جن اوشدھی ہفتہ 2026 کے چوتھے دن، وزارتِ کیمیکلز و فرٹیلائزرز کے محکمۂ ادویات کے تحت فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی) کی جانب سے مختلف ریاستوں اور مرکز کے زیرِ انتظام علاقوں میں صحت کے معائنہ کیمپوں کا انعقاد کیا گیا۔ یہ ملک گیر عوامی رسائی مہم یکم مارچ سے 5 مارچ 2026 تک جاری ہے، جو 7 مارچ کو منائے جانے والے آٹھویں جن اوشدھی دیوس کی تیاریوں کے سلسلے میں منعقد کی جا رہی ہے۔ ملک میں ہولی کے تہوار کی تقریبات کے باوجود ان صحت کیمپوں میں شہریوں نے پُرجوش شرکت کی۔ ان کیمپوں میں مفت طبی مشاورت، موقع پر تشخیصی سہولیات جیسے بلڈ پریشر، بلڈ شوگر اور تھائرائیڈ ٹیسٹ، بچوں کے امراض کی دیکھ بھال اور دائمی بیماریوں کے لیے مشاورت فراہم کی گئی۔ اس کے ساتھ جن اوشدھی ادویات اور سہولت یا سینیٹری پیڈز کی تقسیم بھی کی گئی، جبکہ سستی اور معیاری جینرک ادویات کے فوائد سے متعلق آگاہی نشستیں بھی منعقد کی گئیں۔

نوہٹہ، ڈاؤن ٹاؤن سرینگر، جموں و کشمیر میں صحت کا معائنہ کیمپ منعقد کیا گیا

ہاویری، کرناٹک میں صحت کا معائنہ کیمپ منعقد کیا گیا

ہفتہ بھر جاری رہنے والی تقریبات کے تحت ملک بھر میں تقریباً 250 مقامات پر مفت صحت کیمپ منعقد کیے جا رہے ہیں، جہاں بنیادی طبی سہولیات فراہم کی جا رہی ہیں، جن میں مفت طبی مشاورت، ادویات کی تقسیم اور بنیادی تشخیصی ٹیسٹ جیسے بلڈ شوگر اور بلڈ پریشر کی جانچ شامل ہیں۔

پالنادو، آندھرا پردیش میں صحت کا معائنہ کیمپ منعقد کیا گیا

چوتھے دن کے کیمپ مختلف مقامات پر منعقد ہوئے، جن میں ڈوڈابلاپور، بنگلورو دیہی (کرناٹک)، موہول، سولاپور (مہاراشٹر)، نوہٹہ، ڈاؤن ٹاؤن سرینگر (جموں و کشمیر)، پالنادو (آندھرا پردیش)، بنگلورو شہری (کرناٹک) اور ہاویری (کرناٹک) شامل ہیں۔

ڈوڈابلاپور، بنگلورو دیہی، کرناٹک میں صحت کا معائنہ کیمپ منعقد کیا گیا

پردھان منتری بھارتیہ جن اوشدھی پریوجنا (پی ایم بی جے پی) کے تحت معیاری جینرک ادویات عوام کو سستی قیمتوں پر ملک بھر میں فعال 18,000 سے زائد پردھان منتری بھارتیہ جن اوشدھی کیندروں (پی ایم بی جے کے) کے ذریعے فراہم کی جا رہی ہیں۔ محکمۂ ادویات کے تحت فارماسیوٹیکلز اینڈ میڈیکل ڈیوائسز بیورو آف انڈیا (پی ایم بی آئی) اس فلیگ شپ اسکیم پر عمل درآمد کر رہا ہے، تاکہ ضروری ادویات عام آدمی کو برانڈیڈ ادویات کے مقابلے میں نمایاں طور پر کم قیمت پر، معیار پر کوئی سمجھوتہ کیے بغیر دستیاب ہوں۔

حکومت نے مارچ 2027 تک 25,000 کیندر قائم کرنے کا پُرعزم ہدف مقرر کیا ہے، تاکہ کوئی بھی شہری مالی دشواریوں کے باعث ضروری ادویات سے محروم نہ رہے۔

جو کاروباری حضرات، فارماسسٹ، ڈاکٹرز اور دیگر اہل افراد پردھان منتری بھارتیہ جن اوشدھی کیندر کھولنے میں دلچسپی رکھتے ہیں، وہ سرکاری ویب سائٹ www.janaushadhi.gov.in  کے ذریعے آن لائن درخواست دے سکتے ہیں۔ اس اسکیم کے تحت وسیع تر شرکت کی حوصلہ افزائی کے لیے مالی معاونت اور مراعات بھی فراہم کی جاتی ہیں۔ یہ اقدام قومی صحت مشن میں حصہ ڈالنے کے ساتھ ایک پائیدار ذریعۂ معاش قائم کرنے کا بھی موقع فراہم کرتا ہے۔

******

ش ح۔ ش ا ر۔ ول

Uno-3363