ಭಾರತದ ಲಾಜಿಸ್ಟಿಕ್ಸ್ ಪರಿಸರ ವ್ಯವಸ್ಥೆಯನ್ನು ಪರಿವರ್ತಿಸುವ ಸರ್ಕಾರದ ದೃಷ್ಟಿಕೋನವನ್ನು ಬಲಪಡಿಸಲು, ಕೇಂದ್ರ ಸಂಪರ್ಕ ಮತ್ತು ಈಶಾನ್ಯ ಪ್ರದೇಶಾಭಿವೃದ್ಧಿ ಸಚಿವರಾದ ಶ್ರೀ ಜ್ಯೋತಿರಾದಿತ್ಯ ಎಂ. ಸಿಂದಿಯಾ ಅವರು 17 ಮಾರ್ಚ್ 2026 ರಂದು ನವದೆಹಲಿಯಲ್ಲಿ 24 ಸ್ಪೀಡ್ ಪೋಸ್ಟ್, 48 ಸ್ಪೀಡ್ ಪೋಸ್ಟ್ ಮತ್ತು 24 ಸ್ಪೀಡ್ ಪೋಸ್ಟ್ ಪಾರ್ಸೆಲ್ ಎಂಬ ಮೂರು ಹೊಸ ಪ್ರೀಮಿಯಂ ವಿತರಣಾ ಸೇವೆಗಳಿಗೆ ಚಾಲನೆ ನೀಡಿದರು. ಸಂಪರ್ಕ ಮತ್ತು ಗ್ರಾಮೀಣಾಭಿವೃದ್ಧಿ ರಾಜ್ಯ ಖಾತೆ ಸಚಿವರಾದ ಡಾ. ಚಂದ್ರಶೇಖರ್ ಪೆಮ್ಮಸಾನಿ ಮತ್ತು ಅಂಚೆ ಇಲಾಖೆಯ ಹಿರಿಯ ಅಧಿಕಾರಿಗಳ ಸಮ್ಮುಖದಲ್ಲಿ ಈ ಚಾಲನೆ ನಡೆಯಿತು. ಇದು ವೇಗವಾಗಿ ವಿಸ್ತರಿಸುತ್ತಿರುವ ಎಕ್ಸ್‌ ಪ್ರೆಸ್ ಲಾಜಿಸ್ಟಿಕ್ಸ್ ಮತ್ತು ನಿಗದಿತ ಸಮಯದ ವಿತರಣಾ ವಿಭಾಗದಲ್ಲಿ ಸಾಮರ್ಥ್ಯಗಳನ್ನು ಬಲಪಡಿಸುವತ್ತ ಗಮನಾರ್ಹ ಹೆಜ್ಜೆಯಾಗಿದೆ.

ಈ ಸಂದರ್ಭದಲ್ಲಿ ಮಾತನಾಡಿದ ಕೇಂದ್ರ ಸಂಪರ್ಕ ಸಚಿವರಾದ ಶ್ರೀ ಜ್ಯೋತಿರಾದಿತ್ಯ ಎಂ. ಸಿಂದಿಯಾ ಅವರು, "ಇಂದು ನಮ್ಮ ಇಲಾಖೆಗೆ ಅತ್ಯಂತ ಸ್ಮರಣೀಯ ದಿನವಾಗಿದೆ. ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ದೂರದರ್ಶಿ ನಾಯಕತ್ವದಲ್ಲಿ, ಇಂಡಿಯಾ ಪೋಸ್ಟ್ ಈ ದೇಶದ ಉದ್ದಗಲಕ್ಕೂ ಇರುವ ಪ್ರತಿಯೊಬ್ಬ ನಾಗರಿಕರಿಗೆ ಮತ್ತು ಪ್ರತಿಯೊಬ್ಬ ಅಂತರರಾಷ್ಟ್ರೀಯ ಗ್ರಾಹಕರಿಗೆ ಬದ್ಧವಾಗಿದೆ ಎಂದು ನಾವು ಇಂದು ಪ್ರಪಂಚದಾದ್ಯಂತದ ನಮ್ಮ ಲಕ್ಷಾಂತರ ಗ್ರಾಹಕರಿಗೆ ಘೋಷಿಸುತ್ತಿದ್ದೇವೆ" ಎಂದು ಹೇಳಿದರು.

