ఉత్తరాఖండ్‌లోని రిషికేశ్ లో ఉన్న ఆల్ ఇండియా ఇనిస్టిట్యూట్ ఆఫ్ మెడికల్ సైన్సెస్ (ఎయిమ్స్) 6వ స్నాతకోత్సవ వేడుకల్లో నేడు భారత ఉపరాష్ట్రపతి శ్రీ సీపీ రాధకృష్ణన్ ప్రసంగించారు. ఆయన మాట్లాడుతూ.. పట్టభద్రులవుతున్న విద్యార్థుల జీవితంలో ఇది మార్పు, ఆత్మపరిశీలన, బాధ్యతకు సంబంధించిన కీలకమైన సమయమని అభివర్ణించారు.

రిషికేశ్ ఆధ్యాత్మిక, సాంస్కృతిక ప్రాముఖ్యతను ఉపరాష్ట్రపతి ప్రస్తావించారు. రిషికేశ్ ప్రపంచ స్థాయి ఆధ్యాత్మిక చింతనకు, ప్రశాంతతకు నిలయమని, హిమాలయాలకు ముఖద్వారమని పేర్కొన్న ఉపరాష్ట్రపతి..  ఇలాంటి పవిత్రమైన ప్రదేశంలో ఈ స్నాతకోత్సవ వేడుకలు జరగడం ఈ కార్యక్రమానికి మరింత అర్థాన్ని ఇస్తుందని అన్నారు.

స్నాతకోత్సవం.. కేవలం ఇన్నేళ్ల క్రమశిక్షణతో కూడిన కృషికి, త్యాగానికి లభించిన ముగింపు మాత్రమే కాదనీ, సమాజం, దేశం పట్ల మరింత బాధ్యతాయుతంగా వ్యవహరించాల్సిన సమయమానికి ఆరంభమని శ్రీ సీపీ రాధ కృష్ణన్ అన్నారు. పట్టభద్రులందరూ వృత్తిపరమైన విధులను అంకితభావంతో, గొప్ప లక్ష్యంతో నిర్వర్తించాలని ఆయన కోరారు.

కోవిడ్-19 మహమ్మారి తీసుకొచ్చిన సవాళ్లను ప్రస్తావిస్తూ ప్రధానమంత్రి శ్రీ నరేంద్ర మోదీ నాయకత్వంలో భారత్ పట్టుదలను, ఆవిష్కరణలను, నిబద్ధతను చాటుకుందని ఉపరాష్ట్రపతి పేర్కొన్నారు. దేశంలోని 140 కోట్లకు పైగా పౌరులకు ఉచితంగా వ్యాక్సిన్లను అందించడం ద్వారా ప్రతి ఒక్కరికీ వైద్య సేవలు సమానంగా అందేలా చేసిన భారీ టీకా కార్యక్రమాన్ని కొనియాడారు. భారతీయ శాస్త్రవేత్తలు కేవలం లాభాపేక్ష కోసం కాకుండా, మానవ సంక్షేమం కోసమే టీకాలను అభివృద్ధి చేసినట్లు చెప్పారు.

100 కంటే ఎక్కువ దేశాలకు టీకాలను సరఫరా చేసిన ‘వ్యాక్సిన్ మైత్రి’ కార్యక్రమం ద్వారా భారత్ తన ప్రపంచ బాధ్యతను సమర్థవంతంగా నిర్వహించిందని ఉపరాష్ట్రపతి తెలిపారు. ఈ కార్యక్రమం ద్వారా ‘వసుధైక కుటుంబం’ స్ఫూర్తిని ప్రతిబింబించడమే కాకుండా, బాధ్యత కలిగిన ప్రపంచ భాగస్వామిగా భారత్ తన పాత్రను మరింత బలోపేతం చేసిందని అన్నారు.

ఆరోగ్య మౌలిక సదుపాయాల విస్తరణ గురించి వివరిస్తూ.. గత దశాబ్ద కాలంలో దేశవ్యాప్తంగా కొత్తగా ఏర్పాటు చేసిన ఎయిమ్స్ సంస్థలు... ముఖ్యంగా వెనకబడిన ప్రాంతాల్లో  నాణ్యమైన వైద్య సేవలను, వైద్య విద్యను ప్రజలకు చేరువ చేశాయని ఉపరాష్ట్రపతి శ్రీ సీపీ రాధాకృష్ణన్ పేర్కొన్నారు. ప్రజల అవసరాలను అర్థం చేసుకుని వారికి సేవ చేయడమే సుపరిపాలనకు అసలైన అర్థమని ఆయన వ్యాఖ్యానించారు.

