ਬਿਹਾਰ ਵਿੱਚ ਲੀਚੀ ਕਿਸਾਨਾਂ ਨੂੰ ਦਰਪੇਸ਼ ਸਮੱਸਿਆਵਾਂ ਦਾ ਗੰਭੀਰ ਨੋਟਿਸ ਲੈਂਦੇ ਹੋਏ, ਕੇਂਦਰੀ ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਤੇ ਗ੍ਰਾਮੀਣ ਵਿਕਾਸ ਮੰਤਰੀ, ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਨੇ ਲੀਚੀ ਦੇ ਬਦਬੂਦਾਰ ਕੀੜੇ ਦੁਆਰਾ ਫਸਲਾਂ ਨੂੰ ਹੋ ਰਹੇ ਨੁਕਸਾਨ ਬਾਰੇ ਤੁਰੰਤ ਅਤੇ ਸੰਵੇਦਨਸ਼ੀਲ ਦਖਲਅੰਦਾਜ਼ੀ ਸ਼ੁਰੂ ਕੀਤੀ ਹੈ। ਕਿਸਾਨਾਂ ਦੁਆਰਾ ਦਰਸਾਈਆਂ ਗਈਆਂ ਚਿੰਤਾਵਾਂ ਤੋਂ ਬਾਅਦ, ਸ਼੍ਰੀ ਚੌਹਾਨ ਨੇ ਇੱਕ ਵਿਸ਼ੇਸ਼ ਮਾਹਿਰ ਟਾਸਕ ਫੋਰਸ ਦੇ ਗਠਨ ਦੇ ਨਿਰਦੇਸ਼ ਦਿੱਤੇ ਹਨ ਜੋ ਪ੍ਰਭਾਵਿਤ ਖੇਤਰਾਂ ਦਾ ਦੌਰਾ ਕਰੇਗੀ ਅਤੇ ਉਪਚਾਰਕ ਉਪਾਵਾਂ ਲਈ ਸਿਫਾਰਸ਼ਾਂ ਦੇ ਨਾਲ ਇੱਕ ਰਿਪੋਰਟ ਪੇਸ਼ ਕਰੇਗੀ।

ਇਹ ਮੁੱਦਾ ਕੇਂਦਰੀ ਖੇਤੀਬਾੜੀ ਮੰਤਰੀ ਦੇ ਸਾਹਮਣੇ 7 ਮਈ ਨੂੰ ਸੈਂਟਰਲ ਇੰਸਟੀਟਿਊਟ ਫਾਰ ਸਬਟ੍ਰੌਪਿਕਲ ਹੌਰਟੀਕਲਚਰ, ਲਖਨਊ ਵਿਖੇ ਆਯੋਜਿਤ ਕਿਸਾਨ ਵਿਚਾਰ-ਚਰਚਾ ਪ੍ਰੋਗਰਾਮ ਦੌਰਾਨ ਚੁੱਕਿਆ ਗਿਆ ਸੀ। ਕਿਸਾਨਾਂ ਨੇ ਸ਼੍ਰੀ ਚੌਹਾਨ ਨੂੰ ਲੀਚੀ ਸਟਿੰਕ ਬੱਗ (ਬਦਬੂਦਾਰ ਕੀੜੇ) ਕਾਰਨ ਲੀਚੀ ਦੀਆਂ ਫਸਲਾਂ ਨੂੰ ਹੋ ਰਹੇ ਵਿਆਪਕ ਨੁਕਸਾਨ ਬਾਰੇ ਜਾਣਕਾਰੀ ਦਿੱਤੀ। ਇਸ ਮਾਮਲੇ ਦਾ ਤੁਰੰਤ ਨੋਟਿਸ ਲੈਂਦੇ ਹੋਏ, ਕੇਂਦਰੀ ਮੰਤਰੀ ਨੇ ਅਧਿਕਾਰੀਆਂ ਨੂੰ ਇੱਕ ਵਿਸ਼ੇਸ਼ ਟਾਸਕ ਫੋਰਸ ਬਣਾਉਣ ਦੇ ਨਿਰਦੇਸ਼ ਦਿੱਤੇ।