ಕಳೆದ ಮೂರು ತಿಂಗಳ ಅವಧಿಯಲ್ಲಿ ಈ ಸೇವೆಗಳನ್ನು ವ್ಯಾಪಕವಾಗಿ ಪ್ರಾಯೋಗಿಕವಾಗಿ ನಡೆಸಿ, ವ್ಯವಸ್ಥಿತ ಪರೀಕ್ಷಾರ್ಥ ಚಾಲನೆಗಳ ಮೂಲಕ ಸುಧಾರಣೆ ತಂದ ಅಂಚೆ ಸಿಬ್ಬಂದಿಯ ಅಚಲ ಸಮರ್ಪಣೆ ಮತ್ತು ಅವಿರತ ಪ್ರಯತ್ನಗಳನ್ನು ಅವರು ಶ್ಲಾಘಿಸಿದರು. "ಇಂದು ಅಂಚೆ ಇಲಾಖೆಗೆ ನವೀಕರಣದ ಕ್ಷಣವಾಗಿದೆ. ಇಂದು ನಮ್ಮ ಗ್ರಾಹಕರಿಗೆ ಭರವಸೆಯ ಕ್ಷಣವಾಗಿದೆ. ಹಳೆಯ ಸಂಸ್ಥೆಯೊಂದು ತನ್ನನ್ನು ತಾನು ಮರುಶೋಧಿಸಿಕೊಂಡಿದೆ ಮತ್ತು ಸ್ಪಷ್ಟತೆ, ಆತ್ಮವಿಶ್ವಾಸ ಹಾಗೂ ಉದ್ದೇಶದೊಂದಿಗೆ ಅಮೃತ ಕಾಲದಿಂದ ಶತಾಬ್ದಿ ಕಾಲದ ಈ ಪ್ರಯಾಣವನ್ನು ಪ್ರವೇಶಿಸುತ್ತಿದೆ ಎಂಬುದನ್ನು ದೇಶಕ್ಕೆ ಎತ್ತಿ ತೋರಿಸುವ ಕ್ಷಣ ಇದಾಗಿದೆ" ಎಂದು ಅವರು ಹೇಳಿದರು.

ಸಂಪರ್ಕ ರಾಜ್ಯ ಖಾತೆ ಸಚಿವರಾದ ಡಾ. ಚಂದ್ರಶೇಖರ್ ಪೆಮ್ಮಸಾನಿ ಅವರು ಮಾತನಾಡಿ, "170 ವರ್ಷಗಳಿಗೂ ಹೆಚ್ಚು ಕಾಲ ಅಂಚೆ ಇಲಾಖೆಯು ಈ ರಾಷ್ಟ್ರದ ಸಂದೇಶಗಳನ್ನು ಸಾಗಿಸಿದೆ, ಆದರೆ ಮುಂದಿನ ದಶಕಗಳಲ್ಲಿ ಇದು ಭಾರತದ ಆರ್ಥಿಕ ಏರಿಕೆಯ ವೇಗವನ್ನು ಹಳ್ಳಿಗಳಿಂದ ಹಿಡಿದು ಅತಿದೊಡ್ಡ ಜಾಗತಿಕ ಮಾರುಕಟ್ಟೆಗಳವರೆಗೆ ಕೊಂಡೊಯ್ಯಲಿದೆ. ಇದು ಅವಕಾಶಗಳು ಎಂದಿಗಿಂತಲೂ ವೇಗವಾಗಿ, ದೂರಕ್ಕೆ ಮತ್ತು ಹೆಚ್ಚು ವಿಶ್ವಾಸಾರ್ಹವಾಗಿ ತಲುಪುವುದನ್ನು ಖಚಿತಪಡಿಸುತ್ತದೆ" ಎಂದು ಹೇಳಿದರು.

