محکمۂ صارفین کے امور، حکومتِ ہند نے آج میٹرولوجی کا عالمی دن 2026 منایا، جو 20 مئی 1875 کو پیرس میں دستخط کیے گئے تاریخی میٹر کنونشن کی 151 ویں سالگرہ کے موقع پر منایا جاتا ہے۔ اس سال کے میٹرولوجی کے عالمی دن کا موضوع ہے: ’’پیمائش: پالیسی سازی میں اعتماد کی تعمیر‘‘۔

اپنے ورچوئل خطاب میں، صارفین کے امور، خوراک اور عوامی تقسیم کے وزیر جناب پرہلاد جوشی نے انصاف، صارفین کے تحفظ، سائنسی اعتبار اور شفاف حکمرانی کو یقینی بنانے میں میٹرولوجی کے اہم کردار پر روشنی ڈالی۔ اس سال کے موضوع کا حوالہ دیتے ہوئے، جناب جوشی نے اس بات پر زور دیا کہ درست اور قابلِ اعتماد پیمائشیں مؤثر عوامی پالیسی، تجارت، صحت کی دیکھ بھال، ماحولیاتی تحفظ اور صنعتی ترقی کی ریڑھ کی ہڈی ہیں۔

جناب جوشی نے کہا کہ محکمہ نے اہل (مجاز) نجی اداروں کو 40 سرکار سے منظور شدہ ٹیسٹنگ سینٹرز (جی اے ٹی سی) کے سرٹیفکیٹ جاری کرکے ہندوستان کے قانونی پیمائش کی تصدیق کے بنیادی ڈھانچے کو مضبوط کیا ہے، جو ملک کی تصدیقی صلاحیت بڑھانے کی جانب ایک اہم قدم ہے۔

اعتماد پر مبنی اور ٹیکنالوجی پر مبنی حکمرانی کے حکومتی وژن پر روشنی ڈالتے ہوئے، جناب پرہلاد جوشی نے صارفین کے امور کے محکمے کی جانب سے کی گئی کئی اہم اصلاحات کا ذکر کیا۔ ان میں جن وشواس (ترمیمی) ایکٹ 2026 کے تحت معمولی جرائم کو غیر مجرمانہ قرار دینا، بعض معمولی خلاف ورزیوں کے لیے بہتری کے نوٹسز متعارف کرانا، اور کاروبار کرنے میں آسانی کو بہتر بنانے کے لیے لائسنسنگ سسٹم سے رجسٹریشن پر مبنی نظام کی طرف منتقلی شامل ہے۔

جناب جوشی نے مزید بتایا کہ قانونی پیمائش کے تحت رجسٹریشن اور انفورسمنٹ خدمات کے لیے ای-میزرمنٹ پورٹل کو ایک متحد ڈیجیٹل پلیٹ فارم کے طور پر شروع کیا گیا ہے۔ یہ پورٹل مرکزی اور ریاستی دونوں سطحوں پر وزن اور پیمائش کی تصدیق، رجسٹریشن، ماڈل کی منظوری اور نفاذ سے متعلق سرگرمیوں جیسی خدمات فراہم کرے گا۔

انہوں نے کہا کہ ہندوستان او آئی ایم ایل پیٹرن اپروول سرٹیفکیٹ جاری کرنے والا 13 واں ملک بن گیا ہے، جس سے وزن اور پیمائش کے آلات کی برآمدات کو فروغ ملا ہے اور ہندوستان کی عالمی پوزیشن مضبوط ہوئی ہے۔ انہوں نے مزید کہا کہ ’’میک اِن انڈیا‘‘ پہل کے تحت گھریلو مینوفیکچرنگ صلاحیتوں کو مضبوط بنانے اور عالمی مسابقت بڑھانے کے لیے سی-ڈیک کے تعاون سے ریجنل ریفرنس اسٹینڈرڈ لیبارٹریز (آر آر ایس ایلز) میں وزن اور پیمائش کے آلات کے لیے سافٹ ویئر ٹیسٹنگ سہولیات قائم کی گئی ہیں۔

