પ્રધાનમંત્રી શ્રી નરેન્દ્ર મોદી 11 માર્ચ, 2026 ના રોજ કેરળ અને તમિલનાડુની મુલાકાત લેશે. બપોરે આશરે 1:30 વાગ્યે, પ્રધાનમંત્રી એર્નાકુલમ, કેરળમાં આશરે ₹10,800 કરોડના અનેક વિકાસલક્ષી પ્રોજેક્ટ્સનું ઉદ્ઘાટન કરશે, રાષ્ટ્રને સમર્પિત કરશે, શિલાન્યાસ કરશે અને ફ્લેગ ઓફ કરશે. પ્રધાનમંત્રી આ કાર્યક્રમ દરમિયાન જનસભાને પણ સંબોધિત કરશે. ત્યારબાદ સાંજે આશરે 5:45 વાગ્યે, પ્રધાનમંત્રી તિરુચિરાપલ્લી, તમિલનાડુમાં આશરે ₹5,650 કરોડના અનેક વિકાસ પ્રોજેક્ટ્સનું ઉદ્ઘાટન કરશે, રાષ્ટ્રને સમર્પિત કરશે અને શિલાન્યાસ કરશે. પ્રધાનમંત્રી આ પ્રસંગે જનસભાને પણ સંબોધિત કરશે.

એર્નાકુલમમાં પ્રધાનમંત્રી

પ્રધાનમંત્રી ભારત પેટ્રોલિયમ કોર્પોરેશન લિમિટેડ (BPCL) ની કોચી રિફાઇનરી ખાતે પોલીપ્રોપીલીન યુનિટનો શિલાન્યાસ કરશે. આ પ્રોજેક્ટ પરનું રોકાણ ₹5,500 કરોડથી વધુ છે. આ પોલીપ્રોપીલીન યુનિટની ક્ષમતા વાર્ષિક 400 કિલો ટન છે. પોલીપ્રોપીલીન એ પેકેજિંગ, ઓટોમોટિવ ઘટકો, તબીબી ઉપકરણો, કાપડ અને ઘરગથ્થુ ઉત્પાદનોમાં વપરાતી એક આવશ્યક સામગ્રી છે. આ સુવિધા ભારતની ઘરેલું પોલિમર ઉત્પાદન ક્ષમતાને મજબૂત કરશે, આયાત નિર્ભરતા ઘટાડશે, ઔદ્યોગિક વિકાસને પ્રોત્સાહન આપશે અને આ ક્ષેત્રમાં રોજગારીની તકો ઊભી કરશે.

રોડ ઇન્ફ્રાસ્ટ્રક્ચર ક્ષેત્રમાં, પ્રધાનમંત્રી બે મુખ્ય હાઈવે પ્રોજેક્ટ્સનું ઉદ્ઘાટન કરશે. પ્રથમ NH-66 ના થલપાદી-ચેંગલા સેક્શનનું સિક્સ-લેનિંગ છે, જે ₹2,650 કરોડથી વધુના ખર્ચે બનાવવામાં આવ્યું છે. આ સેક્શન મુંબઈ-કન્યાકુમારી ઇકોનોમિક કોરિડોરનો એક ભાગ છે અને તે કાસરગોડ અને કન્નુર જિલ્લાઓ તથા મેંગલોર અને મુઝપિલાંગાડ સહિતના પડોશી વિસ્તારો વચ્ચે જોડાણને મજબૂત બનાવશે. આ પ્રોજેક્ટ કાસરગોડ, બેકલ, પાયન્નુર અને કન્નુર જેવા મુખ્ય નગરો સાથે જોડાણ સુધારશે, અઝીક્કલ પોર્ટ સાથે લિંકેજ વધારશે અને પર્યટન તથા વેપારને સમર્થન આપશે.

