గ్రేట్ ఇండియన్ బస్టార్డ్ (జీఐబీ) ప్రాజెక్టు పునరుత్పత్తి కార్యక్రమం నాలుగో ఏడాదిలోకి ప్రవేశించిందని కేంద్రం పర్యావరణ, అటవీ, వాతావరణ మార్పుల శాఖ మంత్రి శ్రీ భూపేందర్ యాదవ్ శుక్రవారం తెలియజేశారు. రాజస్థాన్లోని కన్జర్వేషన్ బ్రీడింగ్ సెంటర్లో కొత్తగా రెండు పిల్లలను పొదగడంతో ఈ పక్షుల సంఖ్య 70కి చేరుకుందని వెల్లడించారు.

పర్యావరణానికి ప్రాధాన్యమిస్తున్న ప్రధానమంత్రి శ్రీ నరేంద్ర మోదీ సారథ్యంలో, ఈ ప్రాజెక్టును విజయవంతం చేయడానికి దేశం సరైన మార్గంలో ప్రయాణిస్తోందని మంత్రి అన్నారు.

ఈ పురోగతికి సంబంధించిన సమాచారాన్ని సామాజిక మాధ్యమం ఎక్స్‌లో శ్రీ యాదవ్ పంచుకున్నారు. ప్రాజెక్టు జీఐబీ పరిధిలో సాధించిన మరో విజయంగా దీనిని వర్ణించారు. రాజస్థాన్‌లోని కన్జర్వేషన్ బ్రీడింగ్ సెంటర్లో ఈ వారం సహజ సంపర్క విధానంలో ఒకటి, కృత్రిమ విధానంలో మరొకటి మొత్తం రెండు పిల్లలను పొదిగినట్లు తెలియజేశారు.

జీవజాతుల పరిరక్షణ ప్రయత్నాల్లో ప్రధాన విజయంగా దీనిని శ్రీ యాదవ్ వర్ణించారు. సంరక్షణ కేంద్రాల్లో పెరిగిన కొన్ని పక్షులను ఈ ఏడాది నిర్దేశిత విధానాన్ని అనుసరిస్తూ అటవీ ప్రాంతంలో విడుదల చేస్తామని, ఇది ఈ ప్రాజెక్టుకు నూతన సవాలుతో నిండిన ప్రారంభమన్నారు. ఈ విజయం సాధించిన రాజస్థాన్ అటవీ విభాగం అధికారులను అభినందించారు.

***