ہندوستانی معیاری وقت (آئی ایس ٹی) کے فروغ کی پہل کا حوالہ دیتے ہوئے، جناب جوشی نے بتایا کہ یہ پروجیکٹ نیشنل فزیکل لیبارٹری (این پی ایل) اور اسرو کے تعاون سے نافذ کیا جا رہا ہے۔ ’’ایک قوم، ایک وقت‘‘ پہل کا مقصد آر آر ایس ایلز کے ذریعے پورے ملک میں ہندوستانی معیاری وقت (آئی ایس ٹی) کو اعلیٰ درجے کی درستگی کے ساتھ پھیلانا ہے۔

اپنے کلیدی خطاب میں، صارفین کے امور، خوراک اور عوامی تقسیم کے وزیر مملکت جناب بی ایل ورما نے حکمرانی اور تجارت میں انصاف، شفافیت اور اعتماد کو یقینی بنانے کے لیے درست پیمائش کے نظام کی اہمیت پر روشنی ڈالی۔ انہوں نے کہا کہ درست پیمائش خوراک، ایندھن، دواسازی، بجلی اور پیک شدہ سامان جیسے شعبوں میں شہریوں کی روزمرہ زندگی پر براہِ راست اثر انداز ہوتی ہے، صارفین کے اعتماد کو مضبوط کرتی ہے اور منصفانہ تجارتی طریقوں کو فروغ دیتی ہے۔

جناب جوشی نے جنوری 2026 سے طبی آلات کی درستگی اور عوامی تحفظ کو بہتر بنانے کے لیے غیر حملہ آور اسفیگمومانومیٹر (بلڈ پریشر ماپنے والے آلات) کے معیارات متعارف کرانے پر بھی روشنی ڈالی۔ انہوں نے ملک میں پیمائش کے نظام کو مضبوط بنانے میں صنعتوں، صنعت کاروں، صارفین کی تنظیموں، ٹیسٹنگ لیبارٹریوں، تعلیمی اداروں اور ریاستی قانونی میٹرولوجی محکموں کے تعاون کو سراہا۔

اس موقع پر خطاب کرتے ہوئے محترمہ نیموبین جینتی بھائی بامبھانیا، وزیر مملکت برائے صارفین کے امور، خوراک اور عوامی تقسیم، نے کہا کہ اس سال کے جشن کا موضوع ثبوت پر مبنی پالیسی سازی، صارفین کے تحفظ اور شفاف حکمرانی میں قابلِ اعتماد اور درست پیمائش کی بڑھتی ہوئی اہمیت کو اجاگر کرتا ہے۔

انہوں نے منصفانہ تجارتی طریقوں اور صارفین کے تحفظ کو یقینی بنانے میں ریاستوں اور مرکز کے زیرِ انتظام علاقوں کے قانونی میٹرولوجی محکموں کی کوششوں کو سراہا۔ انہوں نے پیمائش کی صنعت، مینوفیکچررز، ٹیسٹنگ لیبارٹریوں، صارفین کی تنظیموں، تعلیمی اداروں اور دیگر متعلقہ فریقوں کی جانب سے ملک میں تعمیل، معیاری پیمانوں اور صارفین کے اعتماد کو مضبوط بنانے میں دیے گئے تعاون کی بھی تعریف کی۔

محترمہ ندھی کھرے، سکریٹری، محکمہ امورِ صارفین، نے ہندوستان میں قانونی میٹرولوجی کے مسلسل ارتقا پر روشنی ڈالی اور ہموار تعمیلی طریقۂ کار، نظامی اصلاحات اور تجارتی انجمنوں کی جانب سے رضاکارانہ تعمیل کے ذریعے صنعت دوست ضوابط کی ضرورت پر زور دیا۔ انہوں نے جانچ اور پیمائش کے نظام کو جدید بنانے کے لیے نئی ٹیکنالوجی اپنانے کے حکومتی عزم کا اعادہ بھی کیا۔

