కేంద్ర శాస్త్ర-సాంకేతిక మంత్రిత్వశాఖ, భూవిజ్ఞాన శాఖ (స్వతంత్ర బాధ్యత), ప్రధాని కార్యాలయం, సిబ్బంది-ప్రజా ఫిర్యాదులు-పింఛన్లు, అణుశక్తి-అంతరిక్ష శాఖల సహాయ మంత్రి డాక్టర్‌ జితేంద్ర సింగ్‌ ఈ రోజు ఢిల్లీలో వియత్నాం దేశ శాస్త్ర, సాంకేతిక శాఖ మంత్రి ప్రొఫెసర్ డాక్టర్ వూ హాయ్ క్వాన్‌తో ద్వైపాక్షిక చర్చలు జరిపారు. ఈ సందర్భంగా వర్ధమాన సాంకేతికతలు, ఆవిష్కరణలు, పరిశోధనలు- అంకుర వ్యవస్థ వంటి రంగాల్లో సహకారాన్ని మరింత బలోపేతం చేసేందుకు ఇరుపక్షాలు అంగీకరించాయి.

కృత్రిమ మేధ, సైబర్ భద్రత, డీప్ టెక్, సెమీకండక్టర్లు, రోబోటిక్స్, జీవసాంకేతికత, డిజిటల్ సాంకేతికతలు, ఆవిష్కరణల ఆధారిత పరిశోధనల్లో పరస్పర సహకారాన్ని పెంపొందించుకోవడంపై ఈ చర్చలు ప్రధానంగా సాగాయి. శాస్త్ర సాంకేతికత రంగంలో ఇరు దేశాల మధ్య సంస్థాగత యంత్రాంగాలను బలోపేతం చేయడంపై కూడా దృష్టి సారించారు.

వియత్నాం ప్రతినిధి బృందానికి స్వాగతం పలికిన డాక్టర్ జితేంద్ర సింగ్... భారత్, వియత్నాంలు దాదాపు రెండు వేల ఏళ్ల నాటి ఉమ్మడి సాంస్కృతిక, చారిత్రక సంబంధాలతో ముడిపడి ఉన్న నాగరికత భాగస్వాములని అభివర్ణించారు. గత దశాబ్ద కాలంలో ఇరు దేశాల మధ్య 'సమగ్ర వ్యూహాత్మక భాగస్వామ్యం' సరికొత్త వేగాన్ని పుంజుకుందని ఆయన పేర్కొన్నారు. ముఖ్యంగా 2024 ఆగస్టులో వియత్నాం ప్రధాన మంత్రి ఫామ్ మిన్ చిన్ భారత్‌లో పర్యటించిన తర్వాత ఈ బంధం మరింత దృఢంగా మారిందని అన్నారు.

భారతదేశ 'యాక్ట్ ఈస్ట్ పాలసీ', 'ఇండో-పసిఫిక్ విజన్'లో వియత్నాం ఒక ముఖ్యమైన భాగస్వామిగా కొనసాగుతోందని కేంద్ర మంత్రి పేర్కొన్నారు. శాస్త్ర సాంకేతికత, ఆవిష్కరణల రంగాల్లో పెరుగుతున్న భారత్-ఆసియాన్ అనుసంధానం.. ఉమ్మడి పరిశోధనలు, ఆవిష్కరణలు, సాంకేతికత ఆధారిత వృద్ధికి బలమైన ఆధారాన్నిస్తుందని ఆయన వెల్లడించారు. ప్రస్తుత పరిణామాలు శాస్త్ర సాంకేతిక రంగంలోని అత్యాధునిక అంశాల్లో ద్వైపాక్షిక సహకారాన్ని మరింత ఉన్నత స్థాయికి తీసుకెళ్లేందుకు ఒక ముఖ్యమైన అవకాశాన్ని కల్పిస్తాయని ఆయన అన్నారు.

భారత్‌లో వేగంగా విస్తరిస్తున్న అంకుర వ్యవస్థను ప్రస్తావించిన డాక్టర్ జితేంద్ర సింగ్.. ఇరు దేశాల అంకురాలు, ఆవిష్కర్తలు, పరిశోధనా సంస్థల మధ్య మరింత బలమైన అనుసంధానం ఉండాలన్నారు. వర్ధమాన సాంకేతిక రంగాల్లోని పారిశ్రామికవేత్తలు, యువ పరిశోధకులకు కొత్త అవకాశాలను సృష్టించేందుకు భారత్, వియత్నాం కలిసి పనిచేయొచ్చని ఆయన అభిప్రాయపడ్డారు. 

భారత్-ఆసియాన్‌‌కు సంబంధించిన శాస్త్ర సాంకేతికత, ఆవిష్కరణ కార్యక్రమాల్లో వియత్నాం క్రియాశీల భాగస్వామ్యాన్ని కూడా డాక్టర్ జితేంద్ర సింగ్ ప్రస్తావించారు. 'భారత్-ఆసియాన్ రీసెర్చ్ అండ్ ట్రైనింగ్ ఫెలోషిప్' కార్యక్రమం కింద వియత్నాంకు చెందిన సుమారు పదిమంది పరిశోధకులు ఫెలోషిప్‌లను పొందగా... శాస్త్ర సాంకేతిక‌తకు సంబంధించిన వివిధ విభాగాల్లో పలు ఉమ్మడి ప్రాజెక్టులు ప్రస్తుతం కొనసాగుతున్నాయి. ప్రాంతీయ సహకార ఒప్పందాల పరిధిలో నిర్వహించిన ఆవిష్కరణలు- శాస్త్ర విజ్ఞాన ఫోరమ్‌లలో వియత్నాం ఆవిష్కర్తలు, మహిళా శాస్త్రవేత్తలు కూడా పాల్గొన్నారు.

ప్రతిపాదిత తదుపరి ‘భారత్-వియత్నాం జాయింట్ కమిటీ మీటింగ్ (జేసీఎం)’ గురించి ఇరుపక్షాలు చర్చించాయి. నిర్మాణాత్మక సంస్థాగత సహకారం ద్వారా శాస్త్ర సాంకేతికత, ఆవిష్కరణల రంగాల్లో ద్వైపాక్షిక సంబంధాలను మెరుగుపరచడానికి జరుగుతున్న సన్నాహాలను సమీక్షించాయి.

శాస్త్ర సాంకేతికత రంగంలో ఇరు దేశాల మధ్య పెరుగుతున్న అనుసంధానాన్ని ప్రొఫెసర్ డాక్టర్ వూ హాయ్ క్వాన్ స్వాగతించారు. సామాజిక ప్రయోజనాలు, ఆచరణాత్మక అప్లికేషన్లు కలిగిన డీప్ టెక్ రంగంలో నిర్మాణాత్మక సహకారాన్ని పెంపొందించటంపై వియత్నాం ఆసక్తితో ఉన్నట్లు ఆయన తెలిపారు. నిరంతర సమన్వయం కోసం రెండు దేశాల సంబంధిత మంత్రిత్వ శాఖల నుంచి ప్రత్యేక నోడల్ అధికారులను నియమించాలని... తద్వారా ద్వైపాక్షిక కార్యక్రమాలను అమలు చేసే విధంగా మార్చేందుకు ఒక నిర్దిష్ట కార్యాచరణ ప్రణాళికను సిద్ధం చేయాలని ఆయన ప్రతిపాదించారు.