କେନ୍ଦ୍ର କୃଷି ଓ କୃଷକ କଲ୍ୟାଣ ଏବଂ ଗ୍ରାମୀଣ ବିକାଶ ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ ଆସନ୍ତାକାଲି ଓଡ଼ିଶା ଗସ୍ତରେ ଆସିବେ । ତାଙ୍କ ଗସ୍ତ ସମୟରେ ସେ ରାୟଗଡ଼ାରେ ଗ୍ରାମୀଣ ବିକାଶ ମନ୍ତ୍ରଣାଳୟ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେବେ। ସେଠାରେ ସେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା- ଚତୁର୍ଥ ପର୍ଯ୍ୟାୟର ଶୁଭାରମ୍ଭ କରିବେ ଯାହା ରାଜ୍ୟକୁ ଏକ ପ୍ରମୁଖ ବିକାଶମୂଳକ ପ୍ରୋତ୍ସାହନ ପ୍ରଦାନ କରିବ। ଏହି ପଦକ୍ଷେପ ଅଧୀନରେ, ୧,୬୯୮.୦୪ କୋଟି ଟଙ୍କା ବ୍ୟୟରେ ମୋଟ ୧,୭୦୧.୮୪ କିଲୋମିଟର ଲମ୍ବ ବିଶିଷ୍ଟ ୮୨୭ଟି ସଡ଼କ ପ୍ରକଳ୍ପକୁ ହାତକୁ ନିଆଯିବ । ଏହାଦ୍ୱାରା ୮୯୮ଟି ବସତିକୁ ପ୍ରଥମ ଥର ପାଇଁ ସବୁଦିନିଆ ସଡ଼କ ସଂଯୋଗ ସମ୍ଭବ ହେବ । ଏହା ବିଦ୍ୟାଳୟ, ଡାକ୍ତରଖାନା, ବଜାର ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସେବାଗୁଡ଼ିକର ସୁଦୃଢ଼ୀକରଣ କରିବା ସହିତ ସାମାଜିକ-ଆର୍ଥିକ ବିକାଶକୁ ତ୍ୱରାନ୍ୱିତ କରିବ । ଏହି କାର୍ଯ୍ୟକ୍ରମରେ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଉପସ୍ଥିତ ରହିବେ ।

ରାୟଗଡ଼ାର ବାରିଝୋଲାସ୍ଥିତ ଆଇଏସିଆର ପଡ଼ିଆରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମକୁ ଓଡ଼ିଶାର ଦୁର୍ଗମ ଓ ଗ୍ରାମାଞ୍ଚଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଏହି ନୂତନ ରାସ୍ତାଗୁଡ଼ିକ ସ୍କୁଲ, ହସ୍ପିଟାଲ, ଗ୍ରାମାଞ୍ଚଳ ମଣ୍ଡି ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସୁବିଧା ପାଇଁ ସୁଗମତାକୁ ଉନ୍ନତ କରିବ । ଏହା ସହିତ, ପ୍ରକଳ୍ପଗୁଡ଼ିକ ସ୍ଥାନୀୟ ଅଞ୍ଚଳରେ ସ୍ଥାନୀୟ ବାଣିଜ୍ୟ, ନିଯୁକ୍ତି ସୁଯୋଗ ଏବଂ ସାମାଜିକ-ଆର୍ଥିକ କାର୍ଯ୍ୟକଳାପକୁ ନୂତନ ଗତି ପ୍ରଦାନ କରିବ ବୋଲି ଆଶା କରାଯାଉଛି ।

