بھارت کے داخلی سلامتی کے نظام کو مضبوط بنانے کی جانب ایک حالیہ پیش رفت کے طور پر راشٹریہ رکشا یونیورسٹی (آر آر یو) اور سشسترا سیما بل (ایس ایس بی) اکیڈمی نے اس کے تربیتی اداروں کے ساتھ آج خصوصی سلامتی سے متعلق کورسز کی وابستگی اور منظوری کے لیے باضابطہ طور پر ایک مفاہمت نامہ (ایم او یو) پر دستخط کیے۔ اس معاہدے کی باقاعدہ دستخطی تقریب دہلی میں ایس ایس بی کے ہیڈکوارٹر میں منعقد ہوئی، جس میں اعلیٰ سطح کے عہدیداران نے شرکت کی، جن میں پروفیسر (ڈاکٹر) کلپیش ایچ۔ وندرا، پرو وائس چانسلر آر آر یو، جناب اویناش کھاریل، ڈین برائے وابستگی و منظوری، آر آر یو اور جناب سنجے سنگھل، ڈائریکٹر جنرل (ڈی جی) ایس ایس بی، اپنے دیگر افسران کے ساتھ شامل تھے۔

یہ اسٹریٹجک شراکت داری ایک باقاعدہ فریم ورک قائم کرتی ہے جس کے تحت راشٹریہ رکشا یونیورسٹی (آر آر یو)، جو کہ ایک قومی اہمیت کا ادارہ ہے، سشسترا سیما بل (ایس ایس بی) اکیڈمی میں منعقد ہونے والے مختلف تربیتی پروگراموں کو تعلیمی منظوری فراہم کرے گی۔ معاہدے کی شرائط کے تحت دونوں اداروں نے وسائل کے جامع تبادلے پر اتفاق کیا ہے، جس میں اساتذہ کی مہارت، تدریسی آلات اور خصوصی تربیتی سہولیات شامل ہیں۔ اس تعاون کا مقصد قومی سلامتی سے متعلق تعلیمی تحقیق اور سرحدی محافظ افواج کی عملی، زمینی ضروریات کے درمیان خلا کو پُر کرنا ہے۔

تقریب کے دوران، پروفیسر (ڈاکٹر) کلپیش ایچ۔ وندرا نے اس بات پر روشنی ڈالی کہ یہ تعاون پہلے ہی نتائج دے رہا ہے اور بتایا کہ آر آر یو نے حال ہی میں ایس ایس بی کے افسران کے لیے ’’اسمارٹ بارڈر مینجمنٹ‘‘ کے موضوع پر ایک خصوصی کورس منعقد کیا ہے۔ پیشہ ورانہ ترقی کے اعلیٰ ترین معیار کو یقینی بنانے کے لیے، آر آر یو ایس ایس بی کے اہلکاروں کو اپنی جدید ترین تجربہ گاہوں اور فیلڈ پر مبنی ورکشاپس کے ذریعے عملی تربیت فراہم کرے گی۔ اس اقدام سے توقع ہے کہ ایس ایس بی کے تربیتی نصاب کو جدید بنایا جائے گا، جس میں سرحدی نگرانی اور داخلی سلامتی کے چیلنجز کے لیے ٹیکنالوجی پر مبنی حل پر توجہ دی جائے گی۔

سشسترا سیما بل کے ڈائریکٹر جنرل جناب سنجے سنگھل نے آر آر یو کی صلاحیتوں پر بھرپور اعتماد کا اظہار کرتے ہوئے کہا کہ یہ ادارہ فورس کو درکار تعلیمی ڈھانچہ فراہم کرنے کی مکمل اہلیت رکھتا ہے۔ انہوں نے اس بات پر زور دیا کہ یہ شراکت داری افسران کی ’’اپ اسکلنگ‘‘ اور ’’ری اسکلنگ‘‘ پر خاص توجہ دے گی تاکہ وہ سرحدی نظم و نسق اور داخلی سلامتی کے بدلتے ہوئے تقاضوں سے ہم آہنگ ہو سکیں۔ دونوں اداروں کی صلاحیتوں سے فائدہ اٹھاتے ہوئے، اس اقدام کا مقصد سشسترا سیما بل کے اندر مسلسل پیشہ ورانہ ترقی کے لیے ایک مضبوط نظام قائم کرنا ہے۔

