مرکزی وزیر برائے دیہی ترقی اور زراعت و کسانوں کی فلاح، جناب شیوراج سنگھ چوہان نے بدھ کے روز نئی دہلی کے کرشی بھون میں دین دیال انتودیہ یوجنا – قومی دیہی روزگار مشن (ڈی اے وائی–این آر ایل ایم) کا جائزہ اجلاس منعقد کیا، جس میں وزارتِ دیہی ترقی کے افسران نے مشن کے نفاذ اور پیش رفت سے متعلق تازہ معلومات پیش کیں۔

اجلاس کے دوران مرکزی وزیر نے وزارت کے سینئر افسران سے اسکیم کی تازہ ترین پیش رفت پر تفصیلات طلب کیں۔ مشن کی مجموعی کارکردگی پر اطمینان کا اظہار کرتے ہوئے جناب شیوراج سنگھ چوہان نے ہدایت دی کہ 6 کروڑ ’لکھپتی دیدی‘ کا نظرثانی شدہ ہدف حاصل کرنے کے لیے خصوصی اور مرکوز حکمتِ عملی تیار کی جائے اور جنگی پیمانے پر کام کیا جائے۔

انہوں نے واضح کیا کہ 6 کروڑ ’لکھپتی دیدی‘ کے پرعزم ہدف کے حصول کے لیے کم از کم 10 کروڑ خواتین کو وزارتِ دیہی ترقی کی مختلف مالی شمولیتی اسکیموں سے جوڑنا ناگزیر ہوگا۔ انہوں نے افسران کو ہدایت دی کہ ریاستی حکومتوں کے ساتھ قریبی تال میل قائم کرتے ہوئے ایک ٹھوس اور وقت کا پابند عملی منصوبہ تیار کیا جائے تاکہ ہدف کی بروقت تکمیل یقینی بنائی جا سکے۔

جناب شیوراج سنگھ چوہان نے زور دیا کہ مالی شمولیت دیہی بھارت میں خواتین کو بااختیار بنانے اور پائیدار روزگار کی بنیاد ہے۔ ان کا کہنا تھا کہ بینک روابط، قرض تک رسائی، بیمہ کوریج اور مالیاتی خواندگی کے ذریعے زیادہ سے زیادہ خواتین کو باضابطہ مالیاتی نظام سے جوڑنا ضروری ہے تاکہ اپنی مدد آپ گروپوں کی اراکین معاشی طور پر خودمختار اور خود کفیل بن سکیں۔

مرکزی وزیر نے مشن کے تحت مختص بجٹ کے مؤثر اور بہترین استعمال کو بھی یقینی بنانے کی ہدایت دی۔ انہوں نے کہا کہ وہ ریاستیں جہاں کارکردگی توقعات کے مطابق نہیں ہے یا مختص فنڈز کا مکمل استعمال نہیں ہو رہا، انہیں ضروری رہنمائی، عملی معاونت اور حوصلہ افزائی فراہم کی جائے۔ ان کے مطابق، یہ امر اس بات کے لیے نہایت اہم ہے کہ اسکیم کے مقاصد مقررہ مدت کے اندر حاصل کیے جا سکیں۔

ریاستوں کے ساتھ مسلسل رابطے کی اہمیت اجاگر کرتے ہوئے جناب شیوراج سنگھ چوہان نے کہا کہ مستقل مکالمہ اور ہم آہنگی دین دیال انتودیہ یوجنا – قومی دیہی روزگار مشن کے نفاذ کو مزید مضبوط بنائے گی۔ اس طریقۂ کار سے زیادہ تعداد میں اپنی مدد آپ گروپوں اور ’لکھپتی دیدی‘ تک اسکیم کے فوائد پہنچ سکیں گے اور وہ روزگار و بااختیاری کی مختلف پہلوؤں سے زیادہ سے زیادہ فائدہ اٹھا سکیں گی۔

