لوک سبھا کے اسپیکر جناب اوم برلا نے آج فرانس کو بھارت کے سب سے قابل اعتماد اور قریبی دوست شراکت داروں میں سے ایک قرار دیتے ہوئے دونوں ممالک کے درمیان گہرے اور دیرینہ تعلقات کو اجاگر کیا۔ انہوں نے کہا کہ عزت مأب وزیراعظم نریندر مودی اور فرانس کے صدر ایمانوئل میکرون کے درمیان خوشگوار ذاتی تعلقات نے دو طرفہ روابط کو مزید مضبوط اور وسیع کرنے میں اہم کردار ادا کیا ہے۔

جناب برلا نے یہ بات آج پارلیمنٹ ہاؤس میں فرانس کی سینیٹ کے فرانس-بھارت بین پارلیمانی فرینڈشپ گروپ کے وفد سے ملاقات کے دوران کہی۔

صدر میکرون کے فروری 2026 میں بھارت کے دورے کا ذکر کرتے ہوئے، جناب برلا نے کہا کہ دو طرفہ تعلقات کو "خصوصی عالمی اسٹریٹجک شراکت داری” تک بڑھانا دونوں ممالک کے درمیان بڑھتے ہوئے اعتماد اور تعاون کی عکاسی کرتا ہے۔

فرانسیسی پارلیمنٹ میں خواتین کی نمایاں نمائندگی، جو 36 فیصد سے زیادہ ہے، کی تعریف کرتے ہوئے جناب اوم برلا نے اس بات پر زور دیا کہ بھارت بھی حکمرانی میں خواتین کی شرکت بڑھانے کے لیے مسلسل قانون سازی اور ادارہ جاتی اقدامات کر رہا ہے۔ انہوں نے اطمینان کا اظہار کیا کہ خاص طور پر پنچایتی راج اداروں میں نچلی سطح پر خواتین کی نمائندگی نہایت حوصلہ افزا رہی ہے۔

جناب برلا نے وفد کو مزید آگاہ کیا کہ نئے تعمیر شدہ پارلیمنٹ ہاؤس میں منظور ہونے والا پہلا بل ’ناری شکتی وندن ادھینیم‘ تھا، جو منتخب قانون ساز اداروں میں خواتین کے لیے ایک تہائی ریزرویشن کی سہولت فراہم کرتا ہے۔ انہوں نے اس تاریخی قانون کو بھارت کے خواتین کی قیادت میں ترقی اور شمولیت پر مبنی حکمرانی کے پختہ عزم کی عکاسی قرار دیا۔

نئی دہلی (2026) اور پیرس (2025) میں منعقدہ اے آئی سمٹ کا حوالہ دیتے ہوئے، جناب اوم برلا نے کہا کہ بھارت اور فرانس دونوں پارلیمانی کارکردگی، شفافیت اور عوامی رسائی کو بہتر بنانے کے لیے مصنوعی ذہانت اور جدید ٹیکنالوجیز کا بڑھ چڑھ کر استعمال کر رہے ہیں۔ انہوں نے کہا کہ اے آئی اور ڈیجیٹل ٹولز کے استعمال نے شہریوں اور پارلیمنٹ کے درمیان فاصلے کو نمایاں طور پر کم کیا ہے۔ اس تناظر میں انہوں نے دونوں ممالک کی مقننہ کے درمیان باہمی تعاون اور بہترین تجربات کے تبادلے کو مزید فروغ دینے کی تجویز پیش کی۔

جناب برلا نے سفارتی اور پارلیمانی سطح پر بھارت اور فرانس کے درمیان مسلسل اور مثبت مکالمے پر اطمینان کا اظہار کیا۔ انہوں نے گزشتہ سال آپریشن سندور کے بعد فرانس کے دورے پر جانے والے بھارتی پارلیمانی وفد کا ذکر کیا اور اس دوران دہشت گردی کی فرانس کی جانب سے دوٹوک مذمت کو سراہا۔ انہوں نے فرانسیسی وفد کے اراکین کا مسلسل تعاون اور یکجہتی پر شکریہ ادا کیا۔

یہ اجاگر کرتے ہوئے کہ پارلیمانی تعاون بھارت-فرانس تعلقات کا ایک اہم ستون ہے، جناب برلا نے فروری 2024 میں فرانس کی سینیٹ کے چیئرمین جیرال  لارشر کے دورۂ بھارت کو بھی یاد کیا، جس سے دونوں ممالک کے درمیان بین پارلیمانی روابط مزید مضبوط ہوئے۔

****

ش ح۔ م م۔ص ج

U. No. 5865