ઇલેક્ટ્રોનિક્સ અને ઇન્ફોર્મેશન ટેકનોલોજી મંત્રાલય (MeitY), ભારત સરકારે 'AI ગવર્નન્સ એન્ડ ઇકોનોમિક ગ્રુપ' (AIGEG) ની રચના કરી છે. આ એક ઉચ્ચ સ્તરીય આંતર-મંત્રાલય સંસ્થા છે જે AI ગવર્નન્સ પોલિસીના વિકાસ અને સંકલન માટે ભારતની મધ્યસ્થ સંસ્થાકીય પદ્ધતિ તરીકે કામ કરશે.

AIGEG ની રચના ભારતની 'AI ગવર્નન્સ ગાઈડલાઈન્સ' અને 'ઈકોનોમિક સર્વે' (આર્થિક સર્વેક્ષણ) માં કરવામાં આવેલી સંસ્થાકીય ભલામણોને ઔપચારિક સ્વરૂપ આપે છે.

માર્ગદર્શિકા (Guidelines) AI ગવર્નન્સ માટે સમગ્ર સરકારના અભિગમનું સંચાલન કરવા માટે એક આંતર-મંત્રાલય સંસ્થાની સ્થાપના કરવાની ભલામણ કરે છે, જેનો ઉદ્દેશ્ય મંત્રાલયો, વિભાગો, નિયમનકારો અને સલાહકાર સંસ્થાઓના કાર્યોને એક સુસંગત રાષ્ટ્રીય વ્યૂહરચના સાથે જોડવાનો છે. બદલામાં, આર્થિક સર્વેક્ષણ એક એવી સંકલનકારી સત્તાની જરૂરિયાત ઓળખે છે, જે શ્રમની વાસ્તવિકતાઓ અને સામાજિક સ્થિરતાની પ્રાથમિકતાઓ સાથે AI ના અમલીકરણને સુસંગત બનાવવા માટે સક્ષમ હોય.

AIGEG ના અધ્યક્ષ ઇલેક્ટ્રોનિક્સ અને ઇન્ફોર્મેશન ટેકનોલોજી, રેલવે અને માહિતી તથા પ્રસારણ મંત્રી શ્રી અશ્વિની વૈષ્ણવ રહેશે, જ્યારે ઇલેક્ટ્રોનિક્સ અને IT તથા વાણિજ્ય અને ઉદ્યોગ રાજ્ય મંત્રી શ્રી જિતિન પ્રસાદ ઉપાધ્યક્ષ તરીકે સેવા આપશે. AIGEG ના સભ્યોમાં નીતિ વિકાસ, વિજ્ઞાન અને ટેકનોલોજી, સુરક્ષા અને આર્થિક બાબતોના સરકારના વરિષ્ઠ હિતધારકોનો સમાવેશ થાય છે.

AIGEG ભારતની AI ગવર્નન્સ સંસ્થાકીય માળખામાં સર્વોચ્ચ આંતર-મંત્રાલય સંસ્થા તરીકે કાર્ય કરશે. તેને ટેકનોલોજી એન્ડ પોલિસી એક્સપર્ટ કમિટી (TPEC) દ્વારા સહયોગ આપવામાં આવશે, જે વૈશ્વિક વિકાસ, ઉભરતી ટેકનોલોજી, જોખમો, નિયમન અને AI નીતિ તથા ગવર્નન્સને લગતી અન્ય વિકસતી પ્રાથમિકતાઓ પર AIGEG ને નિષ્ણાત સલાહ આપશે.

AIGEG ની રચના અને કાર્યક્ષેત્ર (Terms of Reference) ની વિગતો માટે, કૃપા કરીને નીચેની લિંકનો સંદર્ભ લો: https://d12aarmt01l54a.cloudfront.net/cms/files/constitution-of-aigeg/1776346498.pdf

SM/IJ/GP/JT