કેન્દ્રીય ગ્રામીણ વિકાસ અને કૃષિ મંત્રી શ્રી શિવરાજ સિંહ ચૌહાણે આજે નવી દિલ્હીમાં તેમના સત્તાવાર નિવાસસ્થાને જમીન સંસાધન વિભાગ (DoLR) ની સમીક્ષા બેઠકની અધ્યક્ષતા કરી હતી. આ બેઠકમાં જમીન સંસાધન વિભાગના સચિવ શ્રી નરેન્દ્ર ભૂષણ અને વિભાગના વરિષ્ઠ અધિકારીઓ ઉપસ્થિત રહ્યા હતા.

બેઠક દરમિયાન, અધિકારીઓએ મંત્રીશ્રીને ડિજિટલ ઇન્ડિયા લેન્ડ રેકોર્ડ્સ મોડર્નાઇઝેશન પ્રોગ્રામ (DILRMP) 3.0, સર્વે/રી-સર્વે પ્રવૃત્તિઓ અને વોટરશેડ ડેવલપમેન્ટ પ્રોગ્રામ્સ સહિત વિભાગની વિવિધ પહેલો હેઠળ હાંસલ કરેલી પ્રગતિ વિશે માહિતગાર કર્યા હતા, તેમજ આગામી કાર્યો માટેનો રોડમેપ રજૂ કર્યો હતો.

DILRMP 3.0 ની સ્થિતિની સમીક્ષા કરતા, મંત્રીશ્રીને જાણ કરવામાં આવી હતી કે આ કાર્યક્રમ દેશભરમાં જમીન રેકોર્ડ ઇન્ફ્રાસ્ટ્રક્ચરના આધુનિકીકરણ અને ડિજિટલાઇઝેશનની પરિકલ્પના કરે છે. તેના મુખ્ય ઘટકોમાં જમીન રેકોર્ડનું કોમ્પ્યુટરાઈઝેશન, તાલુકા કક્ષાના રેકોર્ડ રૂમનું આધુનિકીકરણ, જીઓરેફરન્સિંગ અને યુનિક લેન્ડ પાર્સલ આઈડેન્ટિફિકેશન નંબર (ULPIN) ની ફાળવણી, આધાર સીડિંગ (Aadhaar seeding), જમીન રેકોર્ડ ડેટાબેઝમાં મોબાઈલ નંબર અને સરનામાનું સંકલન, મહેસૂલી અદાલતોનું કોમ્પ્યુટરાઈઝેશન અને જમીન રેકોર્ડ પ્રણાલી સાથે તેમનું જોડાણ, કોર જીઆઈએસ (GIS) અને લેન્ડ સ્ટેક સોફ્ટવેરનો વિકાસ અને શહેરી જમીન રેકોર્ડ મેપિંગ માટે પાયલોટ પ્રોજેક્ટ્સનો અમલ સામેલ છે.

શ્રી શિવરાજ સિંહ ચૌહાણે ભારપૂર્વક જણાવ્યું હતું કે આધુનિકીકરણના પ્રયાસોએ જમીન સંબંધિત સેવાઓને પારદર્શક, કાર્યક્ષમ અને મુશ્કેલીમુક્ત બનાવીને નાગરિકો તેમજ તહેસીલદારો અને પટવારીઓ સહિતના મહેસૂલ અધિકારીઓ માટે સુવિધા સુનિશ્ચિત કરવી જોઈએ. તેમણે નોંધ્યું હતું કે પ્રસ્તાવિત લેન્ડ સ્ટેક પહેલ જમીનના ટુકડાઓનું તાત્કાલિક અને સચોટ મૂલ્યાંકન કરવામાં મદદ કરશે, જેનાથી બેંકોને લોન મંજૂરી પ્રક્રિયાઓને સુવ્યવસ્થિત કરવામાં મદદ મળશે.

અધિકારીઓએ એમ પણ જણાવ્યું હતું કે નાગરિકલક્ષી સેવાઓ પૂરી પાડવા માટે સબ-રજિસ્ટ્રાર કચેરીઓના આધુનિકીકરણનું આયોજન કરવામાં આવી રહ્યું છે.

મંત્રીશ્રીએ પ્રધાનમંત્રી કૃષિ સિંચાઈ યોજના (WDC-PMKSY) 2.0 હેઠળ વોટરશેડ ડેવલપમેન્ટ ઘટકની પ્રગતિની પણ સમીક્ષા કરી હતી.

WDC-PMKSY 3.0 હેઠળ સૂચિત પહેલોની સમીક્ષા કરતા, મંત્રીશ્રીએ MIS અને GIS-આધારિત સિસ્ટમોના સંયુક્ત ઉપયોગ દ્વારા સંકલિત ડિજિટલ મોનિટરિંગના મહત્વ પર ભાર મૂક્યો હતો.

શ્રી ચૌહાણે જણાવ્યું હતું કે તેઓ યોજનાઓના ઝડપી અમલીકરણ માટે તમામ રાજ્યોના મંત્રીઓ સાથે આ સંદર્ભમાં બેઠકો યોજશે અને વધુ સારા સંકલન અને પ્રોજેક્ટ્સના સમયસર અમલીકરણને સુનિશ્ચિત કરવા માટે મુખ્યમંત્રીઓ સાથે પણ આ બાબતે ચર્ચા કરશે.

બેઠક દરમિયાન ઉપસ્થિત અધિકારીઓમાં અધિક સચિવ આર. આનંદ, સંયુક્ત સચિવ (વોટરશેડ) નીતિન ખાડે, સંયુક્ત સચિવ (જમીન સંસાધન) પી. નરહરિ, આર્થિક સલાહકાર અબ્દુલ કરીમ અને અન્ય વરિષ્ઠ અધિકારીઓનો સમાવેશ થાય છે.

SM/BS/JD