(ಎಡದಿಂದ ಬಲಕ್ಕೆ) ಜಿತೇಂದ್ರ ಗುಪ್ತಾ, ಮಹಾನಿರ್ದೇಶಕರು; ಡಾ. ಚಂದ್ರಶೇಖರ್ ಪೆಮ್ಮಸಾನಿ, ಸಂಪರ್ಕ ರಾಜ್ಯ ಖಾತೆ ಸಚಿವರು; ಶ್ರೀ ಜ್ಯೋತಿರಾದಿತ್ಯ ಎಂ. ಸಿಂದಿಯಾ, ಮಾನ್ಯ ಸಂಪರ್ಕ ಸಚಿವರು; ವಂದಿತಾ ಕೌಲ್, ಕಾರ್ಯದರ್ಶಿ (ಅಂಚೆ) ಮತ್ತು ಹರ್ಪ್ರೀತ್ ಸಿಂಗ್, ಸದಸ್ಯ (ಕಾರ್ಯಾಚರಣೆ), ಇವರು 24/48 ಸ್ಪೀಡ್ ಪೋಸ್ಟ್ ಮತ್ತು 24 ಸ್ಪೀಡ್ ಪೋಸ್ಟ್ ಪಾರ್ಸೆಲ್ ಸೇವೆಗೆ ಚಾಲನೆ ನೀಡಿದರು.

ಅಂಚೆ ಇಲಾಖೆಯು ಹಲವಾರು ಕಾರ್ಯಾಚರಣಾ ಪರಿಸರಗಳಲ್ಲಿ ಕಟ್ಟುನಿಟ್ಟಾದ ಪ್ರಾಯೋಗಿಕ ಪರೀಕ್ಷೆಗಳ ನಂತರ ಈ ಮೂರು ಗ್ರಾಹಕ-ಕೇಂದ್ರಿತ ಲಾಜಿಸ್ಟಿಕ್ಸ್ ಸೇವೆಗಳನ್ನು ಪರಿಚಯಿಸಿದೆ. ಅಲ್ಲಿ ಎಲ್ಲಾ ಪರೀಕ್ಷಾರ್ಥ ಪ್ರಯೋಗಗಳು ಆಶಾದಾಯಕ ಸಾಧನೆಯ ಮಾನದಂಡಗಳೊಂದಿಗೆ ಯಶಸ್ವಿಯಾಗಿ ಪೂರ್ಣಗೊಂಡಿವೆ. ಈ ಸಕಾರಾತ್ಮಕ ಫಲಿತಾಂಶಗಳ ಆಧಾರದ ಮೇಲೆ, ಈ ರಾಷ್ಟ್ರವ್ಯಾಪಿ ಚಾಲನೆಯು ನಾಗರಿಕರು, ವ್ಯವಹಾರಗಳು ಮತ್ತು ದೇಶದ ಬೆಳೆಯುತ್ತಿರುವ ಆರ್ಥಿಕ ಆಕಾಂಕ್ಷೆಗಳನ್ನು ಬೆಂಬಲಿಸುವ ವೇಗದ, ನಿರೀಕ್ಷಿತ ಮತ್ತು ತಂತ್ರಜ್ಞಾನ ಆಧಾರಿತ ವಿತರಣಾ ಪರಿಹಾರಗಳಿಗೆ ಇಂಡಿಯಾ ಪೋಸ್ಟ್‌ ನ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಈ ಸಂದರ್ಭದಲ್ಲಿ ಹೈದರಾಬಾದ್, ದೆಹಲಿ, ಮುಂಬೈ ಮತ್ತು ಬೆಂಗಳೂರಿನಲ್ಲಿರುವ ಅಂಚೆ ಕಚೇರಿಗಳಲ್ಲಿ ಶಿಪ್‌ಮೆಂಟ್‌ ಗಳ ನೇರ ಬುಕಿಂಗ್ ನಡೆಸಲಾಯಿತು. ವ್ಯವಹಾರಗಳು, ಹಣಕಾಸು ಸಂಸ್ಥೆಗಳು, ಸರ್ಕಾರಿ ಸಂಸ್ಥೆಗಳು ಮತ್ತು ವೈಯಕ್ತಿಕ ಗ್ರಾಹಕರಿಗಾಗಿ ವೇಗವಾದ, ಸುರಕ್ಷಿತ ಮತ್ತು ಖಾತರಿಯ ವಿತರಣಾ ಪರಿಹಾರಗಳಿಗಾಗಿ ಹೆಚ್ಚುತ್ತಿರುವ ಬೇಡಿಕೆಯನ್ನು ಪೂರೈಸಲು ಉದ್ದೇಶಿಸಲಾದ ಹೊಸ ಸೇವೆಗಳನ್ನು ಉದ್ಘಾಟಿಸಲಾಯಿತು.

