કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે પશ્ચિમ બંગાળના નદિયામાં મુખ્ય અતિથિ તરીકે પરમ પૂજ્ય શ્રીલા ભક્તિસિદ્ધાંત સરસ્વતી ઠાકુરજીની 152મી જન્મજયંતીની ઉજવણીને સંબોધિત કરી હતી. આ પ્રસંગે કેન્દ્રીય મંત્રી શ્રી ભૂપેન્દ્ર યાદવની સાથે અન્ય અનેક મહાનુભાવો ઉપસ્થિત રહ્યા હતા.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું હતું કે માયાપુરમાં ભક્તિસિદ્ધાંત સરસ્વતી ઠાકુરજી અને એ.સી. ભક્તિવેદાંત સ્વામી પ્રભુપાદજીએ શ્રી ચૈતન્ય મહાપ્રભૂજી દ્વારા શરૂ કરાયેલ ભક્તિ આંદોલનને માત્ર આગળ જ ધપાવ્યું નથી, પરંતુ તેને આધુનિક પણ બનાવ્યું છે, જેણે વિશ્વભરના યુવાનો અને લોકોના કલ્યાણનો માર્ગ મોકળો કર્યો છે. તેમણે કહ્યું કે તેમના જીવનકાળ દરમિયાન, શ્રી ચૈતન્ય મહાપ્રભૂજીએ ભારત અને વૈશ્વિક સ્તરે અજ્ઞાનના અંધકારથી પીડાતા લાખો લોકોને મુક્ત કરવા માટે ભક્તિનો માર્ગ પ્રકાશિત કર્યો હતો. શ્રી શાહે જણાવ્યું હતું કે જ્યારે કોઈ વ્યક્તિ અસ્તિત્વ ઓગાળીને ભગવાન કૃષ્ણની ભક્તિમાં લીન થઈ જાય છે, ત્યારે બધું સારું થઈ જાય છે. તેમણે નોંધ્યું હતું કે શ્રી ચૈતન્ય મહાપ્રભૂજીએ પૂર્વ ભારતમાં કીર્તન, ભક્તિ સંગીત અને નૃત્ય દ્વારા ગીતાના ગહન સંદેશને સરળ અને સુલભ રીતે ફેલાવ્યો હતો, જેનાથી લાખો લોકોના જીવનમાં ભક્તિનો દીવો પ્રગટ્યો હતો. તેમણે કહ્યું કે આ આંદોલન ભક્તિસિદ્ધાંત સરસ્વતી ઠાકુરજી અને એ.સી. ભક્તિવેદાંત સ્વામી પ્રભુપાદજી દ્વારા યુવાનો અને સમગ્ર વિશ્વના કલ્યાણ માટે માત્ર આગળ જ વધારવામાં આવ્યું નથી પરંતુ આધુનિકતા સાથે પણ જોડવામાં આવ્યું હતું.

શ્રી અમિત શાહે કહ્યું કે આજે શ્રી ચૈતન્ય મહાપ્રભૂજીની ભક્તિના કમાન્ડર અને ગૌડીય સંપ્રદાયના સ્થાપક ભક્તિસિદ્ધાંત સરસ્વતી ઠાકુરજીની 152મી જન્મજયંતી છે. તેમણે કહ્યું કે શ્રી કૃષ્ણના એક અબજ નામોના જાપ કરવાનો સંકલ્પ પૂર્ણ કરીને ભક્તિસિદ્ધાંત સરસ્વતી ઠાકુરજીએ તપસ્યા, ત્યાગ અને શિસ્તનો અજોડ આદર્શ રજૂ કર્યો હતો. શ્રી શાહે કહ્યું કે આ દ્વારા ભક્તિસિદ્ધાંત સરસ્વતી ઠાકુરજીએ પોતાનું સંપૂર્ણ જીવન શ્રી કૃષ્ણને સમર્પિત કર્યું હતું. ભક્તિસિદ્ધાંત સરસ્વતી ઠાકુરજીએ ધર્મને જડ પરંપરાઓ અને સંકુચિતતામાંથી મુક્ત કર્યો, અને દર્શાવ્યું કે આધુનિકતા ધર્મની વિરોધી નથી, પરંતુ તેની સાથી છે. તેમના વિઝનનો ઉલ્લેખ કરતા, શ્રી શાહે નોંધ્યું કે તેમણે પ્રિન્ટિંગ પ્રેસને ‘વૃહદ મૃદંગ’ તરીકે વર્ણવ્યું હતું, જે દર્શાવે છે કે કેવી રીતે પ્રેસમાં છપાયેલા પુસ્તકો સમુદ્ર પાર મુસાફરી કરી શકે છે અને વિશ્વભરમાં ભક્તિનો પ્રસાર કરી શકે છે.

