بندرگاہوں، جہاز رانی اور آبی گزرگاہوں (ایم او پی ایس ڈبلیو) کے مرکزی وزیر سربانند سونووال نے کہا کہ وزارت کی بروقت مداخلت اور مسلسل نگرانی کے نتیجے میں بڑی بندرگاہوں پر تقریباً 90 فیصد بیک لاگ کارگو کی کلیئرنس ہو چکی ہے، جس سے آبنائے ہرمز میں جغرافیائی سیاسی رکاوٹوں سے متاثر ہونے والی سرگرمیوں میں معمول کی بحالی ہوئی ہے۔

سینئر عہدیداروں اور بندرگاہی حکام کے ساتھ ایک اعلیٰ سطحی جائزہ اجلاس کی صدارت کرتے ہوئے وزیر نے کہا کہ مغربی ایشیا میں ابھرتی ہوئی صورتحال نے ابتدائی طور پر کارگو کی نقل و حرکت اور جہازوں کی آمد و رفت کو متاثر کیا تھا، لیکن مربوط اور فعال اقدامات کے ذریعے تجارت پر کم سے کم اثرات کے ساتھ بندرگاہی سرگرمیوں کو تیزی سے مستحکم کر لیا گیا۔

"ہم نے ابھرتے ہوئے چیلنجوں سے نمٹنے کے لیے تیز اور مربوط انداز میں کام کیا۔" سونووال نے کہا، "مسلسل نگرانی اور بروقت مداخلت نے ہمیں بندرگاہی سرگرمیوں کو معمول پر لانے اور بیک لاگ کو مؤثر طریقے سے صاف کرنے میں مدد دی ہے، جس سے ہندوستان کی تجارت کا تسلسل برقرار رہا۔"

وزیر موصوف نے بندرگاہوں کے لحاظ سے آپریشنل صورتحال کا جائزہ لیا اور نمایاں بہتری پر اطمینان کا اظہار کیا، نیز ایک نازک دور میں بھیڑ کو روکنے میں بندرگاہی عملے اور حکام کی کوششوں کو سراہا۔ انہوں نے عالمی غیر یقینی صورتحال کے باوجود ہموار کارروائیوں کو برقرار رکھنے کے عزم کی تعریف کی۔

سونووال نے اس بات پر زور دیا کہ مودی حکومت کی ترجیح نہ صرف آپریشنل تسلسل کو برقرار رکھنا ہے بلکہ برآمد کنندگان، درآمد کنندگان اور لاجسٹک اسٹیک ہولڈرز کے مفادات کا تحفظ بھی ہے۔ انہوں نے بندرگاہی حکام کو ہدایت دی کہ وزارت کی جانب سے اعلان کردہ مالی امدادی اقدامات—بشمول زمینی کرایے میں چھوٹ اور ریفر چارجز میں مراعات—بغیر کسی تاخیر یا طریقۂ کار کی رکاوٹ کے براہِ راست مستفیدین تک پہنچائے جائیں۔

اس شعبے کو واضح پیغام دیتے ہوئے وزیر موصوف نے ڈائریکٹوریٹ جنرل آف شپنگ کو شپنگ سے متعلق چارجز میں مکمل شفافیت یقینی بنانے کی ہدایت کی۔ "یہ بحران منافع کمانے کا موقع نہیں بننا چاہیے،" سونووال نے کہا۔ "تمام چارجز کو واضح طور پر دستاویزی شکل دی جائے اور ان کی نگرانی کی جائے تاکہ تجارتی مفادات کا تحفظ یقینی بنایا جا سکے۔"

جائزہ اجلاس میں بندرگاہوں پر شکایات کے ازالے کے نظام کا بھی جائزہ لیا گیا۔ سونووال نے حکام کو ہدایت دی کہ ایسے حالات میں اسٹیک ہولڈرز کے مسائل کے فوری حل کے لیے نظام کو مزید مؤثر بنایا جائے۔

حکام کے مطابق جواہر لال نہرو پورٹ، دین دیال پورٹ اتھارٹی، نیو منگلور پورٹ اتھارٹی اور ممبئی پورٹ سمیت بڑی بندرگاہوں نے جہاز رانی میں جنگ سے متعلق خلل کے باعث پھنسے ہوئے زیادہ تر کارگو کو کلیئر کر دیا ہے۔ اختراعی آپریشنل اقدامات، یارڈ کی صلاحیت میں اضافہ اور مربوط لاجسٹک منصوبہ بندی نے بیک لاگ کم کرنے میں اہم کردار ادا کیا۔

حکومت کے عزم کا اعادہ کرتے ہوئے وزیر موصوف نے کہا کہ بندرگاہوں، جہاز رانی اور آبی گزرگاہوں کی وزارت مسلسل نگرانی جاری رکھے گی اور کسی بھی نئی صورتحال سے نمٹنے کے لیے تیار رہے گی۔

"ہمارا نقطۂ نظر فعال، جوابدہ اور اسٹیک ہولڈرز پر مرکوز رہا ہے۔ ہم عالمی چیلنجوں کے باوجود ہندوستان کے سمندری شعبے کو مضبوط اور مؤثر بنانے کے لیے پرعزم ہیں،" سونووال نے مزید کہا۔ "وزیر اعظم نریندر مودی کی قیادت میں ہم اپنے تجارتی مفادات کے تحفظ اور سپلائی چین کو پائیدار بنانے کے لیے ہر ممکن اقدام کرتے رہیں گے۔"

 

***

 

UR-5713

(ش ح۔اس ک  )

(ریلیز آئی ڈی: 2251007) وزیٹر کاؤنٹر : 16