ماحولیاتی پائیداری کی سمت ایک اہم قدم کے طور پر، کنکریا کوچنگ ڈپو ایک ’’واٹر نیوٹرل‘‘ ریلوے ڈپو کے طور پر ابھرا ہے، جو یہ ظاہر کرتا ہے کہ جدید اور اختراعی طریقے کس طرح روایتی ریلوے نظام کو ماحول دوست ماڈل میں تبدیل کر سکتے ہیں۔ اس اقدام کے تحت ڈپو روزانہ تقریباً 1.60 لاکھ لیٹر پانی کی بچت کر رہا ہے، جو 300 سے زائد گھریلو ٹینکوں کے برابر ہے۔

اس تبدیلی کے مرکز میں فائیٹو ریمیڈی ایشن پر مبنی جدید آلودہ پانی صاف کرنے کا سسٹم ہے، جس میں پودوں کی مدد سے پانی کو قدرتی طریقے سے صاف کیا جاتا ہے۔ کوچ کی صفائی اور مرمت جیسے روزمرہ کے کاموں سے پیدا ہونے والے گندے پانی کو ضائع کرنے کے بجائے صاف کر کے دوبارہ استعمال کیا جا رہا ہے، جس سے تازہ پانی پر انحصار کم ہوا ہے۔

یہ نظام سائنسی بنیادوں پر کئی مراحل میں کام کرتا ہے، جس میں قدرتی اور تکنیکی طریقوں کا امتزاج شامل ہے۔ ویٹ لینڈ پر مبنی طریقہ کار میں پودے نجاست کو جذب کر کے پانی کے معیار کو بہتر بناتے ہیں۔ آخری مرحلے میں کاربن اور ریت کے فلٹریشن کے ساتھ الٹرا وائلٹ جراثیم کش عمل کے ذریعے پانی کو دوبارہ استعمال کے قابل بنایا جاتا ہے۔

یہ اقدام نہ صرف ماحول کے تحفظ میں مددگار ہے بلکہ پانی کے استعمال پر آنے والی لاگت کو کم کر کے معاشی فوائد بھی فراہم کرتا ہے۔ یہ منصوبہ ماحولیاتی اداروں کے معیارات کے مطابق ہے، جس سے پائیداری اور ضابطہ بندی دونوں کو یقینی بنایا گیا ہے۔

روزانہ کی بچت کے باعث سالانہ تقریباً 5.84 کروڑ لیٹر پانی محفوظ کیا جا رہا ہے، جس سے کنکریا کوچنگ ڈپو بھارتی ریلوے میں مؤثر پانی کے انتظام کی ایک مثال بن گیا ہے۔ ایسے جدید اور پائیدار اقدامات سے یہ ثابت ہوتا ہے کہ بنیادی ڈھانچے کو ماحولیات کی ضروریات کے مطابق ڈھالتے ہوئے بھی عملی کارکردگی برقرار رکھی جا سکتی ہے۔

کنکریا کوچنگ ڈپو کا واٹر نیوٹرل سہولت میں تبدیل ہونا ریلوے نظام میں سبز اور پائیدار اقدامات کی جانب ایک بڑی تبدیلی کی عکاسی کرتا ہے، جو وسائل کے تحفظ اور ماحول دوست ترقی کے عزم کو مزید مضبوط بناتا ہے۔

************

ش ح ۔   م  د ۔  م  ص

(U :5985  )

(ریلیز آئی ڈی: 2253133) وزیٹر کاؤنٹر : 5