ભારતીય સેનાની ટુકડી ભારત - કંબોડિયા દ્વિપક્ષીય સૈન્ય અભ્યાસ CINBAX-II 2026ની બીજી આવૃત્તિ માટે રવાના થઈ છે. આ સૈન્ય અભ્યાસ 04 થી 17 મે 2026 દરમિયાન કિંગડમ ઓફ કંબોડિયાના કંમપોંગ સ્પેયૂ પ્રાંત સ્થિત ટેકો સેન ફ્નોમ થોમ મ્રીસ પ્રોવ રોયલ કંબોડિયન એરફોર્સ ટ્રેનિંગ સેન્ટર (કેમ્પ બેસિલ) ખાતે યોજાવા જઈ રહ્યો છે. મિત્ર વિદેશી દેશો સાથે ભારતના ચાલુ સંરક્ષણ સહયોગના ભાગ રૂપે, કંબોડિયા સાથેનો દ્વિપક્ષીય અભ્યાસ CINBAX-II વિકસતા વૈશ્વિક સુરક્ષા પડકારોની પૃષ્ઠભૂમિમાં મહત્વ ધરાવે છે. આ અભ્યાસ યુએન મેન્ડેટના પ્રકરણ VIIના માળખા હેઠળ હાથ ધરવામાં આવશે, જે સબ-કન્વેન્શનલ વાતાવરણમાં કામગીરીના સંચાલન માટે કંપની સ્તરની સંયુક્ત તાલીમ પ્રદર્શિત કરશે.

ભારતીય સેનાની ટુકડીમાં 120 કર્મચારીઓનો સમાવેશ થાય છે, જે મુખ્યત્વે મરાઠા લાઈટ ઇન્ફન્ટ્રી રેજિમેન્ટની બટાલિયનમાંથી છે. કંબોડિયન ટુકડીમાં રોયલ કંબોડિયન આર્મીના 160 કર્મચારીઓ સામેલ છે.

સંયુક્ત અભ્યાસ યુએન શાંતિ જાળવણી કામગીરી દરમિયાન શાંતિ રક્ષક દળો દ્વારા સામનો કરવામાં આવતા આતંકવાદ વિરોધી કામગીરીની વર્તમાન ગતિશીલતા સાથે સુસંગત હશે. આ ઉદ્દેશ્ય વિવિધ વ્યવહારુ અને વ્યાપક ચર્ચાઓ તેમજ વ્યૂહાત્મક કવાયતો દ્વારા પ્રાપ્ત કરવામાં આવશે, જે એક વ્યાપક માન્યતા અભ્યાસ તરફ દોરી જશે. અભ્યાસના ભાગ રૂપે ડ્રોન કામગીરી, મોર્ટાર અને સ્નાઈપર યુક્તિઓ સહિતની વિશેષ કૌશલ્ય તાલીમનો અભ્યાસ કરવામાં આવશે. પ્રાથમિક ઉદ્દેશ્ય બંને દેશોની ટુકડીઓ વચ્ચે આંતર-કાર્યક્ષમતા, સંકલન અને ઓપરેશનલ સિનર્જી વધારવાનો છે.

આ અભ્યાસ માત્ર વૈશ્વિક શાંતિ જાળવવા માટે બંને રાષ્ટ્રોની ક્ષમતા જ પ્રદર્શિત કરશે નહીં, પરંતુ તે શ્રેષ્ઠ પદ્ધતિઓના વિનિમય અને અર્ધ-શહેરી (Semi-Urban) વાતાવરણમાં પ્રતિકૂળ દળો સામેની વિવિધ કામગીરી દરમિયાન મેળવેલા ઓપરેશનલ અનુભવોની વહેંચણીમાં પણ સુવિધા પૂરી પાડશે.

સંયુક્ત સૈન્ય અભ્યાસ CINBAX-II 2026 ભારત - કંબોડિયા વચ્ચે વધતા સંરક્ષણ સહયોગને પ્રતિબિંબિત કરે છે અને બંને રાષ્ટ્રો વચ્ચેના દ્વિપક્ષીય સંબંધોને વધુ મજબૂત બનાવશે, જ્યારે પ્રાદેશિક સુરક્ષા પડકારોને સંભાળવામાં પરસ્પર સમજણમાં યોગદાન આપશે.

 

SM/NK/GP/JT

(રીલીઝ આઈડી: 2257606) મુલાકાતી સંખ્યા : 17