وزیرِ اعظم جناب نریندر مودی کی قیادت اور مرکزی وزیرِ داخلہ جناب امیت شاہ کی رہنمائی میں قائم کی گئی اس یونیورسٹی کا بنیادی مقصد قومی سلامتی اور پولیسنگ کے لیے ایک ممتاز تعلیمی اور تحقیقی نظام کے طور پر کام کرنا ہے، جو ماہرین کے عالمی نیٹ ورک سے فائدہ اٹھاتے ہوئے ایک منظم فریم ورک کے تحت خصوصی پیشہ ورانہ تعلیم فراہم کرے۔

اس مفاہمتی یادداشت کے تحت، راشٹریہ رکشا یونیورسٹی (آر آر یو) سشسترا سیما بل (ایس ایس بی) کے زیرِ اہتمام موجودہ اور آئندہ کورسز کو منظوری دے گی، جس کے نتیجے میں آر آر یو کی مشترکہ منظوری و سرٹیفکیشن کے رہنما اصولوں کے مطابق سرٹیفکیٹ، ڈپلومہ، پی جی ڈپلومہ، ایڈوانسڈ ڈپلومہ، بیچلر ڈگری اور ماسٹرز ڈگری دی جا سکتی ہے۔

اس شراکت داری میں نفاذ کے لیے ایک منظم فریم ورک شامل ہے:

کورس کا جائزہ: آر آر یو، ایس ایس بی کے تربیتی اداروں میں موجودہ نصاب کا جائزہ لے گی تاکہ تربیتی اوقات اور مواد کو تعلیمی کریڈٹس کے مساوی قرار دیا جا سکے۔

نصاب میں بہتری: دونوں ادارے مل کر اضافی کورس مواد یا نصاب تیار کریں گے تاکہ مخصوص ڈگری یا ڈپلومہ پروگرامز کے لیے درکار ’’اضافی کریڈٹس‘‘ کی شرائط پوری کی جا سکیں۔

معیاری جانچ کا نظام: ہر منظور شدہ کورس کے لیے ایک مضبوط جانچ اور گریڈنگ کا نظام قائم کیا جائے گا تاکہ آر آر یو کے قواعد کے مطابق اعلیٰ معیار برقرار رکھا جا سکے۔

تدریسی معیار کی اعلیٰ ترین دیانت داری کو برقرار رکھنے کے لیے، اس شراکت داری کے تحت موجودہ اور اضافی کورس مواد کی باقاعدہ جانچ اور توثیق لازمی قرار دی گئی ہے۔ اس سے یہ یقینی بنایا جائے گا کہ نصاب متحرک رہے اور بدلتے ہوئے سکیورٹی خطرات کے مطابق خود کو ڈھالتا رہے۔ مزید برآں اس معاہدے کے تحت سشسترا سیما بل (ایس ایس بی) اکیڈمی میں راشٹریہ رکشا یونیورسٹی (آر آر یو) کا ایک مخصوص ڈیسک قائم کیا جائے گا۔ یہ انتظامی مرکز ڈیٹا کے نظم و نسق، روزمرہ رابطوں کو مؤثر بنانے اور منظوری کے عمل کے کامیاب نفاذ کی نگرانی کرے گا، تاکہ یونیورسٹی اور نیم فوجی فورس کے درمیان ہموار ہم آہنگی برقرار رہے۔

یہ تعاون وزارتِ داخلہ کے ’’مربوط تربیت‘‘ کے ویژن کی جانب ایک اہم قدم ہے، جو نظریاتی تحقیق اور عملی سرحدی نظم و نسق کے درمیان خلا کو پُر کرتا ہے۔ ایس ایس بی کے اہلکاروں کی سخت تربیت کی باضابطہ تصدیق کے ذریعے، یہ مفاہمتی یادداشت انہیں کیریئر میں ترقی کے بہتر مواقع اور قومی تعلیمی پالیسی کے مطابق تعلیمی شناخت فراہم کرتی ہے۔

ایک ممتاز داخلی سلامتی کی یونیورسٹی اور سرحدوں کی حفاظت کرنے والی ایک صفِ اول کی فورس کے درمیان یہ ہم آہنگی بھارت کے سکیورٹی نظام کو مزید پیشہ ورانہ بنانے کی جانب ایک اہم اسٹریٹجک قدم ہے۔ قومی کریڈٹ فریم ورک (این سی آر ایف) کے ساتھ تربیتی عمل کو ہم آہنگ کرتے ہوئے، یہ معاہدہ اس بات کو یقینی بناتا ہے کہ ایس ایس بی کے افسران اور اہلکاروں کی محنت اور لگن کو ملک بھر میں تسلیم شدہ تعلیمی کامیابیوں کی صورت میں سراہا جائے۔

******

ش ح۔ ش ا ر۔ ول

Uno-4595