ರಾಷ್ಟ್ರೀಯ ಅಂಕಿಅಂಶ ಕಚೇರಿ, ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ, '2022-23 ಮತ್ತು 2023-24ರ ಪೂರೈಕೆ ಮತ್ತು ಬಳಕೆಯ ಕೋಷ್ಟಕಗಳನ್ನು' ಬಿಡುಗಡೆ ಮಾಡಿದೆ. ಈ ಬಿಡುಗಡೆಯು ಭಾರತದ ರಾಷ್ಟ್ರೀಯ ಲೆಕ್ಕಪತ್ರ ಚೌಕಟ್ಟಿನಲ್ಲಿ ಒಂದು ಪ್ರಮುಖ ಮೈಲಿಗಲ್ಲಾಗಿದೆ, ಏಕೆಂದರೆ ಇದು ಹಿಂದಿನ 2011-12ರ ಮೂಲ ವರ್ಷದ ಸರಣಿಯ ಬದಲಿಗೆ ಬಂದಿರುವ ಪರಿಷ್ಕೃತ 2022-23ರ ಮೂಲ ವರ್ಷದ ಅಡಿಯಲ್ಲಿ ಸಿದ್ಧಪಡಿಸಲಾದ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳ ಮೊದಲ ಸಮಗ್ರ ಗುಂಪಾಗಿದೆ. 2022-23ರ ಮೂಲ ವರ್ಷವನ್ನು ಹೊಂದಿರುವ ವಾರ್ಷಿಕ ರಾಷ್ಟ್ರೀಯ ಲೆಕ್ಕಪತ್ರ ಅಂದಾಜುಗಳ ಹೊಸ ಸರಣಿಯನ್ನು, ಅಂತಾರಾಷ್ಟ್ರೀಯ ಅತ್ಯುತ್ತಮ ಪದ್ಧತಿಗಳು ಮತ್ತು ವಿಶ್ವಸಂಸ್ಥೆಯ ರಾಷ್ಟ್ರೀಯ ಲೆಕ್ಕಪತ್ರಗಳ ವ್ಯವಸ್ಥೆಯ (SNA) ಶಿಫಾರಸುಗಳನ್ನು ಅನುಸರಿಸಿ 2026ರ ಫೆಬ್ರವರಿ 27 ರಂದು ಬಿಡುಗಡೆ ಮಾಡಲಾಯಿತು. ಹೊಸ ಸರಣಿಯಲ್ಲಿ, ಅಂತಿಮ ಅಂದಾಜಿನ ಸಮಯದಲ್ಲಿ ಪ್ರಸ್ತುತ ಬೆಲೆಗಳಲ್ಲಿನ ಉತ್ಪಾದನೆ/ಆದಾಯದ ಅಂದಾಜು ಮತ್ತು ವೆಚ್ಚದ ಅಂದಾಜಿನ ನಡುವಿನ ವ್ಯತ್ಯಾಸವನ್ನು ನಿವಾರಿಸಲು, ವಾರ್ಷಿಕ ಪರಿಷ್ಕೃತ ಅಂದಾಜುಗಳ ಸಿದ್ಧತೆಯನ್ನು ಪೂರೈಕೆ ಮತ್ತು ಬಳಕೆ ಟೇಬಲ್ನ  ಚೌಕಟ್ಟಿನೊಂದಿಗೆ ಸಂಯೋಜಿಸಲಾಗಿದೆ.

ರಾಷ್ಟ್ರೀಯ ಲೆಕ್ಕಪತ್ರ ಚೌಕಟ್ಟಿನಲ್ಲಿ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳು (SUTs) ಅತ್ಯಂತ ಶಕ್ತಿಶಾಲಿ ಮತ್ತು ದತ್ತಾಂಶ-ಸಮೃದ್ಧ ಸಾಧನಗಳಲ್ಲಿ ಒಂದಾಗಿವೆ. ಇವು ಎಲ್ಲಾ ಕೈಗಾರಿಕೆಗಳು ಮತ್ತು ಅಂತಿಮ ಬೇಡಿಕೆಯ ವರ್ಗಗಳಲ್ಲಿ ಸರಕು ಮತ್ತು ಸೇವೆಗಳ ಉತ್ಪಾದನೆ, ವಿತರಣೆ ಹಾಗೂ ಬಳಕೆಯನ್ನು ವ್ಯವಸ್ಥಿತವಾಗಿ ಚಿತ್ರಿಸುವ ಮೂಲಕ, ಆರ್ಥಿಕತೆಯಲ್ಲಿ ನಡೆಯುವ ಎಲ್ಲಾ ಆರ್ಥಿಕ ಚಟುವಟಿಕೆಗಳ ಸಮಗ್ರ ಮತ್ತು ವಿವರವಾದ ಚಿತ್ರಣವನ್ನು ಪ್ರಸ್ತುತಪಡಿಸುತ್ತವೆ. ವಾರ್ಷಿಕ ಅಂದಾಜುಗಳನ್ನು SUT ಚೌಕಟ್ಟಿನೊಂದಿಗೆ ಸಂಪೂರ್ಣವಾಗಿ ಸಂಯೋಜಿಸಿರುವುದು ಈ ಹೊಸ ಸರಣಿಯ ಪ್ರಮುಖ ವೈಶಿಷ್ಟ್ಯಗಳಲ್ಲಿ ಒಂದಾಗಿದೆ. ಇದರ ಅಡಿಯಲ್ಲಿ, ಪ್ರಸ್ತುತ ಬೆಲೆಗಳಲ್ಲಿನ ಉತ್ಪಾದನೆ/ಆದಾಯದ ವಿಧಾನ ಮತ್ತು ವೆಚ್ಚದ ವಿಧಾನದ ನಡುವಿನ ಸಾಂಖ್ಯಿಕ ವ್ಯತ್ಯಾಸಗಳನ್ನು ನಿವಾರಿಸಲು 2022-23 ಮತ್ತು 2023-24ರ ಅಂದಾಜುಗಳನ್ನು ಅಂತಿಮ ಹಂತದಲ್ಲಿ ಪರಸ್ಪರ ಮರುಹೊಂದಿಸಲಾಗುತ್ತದೆ. ಈ ಮೂಲಕ ರಾಷ್ಟ್ರೀಯ ಲೆಕ್ಕಪತ್ರಗಳಲ್ಲಿ ಹೆಚ್ಚಿನ ಆಂತರಿಕ ಸ್ಥಿರತೆ ಮತ್ತು ಸುಸಂಬದ್ಧತೆಯನ್ನು ತರಲಾಗುತ್ತದೆ. ಹೊಸ ಸರಣಿಯಲ್ಲಿ ಅಳವಡಿಸಲಾಗಿರುವ ಹಲವಾರು ಪ್ರಮುಖ ಸುಧಾರಣೆಗಳನ್ನು ಗಮನದಲ್ಲಿಟ್ಟುಕೊಂಡು ಈ ಸಂಯೋಜನೆಯನ್ನು ಕೈಗೊಳ್ಳಲಾಗಿದೆ. ಈ ಸುಧಾರಣೆಗಳು ಮುಖ್ಯವಾಗಿ ಹೊಸ ದತ್ತಾಂಶಗಳ ಲಭ್ಯತೆ ಮತ್ತು ಕೆಳಗೆ ಪಟ್ಟಿ ಮಾಡಲಾದ ಕಾರ್ಯವಿಧಾನಗಳನ್ನು ಅಳವಡಿಸಿಕೊಂಡಿರುವುದರಿಂದ ಸಾಧ್ಯವಾಗಿವೆ:

