اجتماعی ترقی کے فروغ کے اپنے عزم کو مزید مستحکم کرتے ہوئے نیشنل ہائی وے اتھارٹی آف انڈیا (این ایچ اے آئی) نے ورٹیس فاؤنڈیشن کے اشتراک سے ’پروجیکٹ سکشَم‘ کے ذریعے ایک مؤثر سماجی اثر قائم کیا ہے۔ یہ ایک ایسا اقدام ہے جو دیہی خواتین کو پائیدار روزگار کے مواقع کے لیے منظم ہنر مندی کی تربیت کے ذریعے بااختیار بنانے پر مرکوز ہے۔ مہارتوں کی فراہمی کے علاوہ اس اقدام کا مقصد طویل مدتی مالی خودمختاری اور سماجی بااختیاری کے راستے فراہم کرنا بھی ہے۔

پروجیکٹ سکشم ملک بھر میں 12 تربیتی مراکز کے ذریعے کام کر رہا ہے، جو محروم طبقات کو صنعت سے متعلق مہارتوں اور باقاعدہ روزگار میں شمولیت کے مواقع فراہم کرتے ہیں۔ اب تک اس پہل  کے تحت 6,000 سے زائد نوجوانوں کو تربیت دی جا چکی ہے، جن میں سے 4,000 سے زیادہ مختلف شعبوں میں روزگار حاصل کر چکے ہیں۔ مستفید ین اوسطاً ماہانہ 13,000 سے 16,000 روپے کما رہے ہیں، جو کئی ریاستوں میں ابتدائی اجرت کے معیار سے بھی زیادہ ہے۔ قابل ذکر بات یہ ہے کہ 80 فیصد سے زیادہ مستفیدین خواتین ہیں، جو اس پروگرام کے صنفی بنیاد پر بااختیار بنانے کے توجہ کو ظاہر کرتا ہے۔

این ایچ اے آئی کے جامع بنیادی ڈھانچے کی ترقی کے وسیع تر وژن کے مطابق پروجیکٹ سکشَم اس یقین پر مبنی ہے کہ قومی شاہراہوں کے کنارے رہنے والی کمیونٹیز، بالخصوص دیہی خواتین، کو بنیادی ڈھانچے کی توسیع سے پیدا ہونے والے معاشی مواقع سے براہِ راست فائدہ حاصل ہونا چاہیے۔ یہ اقدام اس خلا کو پُر کرنے کی کوشش کرتا ہے تاکہ ان کمیونٹیز کو مہارتوں، روزگار اور مالی خودمختاری تک رسائی فراہم کی جا سکے جو بنیادی ڈھانچے کی توسیع سے جڑی ہونے کے باوجود اکثر اس سے پیدا ہونے والی معاشی رفتار سے محروم رہ جاتی ہیں۔

پروجیکٹ سکشم زمینی سطح  پر اپنی مضبوط گرفت والے ماڈل کی وجہ سے نمایاں ہے۔ فیلڈ ٹیمیں دیہی کمیونٹیز کے اندر قریبی طور پر کام کرتی ہیں، خاندانوں کے ساتھ رابطہ کر کے اعتماد قائم کرتی ہیں، سماجی و ثقافتی رکاوٹوں کو دور کرتی ہیں اور خواتین کی پہلی بار مہارتوں کی ترقی اور روزگار کے مواقع میں شرکت کی حوصلہ افزائی کرتی ہیں۔ شرکاء کو مختلف پیشہ ورانہ مہارتوں کی تربیت دی جاتی ہے، جن میں الیکٹریکل کام، پلمبنگ، آلات کی مرمت، سلائی، جنرل ڈیوٹی اسسٹنٹ نرسنگ اور ملٹی اسکل ٹیکنیشن ٹریننگ شامل ہیں۔ یہ پروگرام مستفیدین کو عملی اور مارکیٹ سے ہم آہنگ مہارتوں سے آراستہ کرنے کے لیے تیار کیے گئے ہیں تاکہ ان کی روزگار کی صلاحیت میں اضافہ ہو سکے۔ بہت سے شرکاء کے لیے یہ ایک تبدیلی خیز سفر کی نمائندگی کرتا ہے، جو انہیں معاشی خود انحصاری حاصل کرنے اور اپنی اور اپنی کمیونٹیز کی خواہشات کو نئے سرے سے متعین کرنے کے قابل بناتا ہے۔

کے اس عزم کو ظاہر کرتا ہے کہ یہ پہل  این ایچ اے آئی کے بنیادی ڈھانچے کی ترقی نہ صرف بہتر رابطے فراہم کرے بلکہ  اجتماعی ترقی کے مواقع بھی پیدا کرے، جو ملک بھر میں زیادہ مضبوط اور زیادہ لچکدار کمیونٹیز کی تشکیل میں مزید معاون ثابت ہوں۔

****

ش ح ۔م ع ا۔  ن ع

U. No.7110