કેન્દ્રીય ગૃહ મંત્રીએ કહ્યું કે માત્ર ભગવાન કૃષ્ણ પ્રત્યેની અટલ અને અનન્ય ભક્તિ જ સામાજિક જડતા તોડવાની હિંમત આપે છે. જેઓ ભગવાનને પોતાના હૃદયમાં રાખે છે તેઓ પોતાને સર્વના સેવક માને છે. તેમણે કહ્યું કે સાચો ગુરુ તે છે જે સેવાની ભાવના સાથે શિષ્યોને નાનામાં નાનીથી લઈને મોટી ઊંચાઈઓ સુધી લઈ જાય છે. શ્રી શાહે ભક્તિસિદ્ધાંત સરસ્વતી ઠાકુરજીને એક સાચા ગુરુ તરીકે વર્ણવ્યા જેમણે ગુરુની ભૂમિકાની ગરિમા અને સારને વિશ્વ સમક્ષ રજૂ કરી અને જાતિના અવરોધો તોડવા માટે નોંધપાત્ર પ્રયાસો કર્યા. તેમણે ઉમેર્યું હતું કે વૈરાગ્યનો અર્થ વિશ્વનો સંપૂર્ણ ત્યાગ નથી, પરંતુ અનિષ્ટોનો ત્યાગ કરવો અને સમગ્ર વિશ્વને ભગવાન કૃષ્ણની ભક્તિમાં જોડવું છે.

શ્રી અમિત શાહે વધુમાં જણાવ્યું હતું કે ઘણા લોકો ભક્તિસિદ્ધાંત સરસ્વતી ઠાકુરજીને જીવંત જ્ઞાનકોશ માને છે. ગણિત અને સંસ્કૃતમાં ઊંડું જ્ઞાન હોવા છતાં, તેમણે ભગવાન કૃષ્ણના ચરણોમાં બધું સમર્પિત કર્યું અને પોતાનું જીવન ભક્તિના માર્ગ પર વિતાવ્યું. તેમણે આશા વ્યક્ત કરી કે માયાપુર ધામ ખાતે વિકસાવવામાં આવી રહેલું આધ્યાત્મિક કેન્દ્ર માત્ર રાષ્ટ્ર જ નહીં પરંતુ વિશ્વભરના ભક્તોની સેવા કરશે અને આવનારી પેઢીઓ માટે ભક્તિના માર્ગનું માર્ગદર્શન કરવાનું ચાલુ રાખશે. માયાપુરમાં ઈસ્કોન દ્વારા વિકસાવવામાં આવી રહેલું આધ્યાત્મિક કેન્દ્ર વિશ્વના કલ્યાણ માટે સમર્પિત વૈશ્વિક નિવાસસ્થાન બનશે. શ્રી શાહે કહ્યું કે ભક્તિસિદ્ધાંત સરસ્વતી ઠાકુરજીનું સૌથી મોટું યોગદાન પરંપરાને આગળ વધારવા માટે એ.સી. ભક્તિવેદાંત સ્વામી પ્રભુપાદજી જેવા શિષ્ય તૈયાર કરવાનું હતું.

કેન્દ્રીય ગૃહ મંત્રી અને સહકારિતા મંત્રીએ જણાવ્યું હતું કે ભક્તિસિદ્ધાંત સરસ્વતી ઠાકુરજી અને એ.સી. ભક્તિવેદાંત સ્વામી પ્રભુપાદજીના જીવનકાર્યનું જ પરિણામ છે કે આજે ઈસ્કોન સમગ્ર વિશ્વમાં સનાતન ધર્મનો ધ્વજ લહેરાવી રહ્યું છે. તેમણે કહ્યું કે હરિચંદ ઠાકુરજી અને ગુરુચંદ ઠાકુરજીએ ‘મતુઆ મહાસંઘ’ દ્વારા સમાજ કલ્યાણ અને સામાજિક સમરસતાને નવી દિશા આપી. શ્રી શાહે કહ્યું, ઈસ્કોને દરેકને ગીતાના માર્ગ પર ચાલવા માટે પ્રેરિત કર્યા છે, પ્રધાનમંત્રી શ્રી નરેન્દ્ર મોદી પણ ભારતની મુલાકાતે આવતા દરેક રાષ્ટ્રાધ્યક્ષ અથવા મંત્રીને ગીતાની નકલ ભેટ તરીકે અર્પણ કરે છે. તેમણે ઉમેર્યું હતું કે ઈસ્કોને ભારતની પરંપરાઓ અને ગ્રંથોને પ્રોત્સાહન આપીને ભક્તિ આંદોલનને મજબૂત બનાવ્યું છે એટલું જ નહીં, સેવાના ક્ષેત્રમાં પણ નોંધપાત્ર યોગદાન આપ્યું છે. તેમણે કહ્યું, આપત્તિઓ દરમિયાન રાહત કાર્ય અને શિક્ષણ, આરોગ્ય સંભાળ અને પર્યાવરણ સંરક્ષણની પહેલો દ્વારા, ઈસ્કોન રાષ્ટ્રની સેવામાં પણ નોંધપાત્ર યોગદાન આપી રહ્યું છે. મફત ભોજન વિતરણ અને હોસ્પિટલો અને કોલેજોની સ્થાપનાથી લઈને પર્યાવરણીય પ્રણાલીઓને મજબૂત કરવા અને યુવાનોને ભારતીય તહેવારો સાથે ફરીથી જોડવા સુધી, ઈસ્કોને સામાજિક ઉત્થાનમાં મોટી ભૂમિકા ભજવી છે.

SM/DK/GP/JD