું હતું કે નેશનલ સ્પોર્ટ્સ યુનિવર્સિટી ભારતીય રમતગમતના ભવિષ્યને આકાર આપવામાં અને વિજ્ઞાન, સંશોધન, નવીનતા (ઇનોવેશન) અને શ્રેષ્ઠતા દ્વારા સંચાલિત મજબૂત ઇકોસિસ્ટમનું નિર્માણ કરવામાં એક સીમાચિહ્નરૂપ સંસ્થા તરીકે ઉભરી આવશે.

ત્યારબાદ મંત્રીશ્રીએ સાઈ (SAI) નેશનલ સેન્ટર ઓફ એક્સેલન્સ (NCOE), ઇમ્ફાલની મુલાકાત લીધી હતી, જ્યાં તેમણે ઉત્તર-પૂર્વ ક્ષેત્રના ચુનંદા (એલિટ) એથ્લેટ્સ અને ઊભરતી પ્રતિભાઓ માટે ઉપલબ્ધ એથ્લેટ સપોર્ટ સિસ્ટમ્સ અને સ્પોર્ટ્સ સાયન્સ સુવિધાઓની સમીક્ષા કરી હતી. તેમણે ફિઝીયોથેરાપી, રિકવરી, ન્યુટ્રિશન (પોષણ), સ્પોર્ટ્સ મેડિસિન, ફિઝિયોલોજી અને સ્ટ્રેન્થ એન્ડ કન્ડિશનિંગ સંબંધિત સુવિધાઓની સમીક્ષા કરતી વખતે એથ્લેટ્સ, કોચ અને સપોર્ટ સ્ટાફ સાથે સંવાદ કર્યો હતો.

આ મુલાકાત રમતગમત શિક્ષણ, વૈજ્ઞાનિક એથ્લેટ તાલીમ અને ઉચ્ચ પ્રદર્શનવાળી ઇકોસિસ્ટમને મજબૂત કરવા પ્રત્યે ભારત સરકારની સતત પ્રતિબદ્ધતા દર્શાવે છે, કારણ કે ભારત વૈશ્વિક રમતગમતની મહાસત્તા બનવા તરફ આગળ વધી રહ્યું છે.

SM/DK/JD