مرکزی وزیرِ تجارت و صنعت جناب پیوش گوئل 25 سے 27 مئی تک کینیڈا کا دورہ کریں گے تاکہ ہندوستان اور کینیڈا کے درمیان جامع اقتصادی شراکت داری معاہدہ (سی ای پی اے) سے متعلق جاری مذاکرات کو آگے بڑھایا جا سکے اور سرکاری، تجارتی و صنعتی سطح پر تبادلۂ خیال کیا جا سکے۔ اس دورے میں جناب گوئل کے ہمراہ ہندوستانی صنعت و تجارت کے 100 سے زائد اداروں کے اعلیٰ نمائندے بھی شامل ہوں گے، جو دھات و کان کنی، توانائی، موٹر گاڑیاں و سرمایہ جاتی اشیا، فضائی صنعت، سیاحت، چمڑا و ٹیکسٹائل، زراعت، ٹیلی مواصلات اور دوا سازی سمیت مختلف شعبوں سے تعلق رکھتے ہیں۔

اپنے دورۂ کینیڈا کے دوران جناب پیوش گوئل بین الاقوامی تجارت کے وزیر عزت مآب جناب منیندر سدھو سے ملاقات کریں گے، جس میں ہند-کینیڈا سی ای پی اے کی پیش رفت کا جائزہ لیا جائے گا اور تجارت و سرمایہ کاری کے نئے امکانات پر غور کیا جائے گا۔ مالی سال 2025-26 میں دونوں ممالک کے درمیان دو طرفہ تجارت تقریباً 8 ارب امریکی ڈالر رہی، جس میں ہندوستان کی برآمدات 4.67 ارب امریکی ڈالر اور درآمدات 3.28 ارب امریکی ڈالر رہیں۔

مرکزی وزیر کینیڈا کے وزیرِ اعظم عزت مآب جناب مارک کارنی سے بھی ملاقات کریں گے اور مختلف دو طرفہ اجلاسوں میں شرکت کریں گے، جن میں وزیرِ خارجہ عزت مآب محترمہ انیتا آنند کے ساتھ ملاقات بھی شامل ہے، تاکہ ترجیحی شعبوں میں تزویراتی تعاون کو مزید مضبوط بنایا جا سکے۔ وزیرِ تجارت و صنعت کینیڈا کی سرکردہ کمپنیوں، نوآموز اداروں اور پنشن فنڈز کے سربراہان سے بھی تبادلۂ خیال کریں گے۔

توانائی کا تحفظ اور توانائی کی منتقلی دونوں ممالک کی بنیادی ترجیحات میں شامل ہیں۔ کینیڈا کے وسیع توانائی اور قدرتی وسائل، اور ہندوستان کی بڑھتی ہوئی توانائی ضروریات، باہمی تکمیلیت کے مضبوط مواقع فراہم کرتے ہیں۔ مزید برآں، ہندوستان اور کینیڈا کے درمیان شہری جوہری تعاون توانائی شراکت داری کا ایک اہم ستون بنا ہوا ہے۔

سائنس اور ٹیکنالوجی کے شعبے میں تعاون کی مضبوط بنیاد موجود ہے، جسے باقاعدہ ادارہ جاتی روابط کی حمایت حاصل ہے۔ مصنوعی ذہانت کی تحقیق، معیارات اور اختراعی نظام کے میدان میں ہند-کینیڈا اشتراک کو مزید وسعت دینے کے وسیع امکانات موجود ہیں۔

سن 2025 کے وسط سے ہندوستان اور کینیڈا کے درمیان مسلسل اعلیٰ سطحی روابط، جن میں 2 مارچ 2026 کو وزیرِ اعظم مارک کارنی کا حالیہ دورۂ ہند بھی شامل ہے، نے دو طرفہ تعلقات اور عوامی روابط کو نئی رفتار دینے میں نمایاں کردار ادا کیا ہے۔ اسی دورے کے دوران ہند-کینیڈا سی ای پی اے مذاکرات کا آغاز بھی کیا گیا تھا۔

کینیڈا کا ایک سرکاری وفد 4 سے 7 مئی 2026 تک ہند-کینیڈا جامع اقتصادی شراکت داری معاہدہ (سی ای پی اے) کے دوسرے دور کے مذاکرات کے سلسلے میں نئی دہلی کے دورے پر آیا تھا۔ مرکزی وزیرِ تجارت و صنعت بھی متعلقہ حکام کے ہمراہ سی ای پی اے مذاکرات کے دوسرے مرحلے کو آگے بڑھانے کے لیے شریک ہوں گے۔ دونوں ممالک مذاکرات کے عمل کو تیز رفتاری سے مکمل کرنے کے لیے پُرعزم ہیں۔ دونوں فریقوں نے سن 2030 تک ہند-کینیڈا دو طرفہ تجارت کو 50 ارب امریکی ڈالر تک پہنچانے کا ہدف مقرر کیا ہے۔

کینیڈا میں تقریباً 28 لاکھ ہندوستانی نژاد افراد مقیم ہیں، جن میں 18 لاکھ ہند-کینیڈین اور تقریباً 10 لاکھ غیر مقیم ہندوستانی، بشمول طلبہ، شامل ہیں۔ یہ برادری دونوں ممالک کے درمیان ایک زندہ پل کی حیثیت رکھتی ہے۔ ہندوستان کو اپنی سمندر پار برادری اور کینیڈا میں ان کی نمایاں کامیابیوں پر فخر ہے۔

ہندوستان اور کینیڈا نے دو طرفہ تعلقات میں سیاسی و اقتصادی بحالی کے ساتھ ساتھ تزویراتی اور سلامتی کے ذرائع سے باضابطہ روابط کا سلسلہ دوبارہ شروع کیا ہے۔ توقع کی جا رہی ہے کہ یہ دورہ باہمی اہمیت کے حامل کلیدی شعبوں میں تعاون کے امکانات کا جائزہ لے گا، باہمی اعتماد کو مزید مستحکم کرے گا، اور ایسی شراکت داری کو نئی رفتار دے گا جس میں غیر معمولی توسیع کی بھرپور صلاحیت موجود ہے۔

******

ش ح۔ ش ا ر۔ ول

Uno-7471