سماجی انصاف و اختیار سازی کی وزارت، حکومتِ ہند نے 24 تا 26 اپریل 2026ء کو چندی گڑھ میں ریاستوں اور مرکز کے زیرِ انتظام علاقوں کے ساتھ منعقدہ چنتن شِور کے دوران ایس ایم آئی ایل ای–بھیک مانگنے سے متعلق سروے موبائل ایپلی کیشن کا اجراء کیا۔

یہ موبائل ایپلی کیشن ایس ایم آئی ایل ای –بھیک مانگنے سے متعلق ذیلی اسکیم (بھیک مانگنے کے عمل میں مصروف افراد کی جامع بازآبادکاری) کے تحت تیار کی گئی ہے تاکہ زمینی سطح پر نفاذ کو بروقت اعداد و شمار کے حصول اور بہتر نگرانی کے ذریعے مضبوط بنایا جا سکے۔ یہ ایپ نافذ کرنے والے اداروں اور ضلعی حکام کو سروے کا ڈیٹا ڈیجیٹل انداز میں درج کرنے کے قابل بنائے گی، جس سے درستگی، شفافیت اور بروقت رپورٹنگ یقینی ہوگی۔

اس موبائل ایپلی کیشن کا اجراء تاخیر سے ہونے والی اور غیر یکساں ڈیٹا رپورٹنگ جیسے مسائل سے نمٹنے کی سمت ایک اہم قدم ہے، جبکہ اس سے وزارت کی بروقت نگرانی، اعداد و شمار کے تجزیے اور مختلف شہروں میں کارکردگی کے جائزے کی صلاحیت بھی مضبوط ہوگی۔

اس موقع پر کہا گیا کہ یہ اقدام حکومت کے ’’بھکشا ورتی سے پاک بھارت‘‘ کے ویژن کے عین مطابق ہے۔ یہ موبائل ایپلی کیشن اسکیم کے مجموعی نگرانی نظام کو مزید مستحکم کرے گی۔ وزارت نے ٹیکنالوجی پر مبنی حل اختیار کرنے اور ادارہ جاتی نظام کو مضبوط بنانے کے اپنے عزم کا اعادہ کیا تاکہ شناخت شدہ افراد کو معاشرے کے مرکزی دھارے میں دوبارہ شامل کیا جا سکے اور وہ عزت و وقار اور خود اعتمادی کے ساتھ زندگی گزار سکیں۔

******

ش ح۔ ش ا ر۔ ول

Uno-6296