ਲਖਨਊ ਵਿੱਚ ਆਈਸੀਏਆਰ - ਸੈਂਟਰਲ ਇੰਸਟੀਟਿਊਟ ਆਫ਼ ਸਬਟ੍ਰੋਪਿਕਲ ਹੌਰਟੀਕਲਚਰ (ਸੀਆਈਐੱਸਐਚ) ਵਿਖੇ ਆਯੋਜਿਤ "ਫਰੂਟ ਹੋਰੀਜ਼ਨ 2026" ਕਾਨਫਰੰਸ ਵਿੱਚ ਬੋਲਦਿਆਂ, ਕੇਂਦਰੀ ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਅਤੇ ਪੇਂਡੂ ਵਿਕਾਸ ਮੰਤਰੀ, ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਨੇ ਸਪੱਸ਼ਟ ਤੌਰ 'ਤੇ ਕਿਹਾ ਕਿ ਸਿਰਫ਼ ਉਤਪਾਦਨ ਵਧਾਉਣਾ ਹੀ ਕਾਫ਼ੀ ਨਹੀਂ ਹੋਵੇਗਾ; ਸਗੋਂ, ਵਿਸ਼ਵ ਫਲ ਬਜ਼ਾਰ ਵਿੱਚ ਭਾਰਤ ਦੀ ਮਜ਼ਬੂਤ ​​ਮੌਜੂਦਗੀ ਸਥਾਪਿਤ ਕਰਨ ਲਈ, ਗੁਣਵੱਤਾ, ਸ਼ੈਲਫ ਲਾਈਫ, ਪ੍ਰੋਸੈੱਸਿੰਗ, ਲੌਜਿਸਟਿਕਸ ਅਤੇ ਨਿਰਯਾਤ ਮਿਆਰਾਂ 'ਤੇ ਗੰਭੀਰ ਕੰਮ ਕਰਨਾ ਹੋਵੇਗਾ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਖੇਤੀਬਾੜੀ ਨੂੰ ਸਿਰਫ਼ ਖੇਤ ਤੱਕ ਸੀਮਤ ਨਹੀਂ ਕੀਤਾ ਜਾ ਸਕਦਾ; ਹੁਣ ਸਮੇਂ ਦੀ ਲੋੜ ਉਤਪਾਦਨ ਤੋਂ ਲੈ ਕੇ ਪ੍ਰੋਸੈੱਸਿੰਗ, ਮਾਰਕੀਟਿੰਗ ਅਤੇ ਨਿਰਯਾਤ ਤੱਕ ਪੂਰੀ ਮੁੱਲ ਲੜੀ ਨੂੰ ਮਜ਼ਬੂਤ ​​ਕਰਨ ਦੀ ਹੈ। 

ਹੁਣ ਫੋਕਸ ਸਿਰਫ਼ ਉਤਪਾਦਨ 'ਤੇ ਨਹੀਂ ਸਗੋਂ ਗੁਣਵੱਤਾ 'ਤੇ ਵੀ 

ਇਸ ਮਹੱਤਵਪੂਰਨ ਸਮਾਗਮ ਵਿੱਚ ਕਿਸਾਨਾਂ ਅਤੇ ਫਲ ਉਤਪਾਦਨ ਅਤੇ ਨਿਰਯਾਤ ਨਾਲ ਜੁੜੇ ਸਾਰੇ ਹਿੱਸੇਦਾਰਾਂ ਨਾਲ ਸਿੱਧੇ ਤੌਰ 'ਤੇ ਗੱਲ ਕਰਦੇ ਹੋਏ, ਕੇਂਦਰੀ ਖੇਤੀਬਾੜੀ ਮੰਤਰੀ ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਨੇ ਕਿਹਾ ਕਿ ਜੇਕਰ ਭਾਰਤ ਵਿਸ਼ਵ ਫਲ ਬਜ਼ਾਰ ਵਿੱਚ ਅੱਗੇ ਵਧਣਾ ਚਾਹੁੰਦਾ ਹੈ ਤਾਂ ਫਲਾਂ ਦੀ ਗੁਣਵੱਤਾ ਵਿੱਚ ਸੁਧਾਰ ਕਰਨਾ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਹੁਣ ਸ਼ੈਲਫ ਲਾਈਫ ਵਧਾਉਣ, ਨਿਰਯਾਤ ਦੌਰਾਨ ਗੁਣਵੱਤਾ ਬਣਾਈ ਰੱਖਣ ਅਤੇ ਅੰਤਰਰਾਸ਼ਟਰੀ ਮਾਪਦੰਡਾਂ ਨੂੰ ਪੂਰਾ ਕਰਨ ਵੱਲ ਵਿਸ਼ੇਸ਼ ਧਿਆਨ ਦੇਣਾ ਚਾਹੀਦਾ ਹੈ।