2022–23 ಸರಣಿಯ ಅಡಿಯಲ್ಲಿ SUT ಯ ಪ್ರಮುಖ ಲಕ್ಷಣಗಳು

(i) SUT ಚೌಕಟ್ಟಿನೊಂದಿಗೆ ವಾರ್ಷಿಕ ಅಂದಾಜುಗಳ ಸಂಯೋಜನೆ: ಹೊಸ ಜಿಡಿಪಿ (GDP) ಸರಣಿಯಲ್ಲಿ, ಆಂತರಿಕ ಸ್ಥಿರತೆಯನ್ನು ಖಚಿತಪಡಿಸಿಕೊಳ್ಳಲು SNA ಶಿಫಾರಸುಗಳಿಗೆ ಅನುಗುಣವಾಗಿ ಉತ್ಪಾದನೆ, ಆದಾಯ ಮತ್ತು ವೆಚ್ಚದ ಅಂದಾಜುಗಳನ್ನು SUT ಒಳಗೆ ಪರಸ್ಪರ ಮರುಹೊಂದಿಸಲಾಗುತ್ತದೆ.

(ii) ಇತ್ತೀಚಿನ ವರ್ಗೀಕರಣಗಳೊಂದಿಗೆ ಹೊಂದಾಣಿಕೆ: NIC 2025, COICOP 2018 ರಂತಹ ನವೀಕರಿಸಿದ ವರ್ಗೀಕರಣಗಳನ್ನು ಅಳವಡಿಸಿಕೊಳ್ಳುವುದರಿಂದ, ರಾಷ್ಟ್ರೀಯ ಲೆಕ್ಕಪತ್ರಗಳನ್ನು ಅಂತಾರಾಷ್ಟ್ರೀಯ ಮಾನದಂಡಗಳು ಮತ್ತು ಬದಲಾಗುತ್ತಿರುವ ಆರ್ಥಿಕ ರಚನೆಗಳೊಂದಿಗೆ ಉತ್ತಮವಾಗಿ ಹೊಂದಿಸಲು ಸಹಾಯ ಮಾಡುತ್ತದೆ.

(iii) ಸುಧಾರಿತ ಹಣಕಾಸು-ಯೇತರ ಖಾಸಗಿ ಕಾರ್ಪೊರೇಟ್ (NFPC) ಅಂದಾಜುಗಳು: MGT 7 ದತ್ತಾಂಶವನ್ನು ಬಳಸಿಕೊಂಡು ಬಹು-ಚಟುವಟಿಕೆ ಉದ್ಯಮಗಳ ಆದಾಯದ ಪಾಲನ್ನು, ಆ ಮೂಲಕ ಒಟ್ಟು ಮೌಲ್ಯವರ್ಧನೆ (GVA) ಅನ್ನು ಪ್ರತ್ಯೇಕಿಸುವ ಮೂಲಕ NFPC ವಲಯದ ಅಂದಾಜುಗಳನ್ನು ಸುಧಾರಿಸಲಾಗಿದೆ. ವಿವಿಧ ಕೈಗಾರಿಕೆಗಳು ಮತ್ತು ಗಾತ್ರದ ವರ್ಗಗಳಲ್ಲಿನ ಬಂಡವಾಳದ ವ್ಯತ್ಯಾಸಗಳನ್ನು ಗಣನೆಗೆ ತೆಗೆದುಕೊಳ್ಳಲು ವಿಕೇಂದ್ರೀಕೃತ ಮಟ್ಟದಲ್ಲಿ ಗುಣಕಗಳನ್ನು (multipliers) ಬಳಸಲಾಗಿದೆ. MCA ದತ್ತಾಂಶವನ್ನು ಬಳಸಿಕೊಂಡು ಸೀಮಿತ ಹೊಣೆಗಾರಿಕೆ ಪಾಲುದಾರಿಕೆಗಳ (LLPs) ಸಮಗ್ರ ವ್ಯಾಪ್ತಿಯನ್ನು ಖಚಿತಪಡಿಸಿಕೊಳ್ಳಲಾಗಿದೆ.

(iv) ಸುಧಾರಿತ IC ರಚನೆ: ಇತ್ತೀಚಿನ ASI ಮತ್ತು ASUSE ದತ್ತಾಂಶ, ಸಚಿವಾಲಯಗಳ ದತ್ತಸಂಚಯಗಳು ಮತ್ತು ಕಾರ್ಪೊರೇಟ್ ಹಣಕಾಸು ವರದಿಗಳನ್ನು ಬಳಸಿಕೊಂಡು ಉದ್ಯಮವಾರು ಇನ್ ಪುಟ್ ಹಂಚಿಕೆಯನ್ನು ಪರಿಷ್ಕರಿಸಲಾಗಿದೆ.

(v) ಸುಧಾರಿತ TTM ಅಂದಾಜುಗಳು: ವ್ಯಾಪಾರ ಮತ್ತು ಸಾರಿಗೆ ಮಾರ್ಜಿನ್ ಗಳನ್ನು (TTM) ಈಗ ಸ್ಥಿರ ಊಹೆಗಳ ಬದಲಿಗೆ ಹೆಚ್ಚು ದತ್ತಾಂಶ ಆಧಾರಿತ ವಿಧಾನವನ್ನು ಬಳಸಿ ಅಂದಾಜಿಸಲಾಗಿದೆ. ASI, HCES ಮತ್ತು ರಾಜ್ಯ ಮಟ್ಟದ ಬೆಲೆ ದತ್ತಾಂಶಗಳಂತಹ ಹಲವಾರು ಮೂಲಗಳನ್ನು ಬಳಸಲಾಗಿದ್ದು, ಇದು SUT ನಲ್ಲಿ ಮೂಲ ಬೆಲೆಗಳಿಂದ ಖರೀದಿದಾರರ ಬೆಲೆಗಳಿಗೆ (purchasers' prices) ಪರಿವರ್ತಿಸುವುದನ್ನು ಸುಧಾರಿಸುತ್ತದೆ.

(vi) ಸುಧಾರಿತ ಉತ್ಪನ್ನ-ಮಟ್ಟದ ತೆರಿಗೆ ಹಂಚಿಕೆ: ವಿವರವಾದ ಉತ್ಪನ್ನ ಮಟ್ಟದಲ್ಲಿ ತೆರಿಗೆಗಳನ್ನು ಹಂಚಿಕೆ ಮಾಡುವುದು ಒಂದು ಪ್ರಮುಖ ಕಾರ್ಯವಿಧಾನದ ಸುಧಾರಣೆಯಾಗಿದೆ. ಸರಕು ಮತ್ತು ಸೇವಾ ತೆರಿಗೆ (GST), ಅಬಕಾರಿ ಸುಂಕಗಳು ಮತ್ತು ಆಮದು ಸುಂಕಗಳಂತಹ ತೆರಿಗೆಗಳನ್ನು ತೆರಿಗೆ ವೇಳಾಪಟ್ಟಿಗಳು, ಆಡಳಿತಾತ್ಮಕ ಮತ್ತು ಸಮೀಕ್ಷೆಯ ದತ್ತಾಂಶಗಳನ್ನು ಬಳಸಿ ನಿರ್ದಿಷ್ಟ ಉತ್ಪನ್ನಗಳಿಗೆ ಮ್ಯಾಪ್ ಮಾಡಲಾಗಿದೆ.

