প্রধান মন্ত্রী শ্রী নরেন্দ্র মোদী ফেব্রুৱারি ২৮,২০২৬ দা গুজরাত্ত চৎকনি। নুংথিলগী পুং ৩:৪৫ রোম তাবদা, প্রধান মন্ত্রীনা সানন্দদা মাইক্রোন সেমিকন্দক্তর তেক্নোলোজি ইন্দিয়া প্রাইভেদ লিমিতেদকী সেমিকন্দক্তর এশেমব্লি, তেষ্ট অমসুং পেকেজিং (এতিএমপি) ফেসিলিতি শঙ্গাগনি। থৌরম অদুদা মহাক্না মীয়ামদসু ৱা ঙাংগনি।

সানন্দ এ.তি.এম.পি ফেসিলিতিদগী য়োন্নবা পোৎথোক পুথোকপা অমসুং অহানবা মেদ-ইন-ইন্দিয়া সেমিকন্দক্তর মেমোরি মোদুলশিং মপান্দা থাদোকপা হৌবগা লোয়ননা শঙ্গাবা অসি ভারতকী সেমিকন্দক্তর শাবগী খোঙচত্ত পুৱারি ওইরবা মাইপাকপা অমা ওইরগনি। চাউখৎলকপা অসি মালেমগী সেমিকন্দক্তর ভেলু চেন্দা ভারতকী ফিবম মপাঙ্গল কনখৎনবা মাইকৈদা থাংজিনবা মরুওইবা খোঙথাং অমা মশক তাকপনি।

সেপ্তেম্বর ২০২৩ দা উরেপ-উয়ুং তমখিবা প্রোজেক অসি ইন্দিয়া সেমিকন্দক্তর মিসন (আই এস এম)না অহানবা অয়াবা পীখিবা প্রোজেক্নি। অপুনবা ওইনা লুপা করোর ২২,৫০০ গী শেনফম অমা কাইথোক্তুনা, অয়াবা পীরবা মতুংদা শাবা হৌখিবনি, মসিদা লৈবাক অসিদা খোঙজেল য়াংনা সেমিকন্দক্তরদা শেন থাদনবা সরকারগী অচেৎপা থাজবা অদুগী মমি তারে।

সানন্দগী ফেসিলিতি মপুংফানা শেমগৎপা লোইবগা, চাউরাক্না ইসক্বার ফিত ৫০০,০০০ রোমগী অনানবা মফম ফংগনি, ফেসিলিতি অসিদা মালেমগী খ্বাইদগী চাউবা রাইজ-ফ্লোর ক্লিনরুমশিং য়াওরি। আর্তিফিসিএল ইন্তিলিজেন্স অমসুং শক্তি লৈবা কম্পুতিং য়াংনা চাউখৎলক্লিবা অসিগী মতুংইন্না, মেমোরি অমসুং ষ্টোরেজগী মালেমগী দরকার ওইবশিং ফংনবা মালেম শীনবা থুংবগী কষ্টমরশিংগী সেবা তৌনবা ফেসিলিতি অসি দিজাইন তৌবনি।

সানন্দ এ.তি.এম.পি ফেসিলিতিনা মাইক্রোনগী মালেম শীনবা থুংনা লৈরিবা মেনুফেকচরিং নেতৱার্কতগী দাইনামিক রেন্দম এসেস মেমোরি (দিরাম) অমসুং নান্দ সেমিকন্দক্তর ৱেফরশিং শেম-শাবা লোইরবা মেমোরি অমসুং ষ্টোরেজ পোৎথোকশিংদা ওন্থোক্কনি অমসুং মালেমগী কৈথেলশিং শীনবা থুংনা মীয়ামদা ফংহনগনি।

লৈবাক অসিদা খুদোংথিবা মায়োক্নবা ঙম্বা অমসুং মশাগী ওক্নবা তেক্নোলোজি শেমগৎনবা প্রধান মন্ত্রীগী পান্দমগী শরুক অমা ওইনা সেমিকন্দক্তর শাবদা ভারত থাজবা য়াবা অমসুং চাংদম্নবা য়াবা মফম অমা ওইনা শেমগৎপগীদমক ফেসিলিতি অসি লিংখৎপনি অমসুং থবক হৌবনি।

***