ਭਾਰਤੀ ਖੇਤੀਬਾੜੀ ਖੋਜ ਪ੍ਰੀਸ਼ਦ (ICAR) ਦੇ ਅਧੀਨ ਮੁਜ਼ੱਫਰਪੁਰ ਦੇ ਲੀਚੀ 'ਤੇ ਰਾਸ਼ਟਰੀ ਖੋਜ ਕੇਂਦਰ ਦੁਆਰਾ 7 ਮਈ ਨੂੰ ਜਾਰੀ ਕੀਤੇ ਗਏ ਇੱਕ ਆਦੇਸ਼ ਅਨੁਸਾਰ, ਟਾਸਕ ਫੋਰਸ ਲੀਚੀ ਦੇ ਬਦਬੂਦਾਰ ਬੱਗ ਨਾਲ ਸਬੰਧਿਤ ਮੌਜੂਦਾ ਸਥਿਤੀ ਦਾ ਮੁਲਾਂਕਣ ਕਰੇਗੀ, ਪ੍ਰਭਾਵਿਤ ਖੇਤਰਾਂ ਦਾ ਦੌਰਾ ਕਰੇਗੀ, ਫਸਲਾਂ ਦੇ ਨੁਕਸਾਨ ਦਾ ਵਿਗਿਆਨਿਕ ਤੌਰ 'ਤੇ ਅਧਿਐਨ ਕਰੇਗੀ ਅਤੇ ਕਿਸਾਨਾਂ ਨੂੰ ਰਾਹਤ ਪ੍ਰਦਾਨ ਕਰਨ ਲਈ ਤੀਬਰ ਅਤੇ ਲੰਬੇ ਸਮੇਂ ਦੇ ਉਪਾਅ ਪ੍ਰਦਾਨ ਕਰੇਗੀ।

ਇਹ ਟਾਸਕ ਫੋਰਸ ਕਿਸਾਨਾਂ ਲਈ ਜ਼ਰੂਰੀ ਸਲਾਹਾਂ ਅਤੇ ਵਿਸਥਾਰ ਗਤੀਵਿਧੀਆਂ ਦੀ ਸਿਫ਼ਾਰਸ਼ ਵੀ ਕਰੇਗੀ, ਇਸ ਤੋਂ ਇਲਾਵਾ ਰਾਜ ਅਤੇ ਕੇਂਦਰੀ ਪੱਧਰ 'ਤੇ ਢੁਕਵੇਂ ਸੁਝਾਅ ਦੇਵੇਗੀ।

ਹੁਕਮਾਂ ਅਨੁਸਾਰ, ਮਾਹਿਰ ਟਾਸਕ ਫੋਰਸ ਦਾ ਗਠਨ ਵੱਖ-ਵੱਖ ਸੰਸਥਾਵਾਂ ਦੇ ਵਿਗਿਆਨੀਆਂ, ਅਧਿਕਾਰੀਆਂ ਅਤੇ ਮਾਹਿਰਾਂ ਨਾਲ ਕੀਤਾ ਗਿਆ ਹੈ। ਮੁਜ਼ੱਫਰਪੁਰ ਸਥਿਤ ਰਾਸ਼ਟਰੀ ਲੀਚੀ ਖੋਜ ਕੇਂਦਰ ਦੇ ਡਾਇਰੈਕਟਰ ਨੂੰ ਪੈਨਲ ਦਾ ਚੇਅਰਪਰਸਨ ਨਿਯੁਕਤ ਕੀਤਾ ਗਿਆ ਹੈ।

ਟਾਸਕ ਫੋਰਸ ਦੇ ਮੈਂਬਰਾਂ ਵਿੱਚ ਬਿਹਾਰ ਸਰਕਾਰ ਦੇ ਬਾਗਬਾਨੀ-ਕਮ-ਬਿਹਾਰ ਰਾਜ ਬਾਗਬਾਨੀ ਮਿਸ਼ਨ ਦੇ ਡਾਇਰੈਕਟਰ ਦੁਆਰਾ ਨਾਮਜ਼ਦ ਪ੍ਰਤੀਨਿਧੀ; ਬਿਹਾਰ ਸਰਕਾਰ ਦੇ ਖੇਤੀਬਾੜੀ ਵਿਭਾਗ ਦੇ ਪਲਾਂਟ ਪ੍ਰੋਟੈਕਸ਼ਨ (ਪੌਦਾ ਸੁਰੱਖਿਆ) ਡਾਇਰੈਕਟਰ ਦੁਆਰਾ ਨਾਮਜ਼ਦ ਪ੍ਰਤੀਨਿਧੀ; ਡਾ. ਰਾਜੇਂਦਰ ਪ੍ਰਸਾਦ ਕੇਂਦਰੀ ਖੇਤੀਬਾੜੀ ਯੂਨੀਵਰਸਿਟੀ, ਪੂਸਾ (Pusa), ਸਮਸਤੀਪੁਰ ਦੇ ਕੀਟ ਵਿਗਿਆਨੀ ਦੁਆਰਾ ਨਾਮਜ਼ਦ ਇੱਕ ਪ੍ਰਤੀਨਿਧੀ; ਬਿਹਾਰ ਖੇਤੀਬਾੜੀ ਯੂਨੀਵਰਸਿਟੀ, ਸਬੌਰ, ਭਾਗਲਪੁਰ ਦੇ ਪ੍ਰਿੰਸੀਪਲ ਵਿਗਿਆਨੀ (ਕੀਟ ਵਿਗਿਆਨ) ਦੁਆਰਾ ਨਾਮਜ਼ਦ ਇੱਕ ਪ੍ਰਤੀਨਿਧੀ; ਅਤੇ ਏਕੀਕ੍ਰਿਤ ਬਾਗਬਾਨੀ ਵਿਕਾਸ ਮਿਸ਼ਨ ਦੁਆਰਾ ਨਾਮਜ਼ਦ ਇੱਕ ਪ੍ਰਤੀਨਿਧੀ ਸ਼ਾਮਲ ਹਨ।

