માનનીય યુવા બાબતો અને રમતગમત મંત્રી, ડૉ.મનસુખ માંડવિયાએ આજે વર્ચ્યુઅલી 06 મોટા સ્પોર્ટ્સ ઈન્ફ્રાસ્ટ્રક્ચર પ્રોજેક્ટ્સનો શિલાન્યાસ કર્યો અને બે એથલીટ સપોર્ટ સુવિધાઓનું ઉદ્ઘાટન કર્યું, જેમાં કુલ ₹120 કરોડનું રોકાણ સામેલ છે.

આ પહેલો ભારતની સ્પોર્ટ્સ ઇકોસિસ્ટમને મજબૂત કરવા અને દેશભરમાં વિશ્વ કક્ષાનું, એથલીટ-કેન્દ્રીત ઈન્ફ્રાસ્ટ્રક્ચર વિકસાવવા માટેની કેન્દ્ર સરકારની પ્રતિબદ્ધતાને પુનઃપુષ્ટ કરવા માટેનું એક મહત્વપૂર્ણ પગલું છે.

છ શિલાન્યાસ પ્રોજેક્ટ્સ, જેનો કુલ ખર્ચ ₹82 કરોડ છે, તે ખેલો ઈન્ડિયા સ્કીમ હેઠળ અમલમાં મૂકવામાં આવી રહ્યા છે, જેમાં સ્પોર્ટ્સ ઓથોરિટી ઓફ ઈન્ડિયા (સાઈ - SAI) નો વધારાનો ટેકો છે.

આ પ્રોજેક્ટ્સ ભૌગોલિક રીતે સમગ્ર દેશમાં વહેંચાયેલા છે, જેમાં ઉત્તર-પૂર્વીય અને પૂર્વીય પ્રદેશોનો સમાવેશ થાય છે, જે સંતુલિત અને સમાવેશી સ્પોર્ટ્સ ઈન્ફ્રાસ્ટ્રક્ચર વિકાસ સુનિશ્ચિત કરે છે.

તેમાં બેંગલુરુમાં સિન્થેટિક હોકી ટર્ફનું અપગ્રેડેશન, પટિયાલામાં મલ્ટી-પર્પઝ હોલનું નિર્માણ, ભોપાલ, ગુવાહાટી અને જલપાઈગુડીમાં સિન્થેટિક એથ્લેટિક ટ્રેક બિછાવવા અને ભોપાલમાં મલ્ટી-પર્પઝ જુડો હોલના નિર્માણનો સમાવેશ થાય છે.

શિલાન્યાસ ઉપરાંત, માનનીય મંત્રીએ એનએસ એનઆઈએસ (NS NIS), પટિયાલા ખાતે ₹38 કરોડનાં કુલ રોકાણ સાથે પૂર્ણ થયેલી બે એથલીટ સપોર્ટ સુવિધાઓનું ઉદ્ઘાટન કર્યું હતું.

આમાં એથલીટ પોષણ સેવાઓને મજબૂત કરવા માટે સેન્ટ્રલાઈઝ્ડ કિચન અને ફૂડ કોર્ટ-કમ-ડાઈનિંગ હોલ અને અત્યાધુનિક ઇન્ટીગ્રેટેડ સ્પોર્ટ્સ સાયન્સ સેન્ટર અને કન્ડિશનિંગ હોલનો સમાવેશ થાય છે, જે એલિટ એથ્લેટ્સ માટે વૈજ્ઞાનિક તાલીમ સપોર્ટ, પર્ફોર્મન્સ એનાલિસિસ, પુનઃપ્રાપ્તિ અને રિકવરીમાં નોંધપાત્ર વધારો કરશે.

તમામ હિતધારકોના પ્રયાસોને સ્વીકારીને અને અસ્કયામત સંચાલનમાં સાઈ (SAI) ની જવાબદારી પર ભાર મૂકતા, માનનીય મંત્રીએ કહ્યું, “દેશભરમાં ઘણા સ્પોર્ટ્સ ઈન્ફ્રાસ્ટ્રક્ચર પ્રોજેક્ટ્સ વિકસાવવામાં આવી રહ્યા છે, પરંતુ સાઈ હેઠળની સુવિધાઓ અમારી સીધી જવાબદારી છે. આ અસ્કયામતોની યોગ્ય જાળવણી થવી જોઈએ, શ્રેષ્ઠ ઉપયોગ થવો જોઈએ અને જ્યાં શક્ય હોય ત્યાં વ્યાવસાયિક રીતે લાભ લેવો જોઈએ જેથી જાહેર રોકાણ લાંબા ગાળાના મૂલ્યનું સર્જન કરવાનું ચાલુ રાખે.”

