U Myntri kam pohïing jong ka sorkar pdeng uba dei ruh u Myntri ka tnad ïatreilang, u Amit Shah, u la plie paidbah mynta ka sngi ïa ka Vibrant Villages Programme–II (VVP–II), ha ka jinglut kaba T.6,839 klur, ha ka shnong Nathanpur jong ka jylla Assam. Ha kane ka sngi, la iadonlang u Myntri Rangbah ka jylla Assam u Dr. Himanta Biswa Sarma, u Home Secretary jong ka sorkar pdeng bad kiwei de ki kynrem ki lyndan.

Ha ka jingai jingkren jong u, u Myntri kam pohiing jong ka sorkar pdeng uba dei ruh u Myntri ka Tnad treilang u Amit Shah u la ong ba u Myntri Rangbahduh ka ri u Narendra Modi u la shim ia ka sienjam bad u la pyrshang ban pynbiang ia kijuh ki jingshakri ha baroh ki shnong jong ka them Barak bad ki District khappud jong ka Assam, kumba long kiwei pat ki shnong ha kylleng ka Ri India, lyngba ka Vibrant Villages- II programme kaba la plie paidbah mynta ka sngi. U la ong ba ka la don ka por ba la ju khein ia ki shnong khappud kum ki "shnong ba khatduh" jong ka ri namar ba ki sahdien ha ka roi ka par, ka ioh kam ioh jam, ka jingpyniasoh bording, bad ka pule puthi. U Shah u la ong ba hapoh ka Vibrant Villages-I, u Myntri Rangbahduh ka ri u Narendra Modi u la rai ba man la kawei pa kawei ka shnong ha ka thain khappud kam dei kaba khatduh hynrei ka shnong kaba nyngkong jong ka India. U Shah u la ong ba naduh mynta, kane ka shnong ha Assam ruh kan sa long ka shnong ba nyngkong jong ka ri. U la ong ba kane ka shnong ym tangba kan lamkhmat ha ka liang ka roi ka par hynrei wat ha ka liang ka ioh kam ioh jam, ka pule puthi, ki surok bad ki telecommunication.

U Amit Shah u la ong ba hapoh ka Vibrant Villages Programme–II, la pynlut jan T. 6,900 klur kaba kynthup ia 1,954 tylli ki shnong ha kylleng ki 334 tylli ki block ha 17 tylli ki jylla, kynthup ia 9 tylli ki District, 26 tylli ki Block, bad 140 tylli ki shnong ha Assam. U la ong ba baroh ki jingdonkam ba kongsan, kiba don ha kiwei kiwei ki shnong ha India, yn pynbiang sha kine ki 140 tylli ki shnong ha Assam. U Shah u la ng ba kane ka prokram ka kynthup ruh ïa ki shnong ha Arunachal Pradesh, Bihar, Gujarat, Jammu and Kashmir, Ladakh, Manipur, Meghalaya, Mizoram, Nagaland, Punjab, Rajasthan, Sikkim, Tripura, Uttarakhand, Uttar Pradesh bad West Bengal. U Amit Shah u la ong ba ka prokram kaba shongdor kumba T.7,000 klur na ka bynta ban kyntiew ia kumba 2,000 tylli ki shnong ha kylleng ki 334 tylli ki block kiba iajan bad u pud u sam jong ka ri ka la sdang naduh mynta ka sngi. U la ong ba kane ka prokram ka kynthup ïa ki katto katne ki skhim kiba ïadei bad ka jingshngain, ka jingpynpoi lut ia ki skhim na ka bynta ka bha ka miat bad ka jingpyniasoh.

U Amit Shah u la ong ba ki sorkar barim ki la synshar ia ka Assam da ki snem hynrei kim shym la leh ei ei na ka bynta ka roi ka par jong ka jylla. U la ong ba ha kine ki 10 snem ba la dep jong ka jingsynshar ka sorkar jong ngi, ngi la pyndep ia kaei kaba ki sorkar ba mynshuwa kim lah ban pyndep wat ha ki 50 snem. U la ong ba ha kine ki san snem ba la leit, la shna 14 kilometer ki surok ha ka shi sngi ha Assam, kaba heh tam ha ka ri. U la ong ba palat 24,000 kilometer ki surok la pynbha, da ki spah haduh hajar tylli ki jingkieng la shna, bad saw tylli ki jingkieng ba thymmai kiba kongsan la aiti sha ki briew jong ka jylla Assam ha kine ki shiphew snem ba la dep da ka sorkar.

U Myntri kam pohiing jong ka sorkar pdeng bad u Myntri ka tnad treilang u la ong ba ha ka por ba ka party jong ngi ka la wan ha ka bor ha Assam, ka jingduk ba bun bynta ha ka jylla ka long haduh 37 percent, kaba la duna sha ka 14 percent ha u snem 2023. U la ong ba ka per capita income jong ka jylla, kaba long T.49,000 ha u snem 2013–14, ka la kiew lai shah sha ka T.1,54,000 ha u snem 2024-25. U Shah u la ong ba kane ka jingkylla ka la urlong namar ka jingkiew ka jingsngew skhem hapdeng ki paidbah, ka jingsynshar kaba bha, bad ka shongsuk shongsain ha ka jylla. U la ong ba ka sorkar ba la ialam da u Dr. Himanta Biswa Sarma ha Assam ruh ka la pynkut ia ki jingjia pynbthei bom bad ki kam lehnoh.

U Amit Shah u la ong ba hapoh ka jingialam jong u Dr. Himanta Biswa Sarma, ka Assam ka la long ka jaka pdeng ha ka kam ai jingsumar ha ka thain shatei lammihngi baroh kawei. U la ong ruh ba dang shna ia ka jaka pynmih Semiconductor kaba shongdor T. 27,000 klur ha kane ka jylla. U la bynrap ba ka sorkar Modi ka la mang T.30,000 klur na ka bynta ka jingkyntiew ia ki surok, T.95,000 klur na ka bynta ki lynti rel, bad T.10,000 klur na ka bynta ki kad liengsuiñ ha Assam. U la ong ba la wanrah ruh ia ka industrial policy kaba ai jingiohnong ban pynsted ia ka roi ka par jong ka Assam.

U Myntri kam pohiing jong ka sorkar pdeng u la ong ba ha ki snem ban wan, ka Assam kan long napdeng ki jylla kiba la kiew bha jong ka ri, bad ka Vibrant Villages Programme–II kadei ka bynta kaba kongsan jong kane ka jingthmu. U la ong ba ka sorkar ka kut jingmut ban pynthikna ba man la ki shnong ha ka thain khappud kin kiew ha kajuh ka kyrdan bad kiwei pat ki shnong ha ka ri, kan ym don kano kano ka jingwan buhai shnong na ki jaka khappud, la khanglad ia ki nongwan rung beain lyngba ki khappud, bad ka Assam kaba shngain ka noh synniang sha ka India kaba shngain. U Shah u la ong ba ka jingplie ïa ka Vibrant Villages Programme–II na them Barak ka dei ka jingsdang ban pyniar ïa ka roi ka par sha ki shnong khappud ha kylleng ki 17 tylli ki jylla.

****