(vii) PFCE ಅಂದಾಜಿನ ಸುಧಾರಣೆ: HCES ದತ್ತಾಂಶ, ಹಾಲು ಮತ್ತು ರಸ್ತೆ ಸಾರಿಗೆಯ ಮೇಲಿನ ಅಧ್ಯಯನ ವರದಿಗಳು, ಹಾಗೆಯೇ ಇತ್ತೀಚಿನ ASI ಮತ್ತು ASUSE ಸಮೀಕ್ಷೆಗಳು ಮತ್ತು ಹಲವಾರು ಆಡಳಿತಾತ್ಮಕ ದತ್ತಾಂಶ ಮೂಲಗಳನ್ನು ಬಳಸಿಕೊಂಡು ಖಾಸಗಿ ಅಂತಿಮ ಬಳಕೆಯ ವೆಚ್ಚದ (PFCE) ಅಂದಾಜುಗಳನ್ನು ಬಲಪಡಿಸಲಾಗಿದೆ.

(viii) ವ್ಯತ್ಯಾಸಗಳ ನಿವಾರಣೆ: ವಾರ್ಷಿಕ ಅಂದಾಜನ್ನು SUT ಚೌಕಟ್ಟಿನೊಂದಿಗೆ ಸಂಪೂರ್ಣವಾಗಿ ಸಂಯೋಜಿಸಿರುವುದು ಈ ಹೊಸ ಸರಣಿಯ ಪ್ರಮುಖ ಸಾಮರ್ಥ್ಯಗಳಲ್ಲಿ ಒಂದಾಗಿದೆ, ಇದರಿಂದಾಗಿ ಅಂತಿಮ ಅಂದಾಜು ಹಂತದಲ್ಲಿ ಅಂಕಿಅಂಶಗಳ ವ್ಯತ್ಯಾಸಗಳನ್ನು (statistical discrepancies) ಸಂಪೂರ್ಣವಾಗಿ ನಿವಾರಿಸಲಾಗಿದೆ.

ಪೂರೈಕೆ ಮತ್ತು ಬಳಕೆಯ ಕೋಷ್ಟಕಗಳ ಉದ್ದೇಶ

ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳು (SUTs) ಪರಸ್ಪರ ಪೂರಕವಾಗಿರುವ ಬಹುಮುಖಿ ಉದ್ದೇಶಗಳನ್ನು ಪೂರೈಸುತ್ತವೆ, ಇದು ಇಂದಿನ ಆಧುನಿಕ ರಾಷ್ಟ್ರೀಯ ಲೆಕ್ಕಪತ್ರ ನಿರ್ವಹಣೆಯಲ್ಲಿ ಇವುಗಳನ್ನು ಅತ್ಯಗತ್ಯವಾಗಿಸಿದೆ. ಮೂಲಭೂತವಾಗಿ, SUTಗಳು ಒಂದು ಏಕೀಕೃತ ವಿಶ್ಲೇಷಣಾತ್ಮಕ ಚೌಕಟ್ಟನ್ನು ಒದಗಿಸುತ್ತವೆ. ಇದು ಒಟ್ಟು ದೇಶೀಯ ಉತ್ಪನ್ನವನ್ನು (GDP) ಅಳೆಯುವ ಮೂರು ಪ್ರಮುಖ ವಿಧಾನಗಳಾದ—ಉತ್ಪಾದನಾ ವಿಧಾನ (production approach), ಆದಾಯ ವಿಧಾನ (income approach) ಮತ್ತು ವೆಚ್ಚದ ವಿಧಾನಗಳನ್ನು (expenditure approach) ಒಂದೇ ಆಂತರಿಕ ಸ್ಥಿರ ರಚನೆಯೊಳಗೆ ಏಕಕಾಲದಲ್ಲಿ ಸಂಯೋಜಿಸುತ್ತದೆ. ಈ ಸಂಯೋಜನೆಯು ಅತ್ಯಂತ ನಿರ್ಣಾಯಕವಾಗಿದೆ, ಏಕೆಂದರೆ ಇದು ವೈವಿಧ್ಯಮಯ ಸಿದ್ಧಾಂತಗಳು ಮತ್ತು ದತ್ತಾಂಶ ಮೂಲಗಳಿಂದ ಪಡೆದ ಅಂದಾಜುಗಳು ಆರ್ಥಿಕತೆಯ ಗಾತ್ರ ಹಾಗೂ ಬೆಳವಣಿಗೆಯ ಒಂದೇ ಒಂದು ಸಾಮರಸ್ಯದ (harmonised) ಅಂದಾಜಿಗೆ ಬಂದು ತಲುಪುವುದನ್ನು ಖಚಿತಪಡಿಸುತ್ತದೆ.

ಜಿಡಿಪಿ (GDP) ಮರುಹೊಂದಾಣಿಕೆಯ ಆಚೆಗೂ, ವಿವಿಧ ಆಡಳಿತಾತ್ಮಕ ಮತ್ತು ಸಮೀಕ್ಷಾ ಮೂಲಗಳ ದತ್ತಾಂಶಗಳನ್ನು ಪರಸ್ಪರ ಮೌಲ್ಯೀಕರಿಸಲು (cross-validating) ಮತ್ತು ಮರುಹೊಂದಿಸಲು SUTಗಳು ಒಂದು ಶಕ್ತಿಶಾಲಿ ಸಾಧನವಾಗಿವೆ. ಈ ಮೂಲಕ ಇವು ರಾಷ್ಟ್ರೀಯ ಖಾತೆಗಳ ಅಂಕಿಅಂಶಗಳ  ಗುಣಮಟ್ಟ ಮತ್ತು ವಿಶ್ವಾಸಾರ್ಹತೆಯನ್ನು ಬಲಪಡಿಸುತ್ತವೆ. ಕೈಗಾರಿಕೆಗಳ ಮೂಲಕ ಉತ್ಪನ್ನವಾರು ಉತ್ಪಾದನಾ ಮೌಲ್ಯ, ನಿವ್ವಳ ಉತ್ಪನ್ನ ತೆರಿಗೆಗಳು, ವ್ಯಾಪಾರ ಮತ್ತು ಸಾರಿಗೆ ಮಾರ್ಜಿನ್ ಗಳು, ಪೂರೈಕೆ ಬದಿಯ ಆಮದು ಮೌಲ್ಯಗಳು, ಕೈಗಾರಿಕೆಗಳ ಮಧ್ಯಂತರ ಬಳಕೆ (intermediate consumption) ಮತ್ತು ಉತ್ಪನ್ನ ವರ್ಗದ ಆಧಾರದ ಮೇಲಿನ ರಫ್ತುಗಳು—ಹೀಗೆ SUTಗಳಲ್ಲಿ ಅಡಕವಾಗಿರುವ ಉತ್ಪನ್ನ-ಮಟ್ಟದ ವಿವರಗಳು, ಈ ಸಂಕಲನವನ್ನು ಸಾಂಪ್ರದಾಯಿಕ ರಾಷ್ಟ್ರೀಯ ಲೆಕ್ಕಪತ್ರಗಳಿಗಿಂತ ಗಮನಾರ್ಹವಾಗಿ ಹೆಚ್ಚು ದತ್ತಾಂಶ-ತೀವ್ರವಾಗಿಸುತ್ತವೆ (data-intensive). ಆದಾಗ್ಯೂ, ಇದೇ ಸೂಕ್ಷ್ಮ ವಿವರಗಳು (granularity) SUTಗಳಿಗೆ ಒಂದು ವಿಶಿಷ್ಟವಾದ ವಿಶ್ಲೇಷಣಾತ್ಮಕ ಮೌಲ್ಯವನ್ನು ನೀಡುತ್ತವೆ. ಈ ವಿವರವಾದ ಉತ್ಪನ್ನವಾರು-ಕೈಗಾರಿಕಾ ಮಾಹಿತಿ ನೀತಿ ನಿರೂಪಕರು, ಸಂಶೋಧಕರು ಮತ್ತು ಶಿಕ್ಷಣ ತಜ್ಞರಿಗೆ ಭಾರತೀಯ ಆರ್ಥಿಕತೆಯ ರಚನೆ, ಸಂಯೋಜನೆ ಮತ್ತು ಚಲನಶೀಲತೆಯ ಸೂಕ್ಷ್ಮ ವಿಶ್ಲೇಷಣೆಯನ್ನು ಕೈಗೊಳ್ಳಲು ಅನುವು ಮಾಡಿಕೊಡುತ್ತದೆ. ಇದು ಕೈಗಾರಿಕಾ ನೀತಿಯಿಂದ ಹಿಡಿದು ವ್ಯಾಪಾರ ಮತ್ತು ಹೂಡಿಕೆ ಯೋಜನೆಯವರೆಗಿನ ವಿವಿಧ ಕ್ಷೇತ್ರಗಳಲ್ಲಿ ಸಾಕ್ಷ್ಯಾಧಾರಿತ ನೀತಿ ನಿರೂಪಣೆಗೆ ಬೆಂಬಲ ನೀಡುತ್ತದೆ.

SUT ಚೌಕಟ್ಟು
ರಚನಾತ್ಮಕವಾಗಿ, ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳನ್ನು ಎರಡು ಪರಸ್ಪರ ಸಂಯೋಜಿತ ಮ್ಯಾಟ್ರಿಕ್ಸ್ಗಳಾಗಿ (matrices) ಪ್ರಸ್ತುತಪಡಿಸಲಾಗುತ್ತದೆ: ಪೂರೈಕೆ ಕೋಷ್ಟಕ ಮತ್ತು ಬಳಕೆ ಕೋಷ್ಟಕ. ಇವೆರಡನ್ನೂ ಉತ್ಪನ್ನವಾರು-ಕೈಗಾರಿಕಾ (product-by-industry) ರೂಪದಲ್ಲಿ ಜೋಡಿಸಲಾಗಿರುತ್ತದೆ. ಪೂರೈಕೆ ಕೋಷ್ಟಕವು ಆರ್ಥಿಕತೆಯಲ್ಲಿನ ಪ್ರತಿಯೊಂದು ಉತ್ಪನ್ನದ ಒಟ್ಟು ಪೂರೈಕೆಯನ್ನು ದಾಖಲಿಸುತ್ತದೆ; ಇದು ದೇಶೀಯ ಉತ್ಪಾದನೆಯಿಂದ ಬರುವ ಪೂರೈಕೆ (ಉತ್ಪಾದಿಸುವ ಕೈಗಾರಿಕೆಯ ಆಧಾರದ ಮೇಲೆ ಪ್ರತ್ಯೇಕಿಸಲಾದ) ಮತ್ತು ಆಮದುಗಳಿಂದ ಬರುವ ಪೂರೈಕೆಯ ನಡುವಿನ ವ್ಯತ್ಯಾಸವನ್ನು ಗುರುತಿಸುತ್ತದೆ. ಉತ್ಪಾದಕರು ಮತ್ತು ಗ್ರಾಹಕರ ಮೌಲ್ಯಮಾಪನಗಳ ನಡುವಿನ ಅಂತರವನ್ನು ಕಡಿಮೆ ಮಾಡಲು, ಪೂರೈಕೆ ಕೋಷ್ಟಕವು ವ್ಯಾಪಾರ ಮತ್ತು ಸಾರಿಗೆ ಮಾರ್ಜಿನ್ ಗಳು ಹಾಗೂ ಉತ್ಪನ್ನ ತೆರಿಗೆಗಳು ಮತ್ತು ಸಬ್ಸಿಡಿಗಳ ಹೊಂದಾಣಿಕೆಗಳನ್ನು ಸಹ ಒಳಗೊಂಡಿರುತ್ತದೆ. ಇದು ದೇಶೀಯ ಉತ್ಪಾದನೆಯನ್ನು ದಾಖಲಿಸುವ 'ಮೂಲ ಬೆಲೆಗಳಿಂದ' (basic prices), ಮಾರುಕಟ್ಟೆಯಲ್ಲಿ ಸರಕು ಮತ್ತು ಸೇವೆಗಳು ವಾಸ್ತವವಾಗಿ ವಹಿವಾಟಾಗುವ 'ಖರೀದಿದಾರರ ಬೆಲೆಗಳಿಗೆ' (purchasers' prices) ಮೌಲ್ಯಮಾಪನವನ್ನು ಪರಿವರ್ತಿಸಲು ಅನುವು ಮಾಡಿಕೊಡುತ್ತದೆ.

ಪೂರೈಕೆ ಕೋಷ್ಟಕಕ್ಕೆ ಪೂರಕವಾಗಿ, ಬಳಕೆ ಕೋಷ್ಟಕವು ಆರ್ಥಿಕತೆಯಾದ್ಯಂತ ಪ್ರತಿಯೊಂದು ಉತ್ಪನ್ನವನ್ನು ಹೇಗೆ ಬಳಸಲಾಗುತ್ತದೆ ಎಂಬುದನ್ನು ದಾಖಲಿಸುತ್ತದೆ. ಇದು ಒಟ್ಟು ಬಳಕೆಯನ್ನು ಹೀಗೆ ಪ್ರತ್ಯೇಕಿಸುತ್ತದೆ: ಪ್ರತಿ ಕೈಗಾರಿಕೆಯ ಮಧ್ಯಂತರ ಬಳಕೆ (ಅಂದರೆ, ಉತ್ಪಾದನಾ ಪ್ರಕ್ರಿಯೆಯಲ್ಲಿ ಇನ್ಪುಟ್ಗಳಾಗಿ ಬಳಸಲಾಗುವ ಉತ್ಪನ್ನಗಳು), ಖಾಸಗಿ ಅಂತಿಮ ಬಳಕೆಯ ವೆಚ್ಚ, ಸರ್ಕಾರದ ಅಂತಿಮ ಬಳಕೆಯ ವೆಚ್ಚ, ಒಟ್ಟು ಬಂಡವಾಳ ರಚನೆ ಮತ್ತು ರಫ್ತುಗಳು. ಇಡೀ SUT ಚೌಕಟ್ಟು ಪ್ರತಿಯೊಂದು ಉತ್ಪನ್ನದ ಒಟ್ಟು ಪೂರೈಕೆಯು (ದೇಶೀಯ ಉತ್ಪಾದನೆ ಮತ್ತು ಆಮದುಗಳು) ಅದರ ಒಟ್ಟು ಬಳಕೆಗೆ (ಮಧ್ಯಂತರ ಬಳಕೆ ಮತ್ತು ಎಲ್ಲಾ ಅಂತಿಮ ಬಳಕೆಗಳು) ಸಮನಾಗಿರಬೇಕು ಎಂಬ ಮೂಲಭೂತ ಉತ್ಪನ್ನ ಸಮಾನತೆಯ (product identity) ಮೇಲೆ ಆಧಾರಿತವಾಗಿದೆ. ಈ ಸಮಾನತೆಯು ಜಿಡಿಪಿ (GDP) ಅಂದಾಜಿನ ಮೂರೂ ವಿಧಾನಗಳನ್ನು ಪರಸ್ಪರ ಸುಸಂಬದ್ಧಗೊಳಿಸುವ ಒಂದು ಕಾರ್ಯವಿಧಾನವಾಗಿದೆ (mechanism). ಇದು ಯಾವುದೇ ಆರ್ಥಿಕ ಹರಿವು (economic flow) ಎರಡು ಬಾರಿ ಲೆಕ್ಕಕ್ಕೆ ಬರದಂತೆ ಅಥವಾ ಬಿಟ್ಟುಹೋಗದಂತೆ ಖಚಿತಪಡಿಸುತ್ತದೆ.
7. 2022-23ರ ಸರಣಿಯಲ್ಲಿ ವಾರ್ಷಿಕ ರಾಷ್ಟ್ರೀಯ ಲೆಕ್ಕಪತ್ರಗಳನ್ನು SUT ಸಂಕಲನ ಪ್ರಕ್ರಿಯೆಯೊಂದಿಗೆ ಸಂಪೂರ್ಣವಾಗಿ ಸಂಯೋಜಿಸಿರುವುದು, ಪ್ರಸ್ತುತ ಬೆಲೆಗಳಲ್ಲಿನ ಅಂತಿಮ ಅಂದಾಜುಗಳು ಯಾವುದೇ ಸಾಂಖ್ಯಿಕ ವ್ಯತ್ಯಾಸಗಳನ್ನು (statistical discrepancy) ಹೊಂದಿಲ್ಲದಿರುವುದನ್ನು ಖಚಿತಪಡಿಸುತ್ತದೆ. ಇದು ರಾಷ್ಟ್ರೀಯ ಲೆಕ್ಕಪತ್ರಗಳ ಅಂtAರಾಷ್ಟ್ರೀಯ ಹೋಲಿಕೆ ಮತ್ತು ವಿಶ್ಲೇಷಣಾತ್ಮಕ ಉದ್ದೇಶವನ್ನು ಹೆಚ್ಚಿಸುತ್ತದೆ.

ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳ ಸಂಕಲನ 

2022-23 ಮತ್ತು 2023-24ರ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳನ್ನು 155 ಉತ್ಪನ್ನಗಳು ಮತ್ತು 67 ಕೈಗಾರಿಕೆಗಳನ್ನು ಒಳಗೊಂಡಿರುವ ಅತ್ಯಂತ ವಿವರವಾದ ಮಟ್ಟದಲ್ಲಿ ಸಂಕಲಿಸಲಾಗಿದೆ. ಇದು ಅಧಿಕೃತ ಸಾಂಖ್ಯಿಕಗಳಲ್ಲಿ ಲಭ್ಯವಿರುವ ಭಾರತೀಯ ಆರ್ಥಿಕತೆಯ ಅತ್ಯಂತ ಸೂಕ್ಷ್ಮವಾದ (granular) ಚಿತ್ರಣಗಳಲ್ಲಿ ಒಂದನ್ನು ಒದಗಿಸುತ್ತದೆ. ವಾರ್ಷಿಕ ಲೆಕ್ಕಪತ್ರಗಳ ಸಂಕಲನದಲ್ಲಿ ಬಳಸಲಾಗುವ ದತ್ತಾಂಶಗಳ ಜೊತೆಗೆ, ಈ ಸಂಕಲನವು ವೈವಿಧ್ಯಮಯ ಮತ್ತು ಸಮಗ್ರವಾದ ಸಮೀಕ್ಷೆ ಹಾಗೂ ಆಡಳಿತಾತ್ಮಕ ದತ್ತಾಂಶ ಮೂಲಗಳನ್ನು ಆಧರಿಸಿದೆ: ಸಂಘಟಿತ ಉತ್ಪಾದನಾ ವಲಯಕ್ಕಾಗಿ ಕೈಗಾರಿಕೆಗಳ ವಾರ್ಷಿಕ ಸಮೀಕ್ಷೆ (ASI); ಅನೌಪಚಾರಿಕ ಕೃಷಿಯೇತರ ವಲಯಕ್ಕಾಗಿ ಅಸಂಘಟಿತ ವಲಯದ ಉದ್ಯಮಗಳ ವಾರ್ಷಿಕ ಸಮೀಕ್ಷೆ (ASUSE); ಖಾಸಗಿ ಅಂತಿಮ ಬಳಕೆಗಾಗಿ ಗೃಹ ಬಳಕೆ ವೆಚ್ಚ ಸಮೀಕ್ಷೆ (HCES); ಮತ್ತು ಸರ್ಕಾರಿ ಇಲಾಖೆಗಳು ಹಾಗೂ ನಿಯಂತ್ರಕ ಸಂಸ್ಥೆಗಳು ನಿರ್ವಹಿಸುವ ವ್ಯಾಪಕ ಶ್ರೇಣಿಯ ಆಡಳಿತಾತ್ಮಕ ಡೇಟಾಬೇಸ್ ಗಳು.

ಸಂಕಲನ ಕಾರ್ಯವಿಧಾನವು ರಚನಾತ್ಮಕವಾದ, ನಾಲ್ಕು ಹಂತಗಳ ಪ್ರಕ್ರಿಯೆಯನ್ನು ಅನುಸರಿಸುತ್ತದೆ: (i) ಕೈಗಾರಿಕೆಗಳು ಮತ್ತು ಉತ್ಪನ್ನಗಳ ಗುರುತಿಸುವಿಕೆ: ಉತ್ಪಾದನಾ ವಲಯಕ್ಕಾಗಿ ASI ದತ್ತಾಂಶದಿಂದ ರಾಷ್ಟ್ರೀಯ ಕೈಗಾರಿಕಾ ವರ್ಗೀಕರಣವನ್ನು (NIC) ಮತ್ತು ಉತ್ಪಾದನೆಯೇತರ ವಲಯಗಳಿಗಾಗಿ ವಾರ್ಷಿಕ ಅಂದಾಜುಗಳಿಂದ ಸಂಕಲನ ವರ್ಗಗಳನ್ನು (CC) ಬಳಸಿಕೊಂಡು ಕೈಗಾರಿಕೆಗಳನ್ನು ಪ್ರತ್ಯೇಕಿಸಲಾಗುತ್ತದೆ; ಉತ್ಪಾದನಾ ವಲಯದ ರಾಷ್ಟ್ರೀಯ ಉತ್ಪನ್ನ ವರ್ಗೀಕರಣ (NPCMS) ಮತ್ತು ಸೇವಾ ವಲಯದ ರಾಷ್ಟ್ರೀಯ ಉತ್ಪನ್ನ ವರ್ಗೀಕರಣಕ್ಕೆ (NPCSS) ಅನುಗುಣವಾಗಿ ಉತ್ಪನ್ನಗಳನ್ನು ವರ್ಗೀಕರಿಸಲಾಗುತ್ತದೆ; (ii) ಪೂರೈಕೆ ಕೋಷ್ಟಕದ ಸಂಕಲನ; (iii) ಬಳಕೆ ಕೋಷ್ಟಕದ ಸಂಕಲನ; ಮತ್ತು (iv) ಉತ್ಪನ್ನ ಸಮತೋಲನ, ಇದರ ಮೂಲಕ ಉತ್ಪನ್ನ ಸಮಾನತೆಯನ್ನು ಪೂರೈಸಲು ಪ್ರತಿ ಉತ್ಪನ್ನದ ಪೂರೈಕೆ ಮತ್ತು ಬಳಕೆಯನ್ನು ಪುನರಾವರ್ತಿತವಾಗಿ  ಮರುಹೊಂದಿಸಲಾಗುತ್ತದೆ.