مرکزی وزیر نے اس عزم کا اعادہ کیا کہ حکومت اس بات کے لیے پُرعزم ہے کہ ’لکھپتی دیدی‘ کو وزارتِ دیہی ترقی کی تمام اسکیموں اور پروگراموں سے زیادہ سے زیادہ فائدہ حاصل ہو۔ انہوں نے کہا کہ مشن کی کامیابی صرف عددی اہداف کے حصول تک محدود نہیں بلکہ دیہی خواتین اور ان کے خاندانوں کی دیرپا معاشی بااختیاری اور معیارِ زندگی میں بہتری سے وابستہ ہے۔

اجلاس میں بتایا گیا کہ دین دیال انتودیہ یوجنا – قومی دیہی روزگار مشن چار بڑے اجزا کے ذریعے کام کرتا ہے: ادارہ جاتی تعمیر اور صلاحیت سازی، سماجی شمولیت و سماجی ترقی، مالی شمولیت، اور روزگار کے فروغ کے اقدامات۔ یہ تمام اجزا مل کر مضبوط کمیونٹی اداروں کی تشکیل، مہارتوں میں اضافہ، شمولیتی ترقی کے فروغ اور دیہی گھرانوں کے لیے آمدنی کے مواقع کو مستحکم بنانے کا ہدف رکھتے ہیں۔

مشن کے تحت بینک روابط پروگرام کے ذریعے باضابطہ قرض تک رسائی میں نمایاں پیش رفت ہوئی ہے۔ اب تک تقریباً 1.5 لاکھ کروڑ روپے کی مالی معاونت بینک روابط کے ذریعے مستفیدین کو فراہم کی جا چکی ہے، جس سے اپنی مدد آپ گروپوں اور ان کے اراکین کو روزگار سے متعلق سرگرمیوں میں سرمایہ کاری اور اپنی معاشی بنیاد مضبوط کرنے میں مدد ملی ہے۔

اس کے علاوہ تقریباً 5 کروڑ افراد کو مالیاتی خواندگی کے پروگراموں سے جوڑا گیا ہے، جس کے ذریعے انہیں مالی نظم و نسق، بچت، قرض اور سرمایہ کاری سے متعلق ضروری معلومات اور مہارتیں فراہم کی گئی ہیں۔ مشن نے سماجی تحفظ کے دائرہ کار کو بھی وسعت دی ہے، جس کے تحت مختلف سماجی تحفظ اسکیموں کے ذریعے تقریباً 7 کروڑ افراد کو بیمہ فوائد حاصل ہوئے ہیں۔

جناب شیوراج سنگھ چوہان نے کہا کہ یہ کامیابیاں دین دیال انتودیہ یوجنا – قومی دیہی روزگار مشن کے دیہی روزگار اور خواتین کی بااختیاری پر انقلابی اثرات کی عکاسی کرتی ہیں۔ انہوں نے مزید کہا کہ مرکوز نفاذ، قریبی نگرانی اور ریاستوں کے ساتھ مضبوط ہم آہنگی کے ذریعے یہ مشن لاکھوں ’لکھپتی دیدی‘ کی تشکیل اور ایک زیادہ شمولیتی و خود کفیل دیہی معیشت کی تعمیر میں فیصلہ کن کردار ادا کر سکتا ہے۔

مرکزی وزیر نے اختتام پر اس عزم کو دہرایا کہ حکومت مشن کے تحت پیش رفت کو تیز کرنے کے لیے مکمل طور پر پُرعزم ہے، تاکہ دیہی خواتین نہ صرف آمدنی کمانے والی بنیں بلکہ بااعتماد اور بااختیار شہری کے طور پر ملک کی ترقی میں فعال کردار ادا کریں۔

************

ش ح ۔   م    د۔  م  ص

(U : 2666   )

(ریلیز آئی ڈی: 2229914) وزیٹر کاؤنٹر : 5