زمین سے 35,000 فٹ کی بلندی پر، وقت کی رفتار تھمتی ہوئی معلوم ہوتی ہے—لیکن جسم کی توانائی بھی اسی طرح سست پڑ جاتی ہے۔ ایک ہی سیٹ پر گھنٹوں تک محدود رہنے سے بڑے سے بڑا تجربہ کار مسافر بھی جسمانی اکڑن، تھکن اور ذہنی بوجھ محسوس کرنے لگتا ہے۔ سفر کے اس جدید چیلنج کو حل کرنے کے لیے ایک سادہ مگر طاقتور حل پیش کیا گیا ہے اور وہ ہے- فضائی سفر کے لیے یوگ—جو کہ دورانِ پرواز صحت و تندرستی کے لیے خاص طور پر ڈیزائن کیا گیا ایک 5 منٹ کا طریقۂ کار ہے۔

مرکزی وزیر مملکت (آزادانہ چارج) برائے آیوش، جناب پرتاپ راؤ جادھو کی جانب سے یوگا مہوتسو 2026 کے دوران شروع کیا گیا یہ جدید اقدام، یوگ کے لافانی علم کو جہاز کے کیبن تک لے آیا ہے، جو آپ کی سیٹ کو تازگی حاصل کرنے کی جگہ میں بدل دیتا ہے۔ مرار جی دیسائی نیشنل انسٹی ٹیوٹ آف یوگا کا تیار کردہ یہ طریقۂ کار آج کے دور کے کثیر السفر مسافروں کی ضرورت کے مطابق ہے—جو فضا میں رہتے ہوئے خود کو ہشاش بشاش رکھنے کا ایک تیز، محفوظ اور مؤثر طریقہ فراہم کرتا ہے۔

اس اقدام کے پیچھے چھپے وژن پر روشنی ڈالتے ہوئے، مرکزی وزیر مملکت (آزادانہ چارج) برائے آیوش، جناب پرتاپ راؤ جادھو نے بتایا: ’’یوگ احتیاطی صحت اور فلاح و بہبود کے لیے ایک طاقتور ذریعہ ہے۔ پرواز کے دوران یوگ کا یہ پروٹوکول ہر ماحول میں—یہاں تک کہ 35,000 فٹ کی بلندی پر بھی—یوگ تک رسائی فراہم کرنے کے ہمارے عزم کی عکاسی کرتا ہے، تاکہ لوگ سفر کے دوران متحرک، پرسکون اور متوازن رہ سکیں۔“

دورانِ پرواز یوگ کیوں ضروری ہے؟

ہوائی سفر، خاص طور پر طویل مسافت کے سفر میں اکثر جسم طویل عرصے تک ساکن رہتا ہے۔ اس کے نتیجے میں پٹھوں میں اکڑن، خون کی ناقص گردش، خستگی، سفر کی تھکن اور بعض صورتوں میں گہری رگوں کے جمنے (ڈی وی ٹی) جیسے سنگین مسائل پیدا ہو سکتے ہیں۔ سفر سے متعلق تناؤ اور کیبن کے دباؤ میں تبدیلیوں کے پیشِ نظر، صحت کے لیے ایک سادہ مداخلت کی ضرورت واضح ہو جاتی ہے۔

پانچ منٹ کا یہ یوگا پروٹوکول ہلکی پھلکی حرکات، سانس لینے کے شعوری مشقوں اور مختصر مراقبے کے ذریعے ان چیلنجوں کا حل پیش کرتا ہے، جس سے جسم اور دماغ دونوں کا توازن بحال کرنے میں مدد ملتی ہے۔

سائنسی اور احتیاطی پہلو پر زور دیتے ہوئے، وزارتِ آیوش کے سکریٹری ویدیہ راجیش کوٹیچا نے اس بات کو اجاگر کیا، ”روزمرہ کے معمولات میں یوگ کو شامل کرنا—یہاں تک کہ پرواز جیسے محدود ماحول میں بھی—خون کی گردش کو نمایاں طور پر بہتر بنا سکتا ہے، تناؤ کو کم کر سکتا ہے اور مجموعی صحت میں معاون ثابت ہو سکتا ہے۔ اس طرح کی عملی مداخلتیں احتیاطی صحت کی دیکھ بھال کو سادہ اور قابلِ رسائی بناتی ہیں۔“