انہوں نے بتایا کہ محکمہ نے بریتھ اینالائزرز، نمی پیما آلات، گیس میٹرز اور گاڑیوں کی رفتار ناپنے والے ریڈار آلات کے ضوابط جاری کیے ہیں۔ انہوں نے سی ایس آئی آر-این پی ایل اور اسرو کے تعاون سے نافذ کیے جانے والے ہندوستانی معیاری وقت کے فروغ کے منصوبے کی پیش رفت پر بھی روشنی ڈالی اور پیمائش کے نظام میں اعتماد کو فروغ دینے کے لیے ای-میپ پورٹل اور دیگر ڈیجیٹل اقدامات کی اہمیت پر زور دیا۔

جناب انوپم مشرا، ایڈیشنل سکریٹری، محکمہ امورِ صارفین، نے شرکا کا خیرمقدم کیا اور 20 مئی 1875 کو دستخط کیے گئے تاریخی میٹر کنونشن کی سالگرہ کے موقع پر ہر سال منائے جانے والے میٹرولوجی کے عالمی دن کی اہمیت پر روشنی ڈالی۔

پروگرام کے بعد ایک تکنیکی اجلاس منعقد ہوا، جس میں قومی اور بین الاقوامی ماہرین نے میٹرولوجی اور معیاری کاری کے شعبے میں ابھرتی ہوئی پیش رفتوں اور عالمی بہترین طریقوں پر تبادلۂ خیال کیا۔

پروفیسر (ڈاکٹر) امیتاوا سین گپتا، ریٹائرڈ قائم مقام ڈائریکٹر، این پی ایل انڈیا، نے معیاری وقت کے عالمی نظم و نسق پر ایک پریزنٹیشن پیش کی اور جدید ایٹمی گھڑی ٹیکنالوجیز اور بین الاقوامی ہم آہنگی کے نظام کے ذریعے انتہائی اعلیٰ درجے کی درستگی کے ساتھ ہندوستانی معیاری وقت (آئی ایس ٹی) کو برقرار رکھنے میں سی ایس آئی آر-این پی ایل کے کردار پر روشنی ڈالی۔

بارک کے سائنسدان ڈاکٹر سنیل کے سنگھ نے ’’آئنائزنگ ریڈی ایشن پیمائش: قومی صحت اور حفاظتی پالیسیوں کو مضبوط بنانے‘‘ کے موضوع پر ایک پریزنٹیشن دی اور بھابھا اٹامک ریسرچ سنٹر (بارک) کے ذریعے تابکاری پیمائش کے معیارات اور حفاظتی نظاموں میں ہندوستان کی بڑھتی ہوئی صلاحیتوں کو اجاگر کیا، جو ہندوستان میں آئنائزنگ تابکاری کی پیمائش کے لیے نامزد ادارہ ہے۔

سی آئی ایم ایل کے صدر ڈاکٹر باب جوزف میتھیو نے ’’سوئٹزرلینڈ میں قانونی میٹرولوجی‘‘ کے موضوع پر اپنی پریزنٹیشن میں سوئٹزرلینڈ کے شفاف قانونی میٹرولوجی فریم ورک اور تجارت و کاروبار میں درستگی، انصاف اور صارفین کے اعتماد کو یقینی بنانے میں اس کے کردار پر روشنی ڈالی۔

او آئی ایم ایل کے ڈائریکٹر انتھونی ڈونلون نے پالیسی سازی، صارفین کے تحفظ، صحت کی دیکھ بھال، تجارت اور ماحولیاتی نگرانی میں درست اور قابلِ اعتماد پیمائش کی اہمیت پر زور دیا۔ انہوں نے بین الاقوامی معیار سازی میں ہندوستان کی بڑھتی ہوئی قیادت کو سراہا اور اکتوبر 2026 میں نئی دہلی میں منعقد ہونے والے قانونی میٹرولوجی کی بین الاقوامی کمیٹی کے 61ویں اجلاس کی ہندوستانی میزبانی کا خیرمقدم کیا۔

جناب آشوتوش اگروال، ڈائریکٹر (قانونی میٹرولوجی)، نے مباحثے کا خلاصہ پیش کیا اور کلماتِ تشکر ادا کیے۔

میٹرولوجی کے عالمی دن کی تقریبات کا اختتام ملک میں پیمائش کے جدید، مؤثر اور قابلِ اعتماد نظام کی تعمیر کے عزم کے اعادہ کے ساتھ ہوا۔

***

UR-7332

(ش ح۔اس ک  )