بھارتی بحریہ کے بحری تربیتی جہاز آئی این ایس سدرشنی 12  مارچ 2026 کو مالٹا کی تاریخی بندرگاہ والیٹا پہنچ گیا، جو اس کے تاریخی سمندری سفر لوکایان-26 کا ایک اہم مرحلہ ہے۔ یہ دورہ ہندوستان اور مالٹا کے درمیان گہرے سمندری تعلقات کو اجاگر کرتا ہے اور جہاز کے 22 ہزار بحری میل پر مشتمل عالمی سفر کا ایک اہم حصہ ہے۔ والیٹا پہنچنے سے قبل جہاز نے سویز نہر سے کامیاب گزرگاہ مکمل کی اور حال ہی میں اسکندریہ کی بندرگاہ پر بھی قیام کیا تھا۔

والیٹا پہنچنے پر جہاز کے کمانڈنگ افسر نے جمہوریہ مالٹا میں ہندوستان کی ہائی کمشنر محترمہ رچیتا بھنڈاری سے ملاقات کی۔ اس ملاقات میں دونوں ممالک کے درمیان دوطرفہ تعلقات کو مضبوط بنانے میں بھارتی بحریہ کے کردار پر زور دیا گیا۔ ہائی کمشنر نے کہا کہ مالٹا میں آئی این ایس سدرشنی کی موجودگی مہاساگر کے وژن کی مضبوط علامت ہے، جو سمندری تعاون کو فروغ دینے کے ساتھ عوامی سطح پر روابط کو بھی مستحکم کرتی ہے۔

اس دورے کے دوران جہاز کا عملہ مالٹا کی مسلح افواج کے ساتھ پیشہ ورانہ ملاقاتیں اور خیرسگالی روابط قائم کرے گا، جس سے باہمی اعتماد اور باہمی تعاون کو مزید فروغ ملے گا۔ جہاز کی جانب سے سماجی رابطوں کی سرگرمیاں بھی منعقد کی جائیں گی، جن میں اسکول کے بچوں اور مالٹا میں مقیم ہندوستانی کمیونٹی کے لیے اوپن شپ کے تحت جہاز کا رہنمائی کے ساتھ دورہ بھی شامل ہوگا۔

آئی این ایس سدرشنی اس وقت اپنے سفر کے دوسرے مہینے میں ہے، جس کا آغاز 20 جنوری2026 کو کوچی سے ہوا تھا۔ مالٹا کے دورے کے بعد جہاز فرانس کے ساحل کی جانب روانہ ہوگا، جہاں وہ ایسکال آ سیٹ سمندری میلے میں شرکت کرے گا اور دنیا کے مشہور بلند بادبانی جہازوں کے ساتھ ہندوستان کی نمائندگی کرے گا۔

************

ش ح ۔   م  د ۔  م  ص

(U :  4057  )