দোনর মিনিষ্ট্রিগী মখাদা লৈবা সি.পি.এস.ই অমা ওইরিবা নোর্থ ইষ্টর্ন হেন্দিক্রাফস এন্দ হেন্দলুমস দিবলপমেন্ত কোরপোরেসনগী মখাদা ঙসি অৱাং নোংপোক্কী ইরি মুগা (অহিমসা) অমসুং মধ্য প্রদেসকী চেন্দেরি ফি শাবগা পুনশিনবা তোপ-তোপ্পা নাৎশিং পুনশিনবা তেক্সতাইলগী থবক অমা হৌদোকখ্রে।

থবক অদু দোনর মিনিষ্ট্রিগী সেক্রেতরিনা ওফিসিএল ওইনা হৌদোকখি, তুংদা ইরি মুগা অমসুং চান্দেরি তেক্সতাইলশিংগী অপুনবা ফেসন শো অমা পাংথোকখি অমসুং মীয়ামগী পুক্নিং চিংশিনখি।

থৌরম অদুদা মীয়ামদা ৱা ঙাংবদা, শ্রী সঞ্জয় জাজুনা হায়খি মদুদি প্রধান মন্ত্রী নরেন্দ্র মোদীগী এক ভারত শ্রেস্থা ভারতকী পান্দম পদ্ম দোরীদা উবা ফংলে। দোনরগী য়ুনিয়ন মিনিষ্টর শ্রী জয়তিরাদিত্য সিন্দিয়াগী লমজিং মখাদা অনৌবা থবক অসি ঙসি পাংথোকপা ঙম্বনি।

মহাক্না হায়খি মদুদি মধ্য প্রদেসকী চান্দেরি অমসুং অৱাং নোংপোক্কী ইরি মুগাগী তোঙান তোঙানবা তেক্সাতাইলগী চৎনবীশিংদগী পদ্ম দোরী লাকপনি। দোরী অসি হেরিতেচ অমা হৌরকপা খক নত্তনা, মসিনা অনৌবা থবক অমসু পাংথোকহল্লে।

হৌদোকপগী থৌরম অদুদা একজিবিসন পাংথোক্তুনা তেক্সতাইলশিং হৌরকপা অমসুং মখোয়গী তুংদা লৈরবা অপুনবা থবকশিং উৎখি। ভারতকী তেক্সতাইলশিং, লৌশিংগী থবকশিং অমসুং তুংকোইনা চৎনবা য়াবা অকে-অমৌ অমসুং হৌজিক্কী কৈথেলশিংদা মমাংঙৈগী ক্রাফশিংগী শীজিন্নফমগী মতাংদা উৎখি।

নুমিৎ ৩ গী একজিবিসন অদু মীয়ামগা খুৎহৈবশিংগা হকথেংননা উন্নবা, তেক্সতাইলগী থবকশিং খঙনবা অমসুং লংদগী হৌরগা ফি পুথোকপা ফাওবগী খোৎচৎ খঙনবা পাংথোকপনি।

লাইভ ওইনা দোমোন্সত্রেসনশিং উৎতুনা অমসুং মখোয়গী ক্রাফকী চৎনবীশিংগী লৌশিং শরুক য়াদুনা থৌরম অদুদা অৱাং-নোংপোক ভারত অমসুং মধ্য প্রদেসকী খুৎহৈবশিং শরুক য়াখি। থৌরম অদুদা লমদমশিং অসিগী ইন্সাং মথেলশিংউ উৎখি অমসুং শরুক য়ারিবা লমদমশিংগী নাৎ অমসুং চৎনবীশিংগী ইনাকখুনবগী মমি তাখি।

থৌরম অদুদা নোর্থ ইষ্টর্ন হেন্দিক্রাফস এন্দ হেন্দলুমস দিবলপমেন্ত কোরপোরেসনগী মেনেজিং দিরেক্তর মারা কোচোনা হায়খি মদুদি পদ্ম দোরীনা অৱাং নোংপোক অমসুং চান্দেরিগী হেন্দলুমগী চৎনবী অমতা ওইহল্লে অমসুং অপুনবা অমসুং তুংকোইনা চৎনবা য়ারবা তেক্সতাইলগী থবক অমা পায়খৎলে।

হৌদোকপগী থৌরম অদুদা ফিল্ম দিরেক্তর মুজাফর অলি, দোনর মিনিষ্ট্রিগী সেনিয়র ওফিসিএলশিং, মধ্য প্রদেস হেন্দলুমগী ওফিসিএলশিং, অতোপ্পা শক্নাইরবশিং, খুৎহৈবশিং শরুক য়াখি।

***