બીજો પ્રોજેક્ટ વેંગાલમથી રામનાટ્ટુકરા સુધીના કોઝિકોડ બાયપાસનું સિક્સ-લેનિંગ છે, જે આશરે ₹2,140 કરોડના ખર્ચે બાંધવામાં આવ્યું છે. આ પ્રોજેક્ટ હાલના અવિભાજિત ટુ-લેન રોડને બંને બાજુ સર્વિસ રોડ સાથે સિક્સ-લેન હાઈવેમાં અપગ્રેડ કરે છે. તે ભીડને નોંધપાત્ર રીતે ઘટાડશે, ટ્રાફિક ક્ષમતામાં સુધારો કરશે અને માર્ગ સુરક્ષા વધારશે. આ સ્ટ્રેચ પર મુસાફરીનો સમય એક કલાકથી ઘટાડીને આશરે 15–20 મિનિટ થવાની ધારણા છે. આ પ્રોજેક્ટ કોઝિકોડ બીચ, બેપોર પોર્ટ અને કાપ્પડ બીચ જેવા મહત્વપૂર્ણ સ્થળો સાથે જોડાણ પણ સુધારશે, જે આ વિસ્તારમાં પર્યટન અને વેપારને વેગ આપશે.

પ્રધાનમંત્રી કેરળમાં પ્રધાનમંત્રી ગ્રામ સડક યોજના (PMGSY) હેઠળ નિર્મિત 23 ગ્રામીણ રસ્તાઓનું ઉદ્ઘાટન કરશે. આ રસ્તાઓ ગ્રામીણ અને દૂરના વિસ્તારોમાં જોડાણ સુધારશે અને બજારો, શિક્ષણ, સ્વાસ્થ્ય સંભાળ અને રોજગારીની તકો સુધી વધુ સારી પહોંચ સુનિશ્ચિત કરવામાં મદદ કરશે, જેનાથી ગ્રામીણ આજીવિકા મજબૂત થશે.

પ્રધાનમંત્રી અમૃત ભારત સ્ટેશન સ્કીમ હેઠળ પુનઃવિકસિત ત્રણ રેલવે સ્ટેશનો - શોરનૂર જંક્શન, કુટ્ટીપુરમ અને ચંગનાસેરીનું ઉદ્ઘાટન કરશે. આ સ્ટેશનોને સુધારેલી મુસાફર સુવિધાઓ અને બહેતર સુલભતા સાથે આધુનિક બનાવવામાં આવ્યા છે. પુનઃવિકાસ મુસાફરો માટે આધુનિક, સુરક્ષિત અને અનુકૂળ મુસાફરી જગ્યાઓ બનાવવા સાથે સ્થાનિક સ્થાપત્ય તત્વોને પણ સંકલિત કરે છે.

પ્રધાનમંત્રી શોરનૂર-નિલામ્બુર રોડ રેલવે લાઇન ઇલેક્ટ્રિફિકેશન પ્રોજેક્ટ રાષ્ટ્રને સમર્પિત કરશે. આ મહત્વપૂર્ણ રેલ સેક્શનનું ઇલેક્ટ્રિફિકેશન શોરનૂર ખાતે લોકોમોટિવ બદલવાની જરૂરિયાતને દૂર કરીને ઝડપી, વધુ કાર્યક્ષમ અને ટકાઉ ટ્રેન કામગીરીને સક્ષમ બનાવશે. પ્રધાનમંત્રી પાલક્કડ અને પોલ્લાચી વચ્ચે નવી ટ્રેન સેવાને પણ ફ્લેગ ઓફ કરશે, જે કેરળ અને તમિલનાડુ વચ્ચે રેલ જોડાણને મજબૂત બનાવશે. આ સેવા બંને રાજ્યો વચ્ચે મુસાફરી કરતા દૈનિક મુસાફરો, તીર્થયાત્રીઓ, વેપારીઓ અને પ્રવાસીઓને લાભ કરશે.

