भारतीय नौदलाच्या आयएनएस सुदर्शिनी या नौकानयन प्रशिक्षण जहाजाचे 12 मार्च 2026 रोजी माल्टामधील वॅलेट्टा या ऐतिहासिक बंदरावर आगमन झाले. लोकायन-26 या आपल्या आंतरमहासागरीय प्रवासाचा एक महत्त्वाचा टप्पा या जहाजाने पूर्ण केला आहे. भारत आणि माल्टा यांच्यामधील दृढ सागरी संबंध यामुळे अधोरेखित झाले असून जहाजाच्या महत्त्वाकांक्षी 22,000 सागरी मेलांच्या जागतिक प्रवासातील हा महत्त्वाचा टप्पा आहे. सुवेझ कालव्यातील यशस्वी प्रवास व नवीनच झालेल्या अलेक्झांड्रिया बंदरामधील थांब्यानंतर हे जहाज वॅलेट्टा बंदरावर पोहोचले.

हे जहाज वॅलेट्टा बंदरात पोहोचल्यानंतर जहाजाच्या कमांडिंग ऑफिसरनी माल्टामधील भारतीय उच्चायुक्त रचिता भंडारी यांच्याशी संपर्क साधला. दोन्ही देशांमधील द्विपक्षीय संबंध बळकट करण्यामध्ये भारतीय नौदलाने बजावलेल्या भूमिकेबाबत यावेळी प्रामुख्याने चर्चा करण्यात आली. माल्टामधील आयएनएस सुदर्शिनी जहाजाची उपस्थिती हे महासागर संकल्पनेचे सक्षम प्रतीक आहे. यामुळे सागरी सहकार्य मजबूत होण्याबरोबरच नागरिकांमधील परस्पर संबंधही दृढ होतील असे मत उच्चायुक्तांनी व्यक्त केले.

या भेटीत जहाजावरील कर्मचारी माल्टाच्या लष्करासोबत व्यावसायिक चर्चा करतील व औपचारिक भेट घेतील. यामुळे परस्पर विश्वास व आंतरकार्यक्षमता यांना आणखी प्रोत्साहन मिळेल. जहाजाला भेट देण्यासाठी शालेय विद्यार्थी आणि माल्टामधील भारतीय समुदायाच्या लोकांनाही आमंत्रिक केले जाईल.

आयएनएस सुदर्शिनी सध्या तिच्या प्रवासाच्या दुसऱ्या महिन्यात आहे, जी २० जानेवारी २०२६ रोजी कोची येथून सुरू झाली. माल्टा भेटीनंतर हे जहाज फ्रान्सच्या किनाऱ्याच्या दिशेने प्रवास करणार असून तिथे एस्केल आ सेत या सागरी महोत्सवात सहभागी होईल. जगातील सर्वात नामांकित उंच जहाजांसोबत या महोत्सवात आयएनएस सुदर्शिनी अभिमानाने भारताचे प्रतिनिधित्व करेल.

***

यश राणे / सुरेखा जोशी/ परशुराम कोर

*** 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai