زراعت اور کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج مہاراشٹر کے ستارہ میں سینک اسکول گراؤنڈ میں منعقدہ "پردھان منتری آواس یوجنا -گرامین (پی ایم اے وائی-جی) بینیفشری کانفرنس اور مہا آواس ابھیان ریاستی سطح کے ایوارڈ تقسیم کی تقریب" میں 5 لاکھ مکمل شدہ دیہی مکانات کی گرہ  پرویش تقریب کا افتتاح کیا ،  5  مستفیدین کو گھر کی چابیاں سونپیں ، اور کئی اہم فیصلوں کا اعلان کیا،  جو مہاراشٹر میں دیہی ترقی کو نئی رفتار دیں گے ۔  مہاراشٹر کے وزیر اعلی جناب دیویندر فڈنویس ، دیہی ترقی اور پنچایتی راج کے وزیر جناب جے کمار گورے ، سیاحت ، کان کنی اور سابق فوجی بہبود کے وزیر اور ستارہ کے وزیر انچارج جناب شمبھوراج دیسائی ، تعمیراتی عامہ کے وزیر جناب شیویندر سنگھ بھوسلے ، ریلیف اور باز آبادکاری کے وزیر جناب مکرند جادھو (پاٹل)، دیہی ترقی اور پنچایتی راج کے وزیر مملکت جناب یوگیش کدم اور مقامی رکن پارلیمنٹ شریمنت چھترپتی ادین راجے بھوسلے اس موقع پر موجود تھے ۔

اپنے خطاب میں مرکزی وزیر جناب شیوراج سنگھ چوہان نے کہا کہ وزیر اعظم جناب نریندر مودی کی قیادت میں مرکزی حکومت کا واضح عزم ہے کہ ملک میں کوئی بھی غریب شخص کچے گھر میں نہ رہے اور ہر اہل خاندان کو  با وقا ر پکی چھت ملے ۔  انہوں نے کہا کہ مہاراشٹر نے پی ایم اے وائی- جی کے نفاذ میں قابل ذکر کام کیا ہے اور ریکارڈ وقت میں 5  لاکھ مکانات مکمل کرکے اچھی حکمرانی ، احساس اور  ثمر آور  انتظامی امور کی بہترین مثال قائم کی ہے۔

مرکزی وزیر جناب چوہان نے مالی سال 27-2026 کے لیے پردھان منتری آواس یوجنا -گرامین کے تحت مہاراشٹر کے لیے 8,368.50 کروڑ روپے کی  مرکزی امداد جاری کرنے کا اعلان کیا ۔  انہوں نے کہا کہ یہ رقم ریاست میں دیہی غریبوں کے لیے مکانات کی تعمیر کو مزید تیز کرے گی اور بے گھر سے آزاد  دیہی مہاراشٹر کے عزم کو مضبوط کرے گی ۔

جناب چوہان نے یہ بھی کہا کہ اہل خاندانوں کے لیے دروازے کھلے ہیں، جو چھوٹ گئے ہیں ، اور سروے اور تصدیق کا عمل مکمل ہونے کے بعد ضرورت کے مطابق مزید مکانات فراہم کیے جائیں گے ۔  انہوں نے اس بات کا اعادہ کیا کہ مرکزی حکومت کا مقصد صرف مکانات تعمیر کرنا نہیں ہے ، بلکہ بجلی ، پانی ، صفائی ستھرائی اور باوقار زندگی کے ساتھ مجموعی طور پر دیہی معیار زندگی کو بھی بلند کرنا ہے ۔

مرکزی وزیر جناب شیوراج سنگھ چوہان نے وزیر اعلی جناب فڈنویس کو پردھان منتری گرام سڑک یوجنا-IV کے تحت مہاراشٹر کے لئے 122.98 کروڑ روپے کے 35 سڑک پروجیکٹوں کے لیے منظوری بھی سونپی ۔   95.99 کلومیٹر پر محیط ان پروجیکٹوں سے ریاست کی 35 دیہی بستیوں کو فائدہ پہنچے گا ، جس سے تعلیم ، صحت ، بازاروں اور دیگر ضروری خدمات تک رسائی آسان ہوگی ۔

جناب شیوراج سنگھ چوہان نے وزیر اعلی جناب فڈنویس کے ساتھ مل کر "مہا آواس ابھیان" کے تحت بہترین کارکردگی کا مظاہرہ کرنے والے اضلاع ، اکائیوں اور عہدیداروں کو اعزاز دیتے ہوئے کہا کہ جب سیاسی عزم ، انتظامی کارکردگی اور عوامی فلاح و بہبود کا احساس ایک ساتھ آتا ہے، تو ترقیاتی مہمات عوامی تحریکیں بن جاتی ہیں ۔  انہوں نے کہا کہ مہاراشٹر نے دیہی ہاؤسنگ کے شعبے میں جو رفتار اور عزم کا مظاہرہ کیا ہے،  وہ دوسری ریاستوں کے لیے باعث تحریک  ہے۔

وکست بھارت جی-رام-جی یوجنا کا حوالہ دیتے ہوئے،  مرکزی وزیر جناب چوہان نے کہا کہ یہ پہل ، جو یکم جولائی کو شروع کی جائے گی ، دیہاتوں کی مجموعی اور منصوبہ بند ترقی کے لیے ایک نئی بنیاد بنے گی ۔  انہوں نے کہا کہ اس اسکیم کے ذریعے گرام پنچایتیں اپنی مقامی ضروریات کے مطابق ایک جامع ترقیاتی منصوبہ تیار کریں گی ، جس سے گاؤں کے بنیادی ڈھانچے ، عوامی سہولتوں   اور گزر بسر سے متعلق اہم کاموں میں تیزی آئے گی اور وکست بھارت کے قومی عزم کو ترقی یافتہ گاؤں کی مضبوط بنیاد پر آگے بڑھایا جائے گا ۔

کسانوں کے مسائل پر خصوصی  بات کرتے ہوئے مرکزی وزیر زراعت جناب چوہان نے پیاز کے کاشتکاروں کو بڑی راحت فراہم کی ۔  انہوں نے کہا کہ پیداوار میں اضافے اور برآمدات سے متعلق حالات کی وجہ سے مارکیٹ کی قیمتیں متاثر ہوئی ہیں ، اس لیے آج سے نیفیڈ 12.35 فی کلو گرام  کے نرخ پر پیاز کی خریداری شروع کر دے گا ،  تاکہ کسانوں کو فوری مدد مل سکے ۔  انہوں نے واضح طور پر کہا کہ مرکزی حکومت کسانوں کو ان کی مشکل  میں تنہا نہیں چھوڑے گی اور خریداری کے نظام کو مؤثر ، شفاف اور منظم بنانے پر زور دیا ۔   جناب چوہان نے عہدیداروں کو سخت نظر رکھنے کی بھی ہدایت کی،  تاکہ خریداری کا عمل آسان رہے اور اصل کسان اس کے فوائد حاصل کر سکیں ۔

گنا اُگانے والوں سے متعلق مسائل کے حوالے سے جناب چوہان نے یقین دلایا کہ مرکز  اور مہاراشٹر کی حکومتیں مسائل کو حل کرنے کے لیے مل کر کام کریں گی ۔  انہوں نے کہا کہ اس معاملے پر وزیر اعلی جناب فڈنویس کے ساتھ بات چیت کی گئی ہے اور عملی حل تلاش کرنے کے لیے متعلقہ وزارت کی سطح پر ضروری بات چیت کی جائے گی ، کیونکہ کسان ملک کی معیشت کی ریڑھ کی ہڈی ہیں ۔

جناب چوہان نے اس بات پر بھی زور دیا کہ زراعت ہندوستانی معیشت کی ریڑھ کی ہڈی ہے اور کسان اس کی روح ہیں ۔  ایم ایس پی میں حالیہ اضافے ، تلہن اور دالوں کی خریداری ، کپاس مشن ، فارمر آئی ڈی ، کسانوں پر مرکوز نظام اور دیہی بنیادی ڈھانچے کی توسیع جیسے اقدامات کا حوالہ دیتے ہوئے ، انہوں نے کہا کہ مرکزی حکومت کسانوں اور دیہی غریبوں کی فلاح و بہبود کو اولین ترجیح دے رہی ہے ۔

ساتارہ کی مقدس سرزمین کو چھترپتی شیواجی مہاراج کی بہادری ، عزت نفس اور اچھی حکمرانی کے لیے تحریک کا مقام قرار دیتے ہوئے،  جناب شیوراج سنگھ چوہان نے کہا کہ شیواجی مہاراج نہ صرف مہاراشٹر بلکہ پورے ملک کے ہیرو ہیں ۔  انہوں نے کہا کہ شیواجی مہاراج نے ملک کو یہ پیغام دیا کہ اچھی حکمرانی کا مطلب غریبوں کے آنسو پونچھنا ، ماؤں اور بہنوں کے احترام کو یقینی بنانا ، کسانوں کو خوشحال بنانا اور معاشرے کے آخری شخص کو گلے لگانا ہے ۔  مرکزی حکومت ، وزیر اعظم جناب نریندر مودی کی قیادت میں ، اس عوامی فلاح و بہبود اور احساس  پر مبنی حکمرانی کے وژن کو آگے بڑھانے کے عزم کے ساتھ کام کر رہی ہے ۔

مہاراشٹر کے وزیر اعلی جناب دیویندر فڈنویس نے اس تقریب میں کہا کہ وزیر اعظم جناب مودی اور مرکزی وزیر جناب شیوراج سنگھ چوہان کے تعاون سے مہاراشٹر کو ریکارڈ 30 لاکھ مکانات کی منظوری ملی ہے اور ریاست نے ریکارڈ وقت میں 5,00,000 مکانات مکمل کر کے انہیں آج مستفیدین کے نام وقف کیا ہے ۔  انہوں نے کہا کہ ریاستی حکومت نے ہاؤسنگ کے معیار کو بہتر بنا کر ، شمسی توانائی کے ذریعے بجلی فراہم کرکے اور اہل بے زمین خاندانوں کو مدد فراہم کرکے،  اس مہم کو جامع سماجی تحفظ کے ماڈل میں تبدیل کر دیا ہے ۔

وزیر اعلی نے یہ بھی کہا کہ مہاراشٹر کا مقصد  سبھی کو گھر دینے والی ریاست بننے کا حصول ہے اور مستقبل میں مزید خاندانوں کو رہائش فراہم کی جائے گی ۔  انہوں نے پیاز کے کاشتکاروں کے لیے مرکزی وزیر جناب چوہان کی طرف سے اعلان کردہ نیفیڈ کی خریداری کا خیرمقدم کیا اور مرکز اور ریاست کے تال میل کے ذریعے گنے اور چینی کی صنعت سے متعلق مسائل کو حل کرنے پر اعتماد کا اظہار کیا ۔

اس پروگرام میں عوامی نمائندوں ، عہدیداروں ، مستفیدین اور دیہی ترقی سے وابستہ دیہی شہریوں کی ایک بڑی تعداد نے شرکت کی ۔

........................................................................................................

) ش ح –ض ر-ق ر)

U.No. 7121