ગ્રામીણ ભારતના વિકાસ ઇતિહાસમાં 10 મેનો દિવસ એક મહત્વપૂર્ણ અને પ્રેરક પ્રકરણ તરીકે નોંધાવા જઈ રહ્યો છે, જ્યારે મધ્યપ્રદેશના ભેરુન્દા, જિલ્લો સીહોરથી પ્રધાનમંત્રી ગ્રામ સડક યોજના (PMGSY) ના 25 વર્ષ પૂર્ણ થવા પર રજત જયંતી સમારોહ ઉજવવામાં આવશે અને આ જ મંચ પરથી PMGSY-IV નો શુભારંભ કરવામાં આવશે. આ અવસરે કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણ દેશના ગામડાઓને મજબૂત, ટકાઉ અને બારેમાસ પાકા રસ્તાઓથી જોડવાના રાષ્ટ્રીય સંકલ્પને નવી ઊર્જા આપશે. આ મહત્વપૂર્ણ આયોજનમાં મધ્યપ્રદેશના મુખ્યમંત્રી ડૉ. મોહન યાદવ પણ સામેલ થશે.

આ આયોજન માત્ર એક સરકારી કાર્યક્રમ નથી, પરંતુ ગ્રામીણ પરિવર્તન, સામાજિક સમાવેશ અને ઇન્ફ્રાસ્ટ્રક્ચર દ્વારા વિકાસને છેવાડાના માનવી સુધી પહોંચાડવાની પ્રતિબદ્ધતાનો વિરાટ ઉત્સવ હશે. સમારોહમાં કેન્દ્રીય મંત્રી શિવરાજ સિંહ દ્વારા PMGSY-IV અંતર્ગત મધ્યપ્રદેશ માટે 2,117 કિલોમીટર લંબાઈના 973 રસ્તાઓ તથા 987 વસાહતોને લાભ પહોંચાડનારા મંજૂરી પત્રો અને નાણાકીય ફાળવણી મુખ્યમંત્રી મોહન યાદવને સોંપવામાં આવશે, જ્યારે PM-JANMAN હેઠળ 384 કિલોમીટરથી વધુ રસ્તાની પરિયોજનાઓની ફાળવણી પણ કરવામાં આવશે, જેનાથી 168 પછાત વસાહતોને સીધો લાભ મળશે.

કાર્યક્રમ દરમિયાન કેન્દ્રીય મંત્રી શિવરાજ સિંહ ચૌહાણ દ્વારા પ્રધાનમંત્રી ગ્રામ સડક યોજના માટે વર્ષ 2026-27 હેતુ કુલ રૂ.18,907 કરોડની સાંકેતિક ફાળવણીની જાહેરાત કરવામાં આવશે, જેમાંથી રૂ. 830 કરોડ મધ્યપ્રદેશના વિકાસ માટે સમર્પિત છે. આ ફાળવણી ગ્રામીણ સંપર્ક, આર્થિક પ્રવૃત્તિઓ, શિક્ષણ, આરોગ્ય અને કૃષિ માર્કેટિંગની પહોંચને વધુ મજબૂત કરવાની દિશામાં એક મોટું પગલું હશે.

સમારોહની શરૂઆત 10 મેના રોજ બપોરે 12 વાગ્યે થશે, જેમાં કેન્દ્રીય મંત્રી શ્રી ચૌહાણ, મુખ્યમંત્રી ડૉ. યાદવની સાથે જ કેન્દ્રીય ગ્રામીણ વિકાસ અને સંચાર રાજ્ય મંત્રી ડૉ. ચંદ્રશેખર પેમ્માસાની અને કેન્દ્રીય ગ્રામીણ વિકાસ રાજ્ય મંત્રી શ્રી કમલેશ પાસવાન, મધ્યપ્રદેશના ગ્રામીણ વિકાસ અને શ્રમ મંત્રી શ્રી પ્રહલાદ સિંહ પટેલ તથા મધ્યપ્રદેશ સરકારના અન્ય જનપ્રતિનિધિઓ અને કેન્દ્ર તથા રાજ્ય સરકારના વરિષ્ઠ અધિકારીઓ ઉપસ્થિત રહેશે.

કેન્દ્રીય મંત્રી શિવરાજ સિંહ ચૌહાણનો સ્પષ્ટ સંદેશ છે કે ગામડાનો રસ્તો માત્ર અવરજવરનું સાધન નથી, પરંતુ તે સમૃદ્ધિ, શિક્ષણ, આરોગ્ય, બજાર, રોજગાર અને સન્માનજનક જીવનનો માર્ગ છે. PMGSY ના 25 વર્ષની સિદ્ધિઓ પર આધારિત આ રજત જયંતિ સમારોહ અને PMGSY-IV નો શુભારંભ આવનારા વર્ષોમાં ગ્રામીણ ભારતને વિકાસની નવી ઊંચાઈઓ સુધી લઈ જનારું નિર્ણાયક પગલું સાબિત થશે.

IJ/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(રીલીઝ આઈડી: 2259362) મુલાકાતી સંખ્યા : 8