ਕਿਸਾਨਾਂ ਦੀ ਆਮਦਨ ਵਧਾਉਣ ਲਈ ਟਾਸਕ ਫੋਰਸ ਬਣਾਈ ਜਾਵੇਗੀ

ਕੇਂਦਰੀ ਖੇਤੀਬਾੜੀ ਮੰਤਰੀ ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਦੀ ਪ੍ਰਧਾਨਗੀ ਹੇਠ ਹੋਏ ਇਸ ਸਮਾਗਮ ਵਿੱਚ, ਇਹ ਫੈਸਲਾ ਕੀਤਾ ਗਿਆ ਕਿ ਆਈਸੀਏਆਰ ਵਿਗਿਆਨਿਕ ਸੰਸਥਾਵਾਂ, ਨਿਰਯਾਤਕ, ਏਪੀਈਡੀਏ ਅਤੇ ਹੋਰ ਸਬੰਧਿਤ ਏਜੰਸੀਆਂ ਸਾਂਝੇ ਤੌਰ 'ਤੇ ਇੱਕ ਟਾਸਕ ਫੋਰਸ ਬਣਾਉਣਗੀਆਂ। ਇਹ ਟਾਸਕ ਫੋਰਸ ਉਤਪਾਦਕਾਂ ਅਤੇ ਨਿਰਯਾਤਕ ਨੂੰ ਦਰਪੇਸ਼ ਸਮੱਸਿਆਵਾਂ ਨੂੰ ਹੱਲ ਕਰਨ ਲਈ ਕੰਮ ਕਰੇਗੀ ਅਤੇ ਕਿਸਾਨਾਂ ਦੀ ਆਮਦਨ ਵਧਾਉਣ ਲਈ ਠੋਸ ਕਦਮ ਚੁੱਕਣ ਨੂੰ ਯਕੀਨੀ ਬਣਾਉਣ ਲਈ ਇੱਕ ਪ੍ਰਭਾਵਸ਼ਾਲੀ ਅਤੇ ਸਮੇਂ ਸਿਰ ਕਾਰਜ ਯੋਜਨਾ ਵਿਕਸਿਤ ਕਰੇਗੀ।

ਯੂਪੀ ਨੂੰ ਮਿਲੇਗਾ ਕਲੀਨ ਪਲਾਂਟ ਮਿਸ਼ਨ ਤੋਂ ਵੱਡਾ ਲਾਭ ਮਿਲੇਗਾ

ਕੇਂਦਰੀ ਮੰਤਰੀ ਸ਼੍ਰੀ ਚੌਹਾਨ ਨੇ ਕਿਹਾ ਕਿ ਕਿਸਾਨਾਂ ਦੀਆਂ ਜ਼ਰੂਰਤਾਂ ਦੇ ਜਵਾਬ ਵਿੱਚ, ਭਾਰਤ ਸਰਕਾਰ ਨੇ ਸਵੱਛ ਪਲਾਂਟਿੰਗ ਸਮੱਗਰੀ ਪ੍ਰੋਗਰਾਮ ਦੇ ਤਹਿਤ ਉੱਤਰ ਪ੍ਰਦੇਸ਼ ਨੂੰ ਵਿਸ਼ੇਸ਼ ਤੌਰ 'ਤੇ ਮਜ਼ਬੂਤ ​​ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਸਬੰਧ ਵਿੱਚ, ਸੀਆਈਐੱਸਐਚ, ਲਖਨਊ ਵਿਖੇ ਇੱਕ ਆਧੁਨਿਕ ਸਵੱਛ ਪਲਾਂਟ ਸੈਂਟਰ ਸਥਾਪਿਤ ਕੀਤਾ ਜਾ ਰਿਹਾ ਹੈ , ਜਿੱਥੇ ਅੰਬ, ਅਮਰੂਦ, ਲੀਚੀ ਅਤੇ ਐਵੋਕਾਡੋ ਵਰਗੀਆਂ ਫਲ ਫਸਲਾਂ ਲਈ ਬਿਮਾਰੀ-ਮੁਕਤ ਅਤੇ ਨਸਲ-ਸ਼ੁੱਧ ਪਲਾਂਟਿੰਗ ਸਮੱਗਰੀ ਤਿਆਰ ਕੀਤੀ ਜਾਵੇਗੀ ਅਤੇ ਸੁਰੱਖਿਅਤ ਕੀਤੀ ਜਾਵੇਗੀ।

