নেসনেল হুমেন রাইতস কম্মিসন (এন.ঐচ.আর.সি) না মসিগী ১২শুবা চহিগী ওইবা মীওইবগী হক্কী অতেনবা ফিল্মশিং চাংদম্নবগী ইন্ত্রিশিং কৌরি। ইন্ত্রিশিং লৌশিনবগী অরোইবা নুমিৎ জুন ৩০, ২০২৬ নি। মাইপাক্লবা ইন্ত্রিশিংদা মনা পীগনি।

অতেনবা ফিল্মশিং চাংদম্নবা অসি ২০১৫ দা কম্মিসন্না হৌদোকখিবনি। মসিনা মখোয়গী চহি থিদনা, মীওইবগী হক ঙাক-শেন্নবা ভারতকী মীয়ামগী সেনিমা অমসুং অনৌবা থবকশিং পুক্নিং থৌগৎনবা অমসুং ইকায়খুম্নবা উৎনবা পান্দম থম্লি। মমাংগী চাংদম্নবশিংদা, কম্মিসন্না লৈবাক অসিগী তোঙান তোঙানবা মফমশিংদগী ফিল্ম কয়া ফংখি।

অতেনবা ফিল্মশিং ইংলিস নত্ত্রগা সবতাইতল য়াওরবা ভারতকী লোল অমদা নম্বা ওইগদবনি। অতেনবা ফিল্মগী অশাংবা খ্বাইদগী তেনবদা মিনিত ৩ অমসুং খ্বাইদগী শাংবদা মিনিত ১০ ওইদবগনি। ফিল্মশিং অদু দোকুমেন্তরি, অশেংবা ৱারিশিং দ্রামা ওইনা পুথোকপা নত্ত্রগা তেক্নিকেল ফোর্মেত অমদা হেক্ত ফিক্সন অমা ওইগদবনি, মসিদা এনিমেসন ফিল্মশিং য়াওগনি, খুন্নাই অমসুং শেন-থুম, নাৎ অমসুং রাজনিতিগী হকশিং মতাংদা মখাগী থিমশিংদা য়ুম্ফম ওইগনি:

* হিংবা, নিংতম্বা, মান্নবা অমসুং ইকায়খুম্নবগী হক

* মীনাই ওইবা অমসুং অঙাংশিং শিন্মী ওইনা শীজিন্নবা অমসুং অঙাংশিংগী হকশিংগী অকক্নবা ৱাফমশিং কোনশিনবা

* অহলশিংগী হকশিং অমসুং মায়োক্নরিবা অৱাবশিং

* হকচাংগী ফিবমদা মীমান্নদ্রবশিংগী হকশিং

* খুৎনা অমোৎ-অকায় শেংবা, হকশেলগী হক

* ফংফম থোকপা নিংতম্বগী ৱাফমশিং

* হুমেন ত্রাফিক্কিং

* ইমুং-মনুংগী মীওৎ-মীনৈ

* পুলিসগী মীওৎ-মীনৈনা মরম ওইদুনা মীওইবগী হকশিং খোঙ্গাউনবা

* কষ্টদিদা মীওৎ-মীনৈ চৎথবা

* খুন্নাই অমসুং শেন-থুমগী মান্নদবশিং

* নোমেদিক অমসুং দিনোতিফাইদ ত্রাইবশিংগী হকশিং

* ফেলগী অওনবশিং

* লাইরিক তম্নবগী হক

* পৃথিবী অসিদা থৱায় পানবশিংদা মহৌশাগী অকোয়বগী ফিবমনা শোকহনবা য়াওনা অফবা মহৌশাগী অকোয়বগী ফিবম অমা ফংনবগী হক

* থবক ফংনবগী হক

* আইনগী মমাঙদা চপ মান্নবগী হক

* চীঞ্জাক অমসুং মচি ওইবা ফংনবা হক

* এল.জি.বি.তি.ক্ব্যু.আইগী হকশিং

* মীওইবনা থোকহনবা নত্ত্রগা মহৌশাগী ওইবা অমাং-অতাশিংনা মরম ওইদুনা লৈফম লৈতদবদগী মীওইবগী হকশিং খোঙ্গাউনবা

* ভারতকী খেন্নবশিংদা মীওইবগী হকশিং অমসুং গুনশিং হরাওবা ফোঙদোকপা

* পুন্সি অমসুং হিংবগী থাকশিং ফগৎহনবা চাউখৎ-থৌরাংগী থবকশিং

ইন্ত্রিগী শেন অমতা লৌদে নত্ত্রগা লনাই মীওই অমনা চাংদম্নবা অসিদা শরুক য়ানবা ইন্ত্রি মশিংদা অকক্নবা লৈতে। অদুবু শরুক য়াগদৌরিবশিংনা ফিল্ম অমমম তোখায়বা মপুংফানা মেনশিল্লবা ইন্ত্রি ফোর্ম অমদা থাজিল্লক্কদবনি। ইন্ত্রি ফোর্মগা লোয়ননা তার্মশিং অমসুং কন্দিসনশিং এন.ঐচ.আর.সিগী ৱেবসাইত www.nhrc.nic.in দা ফংগনি।

ফিল্ম, মপুংফানা মেনশিল্লবা ইন্ত্রি ফোর্ম অমসুং অতোপ্পা দরকার ওইবা চে-চাংশিং গুগল দ্রাইব শীজিন্নদুনা nhrcshortfilm[at]gmail[dot]com দা থারক্কদবনি। হংনিংবা খুদিংমক ই-মেল এদ্রেস অসিদা থারকপা য়াই। 

***