ಪೂರೈಕೆ ಕೋಷ್ಟಕವನ್ನು ಆರಂಭದಲ್ಲಿ 'ಮೂಲ ಬೆಲೆಗಳಲ್ಲಿ' (basic prices) ಸಿದ್ಧಪಡಿಸಲಾಗುತ್ತದೆ, ಇದು ಕೈಗಾರಿಕಾ ಉತ್ಪಾದನೆಯ ವಾರ್ಷಿಕ ಅಂದಾಜುಗಳಲ್ಲಿ ಬಳಸಲಾಗುವ ಮೌಲ್ಯಮಾಪನ ಪದ್ಧತಿಗಳನ್ನು ಪ್ರತಿಬಿಂಬಿಸುತ್ತದೆ. ಪೂರೈಕೆ ಮೌಲ್ಯಗಳನ್ನು 'ಖರೀದಿದಾರರ ಬೆಲೆಗಳಿಗೆ' (purchasers' prices) ಪರಿವರ್ತಿಸಲು ಮತ್ತು ಅವುಗಳನ್ನು ಅದಕ್ಕೆ ಅನುಗುಣವಾದ ಬಳಕೆ-ಬದಿಯ (use-side) ದತ್ತಾಂಶದೊಂದಿಗೆ ಹೊಂದಿಸಲು, ವ್ಯಾಪಾರ ಮತ್ತು ಸಾರಿಗೆ ಮಾರ್ಜಿನ್ಗಳು ಹಾಗೂ ನಿವ್ವಳ ಉತ್ಪನ್ನ ತೆರಿಗೆಗಳನ್ನು ಒಳಗೊಂಡಿರುವ ಮೌಲ್ಯಮಾಪನ ಹೊಂದಾಣಿಕೆಗಳ ಒಂದು ಗುಂಪನ್ನು ನಂತರ ಅನ್ವಯಿಸಲಾಗುತ್ತದೆ. ಪೂರೈಕೆ-ಬದಿಯ ಮೌಲ್ಯಗಳ ಸಂಕಲನವು ವ್ಯಾಪಕ ಶ್ರೇಣಿಯ ಮೂಲಗಳನ್ನು ಆಧರಿಸಿದೆ: ಕಾರ್ಪೊರೇಟ್ ವಲಯಕ್ಕಾಗಿ ಕಾರ್ಪೊರೇಷನ್ ಗಳ ವಾರ್ಷಿಕ ಲೆಕ್ಕಪತ್ರಗಳು; ಉತ್ಪಾದನೆ ಮತ್ತು ಅಸಂಘಟಿತ ವಲಯಕ್ಕಾಗಿ ASI ಮತ್ತು ASUSE ದತ್ತಾಂಶ; ಸರಕುಗಳ ಆಮದುಗಳಿಗಾಗಿ ವಾಣಿಜ್ಯ ಮಾಹಿತಿ ಮತ್ತು ಸಾಂಖ್ಯಿಕ ಮಹಾನಿರ್ದೇಶನಾಲಯದ (DGCIS) EXIM ದತ್ತಸಂಚಯ; ಸೇವೆಗಳ ಆಮದುಗಳಿಗಾಗಿ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ದತ್ತಾಂಶ; ಮತ್ತು ಆಮದು ಸುಂಕಗಳಿಗಾಗಿ ಕೇಂದ್ರೀಯ ಪರೋಕ್ಷ ತೆರಿಗೆಗಳು ಮತ್ತು ಕಸ್ಟಮ್ಸ್ ಮಂಡಳಿಯ (CBIC) ಸುಂಕದ ದರ.

ಬಳಕೆ ಕೋಷ್ಟಕವು ಒಂದೇ ಏಕೀಕೃತ ಚೌಕಟ್ಟಿನಲ್ಲಿ, ಉದ್ಯಮವಾರು ಮೂಲ ಬೆಲೆಗಳಲ್ಲಿನ ಒಟ್ಟು ಮೌಲ್ಯವರ್ಧನೆ (GVA) (ಇದು ಜಿಡಿಪಿಯ ಉತ್ಪಾದನಾ ವಿಧಾನಕ್ಕೆ ಅನುಗುಣವಾಗಿರುತ್ತದೆ), ವೆಚ್ಚದ ಬದಿಯ ಜಿಡಿಪಿ (ಎಲ್ಲಾ ಅಂತಿಮ ಬಳಕೆಗಳ ಮೊತ್ತದಿಂದ ಆಮದುಗಳನ್ನು ಕಳೆಯುವ ಮೂಲಕ ಪಡೆಯಲಾಗುತ್ತದೆ) ಮತ್ತು ಉದ್ಯೋಗಿಗಳ ಪರಿಹಾರ, ಒಟ್ಟು ಕಾರ್ಯಾಚರಣೆಯ ಹೆಚ್ಚುವರಿ ಹಾಗೂ ಮಿಶ್ರ ಆದಾಯವನ್ನು ಒಳಗೊಂಡಿರುವ ಉದ್ಯಮವಾರು ಮೌಲ್ಯವರ್ಧನೆಯ ಆದಾಯದ ಬದಿಯ ವಿಭಜನೆಯನ್ನು ಒದಗಿಸುತ್ತದೆ. ಆರ್ಥಿಕತೆಯ ಈ 'ಮೂರರಲ್ಲೊಂದು' (three-in-one) ಪ್ರಾತಿನಿಧ್ಯವು SUT ಚೌಕಟ್ಟಿನ ವಿಶಿಷ್ಟ ಲಕ್ಷಣವಾಗಿದೆ ಮತ್ತು ಇದು ಸಮಗ್ರವಾದ ಉತ್ಪನ್ನ-ಮಟ್ಟದ ದತ್ತಾಂಶಗಳ ಬಳಕೆಯಿಂದ ಮಾತ್ರ ಸಾಧ್ಯವಾಗಿದೆ. ಬಳಕೆ ಕೋಷ್ಟಕಕ್ಕೆ ಮಾಹಿತಿ ಒದಗಿಸುವ ಪ್ರಮುಖ ದತ್ತಾಂಶ ಮೂಲಗಳು ಹೀಗಿವೆ: ಕೃಷಿ ಇನ್ ಪುಟ್ ಗಳಿಗಾಗಿ ಬೇಸಾಯ ವೆಚ್ಚದ ಅಧ್ಯಯನಗಳು (CCS); ಉತ್ಪಾದನೆಗಾಗಿ ASI ದತ್ತಾಂಶ; ಕಾರ್ಪೊರೇಟ್ ವಲಯಕ್ಕಾಗಿ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ (MCA); ಸರಕುಗಳ ರಫ್ತಿಗಾಗಿ EXIM ದತ್ತಾಂಶ; ಮತ್ತು ಸೇವೆಗಳ ರಫ್ತಿಗಾಗಿ ಆರ್ಬಿಐ (RBI) ದತ್ತಾಂಶ.