પ્રધાનમંત્રી કેરળના કોલ્લમ જિલ્લાના વેસ્ટ કલ્લાડા ખાતે 50 મેગાવોટના ફ્લોટિંગ સોલર પ્રોજેક્ટનો શિલાન્યાસ પણ કરશે. આ પ્રોજેક્ટ ભારતના સ્વચ્છ ઉર્જા લક્ષ્યોમાં યોગદાન આપશે અને ટકાઉ અને લો-કાર્બન ઊર્જા ભવિષ્ય પ્રત્યે દેશની પ્રતિબદ્ધતાને મજબૂત કરશે.

તિરુચિરાપલ્લીમાં પ્રધાનમંત્રી

પ્રધાનમંત્રી તિરુચિરાપલ્લીમાં આશરે ₹5,650 કરોડના અનેક વિકાસ પ્રોજેક્ટ્સનું ઉદ્ઘાટન કરશે, રાષ્ટ્રને સમર્પિત કરશે, શિલાન્યાસ કરશે અને ફ્લેગ ઓફ કરશે. આ પ્રોજેક્ટ્સ પેટ્રોલિયમ અને કુદરતી ગેસ ઇન્ફ્રાસ્ટ્રક્ચર, લ્યુબ્રિકન્ટ્સ ઉત્પાદન, ગ્રામીણ જોડાણ, હાઈવે વિકાસ અને રેલવે સેવાઓ સહિતના મુખ્ય ક્ષેત્રોને આવરી લે છે.

પેટ્રોલિયમ ક્ષેત્રમાં, પ્રધાનમંત્રી ₹3,680 કરોડથી વધુના રોકાણ સાથે નીલગીરી અને ઇરોડ જિલ્લામાં ભારત પેટ્રોલિયમ કોર્પોરેશન લિમિટેડના સિટી ગેસ ડિસ્ટ્રિબ્યુશન નેટવર્કનો શિલાન્યાસ કરશે. આ પ્રોજેક્ટ 8.8 લાખથી વધુ ઘરોને PNG કનેક્શન પૂરું પાડશે, 200 થી વધુ વ્યાપારી સંસ્થાઓને ગેસ સપ્લાય કરશે અને 201 થી વધુ CNG સ્ટેશનો સ્થાપિત કરશે.

પ્રધાનમંત્રી ચેન્નાઈના મનાલી ખાતે ઇન્ડિયન ઓઇલ કોર્પોરેશનના 672 હજાર મેટ્રિક ટન પ્રતિ વર્ષની ક્ષમતા ધરાવતા લ્યુબ બ્લેન્ડિંગ પ્લાન્ટને રાષ્ટ્રને સમર્પિત કરશે. આશરે ₹1,490 કરોડના રોકાણથી વિકસિત આ પ્લાન્ટ ભારતની લ્યુબ્રિકન્ટ્સ ઉત્પાદન ક્ષમતાને મજબૂત કરશે.

પ્રધાનમંત્રી ગ્રામ સડક યોજના હેઠળ, પ્રધાનમંત્રી તમિલનાડુમાં 370 કિમીના 89 ગ્રામીણ રસ્તાઓનું પણ ઉદ્ઘાટન કરશે, જે ગ્રામીણ વિસ્તારોમાં બજારો, શાળાઓ અને સ્વાસ્થ્ય સંભાળ સુવિધાઓ સુધી જોડાણમાં નોંધપાત્ર સુધારો કરશે. પ્રધાનમંત્રી NH-81 પર ગંગાઈકોંડા ચોલાપુરમ નજીક ગ્રીનફિલ્ડ બાયપાસનો શિલાન્યાસ કરશે.

પ્રધાનમંત્રી બે અમૃત ભારત એક્સપ્રેસ ટ્રેનો, બે એક્સપ્રેસ ટ્રેનો અને એક પેસેન્જર ટ્રેન સેવાને ફ્લેગ ઓફ કરશે, જે તમિલનાડુ અને તેલંગાણા, કર્ણાટક, કેરળ અને પૂર્વ ભારત સહિતના અન્ય પ્રદેશો વચ્ચે રેલ જોડાણને મજબૂત કરશે, જેનાથી મુસાફરોને લાભ થશે અને પ્રાદેશિક આર્થિક વિકાસને સમર્થન મળશે.

SM/JD