જવાબદારી અને સમયસર ડિલિવરી પર ભાર મૂકતા, ડૉ. માંડવિયાએ એ પણ હાઇલાઇટ કર્યું કે આ ઈન્ફ્રાસ્ટ્રક્ચર પ્રોજેક્ટ્સ સતત દેખરેખને પાત્ર રહેશે. તેમણે જણાવ્યું હતું કે સાઈના સ્તરે માસિક સમીક્ષાઓ હાથ ધરવામાં આવશે, જ્યારે તેઓ વ્યક્તિગત રીતે ત્રિમાસિક સમીક્ષાઓ કરશે, જેથી પ્રોજેક્ટ્સ ઝડપી બને અને જે ઈન્ફ્રાસ્ટ્રક્ચર બનાવવામાં આવ્યું છે તેનો એથ્લેટ્સના લાભ માટે શ્રેષ્ઠ ઉપયોગ થાય તે સુનિશ્ચિત કરી શકાય.

રમતગમત ક્ષેત્રના વ્યાપક નીતિગત માળખાનો ઉલ્લેખ કરતા માનનીય મંત્રીએ યાદ કર્યું કે કેન્દ્રીય નાણામંત્રીએ ખેલો ઈન્ડિયા મિશનની જાહેરાત કરી છે, જેમાં ઈન્ફ્રાસ્ટ્રક્ચર ડેવલપમેન્ટ સહિત ભારતની સ્પોર્ટ્સ ઇકોસિસ્ટમને મજબૂત કરવા માટે અમલીકરણના મુખ્ય પાસાઓની રૂપરેખા આપવામાં આવી છે.

“આપણે માનનીય પ્રધાનમંત્રી શ્રી નરેન્દ્ર મોદીના વિઝનને સાકાર કરવા માટે સામૂહિક રીતે કામ કરવું જોઈએ, જેમાં ભારતને 2036 સુધીમાં ટોચના 10 રમતગમત રાષ્ટ્રોમાં અને જ્યારે દેશ તેની આઝાદીના 100 વર્ષની ઉજવણી કરે ત્યારે ટોચના પાંચમાં સ્થાન અપાવવાનું છે,” તેમ ડૉ. માંડવિયાએ કહ્યું હતું.

તેમણે વધુમાં હાઇલાઇટ કર્યું કે સ્પોર્ટ્સ ગુડ્સ મેન્યુફેક્ચરિંગ (રમતગમતના સાધનોના ઉત્પાદન) માટે ₹500 કરોડ ફાળવવામાં આવ્યા છે, જે માત્ર સ્થાનિક ઉત્પાદન ક્ષમતાને જ મજબૂત બનાવશે નહીં પરંતુ આત્મનિર્ભર અને વૈશ્વિક સ્તરે સ્પર્ધાત્મક સ્પોર્ટ્સ ઇકોસિસ્ટમના વિકાસને પણ ટેકો આપશે.

દેશમાં રમતગમતની બદલાતી ભૂમિકા પર ભાર મૂકતા ડૉ. માંડવિયાએ જણાવ્યું હતું કે, “રમતગમત આજે એક વ્યવસાય છે અને તેથી ટેલેન્ટ આઈડેન્ટિફિકેશન (પ્રતિભાની ઓળખ) અને તેને પોષવાનું કામ મજબૂત બનાવવું જોઈએ. સરકારે તકો અને એવી પ્રણાલીઓ બનાવવામાં એક ડગલું આગળ રહેવું પડશે જે યુવા પ્રતિભાઓને પાયાના સ્તરેથી ઉચ્ચ સ્તરો સુધી પ્રગતિ કરવા દે.”

ડૉ. માંડવિયાએ વધુમાં જણાવ્યું હતું કે સ્પોર્ટ્સ ઈન્ફ્રાસ્ટ્રક્ચર ડેવલપમેન્ટ દેશભરના એથ્લેટ્સને ભારતની હાઈ-પર્ફોર્મન્સ સ્પોર્ટ્સ ઇકોસિસ્ટમને મજબૂત કરવા અને રાષ્ટ્રના લાંબા ગાળાના રમતગમતના લક્ષ્યોમાં અર્થપૂર્ણ યોગદાન આપવા માટે પ્રેરણા આપવી જોઈએ.

SM/IJ/GP/JD

(રીલીઝ આઈડી: 2222770) મુલાકાતી સંખ્યા : 21