24 ಸ್ಪೀಡ್ ಪೋಸ್ಟ್ ಮತ್ತು 24 ಸ್ಪೀಡ್ ಪೋಸ್ಟ್ ಪಾರ್ಸೆಲ್ ಸೇವೆಯು ಆರು ಪ್ರಮುಖ ಮೆಟ್ರೋ ನಗರಗಳಾದ ನವದೆಹಲಿ, ಮುಂಬೈ, ಚೆನ್ನೈ, ಕೋಲ್ಕತ್ತಾ, ಬೆಂಗಳೂರು ಮತ್ತು ಹೈದರಾಬಾದ್ ನಡುವೆ ಖಾತರಿಯ ಮರುದಿನದ ವಿತರಣೆಯನ್ನು (D+1) ನೀಡುತ್ತದೆ. ಈ ಸೇವೆಯು ವಿಳಂಬವಾದ ಸಂದರ್ಭದಲ್ಲಿ ಪರಿಹಾರದೊಂದಿಗೆ ಖಚಿತ ವಿತರಣಾ ಸಮಯವನ್ನು ಒದಗಿಸುತ್ತದೆ, ಜೊತೆಗೆ ನೈಜ-ಸಮಯದ ಟ್ರ್ಯಾಕಿಂಗ್ ಮತ್ತು ಒಟಿಪಿ-ಆಧಾರಿತ ವಿತರಣಾ ದೃಢೀಕರಣವನ್ನು ಹೊಂದಿರುತ್ತದೆ, ಇದು ಹೆಚ್ಚಿನ ವಿಶ್ವಾಸಾರ್ಹತೆ ಮತ್ತು ಪಾರದರ್ಶಕತೆಯನ್ನು ಖಚಿತಪಡಿಸುತ್ತದೆ. ಭಾನುವಾರ ಮತ್ತು ರಜಾದಿನಗಳಲ್ಲಿಯೂ (ರಾಷ್ಟ್ರೀಯ ರಜಾದಿನಗಳನ್ನು ಹೊರತುಪಡಿಸಿ) ವಿತರಣೆಗಳನ್ನು ಮಾಡಲಾಗುತ್ತದೆ. ಈ ಸೇವೆಯನ್ನು ಆರಂಭದಲ್ಲಿ ಈ ಆರು ಮೆಟ್ರೋ ನಗರಗಳಲ್ಲಿ ಪ್ರಾರಂಭಿಸಲಾಗಿದ್ದು, ಹಂತ ಹಂತವಾಗಿ ಇತರ 1 ಮತ್ತು 2ನೇ ಶ್ರೇಣಿ ನಗರಗಳಿಗೆ ವಿಸ್ತರಿಸಲಾಗುವುದು. ಈ ಸೇವೆಯು ಪ್ರಮುಖ ವಾಣಿಜ್ಯ ಕೇಂದ್ರಗಳ ನಡುವೆ ಪಾರ್ಸೆಲ್‌ ಗಳ ವೇಗದ ಚಲನೆಯನ್ನು ಸಕ್ರಿಯಗೊಳಿಸುವ ಮೂಲಕ ಇ-ಕಾಮರ್ಸ್ ಕಂಪನಿಗಳು, ಎಂ ಎಸ್‌ ಎಂ ಇ ಗಳು, ನವೋದ್ಯಮಗಳು ಮತ್ತು ಇತರ ವ್ಯವಹಾರ ಗ್ರಾಹಕರಿಗೆ ಗಮನಾರ್ಹವಾಗಿ ಪ್ರಯೋಜನವನ್ನು ನೀಡುವ ನಿರೀಕ್ಷೆಯಿದೆ.