SUT ಅನ್ನು ಸಂಕಲಿಸಲು ಬಳಸಲಾಗುವ ವೈವಿಧ್ಯಮಯ ದತ್ತಾಂಶಗಳನ್ನು ಪರಿಗಣಿಸಿ, ಉತ್ಪನ್ನ ಸಮಾನತೆಯನ್ನು ಸಾಧಿಸಲು ಉತ್ಪನ್ನ ಸಮತೋಲನವನ್ನು  ಕೈಗೊಳ್ಳಲಾಗುತ್ತದೆ. ಉತ್ಪನ್ನಗಳ ಈ ಸಮತೋಲನ ಪ್ರಕ್ರಿಯೆಯು ವಿವಿಧ ದತ್ತಾಂಶಗಳ ಸಾಮರ್ಥ್ಯವನ್ನು ಪರಿಶೀಲಿಸುತ್ತದೆ. ಸಾಮಾನ್ಯವಾಗಿ, ಉತ್ಪನ್ನಗಳನ್ನು ಸಮತೋಲನಗೊಳಿಸಲು TTM ಮತ್ತು ತೆರಿಗೆಗಳು, ದಾಸ್ತಾನುಗಳಲ್ಲಿನ ಬದಲಾವಣೆ (Change-in-Stock), ಮಧ್ಯಂತರ ಬಳಕೆ ಮತ್ತು ಆಯ್ದ ಅಂತಿಮ ಬಳಕೆಯ ವಸ್ತುಗಳಂತಹ ಕನಿಷ್ಠ ವಸ್ತುಗಳನ್ನು ಉತ್ಪನ್ನಗಳನ್ನು ಸಮತೋಲನಗೊಳಿಸಲು ಸುಧಾರಿಸಲಾಗುತ್ತದೆ.

ಪ್ರಮುಖ ಮುಖ್ಯಾಂಶಗಳು 

• 2022-23 ಮತ್ತು 2023-24ರ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳು ಭಾರತೀಯ ಆರ್ಥಿಕತೆಯ ರಚನೆ ಮತ್ತು ಚಲನಶೀಲತೆಯ ಕುರಿತು ಶ್ರೀಮಂತ ಪ್ರಾಯೋಗಿಕ ಫಲಿತಾಂಶಗಳನ್ನು ನೀಡುತ್ತವೆ. ಪ್ರಮುಖ ಮುಖ್ಯಾಂಶಗಳನ್ನು ಕೆಳಗೆ ಪ್ರಸ್ತುತಪಡಿಸಲಾಗಿದೆ:
• ಆರ್ಥಿಕತೆಯಲ್ಲಿ ಖರೀದಿದಾರರ ಬೆಲೆಗಳಲ್ಲಿನ (purchasers' prices) ಸರಕು ಮತ್ತು ಸೇವೆಗಳ ಒಟ್ಟು ಪೂರೈಕೆಯು 2022-23ರಲ್ಲಿ ₹627.18 ಲಕ್ಷ ಕೋಟಿ ಮತ್ತು 2023-24ರಲ್ಲಿ ₹669.88 ಲಕ್ಷ ಕೋಟಿಯಷ್ಟಾಗಿತ್ತು.
• ಮೂಲ ಬೆಲೆಗಳಲ್ಲಿನ (basic prices) ಒಟ್ಟು ಪೂರೈಕೆಯ ವಲಯವಾರು ಸಂಯೋಜನೆಯು ಈ ಎರಡು ವರ್ಷಗಳಲ್ಲಿ ಸ್ಥೂಲವಾಗಿ ಸ್ಥಿರವಾಗಿತ್ತು: ಕೃಷಿ ಸರಕುಗಳು ಶೇ. 11, ಗಣಿಗಾರಿಕೆ ಸರಕುಗಳು ಶೇ. 2, ಉತ್ಪಾದನಾ ಸರಕುಗಳು ಶೇ. 35-36 ಮತ್ತು ಸೇವಾ ವಲಯವು ಸುಮಾರು ಶೇ. 51-52 ರಷ್ಟನ್ನು ಹೊಂದಿದ್ದವು. ಇದು ಭಾರತೀಯ ಆರ್ಥಿಕತೆಯಲ್ಲಿ ಸೇವೆಗಳ ಮುಂದುವರಿದ ಪ್ರಾಬಲ್ಯವನ್ನು ಒತ್ತಿಹೇಳುತ್ತದೆ.
• GVA-ಟು-GVO (Gross Value Added to Gross Value of Output) ಅನುಪಾತವು ಒಂದು ಉದ್ಯಮದೊಳಗಿನ ಮೌಲ್ಯವರ್ಧನೆಯ ದಕ್ಷತೆಯ ಪ್ರಮುಖ ಸೂಚಕವಾಗಿದೆ. 2022-23ರಲ್ಲಿ, ಅತ್ಯಧಿಕ ಅನುಪಾತವನ್ನು ಹೊಂದಿರುವ (ವ್ಯಾಪ್ತಿ: 0.95 ರಿಂದ 0.76) ಐದು ಉದ್ಯಮಗಳೆಂದರೆ: ನಿವಾಸಗಳ ಮಾಲೀಕತ್ವ, ಅರಣ್ಯ ಮತ್ತು ಮರ ಕಡಿಯುವಿಕೆ, ಕೃಷಿ, ಕಚ್ಚಾ ಪೆಟ್ರೋಲಿಯಂ ಮತ್ತು ಶಿಕ್ಷಣ ಮತ್ತು ಸಂಶೋಧನೆ—ಇವು ತುಲನಾತ್ಮಕವಾಗಿ ಕಡಿಮೆ ಕಚ್ಚಾ ವಸ್ತುಗಳ ಅಗತ್ಯತೆಗಳನ್ನು ಹೊಂದಿರುವ ಉದ್ಯಮಗಳಾಗಿವೆ. 2023-24ರಲ್ಲಿ, ಮೊದಲ ಐದು ಉದ್ಯಮಗಳೆಂದರೆ (ವ್ಯಾಪ್ತಿ: 0.95 ರಿಂದ 0.74): ನಿವಾಸಗಳ ಮಾಲೀಕತ್ವ, ಕೃಷಿ, ಅರಣ್ಯ ಮತ್ತು ಮರ ಕಡಿಯುವಿಕೆ, ಸಾರ್ವಜನಿಕ ಆಡಳಿತ ಮತ್ತು ರಕ್ಷಣೆ ಹಾಗೂ ಶಿಕ್ಷಣ ಮತ್ತು ಸಂಶೋಧನೆ.
• ಇದಕ್ಕೆ ವ್ಯತಿರಿಕ್ತವಾಗಿ, ಅತ್ಯಂತ ಕಡಿಮೆ GVA-ಟು-GVO ಅನುಪಾತಗಳನ್ನು ಹೊಂದಿರುವ ಉದ್ಯಮಗಳೆಂದರೆ ಹೆಚ್ಚಿನ ಕಚ್ಚಾ ವಸ್ತುಗಳ ಇನ್ ಪುಟ್ ತೀವ್ರತೆಯನ್ನು ಹೊಂದಿರುವ ಉದ್ಯಮಗಳಾಗಿವೆ. 2022-23ರಲ್ಲಿ, ಕೊನೆಯ ಐದು ಸ್ಥಾನಗಳಲ್ಲಿರುವ (ವ್ಯಾಪ್ತಿ: 0.11 ರಿಂದ 0.08) ಉದ್ಯಮಗಳೆಂದರೆ: ಮಾಂಸ, ಮೀನು, ಹಣ್ಣು, ತರಕಾರಿಗಳು, ಎಣ್ಣೆಗಳು ಮತ್ತು ಕೊಬ್ಬುಗಳ ಉತ್ಪಾದನೆ, ಸಂಸ್ಕರಣೆ ಮತ್ತು ಸಂರಕ್ಷಣೆ; ಡೈರಿ ಉತ್ಪನ್ನಗಳ ತಯಾರಿಕೆ; ಸಂವಹನ ಸಾಧನಗಳ ತಯಾರಿಕೆ; ಕೋಕ್ ಮತ್ತು ಸಂಸ್ಕರಿಸಿದ ಪೆಟ್ರೋಲಿಯಂ ಉತ್ಪನ್ನಗಳ ತಯಾರಿಕೆ; ಮತ್ತು ಧಾನ್ಯ ಗಿರಣಿ ಉತ್ಪನ್ನಗಳು ಹಾಗೂ ಪ್ರಾಣಿಗಳ ಆಹಾರಗಳ ತಯಾರಿಕೆ. 2023-24ರಲ್ಲೂ ಸ್ಥೂಲವಾಗಿ ಇದೇ ರೀತಿಯ ಮಾದರಿಯು ಕಂಡುಬಂದಿದ್ದು, ಕೊನೆಯ ಐದು ಸ್ಥಾನಗಳಲ್ಲಿರುವ (ವ್ಯಾಪ್ತಿ: 0.12 ರಿಂದ 0.08) ಉದ್ಯಮಗಳೆಂದರೆ: ಮಾಂಸ, ಮೀನು, ಹಣ್ಣು, ತರಕಾರಿಗಳು, ಎಣ್ಣೆಗಳು ಮತ್ತು ಕೊಬ್ಬುಗಳ ಉತ್ಪಾದನೆ, ಸಂಸ್ಕರಣೆ ಮತ್ತು ಸಂರಕ್ಷಣೆ; ಸಂವಹನ ಸಾಧನಗಳ ತಯಾರಿಕೆ; ಧಾನ್ಯ ಗಿರಣಿ ಉತ್ಪನ್ನಗಳು ಹಾಗೂ ಪ್ರಾಣಿಗಳ ಆಹಾರಗಳ ತಯಾರಿಕೆ; ಡೈರಿ ಉತ್ಪನ್ನಗಳ ತಯಾರಿಕೆ; ಮತ್ತು ಕೋಕ್ ಹಾಗೂ ಸಂಸ್ಕರಿಸಿದ ಪೆಟ್ರೋಲಿಯಂ ಉತ್ಪನ್ನಗಳ ತಯಾರಿಕೆ.
• ಕಟ್ಟಡ ನಿರ್ಮಾಣ ಉದ್ಯಮವು ಮಧ್ಯಂತರ ಬಳಕೆಯಲ್ಲಿ ಅತ್ಯಧಿಕ ಪಾಲನ್ನು ಹೊಂದಿದ್ದು, ಎರಡೂ ವರ್ಷಗಳಲ್ಲಿ ಒಟ್ಟು ಮಧ್ಯಂತರ ಬಳಕೆಯ ಶೇ. 14-15 ರಷ್ಟನ್ನು ಒಳಗೊಂಡಿದೆ.
• ಮಧ್ಯಂತರ ಬಳಕೆಯ ಸಂಯೋಜನೆಯು ಉತ್ಪಾದನೆಯ ಇನ್ಪುಟ್-ತೀವ್ರತೆಯನ್ನು ಬಹಿರಂಗಪಡಿಸುತ್ತದೆ: ಎರಡೂ ವರ್ಷಗಳಲ್ಲಿ, ಸರಕುಗಳು ಒಟ್ಟು ಮಧ್ಯಂತರ ಬಳಕೆಯ ಶೇ. 72-73 ರಷ್ಟನ್ನು ಮತ್ತು ಸೇವೆಗಳು ಶೇ. 27-28 ರಷ್ಟನ್ನು ಹೊಂದಿದ್ದವು. ಇದು ಭಾರತದ ಉತ್ಪಾದನಾ ತಳಹದಿಯ ಕಚ್ಚಾ ವಸ್ತು-ತೀವ್ರತೆಯ (material-intensive) ಸ್ವರೂಪವನ್ನು ಉಲ್ಲೇಖಿಸುತ್ತದೆ.
• 2022-23ರಲ್ಲಿ ಖಾಸಗಿ ಅಂತಿಮ ಬಳಕೆಯ ವೆಚ್ಚವು (PFCE) ಶೇ. 57 ಸರಕುಗಳನ್ನು ಮತ್ತು ಶೇ. 43 ಸೇವೆಗಳನ್ನು ಒಳಗೊಂಡಿತ್ತು, ಆದರೆ 2023-24ರಲ್ಲಿ ಸರಕುಗಳು ಶೇ. 56 ಮತ್ತು ಸೇವೆಗಳು ಶೇ. 44 ರಷ್ಟನ್ನು ಹೊಂದಿದ್ದವು.