ఎయిమ్స్ రిషికేశ్ పై ఉపరాష్ట్రపతి ప్రశంసలు కురిపించారు. వైద్య సేవలు, మంచి విద్యా బోధన, పరిశోధన, ఆవిష్కరణ సామాజిక నిబద్ధత కలిగిన ఈ సంస్థ ఒక అద్భుతమైన ప్రదర్శనకు ఆదర్శంగా నిలిచిందని కొనియాడారు. ముఖ్యంగా ఇక్కడి టెలిమెడిసిన్ కార్యక్రమాలను ఆయన అభినందించారు. వైద్య సేవలు కేవలం ఆసుపత్రి ప్రాంగణాలకే పరిమితం కాకుండా, మారుమూల, వెనుకబడిన ప్రజలకు కూడా చేరాలని సూచించారు.

హెలికాప్టర్ ద్వారా అత్యవసర వైద్య సేవలు, చార్ ధామ్ యాత్ర సమయంలో మారుమూల ప్రాంతాలకు మందులను చేరవేసేందుకు డ్రోన్లను ఉపయోగించడం వంటి వినూత్న ఆరోగ్య సేవలను ఉపరాష్ట్రపతి అభినందించారు. వైద్య సేవల రంగంలో దీర్ఘకాలంగా ఉన్న సవాళ్లకు ఇవి సమర్థవంతమైన పరిష్కారాలని పేర్కొన్నారు.

ఢిల్లీ-డెహ్రాడూన్ ఎక్స్‌ప్రెస్‌వేతో సహా ఈ ప్రాంతంలో మౌలిక సదుపాయాల వేగవంతమైన అభివృద్ధిని ఉపరాష్ట్రపతి ప్రత్యేకంగా ప్రస్తావించారు. సమ్మిళిత అభివృద్ధిని ప్రోత్సహించడం, మౌలిక సదుపాయాలను బలోపేతం చేయడం, వైద్య సేవలను మెరుగుపరచడంలో ముఖ్యమంత్రి శ్రీ పుష్కర్ సింగ్ ధామి నాయకత్వంలోని ఉత్తరాఖండ్ ప్రభుత్వం చేస్తున్న ప్రయత్నాలను ఆయన అభినందించారు.

వైద్య సేవలు ప్రజల నమ్మకానికి నిదర్శనమని, దేశ నిర్మాణంలో వైద్య నిపుణులు కీలక పాత్ర పోషిస్తారని శ్రీ సీపీ రాధాకృష్ణన్ తెలిపారు. ముందస్తు జాగ్రత్త చర్యలు, వైద్య సేవలు గ్రామాలకూ చేరుకోవడం, పరిశోధన, ఆవిష్కరణల ద్వారా దేశానికి తమ వంతు సహకారం అందించాలని సూచించారు. సానుభూతి, నిజాయితీ,  సేవా దృక్పథం వంటి విలువలతో ముందుకు సాగాలని ఆయన  కోరారు.

ఈ కార్యక్రమంలో ఉత్తరాఖండ్ గవర్నర్ లెఫ్టినెంట్ జనరల్ గుర్మీత్ సింగ్ (పదవీ విరరమణ), ముఖ్యమంత్రి శ్రీ పుష్కర్ సింగ్ ధామి, కేంద్ర ఆరోగ్య, కుటుంబ సంక్షేమ శాఖ సహాయ మంత్రి శ్రీమతి అనుప్రియ పటేల్, ఎయిమ్స్ రిషికేశ్ అధ్యక్షులు ప్రొఫెసర్ రాజ్ బహదూర్, డీన్ (అకడమిక్) ప్రొఫెసర్ సౌరభ్, ఎయిమ్స్ కార్యనిర్వాహక డైరెక్టర్ ప్రొఫెసర్ మీను సింగ్, అధ్యాపక బృందం, విద్యార్థులు, ఇతర ప్రముఖులు పాల్గొన్నారు.

***