સિવિલ સર્વિસીસ (પ્રારંભિક) પરીક્ષા-2026 માટે પરીક્ષા કેન્દ્રોની ભીડ ઓછી કરવાના પ્રયાસરૂપે, યુનિયન પબ્લિક સર્વિસ કમિશન (UPSC) એ ભુવનેશ્વર, કાનપુર અને મેરઠ ખાતે ત્રણ નવા પરીક્ષા કેન્દ્રો શરૂ કર્યા છે. આ કેન્દ્રોના ઉમેરા સાથે, પ્રારંભિક પરીક્ષા માટેના કેન્દ્રોની કુલ સંખ્યા 80 થી વધીને 83 થઈ ગઈ છે. આશરે 23,000 ઉમેદવારોએ આ નવા કેન્દ્રોની પસંદગી કરી છે, જેનાથી સિવિલ સર્વિસીસ (પ્રારંભિક) પરીક્ષા-2026 માટેના નજીકના કેન્દ્રો પરનું ભારણ હળવું થયું છે.

આ પહલ અંગે વાત કરતા, UPSCના અધ્યક્ષ ડૉ. અજય કુમારે જણાવ્યું હતું કે, “અમારો ઉદ્દેશ્ય પરીક્ષા પ્રક્રિયાને ઉમેદવારો માટે વધુ અનુકૂળ, સુલભ અને કાર્યક્ષમ બનાવવાનો છે. ત્રણ નવા કેન્દ્રો ઉમેરવાનો હેતુ ભીડ ઓછી કરવાનો અને ઉમેદવારોને વધુ સુવિધા આપવાનો છે. વધુમાં, PwBD (બેન્ચમાર્ક વિકલાંગતા ધરાવતી વ્યક્તિઓ) ઉમેદવારોને તેમના મનપસંદ પરીક્ષા કેન્દ્રો ફાળવવામાં આવે તે સુનિશ્ચિત કરીને, કમિશન તમામ માટે UPSC ની સફરને સાચી રીતે સુલભ અને સર્વસમાવેશી બનાવવા માટે ભૌગોલિક અને ભૌતિક અવરોધોને સક્રિયપણે દૂર કરી રહ્યું છે.”

નવા શરૂ કરાયેલા ભુવનેશ્વર કેન્દ્રે કટક પરનો બોજ નોંધપાત્ર રીતે ઘટાડ્યો છે. ભુવનેશ્વર કેન્દ્ર માટે સિવિલ સર્વિસીસ (પ્રારંભિક) પરીક્ષા - 2026 માટે 10,656 અરજીઓ મળી છે. તેવી જ રીતે, કાનપુર કેન્દ્ર ઉમેરાવાથી લખનૌ પરનું દબાણ હળવું કરવામાં મદદ મળી છે. નવા સ્થાપિત કાનપુર કેન્દ્રે 6,938 અરજીઓ આકર્ષી છે. પશ્ચિમ ઉત્તર પ્રદેશમાં, મેરઠ કેન્દ્રની શરૂઆતથી નજીકના વિસ્તારોના ઉમેદવારોને ફાયદો થયો છે અને ગાઝિયાબાદ પરની નિર્ભરતા ઘટી છે. નવા ઉમેરાયેલા મેરઠ કેન્દ્ર માટે 5,902 અરજીઓ મળી છે.

કમિશને બેન્ચમાર્ક વિકલાંગતા ધરાવતી વ્યક્તિઓ (PwBD) માટે સર્વસમાવેશીતા અને સુલભતા પ્રત્યેની તેની પ્રતિબદ્ધતાનો પણ પુનરોચ્ચાર કર્યો છે. સુધારેલી પદ્ધતિ હેઠળ, એ સુનિશ્ચિત કરવામાં આવ્યું હતું કે PwBD ઉમેદવારને, જો જરૂર પડે તો વધારાની ક્ષમતાઓ ઊભી કરીને, હાલના કેન્દ્રોની ક્ષમતા કરતાં વધુ હોવા છતાં પણ તેમની પસંદગીનું કેન્દ્ર મળશે. પરિણામે, માત્ર દિલ્હી વિસ્તારમાં જ અંદાજે 805 PwBD ઉમેદવારોને તેમની પસંદગીનું કેન્દ્ર મળ્યું છે.

UPSC ને આ વર્ષે સિવિલ સર્વિસીસ (પ્રારંભિક) પરીક્ષા-2026 માટે કુલ 8,19,372 અરજીઓ મળી છે. તેની પરીક્ષા ઇન્ફ્રાસ્ટ્રક્ચરને વધુ મજબૂત કરવા માટે, કમિશને CSP-2026 ના અરજી ફોર્મમાં એક ડ્રોપડાઉન વિકલ્પ રજૂ કર્યો હતો, જે ઉમેદવારોને તેમના મનપસંદ નજીકના શહેરો દર્શાવવા માટે સક્ષમ બનાવે છે. આ કવાયત દ્વારા એકત્રિત કરવામાં આવેલ ડેટા ઉમેદવારોની પસંદગીના સર્વે તરીકે કામ કરશે અને ભવિષ્યમાં વધારાના પરીક્ષા કેન્દ્રો સ્થાપવા માટે વ્યવહારુ સ્થાનો ઓળખવામાં મદદ કરશે.

આ પહલો સમકાલીન જરૂરિયાતોને અનુરૂપ તેની પ્રક્રિયાઓને વિકસાવવા માટેના UPSC ના સતત પ્રયાસોને પ્રતિબિંબિત કરે છે, જ્યારે તે જ સમયે નિષ્પક્ષતા, પારદર્શિતા અને અખંડિતતાના ઉચ્ચતમ ધોરણોને જાળવી રાખે છે.

IJ/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com