اپنی نشست پر تندرستی کا معمول

سہولت اور رسائی کو مدنظر رکھتے ہوئے تیار کردہ اس پروٹوکول کے لیے کسی خاص سامان کی ضرورت نہیں ہے اور اسے بیٹھے بیٹھے انجام دیا جا سکتا ہے۔ یہ جسمانی حرکت، سانس کی آگاہی اور ذہنی سکون کا ایک بہترین مجموعہ ہے:

ذہنی ارتکاز (- 15 سیکنڈ): خود کو پرسکون کرنے کے لیے خاموش آگاہی یا ارادے کے ساتھ آغاز کریں۔

جوڑوں کی ہلکی حرکت (45 سیکنڈ): کندھوں کی گردش، ٹخنوں کی کھچاؤ والی مشقیں اور خون کی گردش بہتر بنانے اور اکڑن کم کرنے کے لیے سادہ حرکات۔

بیٹھ کر کیے جانے والے یوگا آسن: تبدیل شدہ آسن جیسے کہ تاڈ آسن (تاڑ کے درخت کی پوز)، بیٹھ کر کی جانے والی کیٹ-کاؤ  مشق، ریڑھ کی ہڈی کو موڑنا اور تناؤ دور کرنے اور جسمانی ساخت کو بہتر بنانے کے لیے ٹانگوں کی ہلکی حرکات۔

پرنایام (سانس کی مشقیں): گہرے سانس لینا، انولوم ولوم، بھرامری اور شیتلی تاکہ اعصابی نظام کو پرسکون کیا جا سکے اور آکسیجن کے بہاؤ کو بڑھایا جا سکے۔

مراقبہ (30 سیکنڈ): ذہن کو دوبارہ ترتیب دینے اور سکون کو فروغ دینے کے لیے ایک مختصر وقفہ۔

رویے میں تبدیلی کے وسیع تر وژن کی تائید کرتے ہوئے، وزارتِ آیوش کی جوائنٹ سکریٹری محترمہ مونالیسا دش نے زور  دے کر کہا، ”یہ اقدام ظاہر کرتا ہے کہ کس طرح یوگ کو روزمرہ کے حالات میں آسانی سے شامل کیا جا سکتا ہے۔ ایسی سادہ مشقوں کو فروغ دے کر، ہمارا مقصد تندرستی کی ایک ایسی ثقافت بنانا ہے جو لوگوں کے ساتھ رہے، چاہے وہ جہاں بھی جائیں۔“

مختصر مشق، بڑا اثر

صرف پانچ منٹ میں یہ معمول درج ذیل فوائد فراہم کر سکتا ہے:

• خون کی گردش میں بہتری
• پٹھوں کی اکڑن اور تھکن میں کمی
• تناؤ اور بے چینی سے نجات
• بہتر ہاضمہ اور ہائیڈریشن کے بارے میں آگاہی میں مدد
• سفر کی تھکن کو سنبھالنے میں مدد

سب سے اہم بات یہ ہے کہ یہ مسافروں کو اپنی صحت و تندرستی کا خود خیال رکھنے کے قابل بناتا ہے—حتیٰ کہ پرواز کے دوران بھی۔

تندرستی، آپ جہاں بھی ہوں

یوگ کی خوبصورتی اس کی تطبیق  میں پنہاں ہے۔ چاہے آپ گھر پر ہوں، کام پر ہوں یا بادلوں سے بھی اونچی اڑان بھر رہے ہوں، یہ ہر جگہ آپ کے ساتھ ہے۔ پرواز کے دوران یوگ کا یہ پروٹوکول اس بات کی یاد دہانی ہے کہ تندرستی کے لیے کسی اضافی وقت یا جگہ کی ضرورت نہیں—صرف ارادے کی ضرورت ہے۔

جب آپ اپنے اگلے سفر کے لیے سیٹ بیلٹ باندھیں، تو اپنے لیے چند لمحے نکالنے پر غور کریں۔ کیونکہ بعض اوقات، دور تک کا سفر کرنے کا بہترین طریقہ یہ ہے کہ... تھوڑی دیر ٹھہریں، سانس لیں اور اپنے وجود سے دوبارہ جڑ جائیں۔

آپ کا سفر بخیر ہو۔ سکون سے سانس لیں۔ متوازن رہیں!

*****

(ش ح۔ک ح ۔ ن ع)

UR-4521