ಒಟ್ಟಾರೆಯಾಗಿ ಹೇಳುವುದಾದರೆ, 2022-23 ಮತ್ತು 2023-24ರ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳು ಉತ್ಪನ್ನ-ಕೈಗಾರಿಕಾ ಮಟ್ಟದಲ್ಲಿ ಭಾರತೀಯ ಆರ್ಥಿಕತೆಯ ವಿಶಿಷ್ಟವಾದ ಸಮಗ್ರ ಮತ್ತು ಆಂತರಿಕವಾಗಿ ಸ್ಥಿರವಾದ ವಿವರಣೆಯನ್ನು ಒದಗಿಸುತ್ತವೆ. ಇವು ಆರ್ಥಿಕ ಸಂಶೋಧನೆ, ರಚನಾತ್ಮಕ ವಿಶ್ಲೇಷಣೆ ಮತ್ತು ಸಾಕ್ಷ್ಯಾಧಾರಿತ ನೀತಿ ನಿರೂಪಣೆಗೆ ಒಂದು ಮೂಲಭೂತ ಸಂಪನ್ಮೂಲವಾಗಿವೆ.

ಅಂಕಿಅಂಶಗಳ ಸಮಯೋಚಿತತೆ  ಮತ್ತು ಸೂಕ್ಷ್ಮತೆಯನ್ನು  ಸುಧಾರಿಸುವಲ್ಲಿ MoSPI ಗಮನ ಹರಿಸಿರುವುದರಿಂದ, ಹಿಂದಿನ ಮೂಲ ಸರಣಿಗೆ ಹೋಲಿಸಿದರೆ SUT ಅನ್ನು ಅತ್ಯಂತ ಕಡಿಮೆ ಸಮಯದ ವಿಳಂಬದೊಂದಿಗೆ ಪ್ರಕಟಿಸಲಾಗುತ್ತಿದೆ. ಅಷ್ಟೇ ಅಲ್ಲದೆ, ಸೂಕ್ಷ್ಮತೆಯ ದೃಷ್ಟಿಯಿಂದ ಉತ್ಪನ್ನಗಳ ಸಂಖ್ಯೆಯನ್ನು ಹಿಂದಿನ ಮೂಲ ಸರಣಿಯ SUT ನಲ್ಲಿದ್ದ 140 ರಿಂದ 155 ಕ್ಕೆ ಹೆಚ್ಚಿಸಲಾಗಿದೆ.

'2022-23 ಮತ್ತು 2023-24ರ ಪೂರೈಕೆ ಮತ್ತು ಬಳಕೆ ಕೋಷ್ಟಕಗಳು' ಹಾಗೂ SUT ಸಂಕಲನದ ಕುರಿತಾದ ವಿವರವಾದ ಕಾರ್ಯವಿಧಾನದ ಟಿಪ್ಪಣಿಯು (Methodological Note) MoSPI ಅಧಿಕೃತ ವೆಬ್ ಸೈಟ್ ನಲ್ಲಿ ಉಚಿತ ಡೌನ್ ಲೋಡ್ ಗಾಗಿ ಲಭ್ಯವಿದೆ:

https://www.mospi.gov.in/publications-reports/innerpage/847

******