మనీలాండరింగ్, ఆర్థిక నేరాలకు వ్యతిరేకంగా భారతదేశ పోరాటాన్ని మరింత బలోపేతం చేసే దిశగా కీలక ముందడుగులో భాగంగా సమాచార మార్పిడి, పరస్పరం సమన్వయాన్ని పెంపొందించుకునేందుకు ఫైనాన్షియల్ ఇంటెలిజెన్స్ యూనిట్-ఇండియా (ఎఫ్ఐయూ-ఐఎన్‌డీ), పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (పీఎఫ్ఆర్‌డీఏ) మధ్య అవగాహనా ఒప్పందం (ఎంఓయూ) కుదిరింది.

పీఎఫ్ఆర్‌డీఏ ఛైర్మన్ శ్రీ శివసుబ్రమణియన్ రమణ్ సమక్షంలో ఎఫ్ఐయూ-ఐఎన్‌డీ డైరెక్టర్ శ్రీ అమిత్ మోహన్ గోవిల్, పీఎఫ్ఆర్‌డీఏ శాశ్వత సభ్యుడు శ్రీ రణదీప్ సింగ్ జగపాల్ ఈ ఎంఓయూపై సంతకాలు చేశారు.

నియంత్రిత, నివేదికలు అందించే సంస్థలకు అవగాహన, శిక్షణ కార్యక్రమాలను చేపట్టేలా రెండు ఏజెన్సీలను శక్తిమంతం చేయటం ఈ ఎంఓయూ ముఖ్య ఉద్దేశం. ఇందులో భాగంగా పీఎఫ్ఆర్‌డీఏ పరిధిలోని సంస్థల మనీలాండరింగ్ నిరోధక, ఉగ్రవాద ఆర్థిక సహాయ నిరోధక (ఏఎంఎల్, సీఎఫ్‌టీ) సామర్థ్యాలను మెరుగుపరచటంపై ప్రత్యేక దృష్టి సారిస్తారు. అంతర్జాతీయ ప్రమాణాలకు అనుగుణంగా వ్యవహరించేలా ఇరుపక్షాలు చూసుకుంటాయి. సమాచార మార్పిడి, పరస్పరం ఆసక్తి ఉన్న అంశాలపై చర్చించేందుకు ప్రతీ మూడు నెలలకు సమావేశాలు జరుగుతాయి.

రెండు సంస్థల మధ్య క్రమబద్ధమైన సమన్వయం, పరస్పర చర్చలను సులభతరం చేయటానికి ఈ ఎంఓయూలో భాగస్వాములైన ప్రతీ పక్షం.. ఒక నోడల్ అధికారిని, ఒక ప్రత్యామ్నాయ నోడల్ అధికారిని నియమించాలి. ఈ ఒప్పందం ఎగ్మాంట్ గ్రూప్ సమాచార మార్పిడి సూత్రాల ద్వారా విదేశీ ఎఫ్ఐయూ సమాచారాన్ని పంచుకోవటంలోనూ సహకరిస్తుంది.

సంబంధిత ఆర్థిక ఉప రంగాల్లోని మనీలాండరింగ్, ఉగ్రవాద ఆర్థిక సహాయ (ఎంఎల్, టీఎఫ్) ముప్పులను, లోపాలను ఈ సహకారం ద్వారా అంచనా వేస్తారు. అనుమానాస్పద లావాదేవీలకు సంబంధించి రెడ్-ఫ్లాగ్ సూచీలను గుర్తించి ప్రచారం చేయటం, పీఎంఎల్ఏ, పీఎంఎల్ నిబంధనలు, పీఎఫ్ఆర్‌డీఏ మార్గదర్శకాల ప్రకారం నివేదికలు అందించే సంస్థల బాధ్యతలను పర్యవేక్షించటం, తనిఖీ చేయటం ఈ సహకారంలో భాగం.

ఫైనాన్షియల్ ఇంటెలిజెన్స్ యూనిట్-ఇండియా (ఎఫ్ఐయూ-ఐఎన్‌డీ) గురించి

మనీలాండరింగ్, ఉగ్రవాదానికి నిధుల చేరవేయటాన్ని అరికట్టే ప్రయత్నాలను సమన్వయం చేయటం, అనుమానాస్పద ఆర్థిక లావాదేవీలకు సంబంధించిన సమాచారాన్ని స్వీకరించటం, ప్రాసెస్ చేయటం, విశ్లేషించటం, సంబంధిత సంస్థలకు చేరవేయటం వంటి బాధ్యతలను నిర్వహించే కేంద్ర జాతీయ సంస్థ ఎఫ్ఐయూ-ఐఎన్‌డీ.

పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ (పీఎఫ్ఆర్‌డీఏ) గురించి

పీఎఫ్ఆర్‌డీఏ చట్టం-2013 ద్వారా ఏర్పాటు చేసిన చట్టపరమైన నియంత్రణ సంస్థ పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ. జాతీయ పెన్షన్ వ్యవస్థ (ఎన్ పీఎస్), అటల్ పెన్షన్ యోజన (ఏపీవై) సహా భారత్ లోని పెన్షన్ రంగాన్ని నియంత్రించటం, అభివృద్ధి చేయటం, పర్యవేక్షించటం దీని బాధ్యత. పెన్షన్ వ్యవస్థ క్రమంగా వృద్ధి చెందటానికి, చందాదారుల ప్రయోజనాలను కాపాడటానికి పెన్షన్ నిధులు, కేంద్ర రికార్డు నిర్వహణ సంస్థలు, ట్రస్టీలు, అగ్రిగేటర్లు, సేవా కేంద్రాల వంటి మధ్యవర్తుల కోసం పీఎఫ్ఆర్‌డీఏ సమగ్ర నియంత్రణ, పర్యవేక్షణా వ్యవస్థను అందిస్తుంది.

***