48 ಸ್ಪೀಡ್ ಪೋಸ್ಟ್ ಸೇವೆಯು ಮೇಲಿನ ಮೆಟ್ರೋ ನಗರಗಳ ನಡುವೆ ಎರಡು ದಿನಗಳೊಳಗೆ ಖಚಿತ ವಿತರಣೆಯನ್ನು (D+2) ಒದಗಿಸುತ್ತದೆ. ಇದು ಗ್ರಾಹಕರಿಗೆ ಎಂಡ್-ಟು-ಎಂಡ್ ಟ್ರ್ಯಾಕಿಂಗ್, ಎಸ್‌ ಎಂ ಎಸ್ ಸಂದೇಶಗಳು ಮತ್ತು ಸುರಕ್ಷಿತ ವಿತರಣಾ ದೃಢೀಕರಣದೊಂದಿಗೆ ಬೆಂಬಲಿತವಾದ ವಿಶ್ವಾಸಾರ್ಹ ಮತ್ತು ಸಮಯ-ನಿಗದಿತ ದಾಖಲೆ ವಿತರಣಾ ಪರಿಹಾರವನ್ನು ನೀಡುತ್ತದೆ.

ಈ ಪ್ರೀಮಿಯಂ ಸೇವೆಗಳ ಪ್ರಾರಂಭವು ಅಂಚೆ ಇಲಾಖೆಯ ನಾವೀನ್ಯತೆ, ದಕ್ಷತೆ ಮತ್ತು ಗ್ರಾಹಕ-ಕೇಂದ್ರಿತ ಸೇವೆಗಳ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ. ಈ ಕೊಡುಗೆಗಳೊಂದಿಗೆ, ಅಂಚೆ ಇಲಾಖೆಯು ಪ್ರೀಮಿಯಂ ಎಕ್ಸ್‌ ಪ್ರೆಸ್ ವಿತರಣಾ ವಿಭಾಗದಲ್ಲಿ ತನ್ನ ಸ್ಥಾನವನ್ನು ಬಲಪಡಿಸುತ್ತದೆ ಮತ್ತು ಪ್ರಮುಖ ಮೆಟ್ರೋಪಾಲಿಟನ್ ನಗರಗಳಾದ್ಯಂತ ತುರ್ತು ವಿತರಣೆಗಳಿಗಾಗಿ ವಿಶ್ವಾಸಾರ್ಹ, ಸುರಕ್ಷಿತ ಮತ್ತು ಸಮಯಬದ್ಧ ಪರಿಹಾರಗಳನ್ನು ಒದಗಿಸುತ್ತದೆ. ಇದು ದೇಶಾದ್ಯಂತ ವ್ಯವಹಾರಗಳು ಮತ್ತು ನಾಗರಿಕರನ್ನು ಬೆಂಬಲಿಸುವ ವಿಶ್ವಾಸಾರ್ಹ ರಾಷ್ಟ್ರೀಯ ಲಾಜಿಸ್ಟಿಕ್ಸ್ ಪಾಲುದಾರನಾಗಿ ಅಂಚೆ ಇಲಾಖೆಯ ಪಾತ್ರವನ್ನು ಮತ್ತಷ್ಟು ಬಲಪಡಿಸುತ್ತದೆ.

ಹೆಚ್ಚಿನ ವಿವರಗಳಿಗಾಗಿ ಈ ಕೆಳಗಿನ ಲಿಂಕ್ ಅನ್ನು ಕ್ಲಿಕ್ ಮಾಡಿ:

https://www.indiapost.gov.in/speedpost/locateus

 

*****

(ಪ್ರಕಟಣೆ ಐ.ಡಿ.: 2241472) ವಿಸಿಟರ್ ಕೌಂಟರ್ : 19