କେନ୍ଦ୍ର ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଅନୁମୋଦନ ପତ୍ର ପ୍ରଦାନ କରିବେ । ଏହାପରେ କେନ୍ଦ୍ର ମନ୍ତ୍ରୀ ଏବଂ ମୁଖ୍ୟମନ୍ତ୍ରୀଙ୍କ ଦ୍ୱାରା ମିଳିତ ଭାବରେ ପ୍ରକଳ୍ପଗୁଡ଼ିକର ଉଦଘାଟନ ଓ ଶିଳାନ୍ୟାସ କରାଯିବ । ଏହି ଅବସରରେ ହିତାଧିକାରୀମାନଙ୍କୁ ମଧ୍ୟ ସମ୍ମାନିତ କରାଯିବ । ଏହି କାର୍ଯ୍ୟକ୍ରମରେ ଓଡ଼ିଶାର ଗ୍ରାମୀଣ ବିକାଶ, ପଞ୍ଚାୟତିରାଜ ଏବଂ ପାନୀୟ ଜଳ ମନ୍ତ୍ରୀ ରବି ନାରାୟଣ ନାୟକଙ୍କ ସହିତ ଅନ୍ୟାନ୍ୟ ଜନପ୍ରତିନିଧି ଏବଂ ରାଜ୍ୟ ଓ କେନ୍ଦ୍ର ସରକାରଙ୍କ ଅନେକ ବରିଷ୍ଠ ଅଧିକାରୀ ଯୋଗଦେବେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ମାର୍ଗଦର୍ଶନରେ,ଏହି କାର୍ଯ୍ୟକ୍ରମ ସମାବେଶୀ ବିକାଶ ପ୍ରତି କେନ୍ଦ୍ର ଓ ରାଜ୍ୟର ଦୃଢ଼ ସହଭାଗୀ ପ୍ରତିବଦ୍ଧତାକୁ ପ୍ରତିଫଳିତ କରିବ ।

ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଅଧୀନରେ ଓଡ଼ିଶା ପୂର୍ବରୁ ଉଲ୍ଲେଖନୀୟ ପ୍ରଗତି ହାସଲ କରିଛି । ଯୋଜନାର ବିଭିନ୍ନ ଉପାଦାନ ଅଧୀନରେ, ରାଜ୍ୟରେ ଏପର୍ଯ୍ୟନ୍ତ ମୋଟ ୧୭,୯୬୩ଟି ରାସ୍ତା ଏବଂ ୭୪,୭୨୫ କିଲୋମିଟର ୭୦୭ଟି ସେତୁ ମଞ୍ଜୁର କରାଯାଇଛି। ଅନ୍ୟପକ୍ଷରେ ୭୧,୭୪୨ କିଲୋମିଟର ବିଶିଷ୍ଟ ୧୭,୭୬୦ଟି ରାସ୍ତା ଏବଂ ୬୫୮ଟି ସେତୁ ନିର୍ମାଣ ସମ୍ପୂର୍ଣ୍ଣ ହୋଇସାରିଛି। ତେଣୁ, ମେ ପହିଲା କାର୍ଯ୍ୟକ୍ରମ କେବଳ ଏକ ନୂତନ ଅନୁମୋଦନ ନୁହେଁ, ବରଂ ରାଜ୍ୟରେ ଗ୍ରାମୀଣ ବିକାଶର ଚାଲୁଥିବା ଯାତ୍ରାକୁ ଆହୁରି ସୁଦୃଢ଼ କରିବାର ସୁଯୋଗ ଭାବରେ କାର୍ଯ୍ୟ କରିବ ।

ଉନ୍ନତ ସଂଯୋଗୀକରଣ, ଦ୍ରୁତ ଆର୍ଥିକ କାର୍ଯ୍ୟକଳାପ ଏବଂ ଦୂରଦୂରାନ୍ତର ଜନବସତିର ସଶକ୍ତିକରଣ ମାଧ୍ୟମରେ ଏହି ପଦକ୍ଷେପକୁ ଏକ ବିକଶିତ ଭାରତର ଦୃଷ୍ଟିକୋଣ ସହିତ ଯୋଡାଯାଇଛି । ରାୟଗଡ଼ାରେ ଏହି କାର୍ଯ୍ୟକ୍ରମ ରାଜନୈତିକ ଓ ବିକାଶମୂଳକ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ । କେନ୍ଦ୍ର ମନ୍ତ୍ରୀ ଶିବରାଜ ସିଂହ ଚୌହାନ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ମିଳିତ ଉପସ୍ଥିତି ଏହି ବାର୍ତ୍ତାକୁ ଆହୁରି ଦୃଢ଼ କରିବ ଯେ ଓଡ଼ିଶାରେ ଗ୍ରାମୀଣ ରାସ୍ତା, ଭିତ୍ତିଭୂମି ଏବଂ ସାର୍ବଜନୀନ ସୁବିଧାର ପ୍ରସାର ଆହୁରି ଦ୍ରୁତ ଗତିରେ ଆଗକୁ ବଢ଼ିବାକୁ ଯାଉଛି ।

******

PS/Swadhin/Manoj

(ରିଲିଜ ଆଡି: 2257070) ପରିଦର୍ଶକ କାଉଣ୍ଟର : 37