اڈیشہ کے چند علاقوں میں پٹرول اور ڈیزل کی عارضی عدم دستیابی کے بارے میں کچھ حالیہ میڈیا رپورٹس کے پیش نظر ، آئل مارکیٹنگ کمپنیوں (او ایم سیز) نے واضح کیا ہے کہ ریاست بھر میں خوردہ دکانوں پر ایندھن کی دستیابی کافی ہے اور سپلائی کی مجموعی صورتحال معمول اور مستحکم ہے ۔

رواں مہینے کے  اوائل کے چند دنوں کے دوران ، اڈیشہ کے کچھ سرحدی اضلاع میں پٹرول اور ڈیزل کی مانگ میں غیر متوقع اضافہ دیکھنے میں آیا ہے ۔  صورتحال پر تیزی سے رد عمل ظاہر کرتے ہوئے ، او ایم سیز نے متاثرہ خوردہ دکانوں پر ایندھن کے ذخائر کو بغیر کسی تاخیر کے بھرنے کے لیے مربوط اقدامات شروع کیے ہیں ۔

ایندھن کی بلا رکاوٹ  فراہمی کو یقینی بنانے کے لیے ، سپلائی کے مختلف مقامات اور ریٹیل آؤٹ لیٹس پر اسٹاک کی تیزی سے نقل و حمل اور دوبارہ بھرنے کے لیے اضافی ٹینک ٹرک   کوبروئے کار لایا گیا ہے ۔  انوینٹری کی سطح کی بروقت  نگرانی بھی کی جا رہی ہے ، جس میں اسٹاک کی کم سطح کی اطلاع دینے والے آؤٹ لیٹس کو ترجیحی فراہمی کو یقینی بنایا جا رہا ہے ۔

او ایم سیز نے صنعتی صارفین کو مزید مشورہ دیا ہے کہ وہ اپنی ایندھن کی ضروریات کو خوردہ دکانوں سے خریدنے کے بجائے براہ راست متعلقہ تیل کمپنیوں سے حاصل کریں ، کیونکہ خوردہ ایندھن اسٹیشن پیٹرولیم مصنوعات کی وافر فروخت  کے لیے مجاز نہیں ہیں ۔

کمپنیوں نے اس بات کا اعادہ کیا ہے کہ پٹرول اور ڈیزل کا مناسب ذخیرہ پورے اڈیشہ میں تمام سپلائی مقامات اور خوردہ دکانوں پر دستیاب ہے ، اور تمام فیول اسٹیشن معمول کے مطابق کام کر رہے ہیں ۔

عوام کو اس بات کی یقین دہانی کراتے ہوئے او ایم سیز نے کہا کہ تشویش کی کوئی بات  نہیں ہے اور صارفین سے اپیل کی ہے کہ وہ گھبراہٹ میں خریداری سے گریز کریں ۔  شہریوں سے یہ بھی درخواست کی گئی ہے کہ وہ ایندھن کی دستیابی سے متعلق معلومات اور اپ ڈیٹس کے لیے صرف سرکاری ذرائع پر انحصار کریں ۔

********

ش ح۔ش م ۔ رض

6790-U

(ریلیز آئی ڈی: 2258948) وزیٹر کاؤنٹر : 5