ਜ਼ੀਰੋ ਅਸਵੀਕਾਰ ਅਤੇ ਪ੍ਰੀਮੀਅਮ ਗੁਣਵੱਤਾ 'ਤੇ ਜ਼ੋਰ

ਸ਼੍ਰੀ ਚੌਹਾਨ ਨੇ ਕਿਹਾ ਕਿ ਭਾਰਤ ਨੂੰ ਵਿਸ਼ਵ ਬਜ਼ਾਰ ਵਿੱਚ ਪ੍ਰਤੀਯੋਗੀ ਬਣਾਉਣ ਲਈ, "ਜ਼ੀਰੋ ਰਿਜੈਕਸ਼ਨ" ਅਤੇ ਪ੍ਰੀਮੀਅਮ ਕੁਆਲਿਟੀ ਵਾਲੇ ਫਲ ਉਤਪਾਦਨ ਵੱਲ ਵਿਸ਼ੇਸ਼ ਧਿਆਨ ਦੇਣਾ ਚਾਹੀਦਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤੀ ਬਾਗਬਾਨੀ ਖੇਤਰ ਨੂੰ ਆਧੁਨਿਕ ਤਕਨਾਲੋਜੀ, ਵਾਢੀ ਤੋਂ ਬਾਅਦ ਦੇ ਪ੍ਰਬੰਧਨ ਵਿੱਚ ਸੁਧਾਰ, ਪੈਕਹਾਊਸ , ਪ੍ਰੋਸੈੱਸਿੰਗ ਸਹੂਲਤਾਂ ਅਤੇ ਨਿਰਯਾਤ ਲਈ ਵਿਵਹਾਰਕ SOP ਵਿਕਸਿਤ ਕਰਕੇ ਨਵੀਆਂ ਉਚਾਈਆਂ ਤੱਕ ਪਹੁੰਚਾਇਆ ਜਾ ਸਕਦਾ ਹੈ।

ਐਫਪੀਓ (FPO), ਕਲੱਸਟਰ ਅਤੇ ਨਿਰਯਾਤ ਢਾਂਚਾ ਤਸਵੀਰ ਬਦਲ ਦੇਵੇਗਾ

ਕੇਂਦਰੀ ਮੰਤਰੀ ਸ਼੍ਰੀ ਸ਼ਿਵਰਾਜ ਸਿੰਘ ਚੌਹਾਨ ਨੇ ਛੋਟੇ ਕਿਸਾਨਾਂ ਨੂੰ ਬਿਹਤਰ ਬਜ਼ਾਰਾਂ ਅਤੇ ਨਿਰਯਾਤ ਨਾਲ ਜੋੜਨ ਵਿੱਚ FPOs, FPCs ਅਤੇ ਸਵੈ-ਸਹਾਇਤਾ ਸਮੂਹਾਂ ਦੀ ਮਹੱਤਵਪੂਰਨ ਭੂਮਿਕਾ 'ਤੇ ਜ਼ੋਰ ਦਿੱਤਾ। ਇਸ ਸਮਾਗਮ ਨੇ ਇਹ ਵੀ ਉਜਾਗਰ ਕੀਤਾ ਕਿ ਰਾਸ਼ਟਰੀ ਬਾਗਬਾਨੀ ਬੋਰਡ ਦੁਆਰਾ ਕਈ ਨਿਰਯਾਤ-ਮੁਖੀ ਕਲੱਸਟਰ ਵਿਕਸਿਤ ਕੀਤੇ ਜਾ ਰਹੇ ਹਨ, ਅਤੇ ਉੱਤਰ ਪ੍ਰਦੇਸ਼ ਵਿੱਚ ਆਧੁਨਿਕ ਰੇਡੀਏਸ਼ਨ ਅਤੇ ਏਕੀਕ੍ਰਿਤ ਵਾਢੀ ਤੋਂ ਬਾਅਦ ਦੀਆਂ ਸਹੂਲਤਾਂ ਦਾ ਵਿਕਾਸ, ਖਾਸ ਕਰਕੇ ਜੇਵਰ ਹਵਾਈ ਅੱਡੇ ਨਾਲ ਜੁੜੀ ਪਹਿਲਕਦਮੀ ਨੂੰ ਅੱਗੇ ਵਧਾਉਣਾ ਇਸ ਦਿਸ਼ਾ ਵਿੱਚ ਇੱਕ ਮਹੱਤਵਪੂਰਨ ਕਦਮ ਹੋਵੇਗਾ।

ਇਸ ਪ੍ਰੋਗਰਾਮ ਵਿੱਚ ਕਿਸਾਨ, ਵਿਗਿਆਨੀ, ਨਿਰਯਾਤਕ, ਨਰਸਰੀ ਸੰਚਾਲਕ, ਐਫਪੀਓ, ਫਲ ਪ੍ਰੋਸੈੱਸਿੰਗ ਸੈਕਟਰ ਦੇ ਪ੍ਰਤੀਨਿਧੀ ਅਤੇ ਵੱਖ-ਵੱਖ ਰਾਜਾਂ ਦੇ ਵੱਖ-ਵੱਖ ਸੰਗਠਨਾਂ ਨੇ ਸ਼ਿਰਕਤ ਕੀਤੀ। ਉੱਤਰ ਪ੍ਰਦੇਸ਼ ਸਰਕਾਰ ਦੇ ਮੰਤਰੀ, ਸ਼੍ਰੀ ਸੂਰਿਆ ਪ੍ਰਤਾਪ ਸ਼ਾਹੀ ਅਤੇ ਸ਼੍ਰੀ ਦਿਨੇਸ਼ ਪ੍ਰਤਾਪ ਸਿੰਘ, ਕਈ ਸੀਨੀਅਰ ਅਧਿਕਾਰੀ ਅਤੇ ਵਿਗਿਆਨੀ ਵੀ ਮੌਜੂਦ ਸਨ।

************

ਆਰਸੀ/ ਐੱਮਐੱਸ /ਬਲਜੀਤ ਸਿੰਘ