ਇਸ ਪੈਨਲ ਵਿੱਚ ਪੂਰਬੀ ਖੇਤਰ ਲਈ ਆਈਸੀਏਆਰ ਰਿਸਰਚ ਕੰਪਲੈਕਸ ਅਤੇ ਪਹਾੜੀ ਅਤੇ ਪਠਾਰ ਖੇਤਰਾਂ ਲਈ ਖੇਤੀਬਾੜੀ ਪ੍ਰਣਾਲੀ ਖੋਜ ਕੇਂਦਰ, ਰਾਂਚੀ ਤੋਂ ਵਿਗਿਆਨੀ ਡਾ. ਜੈਪਾਲ ਸਿੰਘ ਚੌਧਰੀ; ਨੈਸ਼ਨਲ ਬਿਊਰੋ ਆਫ਼ ਐਗਰੀਕਲਚਰਲ ਇਨਸੈਕਟ ਰਿਸੋਰਸਿਜ਼, ਬੰਗਲੁਰੂ ਤੋਂ ਡਾ. ਐੱਮ ਸੰਪਤ ਕੁਮਾਰ; ਆਈਸੀਏਆਰ-ਨੈਸ਼ਨਲ ਰਿਸਰਚ ਸੈਂਟਰ ਆਨ ਲੀਚੀ, ਮੁਜ਼ੱਫਰਪੁਰ ਤੋਂ ਵਿਗਿਆਨੀ (ਕੀਟ ਵਿਗਿਆਨ) ਡਾ. ਇਪਸਿਤਾ ਸਮਾਲ (Dr Ipsita Samal); ਅਤੇ ਪ੍ਰਿੰਸੀਪਲ ਸਾਇੰਟਿਸਟ (ਕੀਟ ਵਿਗਿਆਨ) ਡਾ. ਵਿਨੋਦ ਕੁਮਾਰ, ਜੋ ਟਾਸਕ ਫੋਰਸ ਦੇ ਮੈਂਬਰ ਸਕੱਤਰ ਵਜੋਂ ਸੇਵਾ ਨਿਭਾਉਣਗੇ, ਸ਼ਾਮਲ ਹਨ।

ਆਦੇਸ਼ ਅਨੁਸਾਰ, ਟਾਸਕ ਫੋਰਸ ਜਲਦੀ ਹੀ ਬਿਹਾਰ ਦੇ ਲੀਚੀ ਉਤਪਾਦਕ ਜ਼ਿਲ੍ਹਿਆਂ ਦੇ ਸਭ ਤੋਂ ਵੱਧ ਪ੍ਰਭਾਵਿਤ ਬਲਾਕਾਂ ਦਾ ਦੌਰਾ ਕਰੇਗਾ। ਟੀਮ ਨੂੰ ਇੱਕ ਹਫ਼ਤੇ ਦੇ ਅੰਦਰ ਕੇਂਦਰੀ ਖੇਤੀਬਾੜੀ ਮੰਤਰੀ ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਨੂੰ ਆਪਣੀ ਰਿਪੋਰਟ ਸੌਂਪਣ ਲਈ ਕਿਹਾ ਗਿਆ ਹੈ ਤਾਂ ਜੋ ਸਮੇਂ ਸਿਰ ਉਚਿਤ ਕਾਰਵਾਈ ਕੀਤੀ ਜਾ ਸਕੇ।

******

ਆਰਸੀ/ਐੱਮਐੱਸ/ਐੱਮਕੇ /ਏਕੇ